Japta 10

Yumi Mas No Laekem Nating “Ol Tok Haed Blong Setan”

TUATIRA

 1. ?Tuatira i stap wea, taem yumi tingbaot ol narafala kongregesen we Revelesen i tokbaot? ?I gat wanem kaen skul long taon ya?

SAMWE long 65 kilomita saotis long taon ya Begama (Pegamam), i gat wan bisi taon blong Teki, nem blong hem Akisa. 1,900 yia bifo, taon ya Tuatira i stap long ples ya. Wan elda we hem i goraon long ol kongregesen i save kasem Tuatira kwiktaem. Hem i mas lego Pegamam, nao hem i no mas folem rod kolosap long solwora. Hem i mas pas long bus nomo. Nao hem i save goraon blong visitim ol narafala kongregesen we Revelesen japta 3 i tokbaot—hemia Sadis, Filadelfia, mo Laodisia. Tuatira i defren long Pegamam long sam fasin. I luk olsem we Tuatira i no wan stampa taon blong wosip long lida we i hed gavman long Rom. Be taon ya i gat sam olta mo haos blong wosip we ol man long taon ya oli yusum blong wosip long ol hiten god nomo. Tuatira i impoten taon long saed blong big bisnes.

2, 3. (a) ?Bifo finis, Baebol i talem se hu blong Tuatira i kam wan Kristin? (b) Jisas i “Pikinini blong God” mo ae blong hem “i olsem faea we i laet.” ?Wanem mining blong samting ya long ol Kristin long Tuatira?

² Taem Pol i stap prij long Masedonia, hem i mitim wan woman Tuatira, nem blong hem Lidia. Hem i gat stoa blong salem flas kaliko we i red olsem klos blong king. Nao hem wetem ol famle blong hem oli glad long mesej blong Pol, oli harem tok blong hem. Mo hem i kaen tumas long Pol. (Ol Wok 16:14, 15) Hemia nao faswan man Tuatira we i akseptem Kristin mesej. Sloslou, taon ya i gat kongregesen blong ol Kristin man. Mesej blong Jisas we i go long kongregesen ya i longfala moa i bitim ol narafala mesej. Hem i se: “Yu mas raetemdaon tok ya blong mi i go long enjel blong [kongregesen] long Tuatira, se ‘Hemia tok blong mi ya we mi Pikinini blong God, we ae blong mi i olsem faea we i laet, mo leg blong mi i saen olsem bras we oli saenemgud.’ ”—Revelesen 2:18.

³ Tok ya “Pikinini blong God” i kamaot wan taem nomo long Revelesen, long vas ya nomo. Be long sam narafala ples long Revelesen Jisas i singaot Jeova se “Papa blong mi.” (Revelesen 2:27; 3:5, 21) Ating nem ya i pulum ol Kristin long Tuatira blong tingbaot olsem wanem Jisas i kolosap long Jeova. Ae blong Pikinini ya “i olsem faea we i laet.” Hemia i olsem woning long ol Kristin long Tuatira se jajmen blong hem agens long ol man we oli stap mekem kongregesen i doti bambae i olsem faea we i laet. Hemia i namba tu taem we Revelesen i talem se leg blong hem i saen olsem bras we oli saenemgud. Samting ya i makem long tingting blong ol man ya olsem wanem fasin blong Jisas blong stap tru long God taem hem i wokbaot long wol, i saenaot. I klia se ol Kristin long Tuatira oli harem advaes ya. !Tede yumi tu yumi mas harem!—1 Pita 2:21.

4, 5. (a) ?From wanem Jisas i save talem sam gudfala toktok long ol Kristin long Tuatira? (b) ?Olsem wanem kongregesen long Tuatira i sem mak long bitim 65,000 kongregesen blong ol Wetnes blong Jeova tede?

