Esikel

40 Nao long namba 25 yia we mifala i stap long kantri blong ol enemi blong mifala,+ long stat blong yia ya, long namba 10 dei blong manis, hemia long namba 14 yia afta we taon blong Jerusalem i foldaon,+ stret long dei ya, han blong Jehova i kam long mi, mo i tekem mi mi go long taon ya.+ 2 Nao tru long ol vison we oli kam long God, hem i tekem mi mi go long kantri blong Isrel, mo i putum mi antap long wan bigfala hil we i hae we i hae,+ mo long ples ya, long saed i go long saot, i gat wan bilding i stap, we i olsem wan taon.

3 Taem hem i tekem mi mi go long ples ya, mi luk wan man we i saen olsem kopa.+ Mo long han blong hem i gat wan linen rop mo wan waelken* blong mesarem samting,+ mo hem i stap stanap long rod we i go long get. 4 Nao man ya i talem long mi se: “Pikinini blong man, yu lukluk gud, yu lesin gud, mo yu tingting gud* long olgeta samting we bambae mi soem long yu, from hemia nao risen we oli tekem yu yu kam long ples ya. Yu mas talemaot long haos blong Isrel evri samting ya we yu luk.”+

5 Mi mi luk wan stonwol we i raonem aotsaed blong tempol.* Mo long han blong man ya, i gat wan waelken blong mesarem samting, we longfala blong hem i sikis kiubit* (long wan kiubit, oli ademap saes blong wan han).* Nao hem i stat blong mesarem stonwol ya, mo stonwol ya i tik olsem saes blong wan waelken mo hae blong hem i saes blong wan waelken.

6 Biaen, hem i go long haos get we i lukluk i go long is,+ mo i klaem long ol step blong hem. Mo taem hem i mesarem spes klosap long doa blong haos get, bigfala blong hem i saes blong wan waelken, mo bigfala blong narafala spes tu i saes blong wan waelken. 7 Mo evri rum blong ol gad, longfala blong olgeta i saes blong wan waelken mo bigfala blong olgeta i saes blong wan waelken, mo i gat faef kiubit bitwin ol rum blong ol gad ya.+ Long haos get ya, insaed olgeta i gat wan spes klosap long rum long doa, mo saes blong hem i wan waelken.

8 Hem i mesarem rum long doa blong haos get we i stap insaed olgeta, mo saes blong hem i wan waelken. 9 Biaen, hem i mesarem rum long doa blong haos get mo hem i eit kiubit, mo hem i mesarem ol bigfala pos long saed blong rum ya, mo oli tu kiubit. Rum ya long doa blong haos get i stap insaed olgeta.

10 I gat tri rum blong ol gad long tufala saed blong is haos get. Trifala rum ya oli sem saes nomo, mo ol bigfala pos we oli stap long saed blong olgeta oli sem saes.

11 Biaen hem i mesarem entrens blong haos get mo bigfala blong hem i 10 kiubit mo longfala blong haos get ya i 13 kiubit.

12 Long fored blong ol rum blong ol gad we oli stap long tugeta saed, i gat ol wol we hae blong olgeta i wan kiubit. Evri rum blong ol gad we oli stap long tugeta saed, oli sikis kiubit.

13 Biaen hem i mesarem haos get ya, i stat long ruf blong wan rum blong ol gad* i go kasem ruf blong narafala rum, mo bigfala blong hem i 25 kiubit. Entrens blong wan rum i stap long fored blong entrens blong narafala rum.+ 14 Biaen hem i mesarem ol bigfala pos we oli stap long saed, mo hae blong olgeta i 60 kiubit, mo hem i mesarem tu ol bigfala pos we oli stap insaed long ol haos get, raon long yad. 15 Mo stat long fored blong entrens blong haos get i go kasem fored blong rum ya long doa we i stap insaed olgeta, hem i 50 kiubit.

16 Insaed long haos get ya, long ol saed saed blong hem, i gat ol windo we aotsaed i smol mo insaed i bigwan+ we i stap long ol rum blong ol gad mo long ol bigfala pos long saed. Mo insaed long rum long doa tu i gat ol windo long tugeta saed, mo i gat ol pija blong pamtri+ long ol bigfala pos ya we oli stap long saed.

