Baebol i Talem Wanem

?Wol Ya Bambae i Kam Wan Paradaes?

I GAT sam kastom stori long saed blong wan gudfala taem we i bin gat pis, man i no gat sin, hem i fren gud wetem God, mo i no gat sik mo ded. Kastom stori olsem i stap long plante laen blong man long ol kantri olsem Ijip, Meksiko, Peru mo Tibet. Mo tu, ol kastom stori ya oli tokbaot taem ya we man i mekem sin.

Nating we sam laen blong man oli bin jenisim mo ademap sam samting long ol stori ya, be plante haf blong olgeta oli sem mak nomo. From we ol tingting long ol stori ya oli klosap sem mak long evri laen, plante man oli ting se ol stori ya oli stanap long ol samting we oli rili hapen long taem bifo. I tru se ol tingting ya oli klosap sem mak long ol save we yumi luk long ol faswan japta blong Baebol long buk blong Jenesis. Ol save we yumi ridim long ples ya i no jes wan kastom stori nomo, be i tokbaot trufala histri blong man.—2 Timoti 3:16.

Fastaem Olgeta, Evri Samting i Gud Nomo

Buk blong Jenesis i tokbaot taem ya we God i wokem faswan man mo woman—Adam mo Iv—mo i putum tufala long wan garen we i gat wota i stap long hem, nem blong hem, Garen blong Iden. Tufala i gat gudfala bodi mo tufala i gat janis blong laef olwe long wol. Panis we tufala bambae i kasem sipos tufala i mekem sin, hemia ded. (Jenesis 2:8-17; Rom 5:12) Adam mo Iv tufala i mas gat ‘plante pikinini, blong bambae oli save go stap long olgeta ples long wol, nao oli save mekem evri samting long wol ya oli stap aninit long han blong olgeta.’ (Jenesis 1:28) Frut we i save kamaot se, ful wol ya bambae i wan paradaes, mo i fulap long ol man we oli stretgud mo oli glad blong stap aninit long rul blong God.

Sore tumas, Adam mo Iv tufala i no obei long God, nao tufala i lusum janis ya blong mekem stamba tingting blong God i kamtru mo blong kasem laef blong olwe. Nating se i olsem, Jeova God bambae i mekem stamba tingting blong hem i kamtru yet long wol. Hem i talem se: “Tok blong mi bambae i . . . mekem olgeta samting we mi mi mekem plan se i mas mekem . . . bambae hem i mekem evri samting we mi mi sanem hem blong i mekem.” (Aesea 55:11) Yes plan blong Jeova blong mekem wol ya i kam wan naesfala paradaes blong olgeta we oli tekem ol fasin blong hem, i wan stamba tingting blong Baebol.—Rom 8:19-21.

“Bambae Yu Yu Stap Wetem Mi Long Paradaes”

Jes afta long taem ya we Adam mo Iv tufala i mekem sin, God i mekem wan promes long saed blong wan “sid” no wan laen, we bambae i spolem “snek ya blong bifo,” Setan, mo bambae i brekemdaon ol wok we hem i stap mekem. (Jenesis 3:15, NW; Revelesen 12:9; 1 Jon 3:8) Sloslo i kam klia se impoten man long “sid” ya hemia Jisas Kraes. (Galesia 3:16) Antap long hemia, Jeova i putumap Jisas olsem King long Kingdom blong hem long heven, gavman ya we bambae i rul antap long wol.—Daniel 7:13, 14; Revelesen 11:15.

Kraes bambae i mekem ol samting we Adam i no mekem. Taswe Baebol i singaot Jisas se, “las Adam.” (1 Korin 15:45) Mo tu, Lodsprea we Jisas i tijim ol man long hem, i joenem Kingdom blong God wetem fiuja blong wol, i se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.”—Matiu 6:10, NW.

From we Jisas bambae i King blong wol long fiuja, hem i gat raet, taem i stap long wol, blong talem long man ya we i tanem tingting blong hem from ol nogud fasin blong hem, mo we i stap hang long pos klosap long hem, se: “Bambae yu yu stap wetem mi long Paradaes.” (Luk 23:43, NW) Paradaes we Jisas i stap tokbaot, bambae i stap long wol, olsem we God i bin talem fastaem. Baebol i sapotem tingting ya. Tingbaot ol vas we oli kam biaen.

“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) “Yu mekem we bambae i gat plante kakae long ples ya, we bambae ol hil oli fulap gud long hem.” (Ol Sam 72:16) “Ol stret man bambae oli stap long wol, mo ol man we oli no gat poen long olgeta, bambae oli stap.” (Ol Proveb 2:21, NW) “Long Saeon ya, tabu hil blong Hae God, bambae i no moa gat man we i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.”—Aesea 11:9.

Ol tok ya oli laenap wetem ol tok blong Jisas antap long bigfala hil, se: “Olgeta we oli kwaet man oli save harem gud, from we God bambae i givim wol ya long olgeta.” (Matiu 5:5, futnot) Biaen, aposol Jon i raetem se: “Naoia God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:3, 4) I klia se ol vas ya blong Baebol oli no tokbaot “paradaes” long heven, be long wol ya nomo.

?Wanem Tingting Blong Ol Man We Oli Stadi Dip Long Baebol?

Plante man we oli stadi dip long Baebol, oli bilif se wol ya bambae i kam paradaes aninit long Kingdom blong Kraes. Joseph A. Seiss, wan man blong stadi long bilif blong ol jos, i talem se: “Aninit long Mesaea, fulwol ya bambae i kam . . . olsem . . . we i mas stap sipos Adam i no bin mekem sin.” Henry Alford we i raetem ol toktok long The New Testament for English Readers, i talem se: “Kingdom blong God . . . bambae i kam kingdom blong wol ya, mo ol man we oli laef aninit long kingdom ya, bambae oli tekem graon ya i blong olgeta . . . graon ya bambae i kam olsem we i niu nomo mo ol gudfala samting bambae oli stap long hem blong olwe, from we God i stap blesem.”—Ol tok long Italik, man ya nomo i raetem.

Wan haeman, Isaac Newton, we i wan saentis mo i wan studen blong Baebol, i raetem se: “Ol man bambae oli gohed blong stap laef long wol ya afta long dei blong jajmen, i no blong 1,000 yia nomo, be blong olwe.”

From we wol ya bambae i stap aninit long rul blong Jisas Kraes, bambae i no moa save gat wan man i stat blong mekem ol rabis fasin bakegen. (Aesea 11:1-5, 9) Yes, long evri fasin, wol ya bambae i kam paradaes, mo samting ya bambae i leftemap Man ya we i Wokem wol ya, gogo i no save finis.

?YU YU BIN TINGBAOT?

◼ ?Wanem stamba tingting blong God fastaem long saed blong ol man mo wol ya?—Jenesis 1:28.

◼ ?Kingdom blong God bambae i mekem wanem?—Matiu 6:10, NW.

◼ ?From wanem wan man bambae i neva save stat blong mekem rabis fasin bakegen?—Aesea 11:1-5, 9.

[Tok blong makem poen long pej 13]

“Olgeta we oli kwaet man oli save harem gud, from we God bambae i givim wol ya long olgeta.”—Matiu 5:5, futnot