⁴ I gud tumas we Jisas i save talem sam gudfala toktok long olgeta long Tuatira. Hem i se: “Mi mi save finis fasin blong [yu] long Tuatira. Mi save we [yu yu] laekem tumas ol man, mo [yu yu] bilif long mi. Mi save we [yu] stap wok blong givhan long ol man, mo mi save we tingting blong [yu] i longfala, i no save foldaon. Mo mi save tu we wok blong [yu] naoia i moa gud long wok ya we [yu yu] mekem fastaem.” (Revelesen 2:19) Defren long ol Kristin long Efesas, ol Kristin long Tuatira we tabu speret i makemaot olgeta oli no lusum lav we oli gat fastaem long Jeova. Bilif blong olgeta i stap strong yet. Mo tu oli stap wok strong moa bitim bifo. Olsem ol tri faswan kongregesen, ol Kristin long Tuatira tu oli stap stanap strong. !Sem mak long bitim 65,000 kongregesen blong ol Wetnes blong Jeova long olgeta ples long wol tede! Lav blong Jeova we olgeta i gat i stap saenaot. Olgeta long ogenaesesen oli gat strong tingting blong gohed strong long minista wok, mo tingting ya i stap pusum ol yangfala mo ol olfala tu. Namba blong ol paenia i stap go antap. !Olgeta oli stap yusum smol taem we i stap yet long waes fasin, blong talemaot gudfala hop blong Kingdom blong God we i kolosap nao!—Matyu 24:14; Mak 13:10.

⁵ Fulap yia finis, plante blong smol kampani we tabu speret i makemaot olgeta wetem plante blong bigfala kampani, oli stap tru long God. Oli givim gudfala eksampel olsem wanem blong stanap strong long wok blong God, nating we ol man blong wol we oli stap raonabaot long olgeta oli no gat hop, oli stap go long tudak moa. !Yumi no mas fraet! Revelesen i talem bakegen tok we sam profet blong God oli talemaot bifo. “Bigfala dei blong Jeova i kolosap. Hem i kolosap, mo i stap hareap tumas.”—Sefanaea 1:14; Joel 2:1; Habakuk 2:3; Revelesen 7:9; 22:12, 13.

“Woman Ya Jesebel”

 6. (a) ?Nating we kongregesen blong Tuatira i gat sam gudfala poen, be Jisas i talem se oli mas stretem wanem fasin kwiktaem? (b) ?Hu ya Jesebel? ?Hem i save talem stret se hem i wan profet?

⁶ Ae blong Jisas we i olsem faea we i laet i lukluk i go insaed long kongregesen ya moa. Nao hem i luk samting we olgeta oli mas stretem naoia nomo. Hem i talem long ol Kristin long Tuatira se: “Be i gat wan samting we [yu] stap mekem we i no stret long fes blong mi. [Yu yu] letem woman ya i stap long [yu] yet, we hem i olsem woman ya Jesebel bifo. Hem i stap talem se hem i profet be i stap pulum ol man blong mi oli go krangke, oli stap mekem nogud wetem woman, mo oli stap kakae mit we ol man oli yusum finis blong mekem wosip long narafala god.” (Revelesen 2:20) Biaen long 1000 B.K.T., waef blong King Ehab blong Isrel, nem blong hem Kwin Jesebel, i stap wosip long gyaman god ya Bel. Hem i wan woman we i laekem blong bos long ol narafala man, hem i mekem rabis fasin long saed blong seks, mo hem i kilim plante man i ded. Jeova i makemaot Jehu blong hem i kilim woman ya i ded. (1 King 16:31; 18:4; 21:1-16; 2 King 9:1-7, 22, 30, 33) Jesebel we hem i stap wosip long ol aedol, hem i no save talem se hem i wan profet. Hem i no olsem Miriam mo Debora, we tufala woman ya i mekem wok blong trufala profet long Isrel. (Eksodas 15:20, 21; Jajes 4:4; 5:1-31) Mo tabu speret blong Jeova i no pusum Jesebel blong talemaot profet tok olsem i pusum olfala Ana mo fo gel blong Filip, we hem i man blong talemaot gud nyus.—Luk 2:36-38; Ol Wok 21:9.

