Baebol i Talem Wanem

?Olsem Wanem Long Ol Spesel Nem We Oli Soem Ona?

EVRI dei, taem ol Kristin long faswan handred yia oli mekem wok blong olgeta mo oli talemaot gud nius blong Kingdom blong God, oli storian wetem sam man blong gavman—sam oli haeman, mo sam oli no hae tumas. Long saed blong ol man blong Jisas, oli no gat ol spesel nem blong makem posisen blong olgeta mo wok we oli mekem. Be long taem blong olgeta, ol man oli gat kastom blong singaot olgeta we oli gat paoa antap long ol narafala, long wan spesel nem. Empera blong Rom i karem spesel nem ya “Augustus.”—Ol Wok 25:21, NW.

?Taem ol disaepol blong Jisas oli stanap long fored blong ol haeman olsem, oli yusum spesel nem blong olgeta no nogat? ?Olsem wanem long yumi?

Soem Respek i No Minim Se Yumi Agri

Aposol Pol i givim advaes long ol Kristin, i se: “Man we i stret blong yufala i ona long hem, yufala i mas ona long hem, mo man we i stret blong yufala i obei long hem, yufala i mas obei long hem.” (Rom 13:7) Hemia i min se yumi save singaot ol haeman long spesel nem blong olgeta. Tede, ol man oli yusum ol spesel nem olsem Masta, King, mo Jaj, long ol man we oli haeman. Be maet sam man oli askem se, ‘?Sipos mi mi save se man ya i no mekem ol gudfala fasin, i stret blong mi mi singaot hem long spesel nem ya?’

Plante haeman blong gavman oli mekem gudfala wok, be fasin blong plante long olgeta i no pulum yumi blong trastem olgeta. Nating se i olsem, ‘from we yumi man blong Masta,’ Baebol i pulum yumi blong obei long ol king mo hed gavman. (1 Pita 2:13, 14) Taswe, sipos yumi luksave se wan man i holem haenem from we God i letem hem, samting ya i mas pusum yumi blong givim ona long hem.—Rom 13:1.

Yumi no respektem wan haeman blong gavman from fasin blong hem, sipos i gud no i nogud. I no fasin blong hem nomo we i pulum yumi blong ona long hem. Taem yumi singaot hem long spesel nem ya, i no min se yumi agri long fasin blong hem. Yumi save luk samting ya long laef blong aposol Pol.

Pol i Yusum Ol Spesel Nem Blong Soem Ona

Oli holemtaet aposol Pol long Jerusalem from ol giaman toktok, mo oli tekem hem i go stanap long fored blong Feliks, hed gavman blong Judia. Taem Feliks i stap olsem wan haeman blong gavman, hem i no soem wan gudfala eksampol. Wan man blong raetem histri, Tacitus, i raetem se, Feliks “i ting se hem i save mekem enikaen rabis fasin, be bambae i no save kasem panis from.” Hem i wantem moa we ol man oli pem hem blong hem i mekem samting we oli wantem, i bitim we hem i jajem man long stret fasin. Nating se i olsem, long tufala yia ya we Pol i stap long kalabus, hem i soem respek long hed gavman ya, mo plante taem tufala i storian tugeta. Taem tufala i stap storian, Feliks i ting se bambae Pol i pem hem blong i letem hem i gofri, be Pol i neva mekem olsem. Hem i tekem janis nomo blong prij long Feliks.—Ol Wok 24:26.

Taem Festas i kam niufala hed gavman, hem i harem kes blong Pol long Sisaria. Festas i wantem mekem ol lida blong ol laen blong Isrel oli harem gud long hem, ale hem i ting se i gud we Pol i go long Jerusalem, blong hem i pas long kot long ples ya. Pol i save se bambae oli no jajemgud bisnes ya, ale, from we hem i wan sitisen blong Rom, hem i talem se: “Mi mi wantem go talemaot bisnes ya blong mi long fes blong Sisa, long Rom.” —Ol Wok 25:11.

