Ol Yangfala Oli Askem . . .

Ol Yangfala Long Skul​—?Mi Save Fren Wetem Olgeta Kasem Wanem Mak?

“Ol fren blong mi long skul oli stap tokbaot gudtaem we oli bin gat long wiken. Be mi mi no gat wan gudfala samting blong tokbaot, mi harem olsem se mi defren.”​—Michelle.a

“Samtaem mi luk wan grup blong ol yangfala mo mi tingting se, ‘Man, olgeta ya oli frengud tugeta. Mi mi wantem gat fren olsem.’ ”​—Joe.

“I isi nomo long mi blong gat ol fren long skul. Be samting ya i pulum trabol i kam long mi.”​—Maria.

LONG wan dei nomo, ating yu spenem klosap ful taem blong yu wetem ol yangfala long skul. Yufala i fesem semkaen hadtaem, yufala i gat ol semkaen wari, mo ating yufala i gat ol semkaen mak tu blong kasem long skul. Samtaem, maet yu harem olsem se ol yangfala long skul oli kasem save moa long yu i bitim papa mama blong yu, ol brata sista blong yu, no ol Kristin long kongregesen. From samting ya, i no wan samting blong sapraes sipos yu harem se olgeta oli kam ol gudfala fren blong yu. ?Olsem wanem? ?I rong blong gat ol fren? ?I gat denja i stap sipos yu fren wetem olgeta ya? ?Taem yu gat ol fren long skul, fasin fren blong yu i save go kasem wanem mak? ?Olsem wanem bambae yu yu save sipos yu stap spenem tumas taem wetem olgeta?

Yu Nidim Ol Fren

Yumi evriwan i nidim ol fren​—⁠hemia ol man we yumi save joen wetem olgeta blong haremgud long ol gudtaem mo we yu save dipen long olgeta tu taem i gat hadtaem. Jisas i gat ol fren, mo hem i glad blong joen wetem olgeta. (Jon 15⁠:15) Taem oli kilim hem i ded long wan pos, gudfala fren blong hem, Jon, “man ya blong hem we hem i lavem hem tumas,” i stap stanap klosap long hem. (Jon 19⁠:​25-27; 21⁠:20) Yu nidim ol fren olsem, we bambae oli stap tru long yu long ol gudtaem mo ol hadtaem tu. Wan proveb long Baebol i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.”​—⁠Ol Proveb 17⁠:​17, NW.

Maet i gat wan yangfala long skul blong yu we i olsem, maet hem i stap long sem klas wetem yu mo yu harem se yutufala i joengud. Yutufala tugeta i intres long sem samting mo yutufala i glad blong storian tugeta. Long tingting blong yu maet yu se, ‘I tru, fren ya i no gat sem bilif olsem mi, be hem i no gat fasin blong wan “rabis fren” tu.’ (1 Korin 15⁠:​33, NW) Yes, sam yangfala we oli no gat sem bilif olsem yu, be maet oli gat ol gudfala fasin we i laenap wetem ol rul blong Jeova. (Rom 2⁠:​14, 15) ?Olsem wanem? ?Hemia i minim se oli save kam besfren blong yu?

Ol Kristin Oli Laekem Joen Wetem Narafala

Ol trufala Kristin oli no ronwe long ol man we bilif blong olgeta i defren long olgeta. Ol Kristin oli toktok wetem enikaen man mo woman nomata wanem kala blong skin, skul, no kalja blong olgeta, from we oli mas obei long oda ya we Jisas i givim se “yufala i mas go long ol man long olgeta ples long wol, blong pulum olgeta oli kam man blong mi.” (Matiu 28⁠:19) Ol Kristin oli no ting se oli moagud i bitim ol narafala, be oli soem kaen fasin mo respek long ol man we oli laef klosap long olgeta, long ol man long wok mo long skul blong olgeta tu. Ol Kristin oli man we i intres long narafala.