 7. (a) ?Taem Jisas i tokbaot “woman ya Jesebel,” i klia se hem i stap tokbaot wanem fasin long kongregesen? (b) ?Maet sam woman long kongregesen oli mekem wanem blong traem soemaot se nogud rod we olgeta nomo oli wantem folem i stret nomo?

⁷ Taswe i klia se “woman ya Jesebel,” we hem i stap talem se hem i wan profet long Tuatira, hem i no tru. Tabu speret blong God i no stap sapotem hem. ?Woman ya i hu? I luk olsem we hem i wan woman no wan grup blong ol woman we oli no sem blong karem sam rabis fasin i kam insaed long kongregesen. Maet sam woman we oli joen wetem kongregesen i bin pulum samfala long kongregesen blong mekem rabis fasin long saed blong seks. Maet samfala oli bin yusum sam vas blong Baebol long rong fasin, blong traem soemaot se rod we olgeta nomo oli wantem folem i stret nomo. !Tru ya, oli gyaman profet stret! Olgeta oli save pulum sam narafala blong folem ol rabis fasin blong olgeta, olsem fasin we “ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, ol woman oli stap wantem man tumas, mo olgeta oli stap wantem tumas ol sin. Mo olgeta oli stap wantem evri samting, be fasin ya, we man i stap wantem evri samting, hemia i olsem nomo we hem i stap mekem wosip long ol narafala god.” (Kolosi 3:5) Oli save pulum samfala long kongregesen blong mekem ol samting we i gud long olgeta nomo, mo ol fasin we oli no klin mo oli no stret. Hemia ol fasin we ol skul blong Krisendom oli stap mekem mo oli stap agri long olgeta.

 8. (a) ?Jisas i talem wanem long saed blong “Jesebel” long Tuatira? (b) ?Tede sam woman oli yusum paoa blong olgeta long wanem rod we i no stret?

⁸ Jisas i gohed blong talem long ol elda long Tuatira se: “Mi mi givim jans long hem finis blong i tanem tingting blong hem, be hem i no wantem tanem tingting blong hem nating from ol sin blong hem. Oraet, from samting ya, bambae mi givim bigfala sik long hem, mi sakem hem i godaon long bed. Mo hem wetem ol man we oli stap mekem krangke wetem hem bifo bambae oli harem nogud tumas long bed ya. Sipos ol man ya oli no tanem tingting blong olgeta from rabis fasin ya we oli wokem wetem woman ya, bambae mi mekem samting ya naoia nomo.” (Revelesen 2:21, 22) Jesebel blong bifo i bos long man blong hem Ehab. Mo hem i agensem man we God i yusum blong kilim ol enemi blong hem, hemia Jehu. Taswe i luk olsem we fasin blong sam woman insaed long kongregesen ya i blong traem bos long hasban blong olgeta mo ol elda. Mo i luk olsem we ol elda long Tuatira oli letem fasin ya blong Jesebel i stap insaed long kongregesen. Long ples ya, Jisas i givim wan strong woning long olgeta, mo long kongregesen blong ol man blong Jeova tede long ful wol. Tede sam woman we oli gat strong tingting olsem oli bin pulum hasban blong olgeta blong lego mo agensem trutok wetem olgeta. Mo sam long olgeta oli bin mekem ol gudfala man blong Jeova oli pas long kot.—Skelem wetem Jud 5-8.

 9. (a) ?From wanem ol tok blong Jisas long saed blong Jesebel i no blong daonem olgeta woman long kongregesen? (b) ?Wetaem nomo ol fasin blong Jesebel oli save stanap long kongregesen?

