Ol Kongregesen Blong Givhan Long Ol Man Blong Oli Laeklaekem Olgeta Mo Oli Joen Gud

Maet yu go finis long sam miting blong kongregesen blong ol Wetnes blong Jeova. Yu luk finis se sam famle, sam we oli no mared, sam olfala mo sam yangfala, olgeta oli joen long ples ya. Oli gat wan tingting nomo long saed blong wosip, mo olgeta oli wantem givhan long ol narafala man.

Long eni ples we i gat fulap man we oli wantem joen gud, i mas gat samfala we oli lukaot long olgeta. God, hem i wan God blong mekem stret fasin, hem i no gat fasin olbaot. Taswe, fasin ya i mas stap long medel blong kongregesen blong ol man blong hem. Sem mak long faswan handred yia, tede oli putumap sam Kristin we oli kasem ol mak long saed blong speret mo oli gat ekspiryens. Oli kolem olgeta elda no man blong lukaot long ol narafala man. Olgeta ya oli lukaotgud long kongregesen mo long olgeta samting we kongregesen i nidim long saed blong speret. Sam man we oli gat strong bilif, oli givhan long ol elda, hemia “ol man blong givhan.” Olgeta ya tu oli no kasem pei from wok blong olgeta long kongregesen, be oli glad blong wok fri nomo. Olgeta oli wok blong kasem mane blong pem ol kaon blong olgeta.—1 Korin 14:33, 40; Filipae1:1; 1 Timote 3:8, 9.

?Olsem wanem oli jusumaot ol man ya? Oli mas mekem wok blong God wetem strong bilif mo oli mas kasem ol mak we Baebol i putum finis. Sam long ol mak ya, oli olsem: ‘Hem i mas man we i no dring grog tumas, we i save blokem ol samting we hem nomo i wantem, mo we fasin blong hem i gud; hem i mas glad blong tekem ol strenja oli kam long haos blong hem, mo i mas savegud fasin blong tij. Hem i mas wan kwaet man, mo i no man blong wantem mane; wan man we i save lukaotgud long famle blong hem, i no wan man we i jes kam Kristin man nomo, hem i mas wan man we ol man we oli no Kristin oli save talem se, “Man ya i gudfala man.” ’ ‘Hem i mas holemstrong tok ya we i no save jenis, we yumi stap tijim ol man long hem.’—1 Timote 3:1-15; Taetas 1:7-9.

Olgeta man long kongregesen, we maet bighaf blong olgeta oli nyufala Kristin nomo, oli no vot blong putumap ol elda. Olgeta we oli elda finis mo oli gat ekspiryens, oli luk olsem wanem ol brata insaed long kongregesen oli wok blong kasem ol mak we Baebol i putum. Afta, oli skelem fasin blong olgeta blong luksave sipos oli naf blong mekem wok blong elda. Hed-Kampani nomo i lukaot long wok ya blong stanemap ol elda mo ol man blong givhan. Fasin ya i folem rod we Kristin kongregesen i soemaot long faswan handred yia.

Ol elda ya, we oli man blong lukaot long ol narafala, oli no olsem ol lida blong ol jyos; oli no bos long ol man. Jisas i talem se wan man we i wantem lidim ol man i mas slef long olgeta. Long kongregesen blong ol Wetnes blong Jeova, ol elda oli wok tugeta blong leftemap Kingdom blong God.—Matyu 20:26, 27; 23:8-11; Rom12:8; 1 Korin 3:5; 4:1, 2; Kolosi 4:11; 1 Tesalonaeka 5:12-14.

Ol elda oli lukaot long ol tok long ol miting mo oli lidim ol man long wok blong prij. Bigfala wok blong kongregesen, hemia blong talemaot gud nyus blong Kingdom long olgeta ples blong hem. Ol elda oli wok olsem man we i lukaot long sipsip tu, oli visitim ol memba blong kongregesen blong leftemap tingting blong olgeta taem oli luksave se i gat nid.—Matyu 24:14; Ol Wok 1:8; 1 Tesalonaeka 2:11, 12; 5:14, 15; 2 Timote 2:24-26; Hibrus 13:17; Jemes 5:13-16; 1 Pita 5:1-4.

Ol elda oli mekem wan wok moa. Olgeta oli mas stretem mo givim advaes long eniwan we i stap folem wan nogud rod, we i save spolem fasin klin mo fasin blong joen gud insaed long kongregesen.—1 Korin5:4, 5, 7, 11-13; Taetas 1:9; 2:15; 3:10, 11.

Sipos yu joen evri wik long ol miting blong kongregesen, bambae yu yu save haremgud from ol gudfala fren, mo yu save kasem plante blesing long saed blong speret.—Ol Sam 35:18; 84:10.

• ?Hu ya olgeta we oli lukaot long ol kongregesen?

• ?Olsem wanem oli jusumaot ol elda mo ol man blong givhan?

• ?Ol elda oli gat wanem wok blong mekem?

[Tok Blong Pija Long Pej 13]

Ol elda oli tijim kongregesen, oli lidim wok blong prij long evri haos wanwan, oli visitim olgeta long kongregesen blong leftemap tingting, oli givim advaes mo stretem trabol.