Aposol Pol i soem gudfala eksampol long saed ya. Hem i save olsem wanem blong storian wetem “ol man we oli gat ol defdefren kaen fasin,” nating se oli no gat sem bilif olsem hem. Be, taem Pol i storian wetem olgeta, hem i no gat tingting ya se bambae hem i kampani oltaem wetem ol man ya. Defren olgeta, hem i talem se: “Mi mekem ol samting ya from gud nius blong Jisas Kraes, blong bambae mi tu mi save kasem ol gudgudfala samting we i blong olgeta we oli bilif long gud nius ya.”​—⁠1 Korin 9⁠:​22, 23.

Yu save folem eksampol blong Pol. Soem kaengud fasin long ol narafala yangfala, talem halo mo smael long olgeta. Lan blong toktok gud wetem olgeta. Maet sam long ol yangfala long skul oli wantem faenem hop we yu yu gat we i stanap long Baebol. Tingbaot eksampol blong wan Kristin gel, nem blong hem Janet. Hem mo ol narafala studen long klas oli mas raetem wan smol toktok long saed blong wanwan studen long klasrum mo biaen wanwan studen i save ridim smol toktok we narafala i raetem long saed blong hem. Wan long ol smol toktok we Janet i kasem i rid olsem: “Yu yu hapi oltaem. !Plis yu talem long mifala from wanem i olsem!”

Olsem we stori ya i soemaot, maet sam long ol fren blong yu long klas oli wantem save ol bilif blong yu. Taswe gudfala frut i save kamaot sipos yu soem kaen fasin long olgeta ya. Samting ya bambae i givim janis long yu blong eksplenem bilif blong yu long olgeta. Letem ol fren blong yu long klas oli talemaot tingting blong olgeta mo yu mas lesingud long olgeta taem oli stap toktok. Fasin blong yu blong storian wetem ol yangfala long skul i olsem wan trening we bambae i halpem yu biaen, taem yu wok wetem ol man we oli no gat sem bilif olsem yu. Long skul mo long ples blong wok, fasin blong yu blong kaengud wetem narafala bambae i halpem yu blong “leftemap tok blong God ya we i sevem yumi, long fes blong ol man.”​—⁠Taetas 2⁠:⁠10.

Fasin Fren We i Olsem ‘Yok We Man i Karem Wetem Wan Man We i No Gat Bilif’

Be, fasin blong mekem i gud long ol yangfala long klas blong yu i no sem mak wetem fasin blong frengud wetem olgeta. Pol i raetem se: “Yu no mas karem yok wetem wan man we i no gat bilif, from we hem i no sem mak long yu.” (2 Korin 6⁠:​14, NW ) Taem yu frengud wetem narafala, hemia i min se yu mo narafala ya yutufala i agri long sem samting mo yutufala i stap wok blong kasem ol semfala mak long laef. Sipos yu yu folem ol bilif mo rul blong Baebol, bambae yu no save frengud wetem wan man we hem i no folem ol bilif mo rul ya long laef blong hem. Ol yangfala long skul we oli no gat bilif olsem yu, oli no sem mak long yu, ale sipos yu frengud wetem olgeta, bambae oli save pulum yu blong mekem rabis fasin no bambae oli spolem ol gudfala fasin we yu lanem finis.

Maria i kasem trabol nao hem i luksave se tok ya i tru nomo. Hem i wan gel we i frengud kwiktaem nomo wetem eni man, ale hem i gat fulap fren, be hem i no save wetaem blong stopem fasin blong frengud tumas wetem narafala. Hem i talem se: “Mi mi harem gud taem ol narafala oli laekem mi, nating se oli boe no gel. Ale fasin ya blong mi i stap pulum mi mi go long wol, olsem man we i stanap long sanbij we i sofsof nao sloslo i stap draon.”

Maet yu yu olsem Maria. Maet i had long yu blong luksave taem yu stap frengud bitim mak wetem wan we i no gat sem bilif olsem yu. Be yu yu save blokem trabol ya sipos yu tingting gud naoia se, hu olgeta we maet bambae yu talem halo mo storian smol nomo wetem olgeta be bambae oli no kam besfren blong yu, mo hu olgeta we bambae yu jusum se oli kam besfren blong yu mo yu kampani oltaem wetem olgeta. ?Be olsem wanem yu save jusum fren olsem?