⁹ Tok ya i no daonem ol gudfala woman insaed long Kristin kongregesen. Naoia ol gudfala sista oli stap mekem bighaf blong wok blong prij long wol. From ol Baebol stadi we oli stap mekem, oli stap pulum fulap man oli kam long kongregesen blong God. God i blesem plan ya, olsem Ol Sam 68:11 (NW) i talem, se: “Jeova hem wan i talem tok ya. Ol woman we oli stap talemaot gud nyus oli olsem wan bigfala ami.” Ol waef we oli gat kwaet fasin mo oli soemaot respek oli stap mekem samting we “i gud tumas long fes blong God.” From gudfala fasin ya, ol waef oli save gat paoa we i gud long hasban blong olgeta. (1 Pita 3:1-4) King Lemuel i presem wan gudfala waef we hem i wok strong. (Proveb 31:10-31) Taem woman i switim man no i stanemap kwestin no i agensem fasin we man i bos, hemia nao taem we fasin blong Jesebel i stanap.—Efesas 5:22, 23; 1 Korin 11:3.

10. (a) ?From wanem Jisas i jajem Jesebel wetem ol pikinini blong hem? (b) ?Olsem wanem olgeta we oli kam olsem ol pikinini blong Jesebel oli stap long denja? ?Olgeta oli mas mekem wanem?

¹⁰ Jisas i stap tokbaot “woman ya Jesebel” yet, i se: “Bambae mi kilim ol pikinini blong hem tu oli ded, nao bambae olgeta [kongregesen] oli save we mi mi save tingting blong olgeta man, mo wanem samting olgeta oli wantem. Bambae mi mi givim pei long yufala evriwan wanwan, stret long mak blong fasin blong yufala.” (Revelesen 2:23) Jisas i givim taem long Jesebel wetem ol pikinini blong hem blong oli tanem tingting blong olgeta from ol sin blong olgeta. Be oli stap gohed long ol rod we oli no stret mo oli no klin, taswe hem i mas jajem olgeta from. Hemia i wan strong mesej long ol Kristin tede. Olgeta we oli folem fasin blong Jesebel, nating we oli man no woman, oli kam olsem pikinini blong hem from we oli agensem ol klin mo stret fasin blong Baebol mo rul ya we i talem se man i bos. Hed blong olgeta i strong, taswe oli sakem tiokratik oda. From ol samting ya, oli sik tumas long saed blong speret. Sipos wan man i gat fasin olsem, hem i mas askem long ol elda long kongregesen blong prea long hem. Nao “prea blong man we i bilif bambae i sevem sikman ya. [Jeova] bambae i mekem bodi blong hem i strong bakegen, mo sipos hem i bin mekem sam sin, [Jeova] bambae i fogivim hem from.” Jeova i save mekem olsemia sipos man ya i gat tingting daon, nao hem i jenisim fasin blong hem blong oli laenap wetem ol prea blong hem. Be i no mas gat wan we i ting se hem i save gyaman long God no Kraes. Hem i no mas traem haedem rabis fasin we hem i bin mekem, mo i no mas mekem olsem we hem i wan Wetnes we i wok strong long wok blong God.—Jemes 5:14, 15.

11. ?Tede wanem i givhan long ol kongregesen blong stap wekap, mo blong blokem paoa blong ol woman we i no stret?

¹¹ Yumi glad we bighaf blong ol kongregesen blong ol Wetnes blong Jeova tede oli stap wekap, oli lukaot we trabol ya i no kam insaed long kongregesen. Ol elda oli traem luksave sipos i gat sam tingting mo fasin we oli no laenap wetem ol tiokratik rul long kongregesen. Olgeta oli traem givhan long ol man mo ol woman we oli stap long denja, blong olgeta oli save kam strong moa long saed blong speret, mo stretem fasin blong olgeta bifo we i let finis. (Galesia 5:16; 6:1) Long kaengud mo strong fasin, ol Kristin elda ya oli blokem ol woman we oli traem mekem ol grup blong leftemap prapa tingting blong olgeta, olsem tingting we woman i fri, i no stap aninit long hed blong hem. Mo tu, samtaem advaes we i stret long trabol ya i kamaot long ol buk blong Watch Tower Sosaeti.a

12. ?Tede olsem wanem grup ya we i olsem Jon bifo i soemaot fasin we i olsem Jehu?

