Ol Yangfala Oli Askem . . .

?Olsem Wanem Mi Save Talem ‘No’?

“Long hot taem long yia ya, wan brata long kongregesen i laekem mi tumas. Mi mi no rili laekem hem. Trabol se, mi no wantem spolem filing blong hem, taswe mi no save olsem wanem blong talem ‘no’ long hem.”—Elizabeth.a

“?YU YU glad sipos yumitu fren?” ?I gat wan boe i bin askem kwestin ya long yu samtaem? From we yu yu wan yangfala woman,b ating bambae yu glad mo yu harem gud we wan boe i laekem yu. !Maet yu glad bitim mak! Be maet tingting blong yu i fasfas tu, nao yu no save wanem blong talem.

Taem wan boe i soem se hem i laekem yu, ol filing blong yu oli save fasfas. !Samting ya i tru moa sipos yu yu gat naf yia blong mared, ale yu yu save glad long fasin ya we hem i mekem!c Nating se i olsem, plante taem ansa blong yu bambae i dipen long hu nao i stap askem kwestin ya. Sipos hem i wan man we i gruap finis long ol filing blong hem mo yu yu gat filing long hem, ating i isi blong talem ‘yes’ long hem. ?Be olsem wanem sipos i klia se hem i no gat ol fasin we wan gudfala hasban i mas gat? ?No olsem wanem sipos hem i gat ol fasin ya be yu yu yu no gat filing long hem?

Mo tu, tingbaot wan gel we i fren wetem wan boe blong smoltaem, nao hem i luksave se hem i no wantem stap ful laef blong hem wetem boe ya. Be hem i no talem wan samting long boe ya, hem i gohed nomo blong fren wetem hem. Hem i stap tingting se: “?Olsem wanem mi save talem ‘no’ long hem?”

Taem Yu No Gat Filing Long Hem

Long taem blong Baebol, ol papa mama nao oli jusum man no woman we pikinini blong olgeta bambae i mared long hem. (Jenesis 24:2-4, 8) Long plante rij kantri tede, ol Kristin wanwan oli jusum hasban no waef blong olgeta. I gat wan rul nomo we Baebol i makemaot long saed ya, se Kristin i mas mared long wan we i “man blong Masta” nomo.—1 Korin 7:39.

?Hemia i min se yu mas mared long eni Kristin we i laekem yu no we yu bin fren wetem hem blong smoltaem? Tingbaot wan gel we Baebol i tokbaot, mo we hem i stap long vilej blong Sunem long Medel Is. King Solomon i luk gel ya mo i laekem hem tumas. Hem i traem blong fren wetem gel ya, be gel ya i no wantem. Antap long samting ya, gel ya i askem long ol haosgel blong king se: “Plis yufala i no traem wekemap filing blong lav long mi bifo we mi mi wantem.” (Sing blong Solomon 2:7, NW ) Waes gel ya i no wantem we ol narafala oli traem fosem hem blong tekem wan disisen kwiktaem. Hem i no wantem fren wetem Solomon blong mared wetem hem, from we hem i laekem wan boe we i no impoten nating, wan boe blong lukaot long sipsip.

Hemia i soemaot wan bigfala samting long olgeta we oli stap tingting blong mared tede: Yu no save gat filing long evri man. Taswe, nating se wan gel i fren blong smoltaem wetem wan boe, be maet hem i no wantem mared long hem. Maet hem i harem olsemia from we i luk wan bigfala slak fasin blong hem. Maet hem i no gat filing long boe ya. Hem i krangke sipos hem i no tinghevi long ol samting ya. Sipos hem i traem blong fogetem, bambae oli no save ronwe.d Gel ya Tamara i tokbaot boe we hem i stap fren wetem, i se: “I gat plante tumas samting we i mekem tingting blong mi i hafhaf long saed blong boe ya. I no ol smosmol samting nomo, be ol bigfala samting we oli mekem mi mi tingting tumas, ale, taem mi luk boe ya, mi fraet mo mi seksek.” Biaen, gel ya i luksave se i moagud we hem i no moa fren wetem boe ya, from we i gat tumas samting i mekem tingting blong hem i hafhaf.

?From Wanem i Had Blong Talem ‘No’?

Be, i isi blong talem se i moagud we gel olsem i talem ‘no’ long boe, be i had blong mekem samting ya. Maet yu yu olsem Elizabeth we yumi tokbaot fastaem finis, we i fraet se bambae hem i spolem boe ya. I tru, yumi mas lukaotgud blong no spolem filing blong ol narafala. Baebol i pulum ol Kristin blong ‘gat sore long ol man mo mekem i gud long olgeta,’ mo blong mekem long olgeta olsem we yumi wantem blong oli mekem long yumi. (Kolosi 3:12; Matiu 7:12) ?Be samting ya i minim se yu mas giaman se yu laekem boe ya, blong yu no spolem tingting no filing blong hem? Samtaem bambae hem i faenemaot trufala filing blong yu, mo from we yu no bin tok tru long hem mo talemaot se yu no laekem hem, bambae hem i harem nogud moa. Bambae i moa nogud sipos yu mared long hem jes from we yu no wantem spolem hem. Filing ya blong no wantem spolem narafala i no wan strong fandesen blong wan gudfala mared.

