Talem Gud Ol Wod

I NO evri Kristin we oli skul gud. Aposol Pita mo Jon tu, ol man oli talem se “tufala i no gat nem, mo tufala i no skul gud.” (Wok 4:13) Nating se yu no skul gud, be i impoten we yu traem talem gud ol wod. Sipos no, yu save pulum tingting blong man i gowe long trutok blong Baebol we yu stap talemaot.

Sam Samting Blong Tingbaot. Ol lanwis oli gat ol defdefren rul blong folem blong talem ol wod. Long plante lanwis, ol man oli yusum ABC blong raetem ol wod. I gat ABC blong Latin we yumi yusum long Bislama tu, mo sam narafala lanwis olsem Arabik, Grik, Hibru, mo Sirilik, oli gat ABC blong olgeta. Taem ol man oli raetem lanwis blong Jaena, oli no yusum ABC, be oli yusum ol saen mo mak. Plante long ol saen ya oli minim wan wod no haf blong wan wod. Ol man Japan mo Koria oli yusum plante saen blong lanwis blong Jaena, be oli talem i defren mo i no gat sem mining tu.

Long ol lanwis we oli yusum ABC, ol man we oli wantem talem gud ol wod oli mas talem stret ol alfabet wanwan insaed long ol wod. Mo oli mas talem stret ol haf blong wan wod. Long ol lanwis we oli talem ol alfabet i sem mak evritaem, olsem Bislama, Grik, lanwis blong Spen, mo Sulu, i no had tumas blong man i talem gud ol wod. Be taem wan lanwis i tekem sam wod blong narafala lanwis, maet man i mas talem ol wod ya olsem oli talem long narafala lanwis ya. From samting ya, maet ol man oli talem ol haf blong ol wod long defdefren wei, no maet oli no talem sam haf nating. Sipos lanwis blong yu i olsem, maet yu mas lanem sam wod baehat, mo yu mas traem yusum olgeta plante. Long lanwis blong Jaena, man we i wantem talem gud ol wod i mas lanem stret wei blong talem plante taosen mak mo saen. Long sam lanwis, sipos yu talem wan wod long voes we i daon, hem i gat mining blong hem, be sipos yu talem sem wod ya long voes we i antap, hem i gat wan narafala mining. Sipos man i no lukaot gud, hem i save givim rong tingting long narafala man.

Sipos ol wod long lanwis blong yu oli gat plante haf blong olgeta, i impoten blong save wanem haf we yu mas talem strong. Long plante lanwis, voes blong man i folem sem tiun oltaem. Sipos i gat wanwan taem we tiun i mas jenis, bambae i gat wan smol mak antap long wod, long haf blong hem we man i mas talem strong moa. Hemia i mekem se i no hadwok blong talem gud ol wod. Be sipos yumi toktok long wan lanwis we voes blong man i no folem sem tiun oltaem, samting ya i mekem se i hadwok moa blong talem gud ol wod. Long lanwis olsem, man i mas lanem plante wod baehat.

I gat sam trap we yumi mas lukaot long olgeta taem yumi traehad blong talem gud ol wod. Sipos man i talem gud ol wod bitim mak, bambae hem i no moa toktok long prapa fasin blong hem, mo tu, maet olgeta we oli lesin oli save ting se hem i flas. Sem samting i save hapen sipos man i talem ol tok long fasin blong bifo. Bambae hem i pulum tingting blong ol man i kam long hem nomo. Be sipos man i no kea nating long fasin blong hem blong toktok mo blong talem ol wod, hemia tu i nogud. Yumi tokbaot samting ya finis long poen ya “Toktok Klia.”

Long wan kantri, maet ol man oli talem wan wod long fasin blong olgeta, be long narafala kantri, ol man oli talem sem wod ya long defren fasin. Maet wan aelan i talem wan wod i defren long narafala aelan. Man we i strenja long wan kantri, maet hem i toktok lanwis blong ol manples be i tanem smol. Long sam lanwis, diksonari i givim defdefren wei blong talem wan wod. Sipos man i no skul gud no hem i stap toktok long lanwis we i no prapa lanwis blong hem, i gud hem i lesin long ol manples mo i traem folem fasin blong olgeta blong talem ol wod. Yumi ol Witnes blong Jehova, yumi wantem toktok gud, from we yumi wantem se man i tinghevi long ol tok we yumi stap talemaot long wok blong prij, mo yumi wantem we ol man long ples blong yumi oli kasem save long ol tok ya.

Long toktok blong yu evri dei, i gud yu yusum ol wod we yu save gud. Taem yu storian wetem ol man, i no had blong talem gud ol wod. Be taem yu rid long bigfala voes, maet yu luk sam wod we yu no stap yusum long storian blong yu evri dei. Ol Witnes blong Jehova oli stap rid plante long ol man. Yumi ridim Baebol long ol man taem yumi prij long olgeta. Sam brata oli ridim ol haf blong Wajtaoa Stadi no Baebol Stadi Blong Kongregesen. Taem yumi rid, i impoten we yumi traem rid gud. Sipos yumi no talem gud ol wod, bambae yumi pulum tingting blong ol man i gowe long mining blong ol tok.

Sam Rod Blong Kam Gud Moa. Plante man we oli no stap talem gud ol wod, oli no haremsave samting ya. Sipos elda we i lukaot long Tiokratik Skul i givim advaes long yu se yu no stap talem gud sam wod, yu mas glad long kaen fasin ya blong hem. Be naoia we yu save se yu gat problem ya, ?yu mas mekem wanem blong kam gud?

Fas samting we yu save mekem, se yu rid long fored blong narafala. I gud yu jusum wan man we hem i stap talem gud ol wod, nao yu askem long hem blong i stopem yu taem yu mestem.

Narafala samting we yu save mekem, se yu lesin gud long ol brata we oli talem gud ol wod taem oli givim wan tok long miting. Sipos i gat CD long lanwis blong yu, we ol brata oli stap ridim Baebol ya New World Translation mo ol haf blong Wajtaoa mo Wekap!, yu save lesin gud long olgeta. Taem yu stap lesin, yu traem faenem ol wod we brata ya i stap talem i defren long wei we yu yu talem. I gud yu raetemdaon ol wod ya, mo yu lanem olgeta. Sloslo, bambae yu no moa mekem plante mastik, mo samting ya bambae i mekem we yu kam gud moa long ol toktok blong yu.

Long plante lanwis, man i save lukluk wan diksonari we i soemaot stret wei blong raetem mo talem ol wod, mo i eksplenem mining blong ol wod. Sipos i gat diksonari olsem long lanwis blong yu, i gud yu jekem ol wod we yu no save. Sipos yu no save stret rod blong yusum wan diksonari, yu save openem i go long ol fas pej, we oli eksplenem mining blong ol mak we oli putum long ol wod. Sipos i no klia long yu yet, yu save askem long narafala blong i eksplenem long yu. Diksonari i soemaot wanem haf blong wod we man i mas talem strong. Sam wod, man i save talem long defdefren wei, i dipen long samting we hem i stap tokbaot. Taem yu jekem wan wod long diksonari, i gud yu traem talem bakegen mo bakegen bifo we yu satem diksonari ya. Sloslo, bambae yu kam naf blong talem gud ol wod, bambae yu no moa mesmestem, mo toktok blong yu bambae i moa gud.