¹² Be samtaem kongregesen i mas putumaot man we i mekem bigfala sin long saed blong seks mo i no tanem tingting blong hem from. Samting ya i tru moa sipos man ya i stap gohed long fasin ya. Tingbaot olsem wanem Jehu i wok kwik mo strong blong tekemaot olgeta paoa mo fasin blong Jesebel long Isrel. Tede tu, grup ya we i olsem Jon bifo oli mekem sam samting we i strong, blong givim eksampel long ol fren blong olgeta we oli olsem “Jonadab” bifo. Samting ya i soemaot se oli defren olgeta long ol lida blong Krisendom, we oli letem ol rabis fasin oli stap nomo.—2 King 9:22, 30-37; 10:12-17.

13. ?Bambae wanem i hapen long olgeta we oli letem ol rabis fasin blong woman i gat paoa long olgeta?

¹³ Pikinini blong God hem i Man blong Karem Mesej blong Jeova mo hem i Jaj. Hem i mekem i stret nomo taem hem i soemaot hu ya Jesebel tede, mo taem hem i sakem hem i godaon long bed from wan bigfala sik. Tru ya, sik blong hem long saed blong speret i bigwan tumas. (Malakae 3:1, 5) Olgeta we oli letem ol rabis fasin blong sam woman olsem i gat paoa long olgeta, bambae oli kasem bigfala trabol. Bambae oli harem nogud from we Kristin kongregesen i mas putumaot olgeta, olsem we oli ded nomo. Oli mas tanem tingting blong olgeta from sin ya, jenisim fasin blong olgeta, nao kongregesen i save letem olgeta oli kambak bakegen insaed long hem. Sipos oli no mekem olsemia, bambae oli ded olgeta long wan “sik we i blong ded nomo,” long taem blong bigfala trabol long wol. Sipos oli tanem tingting blong olgeta fulwan from ol rong fasin blong olgeta, i gat taem yet we oli save kam strong bakegen long saed blong speret.—Matyu 24:21, 22; 2 Korin 7:10.

14. (a) ?Olsem wanem Jisas i stap yusum ol elda blong stretem sam trabol, olsem trabol we i save kamaot from fasin olsem Jesebel? (b) ?Olsem wanem olgeta long kongregesen oli mas sapotem ol elda we oli stretem ol trabol ya?

¹⁴ “Olgeta kongregesen” oli mas save se Jisas i stap skelem “kidni” blong man, hemia oli dip filing blong hem. Mo hem i stap skelem ‘hat’ tu, hemia ol tingting we i haed long man, mo ol samting we i stap pusum hem. Blong mekem olsemia, hem i yusum ol sta no elda we hem i trastemgud olgeta. Oli save stretem ol trabol long kongregesen, olsem trabol we i save kamaot from fasin blong Jesebel. (Revelesen 1:20) Taem ol elda oli lukluk insaed long wan bisnes olsem, nao oli jajem hem, i no stap long olgeta long kongregesen wanwan blong save from wanem mo olsem wanem oli mekem disisen ya. Olgeta oli mas akseptem ol disisen blong ol elda, wetem tingting daon. Mo oli mas gohed blong sapotem ol sta ya long kongregesen. Sipos oli stap fasgud long Jeova mo long ogenaesesen blong hem, bambae oli kasem pei from. (Ol Sam 37:27-29; Hibrus 13:7, 17) Long saed blong yu wan, yu save kasem blesing taem Jisas i givim pei long olgeta man wanwan, stret long mak blong fasin blong olgeta.—Ridim Galesia 5:19-24; 6:7-9.

“Holemstrong Ol Fasin Ya We Yufala i Gat”

15. (a) ?Jisas i talem wanem long olgeta we oli no letem ol fasin blong Jesebel oli pulum olgeta? (b) ?Wanem i soemaot se i no olgeta Kristin evriwan long 1918 we oli letem ol gyaman Kristin skul oli spolem olgeta?

