Kastom Store Blong Bigfala Wora Long Taem Blong Noa i Sapotem Baebol

Bigfala Wora we i ron long taem blong Noa, i wan trufala samting we i hapen long taem bifo. Long kastom store blong plante defren laen raon long wol, yu save harem wan store olsem. Long Jad, wan ples long Afrika, laen ya blong Musae i eksplenem Bigfala Wora ya olsem:

‘Bifo we bifo olgeta, long wan ples farawe, i gat wan famle i stap. Wan dei, mama blong famle ya i wantem mekem wan bigfala kakae blong famle blong hem. Ale, hem i tekem wan besin mo wan wud blong graenem ol sid oli kam flaoa. Long taem ya, skae i no hae tumas olsem naoia. Yes, sipos yu pusum han blong yu, yu save tajem skae. Ale, hem i stap graenem sid ya wetem ful paoa blong hem, nao kwiktaem nomo ol sid oli kam flaoa. !Be woman ya i no lukaotgud taem hem i stap graenem ol sid! !Hem i mestem, i leftemap wud blong graenem sid i go antap tumas, nao i mekem wan hol long skae! Wantaem nomo, bigfala wora i stat blong foldaon i kam long wol. Ren ya i narakaen. Ren ya i foldaon blong seven dei mo seven naet, gogo wora i kavremap fulwol. Taem ren i stap foldaon, skae i stat go antap kasem mak we hem i stap naoia​—i hae we i hae. !Hemia i mekem bigfala trabol long ol man! Stat long taem ya, yumi no moa save tajem skae wetem han blong yumi.’

Yumi intres long poen ya se, raonabaot long wol plante man oli stap talem store ya blong bifo, long saed blong bigfala wora we i kavremap wol. Ol faswan man Amerika mo ol Aborijini blong Ostrelya tu, oli gat kastom store long saed blong bigfala wora ya. Ol store ya oli no sem mak evriwan, be bighaf blong olgeta oli givim tingting ya se wora i bin kavremap wol, mo smol man nomo oli sef long wan sip we man i wokem. From we store ya i stap long plante ples, samting ya i sapotem trutok blong Baebol se Bigfala Wora i bin kavremap wol.​—Jenesis 7:​11-​20.