Jeremaea

33 Tok blong Jehova i kamtru long Jeremaea seken taem, taem oli holemtaet hem i stap yet long Yad Blong Ol Gad,+ i se: 2 “Hemia samting we Jehova Man We i Mekem wol, yes Jehova we i wokem wol mo i mekem i stap strong, mo Jehova i nem blong hem, i talem se: 3 ‘Yu singaot long mi, mo mi bambae mi ansa long yu, mo bambae mi rere nomo blong talemaot long yu ol bigfala samting mo ol samting we i had blong kasem save, we yu no save olgeta nating.’”+

4 “From hemia samting we Jehova God blong Isrel i talem long saed blong ol haos long taon ya, mo ol haos blong ol king blong Juda, we ol man oli bin brekemdaon olgeta from ol samting we oli stanemap raon long hem mo from naef blong faet,+ 5 mo long saed blong olgeta we oli stap kam blong faet agensem ol man Koldia, we oli stap mekem ol ples ya i fulap long ol dedbodi blong ol man we mi kilim olgeta from mi kros long olgeta mo from bigfala kros blong mi, yes hemia olgeta we ol rabis fasin blong olgeta oli mekem se mi haedem fes blong mi long taon ya. Hem i se: 6 ‘Naoia mi stap mekem hem i kam gud bakegen mo i gat gudfala helt,+ mo bambae mi hilim olgeta mo mi soemaot pis we i bigwan we i bigwan mo trutok long olgeta.+ 7 Mo bambae mi tekembak ol man Juda we oli stap kalabus, mo ol man Isrel we oli stap kalabus,+ mo bambae mi mekem olgeta oli kam strong olsem we mi bin mekem long stat.+ 8 Mo bambae mi mekem oli kam klin oli no moa gat fol from sin we oli mekem agensem mi,+ mo bambae mi fogivim olgeta fol we oli gat from sin blong olgeta mo ol rong we oli mekem agensem mi.+ 9 Mo nem blong taon ya bambae i mekem mi mi glad tumas, mo bambae i mekem ol man blong olgeta nesen long wol oli presem mi mo oli leftemap nem blong mi, taem oli harem ol gudfala samting we mi mekem long ol man long taon ya.+ Mo bambae oli fraet mo oli seksek+ from olgeta gudfala samting mo pis we bambae mi putum long taon ya.’”+

10 “Hemia samting we Jehova i talem, i se: ‘Kantri ya we bambae yufala i talem se hem i nogud finis, i no gat man mo animol long hem, hemia ol taon blong Juda mo ol rod blong Jerusalem, we oli stap nating nomo we i no gat man long olgeta mo i no gat man i laef long olgeta mo i no gat animol long olgeta, bambae ol man oli harem bakegen 11 noes blong ol man we oli stap glad, mo noes blong olgeta we oli stap harem gud,+ voes blong man we i rere blong mared mo voes blong woman we i rere blong mared, mo voes blong olgeta we oli stap talem se: “!Yufala i talem tangkiu long Jehova komanda blong ol ami, from we Jehova i gud,+ mo fasin blong hem blong lavem man oltaem i stap olwe!”’+

“Jehova i talem se: ‘Bambae oli tekem ol ofring blong talem tangkiu, i go insaed long haos blong Jehova,+ from bambae mi tekem ol man blong kantri ya we oli stap kalabus, oli kambak olsem long stat.’”

12 “Hemia samting we Jehova komanda blong ol ami i talem, i se: ‘Kantri ya we i nogud finis, we i no gat man mo animol long hem, mo long olgeta taon blong hem, bambae i gat gudfala gras bakegen we ol man blong lukaot long sipsip oli save tekem ol sipsip blong olgeta i go spel long hem.’+

13 “Mo Jehova i talem se: ‘Long olgeta taon long rijen blong ol hil, ol taon long levelples, ol taon blong saot, graon blong Benjamin, ol eria raonabaot long Jerusalem+ mo long ol taon blong Juda,+ bambae ol sipsip oli pas bakegen aninit long han blong man we i stap kaontem olgeta.’”

14 “Mo Jehova i talem se: ‘!Yu luk! I gat ol dei i stap kam we bambae mi mekem ol gudfala promes, we mi bin talem long saed blong haos blong Isrel mo haos blong Juda i kamtru.+ 15 Long ol dei ya mo long taem ya bambae mi mekem wan niufala gru we i blong Deved i kamaot, wan niufala gru* we fasin blong hem i stret,+ mo bambae hem i mekem se i gat jastis mo stret fasin long kantri ya.+ 16 Long ol dei ya bambae oli sevem Juda,+ mo Jerusalem bambae i stap we i sefgud.+ Mo bambae oli singaot taon ya olsem: Jehova i Stret Fasin Blong Yumi.’”+

17 “From we hemia samting we Jehova i talem: ‘Oltaem bambae i gat wan man long laen blong Deved, i sidaon long jea blong king long haos blong Isrel,+ 18 mo bambae i neva gat wan taem we ol pris long laen blong Livae oli stop blong stanap long fored blong mi blong givim ol ofring we oli bon fulwan, blong bonem ol sid ofring mo blong givim ol sakrefaes.’”

19 Mo tok blong Jehova i kamtru long Jeremaea bakegen se: 20 “Hemia samting we Jehova i talem, i se: ‘Sipos yufala i save brekem kontrak blong mi long saed blong dei, mo kontrak blong mi long saed blong naet, blong blokem dei mo naet blong tufala i no kamaot long prapa taem blong tufala,+ 21 ale long taem ya nao kontrak blong mi wetem Deved man blong wok blong mi, i save brok,+ blong mekem se i no mas gat wan boe blong hem i rul olsem king long tron* blong hem,+ mo sem mak long kontrak blong mi wetem ol pris long laen blong Livae, hemia ol minista blong mi.+ 22 Olsem we man i no naf blong kaontem ol ami blong heven mo i no save makem se i gat hamas sanbij long solwota, long sem fasin bambae mi mekem pikinini* blong Deved man blong wok blong mi, mo ol Livaet we oli stap mekem minista wok blong mi, oli kam plante we plante.’”

23 Mo tok blong Jehova i kamtru long Jeremaea bakegen se: 24 “?Yu yu no makem samting we ol man ya oli stap talem, oli se: ‘Jehova bambae i tanem baksaed long tufala famle we hem i jusum’? Mo oli tritim nogud ol prapa man blong mi, oli no respektem olgeta nating, mo oli no moa luk olgeta olsem wan nesen.

25 “Hemia samting we Jehova i talem, i se: ‘Stret olsem we mi stanemap kontrak blong mi long saed blong dei mo naet,+ mo ol loa* blong heven mo wol,+ 26 long sem fasin, bambae mi neva tanem baksaed long pikinini* blong Jekob mo long man blong wok blong mi Deved, olsem nao bambae i no gat wan samting i save blokem mi blong tekem ol man we oli kamaot biaen long pikinini* blong Deved, blong oli rul antap long laen* blong Ebraham, Aesak mo Jekob. From bambae mi tekembak ol man blong olgeta we oli stap kalabus,+ mo mi sore long olgeta.’”+