17 Biaen hem i tekem mi mi go long yad aotsaed, mo mi luk ol rum blong kakae,*+ mo raon long yad ya i gat ston floa. I gat 30 rum blong kakae long ston floa ya. 18 Saes blong ston floa we i stap long saed blong ol haos get, i sem mak long longfala blong ol haos get ya, hemia ston floa we i stap daon.

19 Biaen hem mesarem saes* blong yad ya, stat long fored blong haos get we i stap daon, i go kasem stat blong yad insaed. Mo saes blong hem i 100 kiubit long saed i go long is mo long not.

20 Long yad aotsaed, i gat wan haos get we i lukluk i go long not, mo hem i mesarem longfala mo bigfala blong haos get ya. 21 I gat tri rum blong ol gad long tugeta saed. Ol bigfala pos blong hem we oli stap long saed mo rum we i stap long doa, oli sem saes long olgeta we oli stap long faswan haos get. Longfala blong haos get ya i 50 kiubit mo bigfala blong hem i 25 kiubit. 22 Ol windo blong hem, wetem rum long doa, mo ol pija blong pamtri,+ oli sem saes long olgeta we oli stap long is haos get. Mo ol man oli save klaem long seven step blong kasem, mo rum long doa i stap long fored blong olgeta.

23 Long yad insaed, i gat wan haos get we i stap long fored blong not haos get, mo wan haos get long fored blong is haos get. Nao man ya i mesarem wan haos get i go kasem narafala haos get, mo saes blong hem i 100 kiubit.

24 Biaen hem i tekem mi mi go long saed i go long saot, mo long ples ya mi luk wan haos get.+ Hem i mesarem ol bigfala pos we oli stap long saed blong haos get ya, mo rum long doa, mo saes blong olgeta i sem mak long saes blong ol narawan. 25 I gat ol windo long tugeta saed blong hem mo long rum long doa, olsem ol narafala windo. Longfala blong haos get ya i 50 kiubit, mo bigfala blong hem i 25 kiubit. 26 I gat seven step blong go antap long haos get ya,+ mo rum long doa i stap long fored blong olgeta. Mo i gat ol pija blong pamtri long ol bigfala pos blong hem we oli stap long saed, we long wanwan saed i gat wan pija.

27 Long yad insaed, i gat wan haos get we i lukluk i go long saot. Nao hem i mesarem stat blong haos get ya i go daon long saot, i go kasem narafala haos get, mo saes blong hem i 100 kiubit. 28 Biaen hem i tekem mi mi gotru long saot haos get blong go long yad insaed, mo taem hem i mesarem saot haos get ya, saes blong hem i sem mak long ol narafala haos get. 29 Ol rum blong ol gad, wetem ol bigfala pos long saed blong hem mo rum long doa, saes blong olgeta i sem mak long ol narawan. I gat ol windo long tugeta saed blong hem mo long rum long doa. Longfala blong haos get ya i 50 kiubit mo bigfala blong hem i 25 kiubit.+ 30 Raon long ples ya i gat ol rum long doa, we longfala blong olgeta i 25 kiubit mo bigfala blong olgeta i 5 kiubit. 31 Rum long doa blong haos get ya, i lukluk i go long yad aotsaed, mo i gat ol pija blong pamtri long ol bigfala pos we oli stap long saed blong hem,+ mo i gat eit step blong go antap long haos get ya.+

32 Taem hem i tekem mi mi kam long yad insaed long saed i go long is, hem i mesarem haos get ya mo saes blong hem i sem mak long ol narafala haos get. 33 Ol rum blong ol gad, wetem ol bigfala pos long saed blong hem, mo rum long doa, saes blong olgeta i sem mak long ol narawan, mo i gat ol windo long saed blong hem mo long rum long doa. Longfala blong haos get ya i 50 kiubit mo bigfala blong hem i 25 kiubit. 34 Rum blong hem long doa, i lukluk i go long yad aotsaed, mo ol bigfala pos we oli stap long tugeta saed blong haos get ya, i gat ol pija blong pamtri long olgeta, mo i gat eit step blong go antap long haos get ya.

