Japta 31

Oli Pulum Wit Long Sabat Dei

JISAS wetem ol disaepol blong hem oli aot long Jerusalem blong gobak long Galili. Hot taem i stap kam. Taswe taem oli pas long ol garen oli luk we kakae blong wit i stap. Ol disaepol oli hanggri. Ale oli pulum sam kakae blong wit, nao oli kakae. Be hemia wan Sabat dei. I gat sam man we oli stap luk olgeta, taem oli pulum kakae blong wit long Sabat dei.

I no longtaem, sam lida blong ol man Isrel long Jerusalem oli bin traem kilim Jisas i ded, from we oli talem se hem i stap brekem loa blong Sabat dei. Nao ol Farisi oli tok agens long ol disaepol blong hem, oli talem se: “Ei, yu luk. Ol man blong yu oli stap mekem fasin ya, be long Sabat dei, fasin ya i tabu, i brekem loa.”

Ol Farisi oli stap talem se taem ol disaepol oli pulum wit mo oli ravem long han blong olgeta blong tekemaot kakae blong hem, i olsem we oli stap mekem wan wok long Sabat dei. Ol strong rul blong olgeta oli mekem loa blong Sabat dei i wan bigfala baden long ol man. Be taem God i givim loa blong Sabat dei, hem i wantem we dei ya i wan hapi dei, we i leftemap olgeta long saed blong speret. Taswe naoia Jisas i yusum sam eksampel long Baebol blong soemaot se Jeova God i neva wantem we loa blong Sabat dei i strong bitim mak olsem oli stap talem.

Ale Jisas i storeyan long saed blong Deved wetem ol man blong hem long taem bifo. Oli hanggri, nao oli go insaed long haos blong God, oli tekem bred we ol pris oli givim i go long God finis, nao oli kakae. Bred ya, oli givim i go long Jeova finis, afta, oli jenisim olgeta wetem sam nyufala bred we oli jes kukum nomo. Loa i talem se ol pris nomo oli gat raet blong kakae bred ya. Be from we Deved wetem ol man blong hem oli hanggri, oli kakae bred ya, mo oli no kasem panis from.

Nao Jisas i givim wan narafala eksampel long olgeta, i se: “?Ating yufala i no ridim tu long Loa blong Moses, we oltaem, long Sabat dei, ol pris long haos blong God oli stap brekem loa blong Sabat dei, be God i no tingbaot samting ya?” Yes, long Sabat dei, ol pris oli gohed blong katem mit mo mekem ol narafala wok we oli mas mekem long haos blong God blong mekemrere ol anamol blong sakrafaes. Nao Jisas i gohed i se: “Mi mi talem long yufala, i gat wan i stap long ples ya we i hae moa long haos blong God.”

Nao hem i givim sam advaes long ol Farisi i se: “?Ating yufala i no save mining blong tok ya blong Baebol, we God i talem se ‘Mi mi no wantem we man i stap kilim anamol blong mekem wosip, mi mi wantem we man i gat sore long man.’? Sipos yufala i save, bambae yufala i no save jajem olgeta ya we oli no gat poen blong olgeta.” Las tok blong hem i olsem: “!From we mi, mi Pikinini blong Man, mi Masta blong Sabat dei!” ?Las tok ya blong Jisas i minim wanem? Jisas i stap tokbaot rul blong Kingdom blong hem blong wan taosen yia, be bambae i mekem pis i kamaot long wol.

Long 6,000 yia we i pas finis, ol man oli harem nogud from we oli stap olsem slef aninit long paoa blong Devel Setan. Oli stap long wan wol we i raf mo i gat faet i kamaot evri dei long hem. Be rul blong Kraes we i olsem Sabat dei, bambae hem i wan taem blong spel long olgeta trabol mo ol samting we i mekem man i harem nogud. Matyu 12:1-8; Levitikas 24:5-9; 1 Samuel 21:1-6; Namba 28:9; Hosea 6:6.

▪ ?Ol Farisi oli tok agens long ol disaepol blong Jisas from wanem? ?Jisas i givim wanem ansa long olgeta?

▪ ?Jisas i soemaot se ol Farisi oli gat wanem poen?

▪ ?Olsem wanem Jisas i “Masta blong Sabat dei”?