Festas i no sua olsem wanem blong eksplenem long Sisa ol poen ya we oli putum agensem Pol. Be taem King Agripa namba tu i kam luk Festas blong talem halo nomo long hem, Festas i talemaot ol samting ya long hem, mo Agripa i intres long bisnes ya. Long nekis dei, ol nambawan kapten blong ol soldia mo ol haeman blong taon oli wokbaot wetem king ya i go insaed long rum we oli stap mekem kot long hem, nao oli mekem ol strong kastom blong ona long hem.—Ol Wok 25:13-23.

Taem oli askem long Pol blong toktok, hem i yusum spesel nem ya “King” blong statem tok blong hem, mo i gohed blong tokbaot bigfala save we Agripa i gat long ol kastom mo ol fasin blong ol laen blong Isrel. (Ol Wok: 26:2, 3) Long taem ya, plante man oli save se Agripa i stap mekem rabis fasin ya blong slip wetem stret sista blong hem. Pol tu i mas save rabis fasin ya blong Agripa we ol man oli stap tokbaot. Nating se i olsem, Pol i givim ona we i stret long hem olsem king.

Taem Pol i stap talem stori blong hem, Festas i singaot bigwan i se, “!Pol! !Yu yu krangke!” Pol i no kam kros, be wetem kwaet fasin hem i ansa long hed gavman ya mo i singaot hem se “Masta.” (Ol Wok 26:24, 25) Pol i soem respek long hem we i stret long haenem we hem i gat. Ol eksampol ya oli pulum yumi blong askem kwestin ya se, ?I gat mak long fasin ya blong ona long ol haeman?

Givim Ona We i Stret

Rom 13:1 (NW) i soemaot se ol haeman blong gavman oli no gat olgeta paoa, i se: “Evri sol i mas obei long ol haeman we oli stap rul, from we i no gat man i save rul sipos God i no letem hem. Ol haeman we oli stap rul, oli stap long prapa ples blong olgeta from God.” Taswe ona we yumi givim long ol haeman blong gavman i gat mak blong hem. Jisas nao i putum mak ya taem hem i talem long ol disaepol blong hem se: “Yufala, bambae yufala i no letem ol man ol singaot yufala se ‘Tija,’ from we yufala i gat wan tija nomo, mo yufala evriwan i wan brata. Mo bambae yufala i no singaot wan man long wol ya se ‘Papa,’ from we yufala i gat wan Papa nomo blong yufala, we hem i stap long heven. Mo bambae yufala i no letem ol man oli singaot yufala se [“Lida,” NW] from we yufala i gat wan [Lida] nomo blong yufala, we hemia mi ya, mi Mesaea.”—Matiu 23:8-10.

Samting we bambae i givhan long yumi blong kasem save long mak ya we Jisas i putum long saed blong ol spesel nem blong soem ona, hemia se, taem yumi singaot wan haeman blong gavman long wan spesel nem, hemia i no sem mak olsem taem we yumi singaot wan man blong jos long wan spesel nem. Taswe, taem wan haeman blong gavman i karem wan spesel nem blong jos, bambae yumi folem advaes blong Pol blong soem ona long hem, be i no kasem mak ya we yumi singaot hem long spesel nem we jos i givim. Man we i folemgud ol advaes blong Baebol, bambae hem i soem respek long ol haeman ya. Be man we i trenem tingting blong hem folem Baebol, tingting blong hem bambae i no letem hem blong yusum ol spesel nem we jos i givim long olgeta. Long rod ya, hem i ‘givimbak long God samting we i blong God.’—Matiu 22:21.

?YU YU BIN TINGBAOT?

◼ ?Ol man blong Jisas oli tingbaot ol haeman blong gavman olsem wanem?—Rom 13:7.

◼ ?Aposol Pol i yusum ol spesel nem blong ona long ol haeman blong gavman?—Ol Wok 25:11; 26:2, 25.

◼ ?Wanem ol spesel nem we Jisas i no agri long olgeta?—Matiu 23:8-10.

[Tok blong pija long pej 21]

?Pol i singaot Agripa long wanem spesel nem?