?Olsem Wanem Blong Jusum Ol Fren?

Olsem yumi talem finis, taem Jisas i stap long wol, hem i gat ol gudfala fren blong hem we hem i kampani oltaem wetem olgeta. Jisas i folem stret fasin long laef blong hem mo hem i tokbaot ol samting long saed blong spirit wetem ol fren blong hem. Olgeta we oli agri wetem ol tijing blong hem mo we oli laekem fasin blong laef blong hem, olgeta nao oli kam gud fren blong hem. (Jon 15⁠:14) Wan taem, i gat fo man we i harem ol tok blong Jisas, nao samting ya i tajem hat blong fofala, mo fofala i “livim olgeta samting blong olgeta, oli biaen long Jisas.” Fofala ya hemia Pita, Andru, Jemes, mo Jon. Fofala ya i kam ol gudgudfala fren blong Jisas.​—⁠Luk 5⁠:​1-11; Matiu 4⁠:​18-22.

Ol toktok mo fasin blong Jisas oli soemaot klia long ol man se hem i strong blong folem bilif blong hem, mo narafala man bambae i no save pulum hem i gowe long rod ya we hem i jusum finis. Ol man we oli no wantem folem hem long rod ya, olgeta nao oli gowe long hem, mo Jisas i letem olgeta oli go.​—⁠Jon 6⁠:​60-66.

I gat wan yang man we fasin blong hem i mekem Jisas i sore long hem. Baebol i stori se: “Jisas i lukluk stret long man ya, mo i lavem hem tumas.” Be taem man ya i kasem save wanem we Jisas i talem se ol fren blong hem oli mas mekem, man ya “i gowe long Jisas.” Fastaem i luk olsem se man ya i wan gudfala man, taswe Jisas i “lavem hem tumas.” Be, hemia i no naf blong mekem se man ya i kam gudfala fren blong Jisas. (Mak 10⁠:​17-22; Matiu 19⁠:​16-22) ?Olsem wanem long yu?

Maet i gat wan yangfala long skul we yu yu joengud wetem. Be i gud yu askem long yu wan se: ‘?Yangfala ya i rere blong obei long ol tok blong Jisas? ?Hem i wantem save Jeova, we Jisas i tijim yumi se yumi mas wosipim hem?’ (Matiu 4⁠:10) Taem yu stap storian wetem ol yangfala long klas blong yu mo yu gohed blong obei long ol rul blong Baebol, bambae yu luksave klia nomo hu long ol yangfala ya i save kam fren blong yu.

I gud we yu soem kaengud fasin long ol yangfala long klas blong yu, olsem we Jisas tu i kaengud long enikaen man. Be Jisas i meksua se olgeta man we hem i frengud wetem olgeta, oli lavem Papa blong hem long heven, hemia Jeova. Yu save mekem olsem Jisas. ‘Mekem fasin blong yu i stret gud’ long skul, mo, wetem respek, tokbaot ol bilif blong yu wetem ol narafala. Be antap long evri samting, meksua se yu jusum ol yangfala we oli save kam ol gudfala fren blong yu.​—⁠1 Pita 2⁠:⁠12.

[Futnot]

SAM SAMTING BLONG TINGBAOT

◼ ?Wanem trabol we yu save kasem sipos yu spenem taem afta skul no wiken wetem wan yangfala blong klas blong yu we i no gat sem bilif olsem yu? ?Yu ting se i waes blong mekem olsem?

◼ ?Afta we yu ridim atikol ya finis, yu yu luksave se maet i gat sam yangfala long skul we yu yu stap spenem tumas taem wetem olgeta? ?Sipos i olsem, ale, yu save mekem wanem?

[Bokis blong pija long pej 30]

?OLSEM WANEM MI SAVE FAENEM OL TRUFALA FREN?

Long vidio kaset ya, we ol Witnes blong Jeova oli wokem, yu save harem storian blong ol yangfala blong Yunaeted Stet, Itali, Franis, mo Spen, oli toktok. Oli wokem vidio kaset ya long 36 lanwis.

[Tok blong pija long pej 30]

Maet sam yangfala long klas blong yu oli wantem save ol bilif blong yu