Be, maet yu stap wari se: ‘Sipos mi mi no mared long hem, maet bambae i no moa gat narawan i askem mi.’ Wan buk (Teen) i talemaot tingting we wan gel i save gat i se: “Boe ya i no ‘stret’ long mi, be nating, i moagud we mi mared wetem eni boe i winim we mi stap mi wan.” Yes filing ya blong wantem serem laef blong yu wetem narafala, i strong. Be, stret rod blong ansa long filing ya, i no jes blong jusum eniwan nomo blong maredem. Yu mas faenem wan we yu laekem hem tru, mo we i naf blong mekem gud ol wok we Baebol i talem se ol mared man mo woman oli mas mekem. (Efesas 5 :33) !Taswe yu no mas hareap tumas blong jusum wan waef no hasban! Plante we oli bin mekem olsem, oli harem nogud biaen.

Mo tu, maet samfala gel oli gohed blong fren wetem boe, nating se oli luk sam bigfala poen long hem. Oli tingting olsem: ‘Sipos mi letem smol taem i pas, ating bambae hem i jenisim fasin blong hem.’ ?Tingting ya i waes? Plante taem ol nogud fasin olsem oli bin stap longtaem finis, mo i hadwok blong jenisim. ?Mo sipos hem i mekem sam bigfala jenis kwiktaem, yu save sua se bambae oli stap longtaem? Wan gel we nem blong hem Karen i mekem wan waes disisen blong no moa fren wetem wan boe, taem hem i luksave se tufala i no gat semfala tingting long saed blong ol samting we tufala i wantem long fiuja. Gel ya i talem se: “I strong long mi blong mekem olsem, from we mi mi gat filing long boe ya. Be mi save se mi mekem samting we i stret.”

Mekem Long Kaen Fasin

I tru se, i no isi blong talem ‘no’ long wan boe. Yu mas mekem long kaen fasin, olsem we yu holem wan plet we i save brok isi nomo. Hemia sam advaes we maet i givhan long yu.

Tokbaot bisnes ya wetem papa mama blong yu no wetem wan narafala olfala long kongregesen. Maet oli save givhan long yu blong luksave sipos tingting blong yu i stret no nogat.

Tok klia mo stret. Yu mas talemaot filing blong yu i klia nomo, blong hem i kasem save gud. Sipos yu talem “No tangkiu” samting ya nomo i naf blong blokem plante boe. Be, maet yu nidim blong talem long fasin we i strong moa, olsem, “Mi mi sore, be mi no intres long yu.” Yu mas lukaotgud blong no givim tingting se maet bambae yu jenisim tingting blong yu sipos hem i pulum yu. Sipos yu talemaot klia se yu no gat filing long hem, samting ya i save mekem i moa isi long hem blong winim tingting we i foldaon.

Tok tru be long kaen fasin. Ol Proveb 12:18 i talem se : “Ol tok nogud we man i sakem we i no tingbaot i save mekem narafala man i harem nogud, olsem we naef blong faet i stikim hem.” I tru se i impoten blong tok stret, be Baebol i talem tu se yumi mas ‘toktokgud, olsem we yumi ademap sol long kakae blong mekem i tesgud.’—Kolosi 4:6, NW.

Holemstrong long disisen blong yu. Sam fren blong yu we oli no save from wanem yu yu talem ‘no’ long boe ya, ating bambae oli traem pulum yu blong fren wetem hem bakegen. Be disisen ya i blong yu, i no blong olgeta.

Mekem ol fasin we oli laenap wetem toktok blong yu. Maet fastaem yutufala i bin stap olsem gud fren nomo. Taswe, ating bambae yu wantem we ol samting i kam olsem bifo ya. Be klosap oltaem samting ya i no save hapen, from we ol filing blong hem oli bin jenis i kam filing blong lav we hem i gat long yu. ?Yu ting se hem i save fogetem ol filing ya mo mekem olsem we oli no bin kamaot? No gat. Taswe, i gud we yutufala i toktok gud long yutufala, be sipos yutufala i toktok oltaem long telefon no joen tugeta plante, ating samting ya bambae i mekem hem i harem nogud moa. Maet i kam olsem we yu stap pleplei wetem filing blong hem, mo hemia i no soemaot kaen fasin nating.

Aposol Pol i talem long ol Kristin blong oli “tok tru nomo” long olgeta. (Efesas 4:25) Maet i had blong mekem olsem, be maet samting ya i givhan long yutufala evriwan blong gohed gud long laef blong yutufala.

[Futnot]

[Tok blong makem poen pija long pej 21]

Yu no save gat filing long evri man

[Tok blong pija long pej 22]

Toktok klia mo stret blong talemaot filing blong yu