Fas leta i go long Korin

2 Taswe ol brata, taem mi kam luk yufala mo mi talemaot tabu tokhaed+ blong God long yufala, mi no yusum ol flas tok mo ol waestok.+ 2 Mi mi mekem desisen se taem mi stap wetem yufala, mi no wantem tokbaot ol narafala samting, be mi tokbaot Jisas Kraes nomo, mo ded blong hem long pos.+ 3 Mo mi no gat paoa, mi fraet we mi stap seksek taem mi kam long yufala. 4 Mo taem mi toktok mo mi prij long yufala, mi no yusum ol tok blong ol waes man blong pulum yufala, be ol tok blong mi oli soemaot spirit mo paoa blong God.+ 5 Olsem nao, bilif blong yufala i save stanap long paoa blong God, be i no long waes blong man.

6 Yumi tokbaot waes long olgeta we oli gat tingting blong bigman,+ be yumi no tokbaot waes blong sistem blong wol* ya, no waes blong ol man we oli rul long wol ya, we bambae oli lus i no longtaem.+ 7 Be yumi tokbaot waes blong God we i stap long wan tabu tokhaed,+ hemia waes blong God we i haed. Hem i jusumaot finis waes ya bifo we ol sistem blong wol* ya i stat, blong bambae yumi kasem glori. 8 Waes ya nao we i no gat wan rula blong sistem blong wol* ya i save,+ from we sipos oli save, bambae oli no kilim bigfala Masta blong yumi i ded long pos. 9 Be olsem we Baebol i talem: “Ol samting we God i rerem finis blong olgeta we oli lavem hem, oli no stap nating long hat blong ol man, mo ae blong olgeta i no luk, mo sora blong olgeta i no harem.”+ 10 God i yusum spirit blong hem+ blong soemaot ol samting ya long yumi,+ from we spirit ya i lukluk long evri ples blong faenemaot evri samting wetem ol save blong God tu we man i no save faenemaot.+

11 ?Hu i save tingting blong narafala man? Man ya nomo i save. Long sem fasin, i no gat man i save ol tingting blong God, be spirit blong hem nomo i save. 12 Yumi no kasem spirit blong wol, be yumi kasem spirit we i kamaot long God,+ nao yumi save ol samting we God i givim long yumi from we hem i kaen long yumi. 13 Yumi stap tokbaot ol samting ya tu, be yumi no yusum tok we yumi lanem long waes blong man.+ Yumi yusum ol tok we spirit i tijim yumi long hem,+ blong eksplenem* ol samting we oli blong God.

14 Be man we i gat tingting blong man nomo, hem i no akseptem* ol samting we oli kamaot long spirit blong God, from we hem i luk ol samting ya se oli krangke nomo. Mo bambae hem i neva save olgeta, from we man i mas gat spirit blong God blong hem i lukluk gud mo i kasem save long olgeta. 15 Be man we spirit blong God i lidim hem, hem i lukluk gud long evri samting,+ mo i no gat man i save jajem hem. 16 Baebol i talem se: “?Hu i save tingting blong Jehova* nao i save tijim hem?”+ Be yumi, yumi gat tingting blong Kraes.+