Seken leta i go long Korin

11 Mi wantem se yufala i no kros long mi, nating sipos samting we mi mekem i krangke. !Be mi luk se yufala i no kros long mi! 2 Mi stap luk yufala olsem wan yang gel we i klin, i no save man yet, mo we mi mi stretem bisnes blong mared blong hem finis. Man we mi mi promes se bambae yufala i mared long hem, hemia Kraes. From samting ya, mi mi jalus from yufala long wan jalus we i kamaot long God.*+ 3 Be mi mi fraet se tingting blong yufala bambae i kam nogud olsem Iv we snek i trikim hem nao i pulum hem.+ Ale bambae yufala i lego gudfala fasin ya we yufala i stap lavem Kraes mo we yufala i stap klin from hem.+ 4 Mi talem olsem from we yufala i glad nomo blong letem sam man oli kam prij long yufala, nao oli tokbaot wan defren Jisas long hemia we mifala i talemaot long yufala. Mo yufala i glad nomo blong kasem wan defren spirit long hemia we yufala i kasem finis.+ Mo yufala i glad nomo we oli talemaot wan defren gud nius long hemia we yufala i bilif long hem finis. 5 Ol aposol ya we yufala i stap talem se oli nambawan, be mi mi no luk nating se oli hae moa long mi.+ 6 Nating se mi mi no gat gudhan blong toktok,+ be mi gat save. Mo mifala i soemaot save ya long yufala long evri rod mo long evri samting we mifala i mekem.

7 Mi mi glad nomo taem mi stap talemaot gud nius blong God long yufala, mo mi no mekem yufala i pem mi from. Mi nomo mi mekem mi mi stap daon blong leftemap yufala. ?Olsem wanem? ?Yufala i ting se mi mi mekem sin?+ 8 Ol narafala kongregesen oli stap givim samting blong givhan long mi, mo hemia i olsem we mi stap stilim olgeta, blong mi mekem minista wok blong yufala.+ 9 Be taem mi stap wetem yufala, mo mi nidim sam samting, mi no kam wan baden long yufala, from we ol brata we oli kam long Masedonia oli givim olgeta samting we mi mi sot long hem.+ Mi mi talem tru long yufala se long evri rod, mi no kam wan baden long yufala, mo bambae mi gohed blong mekem olsem.+ 10 Stret olsem we trutok blong Kraes i stap long mi, bambae mi no stop blong tok flas from samting ya+ long olgeta ples long Akaea. 11 ?Be mi mi mekem samting ya from wanem? ?From we mi no lavem yufala? !Nogat! God i save we mi mi lavem yufala tumas.

12 I gat sam man we oli stap tok flas mo oli talem se oli aposol olsem mifala. Taswe bambae mi gohed nomo blong mekem samting we mi stap mekem,+ blong mi blokem olgeta blong oli no moa gat samting blong tok flas from. 13 Ol man ya oli ol giaman aposol, oli stap giaman long ol narafala, mo oli mekem olsem se oli aposol blong Kraes, be oli giaman nomo.+ 14 Be yumi no sapraes long samting ya, from we Setan tu i stap mekem olsem se hem i wan enjel blong laet.+ 15 Taswe yumi no sapraes sipos ol minista blong hem tu, oli stap mekem olsem se oli minista blong stret fasin. Be samting we bambae i hapen long olgeta long en, bambae i stret nomo long wok blong olgeta.+

16 Mi talem bakegen se: Ol man oli no mas ting se samting we mi mekem i krangke. Be sipos yufala i tingting olsem, yufala i letem mi mi stap krangke olsem, blong mi tu mi save tok flas smol. 17 Tok ya we mi talem, Masta i no save talem, be mi mi stap tok flas olsem wan krangke man nomo. 18 Plante man oli stap tok flas from ol samting blong wol ya, ale mi tu bambae mi tok flas. 19 Yufala i “waes tumas,” taswe yufala i letem ol krangke man oli gohed. 20 Tru, ol man ya oli mekem yufala i kam slef blong olgeta, oli kakae evri samting blong yufala, oli aotem olgeta samting we yufala i gat, oli stap leftemap olgeta long fes blong yufala, mo oli slavem yufala, be yufala i letem olgeta nomo.

21 Mifala i sem blong talemaot samting ya, from we maet sam long yufala bambae oli ting se mifala i no yusum gud paoa blong mifala.

Be sipos i gat sam man we oli no sem blong tok flas, ale mi tu bambae mi no sem blong tok flas, nating sipos ol man bambae oli luk mi se mi krangke nomo. 22 ?Olsem wanem? ?Olgeta oli Hibru? Mi tu mi olsem.+ ?Olgeta oli man Isrel? Mi tu mi olsem. ?Olgeta oli pikinini* blong Ebraham? Mi tu mi olsem.+ 23 ?Olgeta oli ol minista blong Kraes? Ating mi mi tok olsem krangke man, be mi mi gudfala man blong wok blong Kraes i bitim ol man ya: Mi mi mekem plante moa wok+ i bitim olgeta. Mi mi go kalabus plante taem+ moa i bitim olgeta. Ol man oli wipim mi plante taem moa i bitim olgeta, mo plante taem, klosap mi mi ded.+ 24 Long faef defren taem, ol man Jiu oli wipim mi. Be long ol taem ya wanwan, oli givim 39 wip* long mi.+ 25 Tri taem, ol man oli wipim mi long wud,+ wan taem oli stonem mi,+ tri taem sip we mi stap long hem, i rek,+ mo long wan fulnaet mo wan fuldei, mi stap aotsaed long medel solwota. 26 Oltaem mi mi stap wokbaot i go long ol defdefren ples, mo klosap mi lusum laef blong mi long ol reva we oli ron bigwan, mo long ol man blong stil, mo long ol man ples blong mi,+ mo long ol man blong ol narafala nesen tu.+ Klosap mi lusum laef blong mi long ol taon,+ mo long bus, mo long medel solwota. Mo klosap mi lusum laef blong mi long han blong olgeta we oli talem se oli brata blong mi, be oli giaman nomo. 27 Mi mi wok had mo mi taetem bun blong mi. Plante taem mi no slip long naet,+ mi hanggri mo mi tosta.+ Plante taem mi no gat kakae,+ mo mi no gat klos,* mo mi no gat ples blong stap long hem.

28 Be i no ol samting ya nomo, evri dei mi mi wari tu from ol kongregesen.+ 29 Mi mi harem nogud taem wan man i slak, mo mi kros taem wan man i mekem narafala i stambol.

30 Sipos mi mas tok flas, bambae mi tok flas from ol samting we oli soemaot se mi mi no strong. 31 God ya we i Papa blong Masta Jisas, mo we yumi mas presem hem blong olwe, hem i save se mi mi no giaman. 32 Long Damaskes hed gavman we i stap aninit long king Aretas, hem i putum ol soldia oli gad long taon ya, blong oli holem mi. 33 Be ol brata oli putum mi long wan bigfala basket,* nao oli pusum mi mi gotru long wan windo long bigfala stonwol ya, mo oli slakem mi mi godaon,+ nao mi ronwe.