Esikel

22 Nao tok blong Jehova i kamtru bakegen long mi, i se: 2 “Mo yu pikinini blong man, ?yu yu rere blong talemaot jajmen long* taon ya we i gat fol from i mekem blad i ron,+ mo blong mekem hem i save olgeta nogud samting we hem i stap mekem?+ 3 Yu mas talem se: ‘Hemia samting we Hae Masta Jehova i talem: “O taon we i mekem blad i ron+ insaed long hem wan, mo we taem blong hem i stap kam,+ mo i stap wokem ol aedol we oli nogud we oli nogud* blong mekem hem i kam doti,+ 4 ol blad we yu yu mekem i ron, oli mekem yu yu gat fol,+ mo ol aedol ya blong yu we oli nogud we oli nogud, oli mekem yu yu no moa klin.+ Yu yu mekem se en blong ol dei blong yu i kam hariap, mo en blong ol yia blong yu oli kam finis. From samting ya, bambae mi yusum yu olsem wan samting blong ol nesen oli tok nogud long hem, mo olsem wan samting blong olgeta kantri oli laf long hem.+ 5 Ol kantri we oli stap klosap long yu mo olgeta we oli stap longwe bambae oli jikim yu,+ yu we nem blong yu i no klin mo yu fulap long trabol. 6 !Yu luk! Evri jif blong Isrel we oli stap long medel blong yu, oli stap yusum paoa blong olgeta blong mekem blad i ron.+ 7 Insaed long yu, olgeta oli stap mekem i nogud long papa mo mama blong olgeta from we oli ting nating long tufala.+ Oli trikim ol man blong narafala kantri blong tekem olting blong olgeta, mo oli mekem i nogud long pikinini we papa blong hem i ded* mo long wido.”’”+

8 “‘Yu yu stap lukluk nogud long ol holi ples blong mi, mo yu mekem ol sabat blong mi oli no moa tabu.+ 9 Insaed long yu, i gat ol man we oli stap spolem nem blong narafala man from we oli wantem mekem blad i ron.+ Insaed long yu, olgeta oli stap kakae ol sakrefaes we oli mekem antap long ol bigfala hil, mo oli stap mekem ol doti fasin long medel blong yu.+ 10 Insaed long yu, olgeta oli no ona long bed blong papa blong olgeta,*+ mo oli repem wan woman we i no klin from we i gat sikmun.+ 11 Insaed long yu, wan man i mekem i nogud long waef blong neba blong hem,+ mo wan nara man i mekem waef blong boe blong hem i kam doti long ol doti fasin blong hem,+ mo wan narafala i repem sista blong hem, we i gel blong papa blong hem.+ 12 Insaed long yu, olgeta oli letem ol narafala oli pem olgeta blong mekem blad i ron.+ Yu yu letem man i kaon blong i pem intres+ o blong yu kasem mane,* mo yu tekem mane long ol neba blong yu long fasin we i no stret.+ Yes, yu yu fogetem mi fulwan finis,’ hemia nao samting we Hae Masta Jehova i talem.

13 “‘!Yu luk! Mi mi klapem han blong mi from we mi no laekem nating fasin ya blong yu we yu stap giaman blong kasem samting, mo from we yu stap mekem blad i ron long medel blong yu. 14 ?Olsem wanem? ?Bambae yu yu gohed blong gat strong tingting mo mekem han blong yu i strong long dei ya we bambae mi tekem aksen agensem yu?+ Mi Jehova, mi nao mi talem samting ya, mo bambae mi tekem aksen. 15 Mi bambae mi ronemaot yu yu go wanwan olbaot long medel blong ol nesen mo wanwan olbaot long ol kantri,+ mo bambae mi stopem ol fasin blong yu we oli no klin.+ 16 Nao long fored blong ol nesen, bambae oli no moa ona long yu, mo bambae yu yu mas save se mi mi Jehova.’”+