¹⁵ Nao Jisas i leftemap tingting blong olgeta, i se: “Be yufala long Tuatira we yufala i no folem krangke toktok ya, we yufala i no lanem ol fasin ya we oli kolem gudfala tok haed blong Setan, mi mi gat tok blong yufala tu. Mi no wantem putum sam hevi samting long solda blong yufala bakegen, be mi wantem blong yufala i holemstrong ol fasin ya we yufala i gat, gogo kasem we mi bambae mi kamtru.” (Revelesen 2:24, 25) I gat sam gudfala man long kongregesen long Tuatira we oli no letem ol fasin blong Jesebel oli pulum olgeta. Sem mak long ol 40 yia bifo long 1918 mo ol yia we oli ron biaen long hem. Long taem ya, i no olgeta Kristin man we oli agri long ol rabis mo kruked fasin we oli fulap long Krisendom. Smol grup blong ol Baebol Studen, hemia ol Wetnes blong Jeova naoia, oli traehad blong givhan long ol memba blong ol skul blong luksave se stampa blong plante tijing blong ol skul blong Krisendom i no Kristin. Smol grup ya i sakem bilif mo fasin we i kamaot long Babilon fastaem, we oli bin kasem from ol gyaman Kristin skul. Mo oli sakemaot ol tijing mo fasin blong “woman ya Jesebel” tu.

16. ?Nating we Jisas mo ol Kristin long hed kampani long faswan handred yia oli no wantem putum sam moa hevi samting long solda blong ol man long kongregesen, be wanem sam samting we yumi mas blokem?

¹⁶ Grup ya tede we oli olsem Jon bifo oli pulum ol fren blong olgeta long bigfala kampani blong lukaot we sam rabis fasin olsem ol rabis pleplei blong wol tede, oli no gat paoa long olgeta. Yumi no gat nid blong lukluk no mekem ol rabis fasin blong save olsem wanem long olgeta no blong lanem olsem wanem blong blokem ol fasin ya. Man we i waes i stap longwe long ol “tok haed blong Setan.” I olsem Jisas i talem, se: “Mi no wantem putum sam hevi samting long solda blong yufala bakegen.” Tok ya i pulum yumi blong tingbaot rul we hed kampani blong ol Kristin man long faswan handred yia oli stanemap, se: “I tok blong Tabu Speret, mo i tok blong mifala tu, se bambae mifala i no putum sam narafala loa long yufala, we bambae i olsem wan hevi samting long yufala, antap long ol rul ya we i mas gat. Hemia ol rul ya. Bambae yufala i no kakae ol kakae ya we man i yusum finis blong mekem wosip long ol narafala god. Bambae yufala i no kakae blad. Bambae yufala i no kakae anamol we man i jokem nek blong hem nomo, we blad i stap yet long mit blong hem. Mo bambae yufala i no mekem nogud wetem woman. Sipos yufala i folem ol rul ya, bambae yufala i go long stret rod.” (Ol Wok 15:28, 29) Blong gohedgud long saed blong speret, yumi mas stap longwe long ol gyaman skul, blokem fasin blong yusum blad long rod we i no stret (olsem blad transfyusen), mo blokem rabis fasin long saed blong seks. Mo ating samting ya bambae i mekem bodi blong yumi i stap strong tu.

17. (a) ?Olsem wanem Setan i stap pulum ol man tede wetem “ol tok haed” blong hem? (b) ?Yumi mas tingting olsem wanem long ol “tok haed” ya blong flas wol ya blong Setan?

