Gospel blong Luk

3 Long namba 15 yia blong rul blong Taebirias Sisa, Ponjes Paelat i hed gavman long Judia, mo Herod*+ i distrik rula blong Galili, mo brata blong hem Filip i distrik rula long Ituria mo Trakonaetas, mo Lisanias i distrik rula long Abilin, 2 mo Anas mo Kaeafas tufala i jif pris.+ Long taem ya, Jon,+ boe blong Sekaraea, i stap long draeples mo hem i kasem tok blong God.+

3 Nao hem i go long olgeta ples raonabaot long Jodan Reva, i stap prij se ol man oli mas baptaes blong soem se oli tanem tingting blong olgeta, nao God i save fogivim sin blong olgeta,+ 4 olsem we tok long buk blong profet ya Aesea i talem, i se: “Wan man i stap singaot bigwan long draeples, i se: ‘!Yufala i mekemrere rod blong Jehova!* Mo ol rod blong hem, yufala i mekem oli stret.+ 5 Yufala i mas berem evri vali, mo yufala i mas levelem evri bigfala hil mo ol smol hil, mo yufala i mas stretem ol rod we oli kruked, mo yufala i mekem ol rod we oli raf oli kam smut. 6 Mo olgeta man evriwan* bambae oli luk rod we God i mekem blong sevem man.’”+

7 Nao hem i talem long ol man we oli stap kam blong hem i baptaesem olgeta, se: “Ol pikinini blong posen snek, ?hu i talem long yufala se yufala i save ronwe long dei blong kros blong God we i stap kam?+ 8 I moa gud yufala i mekem ol samting we oli soemaot se yufala i tanem tingting blong yufala finis. Mo i nogud yufala i stap tingting se: ‘Mifala ya, Ebraham i papa blong mifala.’ Mi mi talem long yufala se God i save mekem ol ston ya oli kam pikinini blong Ebraham. 9 Akis i stap rere finis blong katemdaon ol tri long rus blong olgeta. Tri we i no karem gudfala frut, bambae oli katemaot mo oli sakem i go long faea.”+

10 Nao ol man ya oli askem long hem se: “?Ale bambae mifala i mekem wanem?” 11 Nao hem i ansa se: “Man we i gat wan narafala klos,* i gud hem i givim wan long man we i no gat klos. Mo man we i gat kakae, i gud hem i mekem sem mak.”+ 12 Ol man blong tekem takis tu oli kam blong baptaes,+ mo oli askem long hem se: “?Tija, mifala i mas mekem wanem?” 13 Hem i ansa se: “Taem yufala i go tekem mane blong takis, yufala i no mas tekem i bitim wanem we loa i talem.”+ 14 Mo ol soldia tu oli askem long hem se: “?Mifala i mas mekem wanem?” Hem i ansa se: “Yufala i no mas mekem i strong long ol man* o talem giaman poen agens long ol man.+ Be yufala i mas glad nomo long samting* we yufala i kasem.”

15 Long taem ya, ol man oli stap wet blong luk Kraes, nao long tingting blong olgeta, oli tingbaot Jon se: “?Ating hem nao i Kraes?”+ 16 Be Jon i talemaot ansa long olgeta se: “Mi mi baptaesem yufala long wota, be man we i hae moa long mi, hem i stap kam, mo mi mi no stret blong tekemaot rop blong sandel blong hem.+ Hem bambae i baptaesem yufala long tabu spirit mo long faea.+ 17 Naoia savel blong sakemaot doti blong wit i stap long han blong hem, blong hem i klinim gud ples blong klinim wit, mo blong hivimap ol wit insaed long stohaos blong hem. Be ol skin blong wit, bambae hem i bonem long faea we i no save ded samtaem.”

18 Mo tu, hem i talem plante advaes blong leftemap tingting blong ol man, mo i gohed blong talemaot gud nius long olgeta. 19 Be Jon i tok long Herod we i distrik rula, from we hem i bin tekem Herodias, waef blong brata blong hem, mo from plante narafala samting nogud we Herod i bin mekem. 20 Mo Herod i mekem wan narafala samting we i nogud moa: Hem i putum Jon long kalabus.+

21 Taem ol man ya oli stap baptaes, Jisas tu i baptaes.+ Mo taem hem i stap prea, heven i open,+ 22 mo tabu spirit i kamdaon long hem olsem wan sotleg, mo wan voes i kamaot long heven, i talem se: “Yu yu pikinini blong mi. Mi mi lavem yu tumas, mo mi glad long yu.”+