17 Nao tok blong Jehova i kamtru bakegen long mi, i se: 18 “Pikinini blong man, long lukluk blong mi, haos blong Isrel i kam olsem makas nomo. Olgeta evriwan oli ol kopa, ol tin, ol aean, mo ol led we oli stap insaed long oven we i hot we i hot. Oli kam makas blong silva.+

19 “Taswe, hemia samting we Hae Masta Jehova i talem: ‘From we yufala evriwan i kam olsem ol makas we oli gud blong nating nomo,+ mi mi tekem yufala i kam wanples insaed long Jerusalem. 20 Olsem we man i hivimap silva, kopa, aean, led, mo tin insaed long oven we i hot we i hot, mo i blo long faea blong mekem oli ronaot, mi bambae mi kros long yufala nao mi tekem yufala i kam wanples mo mi blo long yufala mo mi mekem yufala i ronaot.+ 21 Mi bambae mi tekem yufala i kam wanples mo bambae mi blo long faea blong kros blong mi i kam long yufala,+ nao bambae yufala i ronaot insaed long taon.+ 22 Olsem we silva i ronaot insaed long oven we i hot we i hot, bambae yufala i ronaot insaed long taon. Nao bambae yufala i mas save se mi Jehova, mi nao mi kafsaedem bigfala kros blong mi long yufala.’”

23 Nao tok blong Jehova i kamtru bakegen long mi, i se: 24 “Pikinini blong man, yu talem long hem se: ‘Yu yu wan kantri we bambae i no kam klin, o ren bambae i no foldaon long yu long dei blong kros blong mi. 25 Ol profet blong hem oli mekem ol rabis plan insaed long hem,+ olsem wan laeon we i stap singaot bigwan mo i stap terem kakae blong hem.+ Olgeta oli stap kakae ol man.* Oli stap holemtaet ol samting we oli sas mo ol gudgudfala samting. Mo oli mekem se plante woman insaed long hem oli kam wido. 26 Ol pris blong hem oli brekem loa blong mi,+ mo oli gohed blong mekem ol holi ples blong mi, oli no moa tabu.+ Mo oli no mekem se ol samting we oli tabu oli stap defren long ol samting we oli no tabu,+ mo oli no tijim ol man blong oli save samting we i no klin mo samting we i klin,+ mo oli no wantem holemtaet ol sabat blong mi, mo oli mekem se mi mi no moa tabu long medel blong olgeta. 27 Ol prins we oli stap insaed long hem, oli olsem ol wulf we oli stap terem kakae blong olgeta. Olgeta oli stap mekem blad i ron mo oli kilim ol man* blong kasem samting long rod we i no stret.+ 28 Be ol profet blong hem oli stap yusum waetwas blong plastarem ol samting we oli mekem. Oli luk ol giaman vison mo oli talemaot ol samting we oli haed we oli giaman nomo,+ mo oli talem se: “Hemia samting we Hae Masta Jehova i talem,” be Jehova i no talemaot ol tok ya. 29 Ol man blong kantri ya oli stap ravem ol man mo oli stap stil,+ oli stap mekem i nogud long ol man we oli gat nid mo long ol puaman, mo oli stap ravem ol man blong narafala kantri, mo oli blokem olgeta blong oli no kasem jastis.’

30 “‘Mi mi stap lukaotem wan man long medel blong olgeta blong hem i riperem stonwol ya o blong i stanap long fored blong mi long bihaf blong kantri ya, i stanap long ples we stonwol i brok, nao bambae oli no spolem,+ be mi mi no faenem eni man. 31 From samting ya, bambae mi mi kafsaedem kros blong mi long olgeta, mo mi spolemgud olgeta long faea blong kros blong mi. Mo bambae mi mekem ol nogud frut blong ol fasin blong olgeta i gobak long hed blong olgeta,’ hemia nao samting we Hae Masta Jehova i talem.”