Distrik Asembli Blong 1996 “Ol Man Blong Talemaot Pis Blong God”

LONG taem bifo, ol man blong Jeova oli mekem tri bigfala lafet evri yia. Long sem fasin, ol man we oli karem nem blong Jeova tede, oli kam tugeta tri taem long wan yia blong haremgud. Oli glad blong joen tugeta long spesel dei asembli, long seket asembli blong tu dei, mo long distrik asembli blong tri no fo dei. Long yia ya, stampa tok blong distrik asembli hemia, “Ol Man Blong Talemaot Pis Blong God.”

!Stampa tok ya i stret nomo! God blong yumi, Jeova, hem i “God ya we i stampa blong pis,” yes, hem i ‘God we i stap givim pis.’ Lida blong yumi, Jisas Kraes, hem i “Prins blong Pis.” Mo mesej we ol man blong Jeova oli talemaot, i wan mesej blong pis ya blong God. (Filipae 4:9; Rom 15:33; Aesea 9:6; Neham 1:​15) Nambawan program i rere long asembli ya, mo bambae hem i halpem yumi evriwan blong luksave moa se pis blong God i impoten.

Long yia ya, bambae i gat wan asembli kolosap long ples blong yu. I gud yu jekemap wetem ol Wetnes blong Jeova, blong save stret taem mo ples blong asembli ya, nao bambae yu save mekem plan blong go. Olgeta man we oli intres long trufala pis we i save stap longtaem, bambae oli welkam.