¹⁷ Tede Setan i stap yusum sam narafala “tok haed” tu. Hem i stap yusum ol flas mo waes tok blong ol man we oli gat hae save. Ol man ya oli talem se ol rabis fasin oli oraet nomo, oli talemaot ol tingting we i no stret nating, olsem wok blong ol rabis speret mo ‘evolusen.’b ?Wanem tingting blong God we hem i waes olgeta, long saed blong ‘ol tok haed ya’? Aposol Pol i talemaot tok blong God se: “Waes blong ol man we oli gat waes, bambae mi mekem i lus olgeta.” “Ol tingting blong God we man i no save faenemaot” oli narakaen olgeta. I isi blong kasem save long ol, oli klia, mo oli tajem hat blong man. Ol Kristin we oli waes oli blokem ‘ol tok haed’ blong flas wol ya blong Setan. Tingbaot, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”—1 Korin 1:19; 2:10; 1 Jon 2:17.

18. ?Ol Kristin we tabu speret i makemaot olgeta, nao oli holem wok blong olgeta gogo kasem en, Jisas bambae i givim wanem blesing long olgeta? ?Taem olgeta ya oli laef bakegen long ded, bambae oli kasem wanem blesing long Amageden?

¹⁸ Nao Jisas i talem sam gudfala toktok we i leftemap tingting blong ol Kristin long Tuatira. Mo ol toktok ya i save enkarajem ol Kristin tede we tabu speret i makemaot olgeta. Hem i se: “Long olgeta we bambae oli win long faet blong olgeta, we bambae oli holem wok we mi givim long olgeta gogo kasem en blong hem, mi bambae mi givim paoa ya long olgeta we Papa blong mi i givim long mi. Bambae mi leftemap olgeta blong oli hae moa long ol narafala man long wol, nao bambae oli rul long olgeta. Nao wokingstik blong olgeta we i saen blong haenem blong olgeta, hem bambae i olsem wan aean, we i naf blong brekem bodi blong ol man blong evri ples, olsem we aean i save smasem graonpot we i brobrok olgeta.” (Revelesen 2:26, 27) !Tru ya, hemia i wan nambawan blesing! Olgeta we tabu speret i makemaot olgeta finis, nao oli win long faet blong olgeta, bambae oli kasem paoa, taem oli laef bakegen long ded. Bambae oli givhan long Jisas blong yusum ‘wokingstik we i olsem wan aean,’ blong smasem ol stronghed nesen long Amageden. Taem Kraes i smasem ol enemi blong hem olsem we aean i save smasem graonpot we i brokbrok olgeta, paoa blong ol bigfala nyuklia bom long ol nesen ya bambae i nating nomo.—Ol Sam 2:8, 9; Revelesen 16:14, 16; 19:11-13, 15.

19. (a) ?Hu ya “moningsta ya”? ?Olsem wanem bambae Jisas i givim hem long olgeta we oli win long faet blong olgeta? (b) ?Wanem samting i leftemap tingting blong bigfala kampani tu?

¹⁹ Jisas i gohed moa, i se: “Mo bambae mi givim moningsta tu long olgeta.” (Revelesen 2:28) Biaen Jisas i eksplenem mining blong “sta” ya, i se: “Mi mi kamaot long laen blong olfala ya bifo, Deved, mi mi wan laen blong hem. Mi mi moningsta ya we i stap saengud.” (Revelesen 22:16) Yes, Jisas nao i fulumap profet tok ya we Jeova i fosem Balam blong talemaot, se: “Tru ya, wan sta bambae i kamaot long laen blong Jekob. Mo wokingstik blong king bambae i stanap long laen blong Isrel.” (Namba 24:17) ?Olsem wanem Jisas bambae i givim “moningsta ya” long olgeta we oli win long faet blong olgeta? Jisas i mekem olsem taem hem i givim hem wan long olgeta. Hem i pulum olgeta oli stap kolosap long hem, oli fren blong hem we oli kolosap moa i bitim ol narafala man. (Jon 14:2, 3) !Tru ya, presen ya i wan bigfala samting we i pulum olgeta blong stanap strong gogo kasem en! Bigfala kampani tu i glad blong save we “moningsta ya we i stap saengud” bambae hem i yusum paoa blong hem long Kingdom blong hem, i no longtaem, blong mekem wol ya i kam Paradaes.

