Mekem Ol Gudfala Fasin Mo Serem Olting Wetem Ol Narafala
1 Woman ya Dokas, “oltaem hem i stap mekem ol gudfala wok, mo i stap givhan long ol puaman.” (Wok 9:36, 39) Jeova God mo olgeta we oli savegud hem, oli laekem hem tumas from gudfala fasin ya blong hem blong givim presen long narafala. Hibrus 13:16 (NW ) i talem se: “Yufala i no mas foget blong mekem ol gudfala fasin, mo blong seraot olting blong yufala wetem ol narafala, from we ol kaen sakrefaes ya, God i harem gud long olgeta.” ?Olsem wanem yumi save mekem ol gudfala fasin mo seraot olting blong yumi wetem ol narafala?
2 Wan rod blong givhan long ol narafala, hemia blong serem “ol nambawan samting” blong yumi wetem olgeta. (Prov. 3:9) Presen mane we yumi givim, i givhan blong bildim ol Haos Kingdom, ol Haos Asembli, mo ol branj ofis long olgeta ples long wol. Gudfala fasin blong yumi blong givim, i givhan long plante milian man blong oli kasem ol tijing blong God, mo blong oli kam strong taem oli joen wanples blong mekem ol samting long saed blong spirit.
3 Mekem Tingting i Harem Gud Bakegen: Taem i gat wan disasta, ol man blong Jeova oli rere blong “mekem i gud” long ol Kristin brata blong olgeta, wetem olgeta ya tu we oli no gat sem bilif. (Gal. 6:10) Long Franis, wan faktri blong kemikol i bosta. Biaen long trabol ya, wan man wetem woman blong hem we haos blong tufala i stap klosap long faktri ya, tufala i talem se: “Ol Kristin brata oli kam kwiktaem blong givhan long mitufala blong klinim haos blong mifala mo haos blong ol narafala we oli stap long sem bilding wetem mitufala. Ol man we oli stap raonabaot long mitufala oli sapraes tumas taem oli luk we plante man wantaem oli kam blong givhan.” Wan narafala sista i talem se: “Ol elda oli halpem mifala. Oli kam luk mifala blong leftemap tingting blong mifala. Blong talem stret, hemia nao samting we mifala i rili nidim, i bitim ol samting long saed blong bodi.”
4 Yumi save mekem i gud long ol man raonabaot long yumi long plante rod. Be beswan rod we i save givhan moa long olgeta, hemia blong serem gudfala save blong trutok long olgeta, we i karem promes blong Jeova hem wan, long saed blong hop blong “laef ya we i no save finis.” (Taet. 1:1, 2) Ol man we oli stap harem nogud long ol trabol blong wol ya mo long prapa laef blong olgeta we i fulap long sin, oli rili save harem gud bakegen long tingting blong olgeta taem yumi talemaot ol tok blong Baebol long olgeta. (Mat. 5:4) Sipos yumi gat janis, i gud we yumi mekem i gud long ol narafala mo serem olting blong yumi wetem olgeta.—Prov. 3:27.