Seken Buk Blong Kronikel

33 Manase+ i gat 12 yia taem hem i kam king, mo hem i rul 55 yia long Jerusalem.+

2 Manase i mekem samting we i nogud long ae blong Jehova, mo i stap folem ol nogud samting we ol nesen oli bin mekem, hemia ol nesen we Jehova i bin ronemaot olgeta long fored blong ol man Isrel.+ 3 Mo hem i wokem bakegen ol hae ples blong wosip we papa blong hem Hesekia i bin brekemdaon,+ mo i wokem ol olta blong ol god ya Bal mo ol tabu pos,* mo i bodaon long olgeta ami blong heven, mo i wosipim olgeta.+ 4 Mo tu, hem i wokem ol olta insaed long haos blong Jehova,+ hemia ples ya we Jehova i bin talem se: “Bambae nem blong mi i stap olwe long Jerusalem.”+ 5 Mo insaed long tufala yad blong haos blong Jehova, hem i wokem ol olta blong olgeta ami blong heven.+ 6 Mo tu, hem i mekem ol prapa boe blong hem oli pastru long faea+ long Vali Blong Boe Blong Hinom.+ Mo hem i mekem majik,+ i lukaotem ol samting we oli haed, mo i mekem wok blong kleva, mo hem i putumap ol man we oli stap toktok wetem ol dedman mo ol man we oli stap talemaot fiuja.+ Hem i mekem ol samting we oli nogud long ae blong Jehova we i bitim mak olgeta, blong mekem hem i kros.

7 Hem i putum pija we hem i katem, insaed long haos ya blong tru God+ we God i bin talem long Deved mo long boe blong hem Solomon, se: “Long olgeta traeb long Isrel, mi mi jusumaot haos ya mo Jerusalem, blong mi putum nem blong mi i stap oltaem long hem.+ 8 Mo sipos ol man Isrel oli obeigud long olgeta samting we mi mi talemaot long olgeta, hemia ful Loa, wetem ol rul mo ol desisen we mi givim long yufala tru long Moses, bambae mi neva tekemaot leg blong ol man Isrel long kantri ya we mi givim long ol olfala blong olgeta.” 9 Manase i gohed blong lidim Juda mo ol man Jerusalem oli gowe long stret rod, nao oli mekem i moa nogud i bitim ol nesen ya we Jehova i bin kilim olgeta oli ded long fored blong ol man Isrel.+

10 Jehova i gohed blong toktok long Manase wetem ol man blong hem, be olgeta oli no wantem lesin.+ 11 Nao Jehova i mekem ol lida blong ami blong king blong Asiria oli kam faet agensem olgeta, nao oli holemtaet Manase wetem ol huk,* oli fasem hem long ol hankaf we oli wokem long kopa, mo oli tekem hem i go long Babilon. 12 Nao long taem we hem i harem nogud, hem i plis long God blong hem Jehova* blong i sore long hem. Mo hem i gohed blong mekem tingting blong hem i godaon bigwan long fored blong God blong ol olfala blong hem. 13 Hem i gohed blong prea long God, mo prea blong hem i tajem God nao Hem i lesin long samting we Manase i askem, mo i putumbak hem long Jerusalem blong i rul.+ Biaen Manase i kasem save se Jehova nao i tru God.+

14 Afta long samting ya, hem i wokem wan stonwol aotsaed long Taon Blong Deved,+ hemia long wes blong Gihon,+ long krik,* mo i wokem i go kasem Get Blong Fis,+ mo i gohed raon kasem Ofel,+ mo i mekem i hae we i hae. Mo tu, hem i putumap ol lida blong ol ami long olgeta taon blong Juda we stonwol i goraon long olgeta. 15 Biaen hem i tekemaot ol god blong ol narafala kantri mo aedol we oli stap long haos blong Jehova,+ mo evri olta we hem i bin wokem antap long bigfala hil we haos blong Jehova i stap long hem+ mo long Jerusalem. Mo hem i mekem oli sakem ol samting ya aotsaed long taon. 16 Mo tu, hem i mekemrere olta blong Jehova,+ mo i stat blong bonem sakrefaes blong pis+ mo sakrefaes blong talem tangkiu+ antap long olta ya. Mo hem i talem long Juda blong i mekem wok blong Jehova we i God blong Isrel. 17 Nating se i olsem, ol man oli gohed yet blong mekem sakrefaes long ol hae ples, be oli mekem i go nomo long Jehova we i God blong olgeta.

18 Ol narafala stori blong Manase, wetem prea we hem i mekem i go long God blong hem, mo ol tok we ol man blong luk vison oli talem long hem long nem blong Jehova we i God blong Isrel, oli raetemdaon olgeta long buk blong histri blong ol king blong Isrel. 19 Mo tu, oli raetemdaon prea blong hem,+ mo olsem wanem God i ansa long samting we hem i askem, olgeta sin blong hem mo fasin blong hem blong no holemstrong long God,+ mo ol ples we hem i wokem ol hae ples blong wosip mo i stanemap ol tabu pos,*+ mo ol pija we hem i bin katem bifo we i mekem tingting blong hem i stap daon. Olgeta samting ya, oli raetemdaon wetem ol tok blong ol man blong hem we oli stap luk vison. 20 Biaen Manase i go spel wetem ol olfala blong hem, mo oli berem hem long haos blong hem. Mo boe blong hem Amon i kam king long ples blong hem.+

21 Amon+ i gat 22 yia taem hem i kam king, mo hem i rul tu yia long Jerusalem.+ 22 Mo Amon i gohed blong mekem samting we i nogud long ae blong Jehova, stret olsem we papa blong hem Manase i bin mekem.+ Mo hem i mekem sakrefaes i go long olgeta pija we papa blong hem Manase i bin katem,+ mo i gohed blong wosipim olgeta. 23 Be hem i no mekem tingting blong hem i stap daon long fored blong Jehova+ olsem we papa blong hem Manase i bin mekem.+ Be hem i gohed blong mekem fol blong hem i kam bigwan moa. 24 Biaen, ol man blong wok blong hem oli mekem rabis plan agensem hem,+ nao oli kilim hem i ded long prapa haos blong hem. 25 Be ol man blong kantri ya oli kilim i ded evri man we oli mekem plan agensem King Amon,+ mo oli mekem boe blong hem Josaea+ i kam king long ples blong hem.