Japta 63

Sam Moa Advaes Long Olgeta

JISAS wetem ol aposol blong hem oli stap yet insaed long wan haos long Kapaneam. Oli stap storeyan long kwestin ya: ‘?Hu man we i hae moa long narafala?’ Be i gat wan narafala samting we oli stap storebaot tu. Hemia wan samting we ating i kamaot taem oli kasem Kapaneam. Long taem ya, Jisas i no stap wetem olgeta. Jon i mekem ripot long Jisas, i se: “Tija, mifala i luk wan man we i stap ronemaot ol devel long nem blong yu. Be from we i no wan long yumi, mifala i blokem hem.”

Long tingting blong Jon, ol aposol nomo oli gat raet blong mekem ol sikman oli kamgud bakegen. Hem i ting se man ya we i mekem ol merikel ya i stap mekem i no stret, from we hem i no haf blong kampani blong ol aposol.

Be Jisas i talem se: “Yufala i no blokem hem. Man we i stap mekem merikel long nem blong mi, hem i no save go kwik blong tok nogud long nem blong mi. Man we i no agens long yumi, hem i wetem yumi. Tru mi talem long yufala, man we i givim kap kolwora long yufala blong yufala i dring, from we yufala i man blong mi, we mi mi Mesaea, bambae hem i gat pei blong hem from.”

Sipos man ya i wantem folem Jisas, hem i no nidim blong wokbaot wetem hem. Jisas i no stanemap Kristin jyos yet. Man ya i no wokbaot wetem Jisas mo ol aposol blong hem, be samting ya i no min se hem i blong wan narafala jyos. Hem i gat bigfala bilif long Jisas, taswe hem i save ronemaot ol devel long nem blong Jisas. Jisas i talem se samting we hem i stap mekem, i gud nomo. Mo i stret we man ya bambae i kasem pei from.

?Be olsem wanem nao sipos man ya i foldaon from samting we ol aposol oli bin talem no mekem long hem? !Samting ya i nogud tumas! Jisas i talem se: “Sipos wan man i mekem wan long ol pikinini ya we oli bilif i foldaon long sin, man ya bambae i kasem bigfala panis. Sipos oli fasem wan bigfala ston long nek blong hem, oli sakem hem long solwora, hemia i moa gud, i winim panis ya we bambae hem i kasem.”

Nao Jisas i talem long ol disaepol blong hem se oli mas tekemaot ol samting long laef blong olgeta we oli save foldaon from. Maet oli stap tinghae long wan samting, olsem we oli tinghae long prapa han, leg no ae blong olgeta. Nating we oli laekem tumas samting ya, be i moa gud we oli katemaot hem, nao oli kasem laef long Kingdom blong God, i winim we oli holemtaet hem, be oli go long Gehena (ples blong doti kolosap long Jerusalem we faea i laet long hem oltaem.) Gehena i minim ded blong olwe.

Nao Jisas i givim woning long olgeta, i se: “Yufala i mas lukaot gud blong yufala i no tingting nating long wan long ol pikinini ya blong mi. Tru mi talem long yufala, ol enjel we oli stap lukaot long olgeta oli stap long heven, mo oli stap oltaem long fes blong Papa blong mi long heven.” Nao hem i yusum wan pija tok blong soemaot se ‘ol pikinini ya blong hem’ oli sas tumas. Hem i storebaot wan man we i gat handred sipsip blong hem, nao wan long olgeta i lus. Nao man ya i livim ol 99 sipsip blong hem, oli stap kakae gras long saed blong hil, blong i go lukaot sipsip ya we i lus. Taem hem i faenem sipsip ya, hem i save glad moa long hem, i winim ol narafala 99 sipsip ya blong hem we oli no lus. Nao Jisas i finisim pija tok ya, i se: “Mo long sem fasin, Papa blong yufala long heven, hem i no wantem we wan long ol pikinini ya bambae i lus.”

Ating Jisas i stap tingbaot kwestin we ol aposol blong hem oli rao from, taem hem i talem se: “Sol i mas stap long laef blong yufala evriwan, mo yufala i mas gat pis oltaem wetem yufala.” Sipos yu putum sol long wan kakae, i save mekem tes blong kakae ya i moa gud. Ale, sipos yumi putum ‘sol’ long ol tok blong yumi, man i save harem gud long olgeta. Olsem ya nao, ‘sol ya’ i save mekem se yumi gat pis wetem ol man.

Be from we yumi evriwan i sinman, samtaem i mas gat bigfala trabol i kamaot. Taswe Jisas i soemaot olsem wanem blong stretem wan trabol olsem. Hem i se: “Sipos brata blong yu i mekem i no stret long yu, yu mas go luk hem, nao taem yutufala nomo i stap, yu mas talemaot long hem samting nogud ya we hem i mekem. Sipos hem i save lesin long yu, tok blong yu bambae i mekem hem i kam brata blong yu bakegen.” Nao Jisas i talem se sipos hem i no wantem lesin long yu, “yu mas tekem wan tu man i wetem yu, blong oli wetnes blong yu. Nao bambae i olsem we Baebol i talem, i se: ‘Evri poen oli mas gat tok blong tu tri wetnes, blong mekem oli stanap.’ ”

Sipos yu no save stretem trabol long tufala rod ya, long taem ya nomo yu save mekem olsem: “Yu mas talemaot trabol ya long ol memba blong jyos.” Hemia ol elda long kongregesen we oli save jajem bisnes ya. Nao sipos man ya we i stap mekem i no stret i no wantem harem tok blong ol elda, Jisas i talem se: “Yu mas mekem long hem olsem we hem i wan hiten man, no wan man blong tekem mane blong takis.”

Taem ol elda oli mekem wan disisin long wan trabol, oli mas fas gud long ol loa blong Jeova. Ale, taem oli faenemaot se wan man i stap mekem i no stret, nao hem i mas kasem panis from, i olsem we God i tekem disisin ya finis long heven. Yes, samting we oli blokem long wol ya, “God i blokem” finis long heven. Mo sipos oli faenemaot se man ya i no stap mekem wan samting we i nogud, i olsem we oli “letem long wol ya.” Yes, “God i letem” finis long heven. Long saed blong ol disisin blong ol elda, taem oli stap stretem ol trabol olsem, Jisas i talem se: “Taem tu tri man oli joen wanples long nem blong mi, mi mi stap long medel blong olgeta.” Matyu 18:6-20; Mak 9:38-50; Luk 9:49, 50.

▪ ?Long taem blong Jisas, from wanem i oraet nomo we sam man blong hem oli no stap wokbaot wetem hem?

▪ ?Jisas i talem wanem blong soemaot se i nogud tumas sipos wan man i mekem wan ‘pikinini blong hem’ i foldaon? ?Jisas i givim wanem pija tok blong soemaot se ol ‘pikinini’ ya oli impoten tumas?

▪ ?Ating wanem i pulum Jisas blong talem long ol disaepol se: “Sol i mas stap long laef blong yufala evriwan”?

▪ ?Wanem mining blong tok ya blong Baebol se: “God i blokem” long heven mo “God i letem” long heven?