35 Biaen hem i tekem mi mi go insaed long not haos get+ mo i mesarem haos get ya, mo saes blong hem i sem mak long ol narafala haos get. 36 Ol rum blong ol gad, wetem ol bigfala pos long saed blong hem mo rum long doa, saes blong olgeta i sem mak long ol narawan. I gat ol windo long tugeta saed blong hem. Longfala blong haos get ya i 50 kiubit mo bigfala blong hem i 25 kiubit. 37 Ol bigfala pos long saed blong hem oli lukluk i go long yad aotsaed. Ol bigfala pos ya oli stap long tugeta saed blong haos get ya, mo i gat ol pija blong pamtri long olgeta, mo i gat eit step blong go antap long haos get ya.

38 Klosap long ol bigfala pos we oli stap long saed blong ol haos get, i gat wan rum blong kakae mo entrens blong hem, hemia nao ples blong wasem ol ofring we oli bon fulwan.+

39 I gat tu tebol long wan saed blong rum long doa we i stap long haos get mo tu tebol long narasaed blong hem. Antap long ol tebol ya, oli stap kilim ol animol blong mekem ofring we i bon fulwan,+ ofring blong sin,+ mo ofring blong tekemaot fol.+ 40 Long rod blong go antap long not haos get, i gat tu tebol aotsaed long entrens. Mo tu i gat tu tebol long narasaed blong rum long doa blong haos get. 41 I gat eit tebol evriwan we oli stap kilim ol animol blong sakrefaes antap long olgeta, fo i stap long wan saed blong haos get ya, mo fo long narasaed. 42 Ol fo tebol we oli blong ofring we i bon fulwan, oli wokem long ol ston we oli katemgud. Ol tebol ya, longfala blong olgeta i wan mo haf kiubit, bigfala blong olgeta i wan mo haf kiubit, mo hae blong olgeta i wan kiubit. Mo antap long ol tebol ya, oli putum ol tul blong kilim ol animol blong ofring we i bon fulwan mo ol animol blong mekem sakrefaes. 43 Raon long wol we i stap insaed, oli putum ol self we bigfala blong olgeta i saes blong wan han. Mo ol mit blong ol ofring we oli givim olsem presen, oli putum antap long ol tebol.

44 Long haos get insaed, aotsaed long hem i gat ol rum blong kakae we oli blong ol man blong singsing.+ Ol rum ya oli stap long yad insaed, klosap long not haos get mo oli lukluk i go long saot. I gat wan narafala rum blong kakae we i stap klosap long is haos get mo hem i lukluk i go long not.

45 Hem i talem long mi se: “Rum ya blong kakae we i lukluk i go long saot, hem i blong ol pris we oli lukaot long ol wok long tempol.+ 46 Mo rum blong kakae we i lukluk i go long not, hem i blong ol pris we oli lukaot long ol wok long olta.+ Olgeta oli ol boe blong Jadok,+ oli kamaot long ol Livaet we oli putumap olgeta blong kam klosap long Jehova mo mekem minista wok blong hem.”+

47 Biaen, hem i mesarem yad insaed mo longfala blong hem i 100 kiubit, mo bigfala blong hem i 100 kiubit, fofala saed blong hem i skwea. Mo olta i stap long fored blong tempol.

48 Biaen hem i tekem mi mi go insaed long rum long doa blong tempol,+ mo i mesarem bigfala pos we i stap long saed blong rum long doa, mo saes blong hem i faef kiubit long wan saed, mo faef kiubit long narasaed. Mo bigfala blong entrens ya, hem i tri kiubit long wan saed, mo tri kiubit long narasaed.

49 Longfala blong rum ya long doa hem i 20 kiubit, mo bigfala blong hem i 11* kiubit. Ol man oli save klaem long ol step blong kasem rum ya. Mo i gat ol bigfala pos klosap long ol pos ya long saed, we wan bigfala pos i stap long wan saed mo narawan i stap narasaed.+