Japta 37

Jisas i Mekem Tingting Blong Wan Wido i No Moa Hevi

FASTAEM, Jisas i mekem wan man blong wok blong wan kapten blong ol soldia i gud bakegen. Nao smoltaem biaen, Jisas i go long wan taon, nem blong hem Naen. Hem i stap samwe long 32 kilomita long saot blong Kapaneam, long saed i go long wes. Ol disaepol blong Jisas wetem plante narafala man tu oli biaen long hem. Ating san i stap godaon taem oli kasem bigfala stonwol we i goraon long taon ya. Long ples ya, oli luk wan kampani i stap kamaot long taon ya. Olgeta ya oli stap karem wan yangfala dedman, oli go afsaed long taon ya blong berem hem.

Mama blong boe ya, tingting blong hem i hevi tumas, from we hem i wan wido mo boe ya i wan pikinini nomo we hem i gat. Taem man blong hem i ded, hem i save harem gud lelebet from we hem i gat wan boe blong hem i stap. Evri samting we hem i mekem i blong givhan long boe blong hem blong hem i save kasem wan gudfala laef long fyuja. Be naoia woman ya i no moa gat wan i stap blong leftemap tingting blong hem. Hem i krae tumas taem hem i stap wokbaot i go long beregraon. Mo plante man long ples ya oli biaen long woman ya.

Nao taem Jisas i luk woman ya, hem i harem nogud long hat blong hem. Filing we hem i soemaot long voes blong hem i pulum woman ya blong trastem hem. Hem i talem se: “Yu no krae.” Ol man oli sek long fasin mo toktok blong hem. Ale taem hem i kam kolosap long bed we ol man oli stap karem dedman ya long hem, nao hem i tajem bed ya, ol man ya oli stop, oli stap stanap. Olgeta man ya oli no save samting we bambae Jisas i mekem.

Tru, ol man we oli stap folem Jisas, oli luk finis plante merikel we hem i mekem, taem hem i mekem ol sikman oli gud bakegen. Be ating oli neva luk taem Jisas i mekem wan man i laef bakegen long ded. ?I tru we Jisas i save mekem samting ya? Nao Jisas i tok long dedbodi ya, i se: “Yang man, mi mi talem long yu, yu girap.” Nao dedman ya i girap, i sidaon, nao i stat totkok. Nao Jisas i talem long wido ya, i se: “Hemia pikinini blong yu.”

Taem ol man ya oli luk we yangfala man i rili laef bakegen, oli talem se: “Wan profet we i hae tumas i kamtru finis long yumi. Mo bakegen oli talem se: “God i tingbaot ol man blong hem.” (NW) Kwiktaem nomo, nyus ya blong Jisas i goaot, i kavremap olgeta ples long Judia mo long ol ples raonabaot.

Long taem ya, Jon Baptaes i stap long kalabus yet. Nao hem i wantem harem moa long saed blong ol bigfala wok we Jisas i stap mekem. Ale, ol disaepol blong Jon oli kam long Jon, oli storeyan long hem long ol bigfala merikel we Jisas i mekem. ?Taem Jon i harem nyus ya, hem i talem wanem? Luk 7:11-18.

▪ ?Taem Jisas i kam kolosap long taon ya Naen, hem i luk wanem?

▪ ?Taem Jisas i luk samting ya, hem i harem olsem wanem? ?Nao hem i mekem wanem?

▪ ?Ol man oli talem wanem taem oli luk merikel we Jisas i mekem?