Stap Tru Long God

20. ?Wanem sam samting we oli kamaot long Krisendom we oli mekem yumi tingbaot sam slak fasin blong kongregesen blong Tuatira?

²⁰ Mesej ya i mas leftemap tingting bigwan blong ol Kristin long Tuatira. Tingbaot: Pikinini blong God long heven we i kasem bigfala paoa finis, hem wan i toktok long ol Kristin ya long Tuatira long saed blong sam problem blong olgeta. Yumi save se sam long kongregesen oli mas akseptem ol gudfala toktok ya we i blong lidim olgeta. Mesej ya we i longfala moa i bitim ol narafala mesej, i givhan long yumi blong luksave trufala Kristin kongregesen tede tu. Long 1918, taem Jisas i kam blong jekemap haos blong Jeova, bighaf blong ol man long ogenaesesen we oli talem se oli Kristin, oli no klin. Oli stap wosip long aedol mo oli stap joen long sam fasin blong wol mo ol gyaman skul. (Jemes 4:4) Bilif blong samfala i stanap long tijing blong sam stronghed woman we oli laef biaen long yia ya 1800. Hemia ol woman olsem Ellen White we hem i blong skul Sevendei Adventis mo Mary Baker Eddy we hem i blong skul blong ol Kristin Sayentis, mo ol woman we i no longtaem oli girap, oli prij long ol skul. (Ridim defren fasin long 1 Timote 2:11, 12.) Insaed long ol defren kaen Katolik skul, plante taem ol man oli givim ona long Meri fastaem long God mo Kraes. Jisas i no ona long Meri olsemia. (Jon 2:4; 19:26) ?Ol ogenaesesen ya we oli letem paoa blong ol woman ya i rul long olgeta oli rili Kristin man?

21. ?Mesej blong Jisas long kongregesen blong Tuatira i tijim wanem lesen long yumi?

²¹ Olgeta Kristin wanwan, nating we oli blong grup ya we i olsem Jon bifo no blong ol narafala sipsip, oli mas tingtinggud long mesej ya. (Jon 10:16) Maet samfala oli wantem folem isi rod, olsem ol man we oli folem ‘Jesebel’ long Tuatira. I gat sam samting we oli save pulum yumi blong brekem loa blong God tu. Tede, plante Kristin oli fesem traem ya long saed blong blad transfyusen no fasin blong kakae blad. Maet samfala i ting se sipos oli wok strong long wok blong prij mo oli givim tok long kongregesen, samting ya i givim raet long olgeta blong slak long sam narafala fasin, olsem fasin blong lukluk sam video mo sinema we oli soemaot ol raf mo rabis fasin, no blong dring alkol i bitim mak. Woning we Jisas i givim long ol Kristin long Tuatira i talem long yumi se yumi no gat raet blong mekem olsemia. Jeova i wantem se yumi klin, yumi givim ful laef blong yumi i go long hem. Hem i no wantem we wosip blong yumi i hafhaf, olsem plante Kristin long Tuatira.

22. ?Olsem wanem Jisas i makem long yumi se yumi mas lesingud?

²² Lastok blong Jisas long mesej ya i olsem: “Man we i gat sora blong hem i mas lesingud long tok we Tabu Speret i stap talem long ol [kongregesen].” (Revelesen 2:29) Hemia namba fo taem we Jisas i talem samting ya bakegen. Mo biaen long ol nekis tri mesej hem i yusum sem toktok bakegen. ?Sora blong yu i rere blong lesingud long toktok ya? Oraet, yu mas gohed blong lesingud long ol advaes we God i stap givim from tabu speret, tru long ol man we hem i stap yusum.

[Ol Futnot]

[Tok Blong Pija Long Pej 51]

Tede, ol gudfala sista oli mekem bighaf blong wok blong prij. Semtaem, oli sapotem tiokratik oda wetem tingting daon