Jeremaea

24 Biaen Jehova i soem tu basket blong ol fig long mi we tufala i stap long fored blong tempol blong Jehova, hemia afta we King Nebukadnesa* blong Babilon i tekem Jekonia*+ boe blong Jehoeakim,+ king blong Juda, i go stap long wan narafala kantri. Hem wetem ol prins blong Juda, mo ol man we oli gat gudhan blong wokem ol defdefren samting, mo ol man blong wokem samting long aean.* Hem i tekem olgeta long Jerusalem i go long Babilon.+ 2 Wan basket i gat ol gudfala fig insaed, oli olsem ol fasfrut blong fig, be narafala basket i gat ol rabis fig, oli nogud olgeta we man i no moa save kakae.

3 Ale Jehova i askem long mi se: “?Jeremaea, yu luk wanem?” Nao mi talem se: “Ol fig, ol gudfala fig oli gud we oli gud, be ol rabis wan, oli nogud we oli nogud, oli nogud olgeta we man i no moa save kakae.”+

4 Biaen tok blong Jehova i kamtru long mi, i se: 5 “Hemia samting we Jehova God blong Isrel i talem i se: ‘Olsem ol gudfala fig ya, long sem fasin, bambae mi gat gudfala tingting long olgeta ya we oli aot long Juda oli go long narafala kantri, hemia olgeta we mi sanemaot olgeta long ples ya i go long kantri blong ol man Koldia. 6 Oltaem bambae ae blong mi i stap long olgeta blong mi mekem i gud long olgeta, mo bambae mi mekem olgeta oli kambak long kantri ya.+ Bambae mi bildimap olgeta mo bambae mi no brekemdaon, bambae mi planem olgeta, mo bambae mi no rutumaot.+ 7 Mo bambae mi givim wan hat long olgeta blong oli save mi, se mi mi Jehova.+ Bambae oli kam ol man blong mi, mo mi bambae mi kam God blong olgeta,+ from we bambae oli kambak long mi wetem fulhat blong olgeta.+

8 “‘Be long saed blong ol rabis fig ya we oli nogud olgeta we man i no moa save kakae,+ hemia samting we Jehova i talem: “Bambae mi luk King Jedekia+ blong Juda, ol prins blong hem, mo smol haf blong ol man Jerusalem we oli stap yet long kantri ya, mo olgeta we oli stap long kantri ya Ijip,+ olsem ol rabis fig ya. 9 Bambae mi mekem olgeta oli kam olsem wan samting we olgeta kingdom blong wol oli fraet long hem,+ mo olsem wan bigfala trabol, mo olsem wan rabis tok, wan proveb,* wan samting blong man i laf long hem, mo wan samting blong singaot trabol,+ long olgeta ples we mi ronem olgeta oli go wanwan long hem.+ 10 Mo bambae mi sanem wan naef blong faet i go agensem olgeta,+ mo hadtaem blong kasem kakae, mo strong sik,+ gogo kasem we oli lus evriwan long kantri ya we mi bin givim long olgeta mo ol olfala blong olgeta.”’”