Esra

9 Stret afta we mifala i mekem ol samting ya, ol prins oli kam luk mi, mo oli talem se: “Ol man Isrel, ol pris, mo ol Livaet, oli no stap longwe long ol man blong ol kantri raonabaot, mo long ol rabis fasin blong olgeta,+ hemia blong ol man Kenan, ol laen blong Het, ol man Perij, ol man Jebus, ol man Amon, ol man Moab, ol man Ijip,+ mo ol laen blong Amoro.+ 2 Olgeta oli tekem sam long ol gel blong ol man ya, blong oli kam ol waef blong olgeta mo waef blong ol boe blong olgeta.+ Mo naoia olgeta ya, hemia ol tabu pikinini ya,*+ oli stap joen wetem ol man blong ol narafala kantri.+ Ol prins mo ol deputi rula nao oli faswan blong mekem rabis fasin ya mo blong no holemstrong long God.”

3 Nao stret long taem we mi harem samting ya, mi terem klos blong mi wetem kot ya we mi werem we i no gat han blong hem. Mo mi pulumaot sam hea long hed blong mi mo mustas blong mi, mo mi sidaon from mi sek nogud long samting ya. 4 Nao olgeta we oli gat bigfala respek* long ol tok blong God blong Isrel, oli kam hivap raon long mi. Oli mekem olsem from we olgeta we oli bin stap long wan narafala kantri, oli no holemstrong long God. Mo mi mi sidaon i stap from we mi sek nogud long samting ya, mo mi stap olsem go kasem we oli bonem sid ofring long sapa.+

5 Nao long sapa, long taem blong bonem sid ofring,+ mi mi girap long ples we mi stap harem nogud mo sidaon long hem. Mi stanap wetem klos blong mi mo kot ya we i no gat han blong hem we mi bin terem, nao mi nildaon mo mi stretem han blong mi i go long Jehova we i God blong mi. 6 Mo mi talem se: “O God blong mi. Mi mi harem se mi sem mo mi no stret, taswe mi no save lukluk i kam long yu. O God blong mi, ol rong blong mifala oli kam plante tumas, mo ol mastik blong mifala oli hivap i go kasem heven.+ 7 Stat long taem blong ol olfala blong mifala i kam kasem tede, fol blong mifala i kam bigwan tumas.+ Mo from ol mastik blong mifala, mifala wetem ol king blong mifala, mo ol pris blong mifala, mifala i bin go long han blong ol king blong ol narafala kantri, mo mifala i safa long naef blong faet,+ mo oli holemtaet mifala,+ oli stilim olting blong mifala,+ mo mifala i sem, olsem we i hapen tede.+ 8 Be blong smol taem, Jehova we i God blong mifala i soemaot se i glad long mifala, taem i letem smol haf blong mifala we i laef yet i go fri, mo i givim long mifala wan ples we i sefgud long holi ples,+ blong mekem se ae blong mifala i saen, O God blong mifala, mo blong mekem se mifala i gat smol paoa bakegen long taem ya we mifala i stap slef yet. 9 Nating se mifala i slef,+ be God blong mifala i no lego mifala blong mifala i stap slef nomo. Hem i soemaot se hem i lavem mifala oltaem long fored blong ol king blong Pesia,+ blong mekem se mifala i gat paoa bakegen nao mifala i save wokem bakegen haos blong God blong mifala,+ mo riperem haos ya we oli bin spolem, mo blong givim long mifala, wan stonwol* long Juda mo Jerusalem.

10 “O God blong mifala, ?bambae mifala i talem wanem afta long ol samting ya we i hapen? Mifala i bin lego ol komanmen blong yu, 11 we yu givim long mifala tru long ol man blong wok blong yu, ol profet, we oli se: ‘Kantri ya we bambae yufala i tekem i blong yufala, i wan kantri we i no klin, from we ol man long kantri ya oli no klin, mo from ol nogud samting we oli stap mekem, nao en blong kantri ya i go kasem nara en blong hem i fulap long ol doti fasin blong olgeta.+ 12 Taswe, yufala i no mas givim ol gel blong yufala long ol boe blong olgeta, mo yufala i no mas tekem ol gel blong olgeta blong oli stap wetem ol boe blong yufala.+ Mo yufala i no mas givhan long olgeta blong oli gat pis mo oli kam rij,+ olsem nao bambae yufala i kam strong, yufala i kakae ol gudfala samting blong kantri ya, mo yufala i tekem kantri ya i blong ol boe blong yufala blong olwe.’ 13 Olgeta samting ya oli kasem mifala, from ol nogud fasin blong mifala mo bigfala mastik blong mifala, be yu, O God blong mifala, yu no panisim mifala folem ol mastik blong mifala,+ mo yu letem mifala we i stap long ples ya i go fri.+ Be afta we olgeta samting ya oli kasem mifala, 14 i no stret blong mifala i brekem ol komanmen blong yu bakegen, mo mekem ol agrimen blong mared wetem ol man we oli stap mekem ol nogud samting ya.+ Sipos mifala i mekem olsem, bambae yu yu kros bitim mak long mifala mo yu spolemgud mifala, nao bambae i no moa gat wan smol haf blong mifala i laef yet i stap, o sam man oli laef i stap. 15 O Jehova, God blong Isrel, yu yu gat stret fasin,+ taswe smol haf blong mifala i laef kam kasem tede. Naoia mifala i stap long fored blong yu wetem fol blong mifala, be fol ya i mekem se i had blong mifala i stanap long fored blong yu.”+