Leta Blong Hed Kampani

Ol Brata mo Sista:

!MIFALA i glad tumas blong raetem leta ya i go long yufala! Yufala i stap soemaot bigfala lav mo yufala i rere blong lego plante samting blong mekem wok blong Jeova. Mifala i presem yufala from ol gudfala fasin ya. Bambae yufala i luk long Yearbook blong yia ya se plante gudfala frut i kamaot long sevis yia we i pas. Bakegen, yumi spenem moa long wan bilian aoa long wok blong prij mo tijim man. Wok ya i pulum ol man oli kam klosap long Jeova. Hem i wan bigfala ona blong joen wetem God, Papa blong yumi long heven, blong mekem wok blong hem.—1 Kor. 3:9.

Taem mifala i tingbaot wok we i stap yet, mifala i sua se bambae yufala i gohed blong folem eksampol blong ol man blong God we Baebol i tokbaot se oli wok wetem strong tingting mo strong bilif. Tingbaot eksampol blong aposol Pol. Hem i wantem tumas blong mekem wanem we hem i naf blong mekem, blong wok blong Kingdom i go moa. I luk olsem se, taem hem i spenem laswan yia blong hem long Efesas, hem i raetem faswan leta blong hem i go long Kristin kongregesen blong Korin. Hem i tokbaot ol plan blong hem i se: “Bambae mi stap long ples ya long Efesas, gogo kasem dei blong Pentekos, from we long ples ya doa i open finis long mi, blong mi mekem wan gudfala wok we bambae i gat plante frut blong hem. Be i gat plante man tu we oli stap agens long mi.”—1 Kor. 16:8, 9.

Pol i bin mekem plan blong wokbaot i go long Masedonia mo Korin. Be hem i luksave se hem i gat janis blong mekem wan gudfala wok long Efesas sipos hem i stap smoltaem long ples ya. Pol i rere oltaem blong jenisim plan blong hem. Hem i luk se wan janis i kam long hem blong mekem wok blong Kingdom i go moa, stret long ples we hem i stap finis long hem, hemia long Efesas. Ale, hem i jenisim plan blong hem. Hem i talem se doa i open long hem blong mekem wan gudfala wok, ale hem i yusum janis ya blong mekem moa wok.

Wok blong talemaot gud nius mo blong mekem kongregesen blong Efesas i strong moa, hemia ol bigfala wok ya. Samtaem biaen, Pol i raet i go long ol olfala man long kongregesen long taon ya i se: “Taem mi stap talemaot gud nius, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala. Mo long fes blong ol laen blong Isrel mo long fes blong ol narafala man, mi mi stap talemaot ol trutok long olgeta. Mi talem stret long olgeta, se oli mas tanem tingting blong olgeta from ol sin blong olgeta blong kam long God, mo oli mas bilif long Jisas, Masta blong yumi.”—Wok 20:20, 21.

Plante long yufala, ol gudfala brata mo sista, i tekem ol janis we yufala i kasem blong mekem moa wok. Long yia we i pas, samwe long 798,938 brata mo sista oli bin gat janis blong jenisim no stretem sam samting long laef blong olgeta blong joen long ol defdefren haf blong wok blong paenia. Sam long yufala i wokbaot i go long narafala kantri blong mekem wok blong misinari. Yufala i stap wok strong blong talemaot gud nius mo bildimap ol kongregesen. Mo tu, sam long yufala i lanem wan narafala lanwis blong halpem ol man long ples blong yufala we oli toktok lanwis ya. Sam narafala bakegen oli stretem sam samting long laef blong olgeta blong go long ol teritori farawe no long ol ples we i gat bigfala nid. Samfala oli faenem tu se oli save mekem moa wok taem oli stap nomo long skul, long wok no narafala ples, mo taem oli yusum ol defren rod, olsem telefon, blong prij long narafala. Ol ripot we yumi kasem long olgeta ples long wol oli pruvum se ol man blong God, nating se oli yangfala no olfala, oli lukaot ol kaen rod mo tekem evri janis blong serem save blong trutok wetem ol man long evri ples.

Yumi sua se Jeova i stap lukluk mo i glad bigwan long ol traehad blong yumi. Baebol i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.” (Hib. 6:10) Gohed blong lukaot evri janis blong mekem trufala wosip i go moa. Maet sam long yufala oli save spenem moa taem long wok blong prij. Yumi evriwan i save traehad blong karem moa frut long wok blong prij.

Yumi save se, taem yumi obei long oda ya blong prij, bambae yumi kasem trabol. Tingbaot Pol taem hem i talem se wan doa i open long hem blong mekem moa wok, hem i raetem se: “Be i gat plante man tu we oli stap agens long mi.” Ol man Jiu wetem ol Hiten man tu, oli stap agensem Pol. Olgeta ya oli kam agensem hem stret no oli mekem plan long fasin haed blong spolem hem.—Ol Wok 19:24-28; 20:18, 19.

Yumi fesem semfala traem tede. Taem bambae yumi kam klosap moa long taem we God i mas spolem rabis wol ya, yumi save se bambae yumi fesem moa trabol yet. Setan i “kros tumas” mo hem i kros moa long olgeta man we oli stap mekem wok blong God. (Rev. 12:12) Yumi no mas fogetem se Setan hem i “masta blong wol ya.” Jisas i talem long ol disaepol blong hem se: “Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.”—Jon 14:30; 15:19.

Tingting blong yumi i strong blong no letem wan man nating i slakem bilif we yumi gat long God no mekem yumi slodaon long wok blong prij. Yumi save se bambae ol man oli gohed blong agensem yumi mo mekem ol rabis plan agensem yumi. Be bambae yumi gohed strong long wok blong talemaot gud nius blong Kingdom. Yumi trastem Jisas se bambae hem i smasem Setan mo ol rabis ami blong hem, stret long taem we Jeova i wantem. Ol man nogud oli no naf blong stopem aposol Pol blong toktok. Mo oli no naf tede blong stopem ol man blong Jeova. Nating se Setan i kros bigwan mo wol ya i no laekem yumi nating, spirit blong Jeova i wok strong blong givhan long ol man blong Hem. !Yumi glad tumas blong save se niufala namba blong olgeta we oli stap talemaot gud nius naoia i 6,304,645!

Mifala i prea se bambae yufala i gohed blong tekem evri janis blong go moa blong talemaot nambawan Kingdom blong Jeova. Yufala i mas save se mifala i intres bigwan long yufala evriwan, taem yumi stanap tugeta “we solda blong wan i joen long solda blong narawan” blong mekem wok blong God ya we i Antap Olgeta, Jeova.—Sef. 3:9, NW.

Ol brata blong yufala,

Hed Kampani blong ol Witnes blong Jeova