?Hu i Rili Rulum Wol?

Plante man bambae oli ansa long kwestin ya antap, long wan tok nomo—se God. Be i gud blong save, Baebol i no talem we Jisas Kraes no Papa blong hem tufala nao i rili rulum wol ya. I defren olgeta, Jisas i talem se: “Naoia bambae God i brekem paoa blong masta blong wol ya Setan.” Mo hem i talem tu se: “Setan ya we i masta blong wol ya, hem i stap kam. Hem i no gat paoa long mi.”—Jon 12:31; 14:30; 16:11.

Taswe rula blong wol ya i enemi blong Jisas. ?Hem i hu?

Wan Pruf Long Ol Fasin Blong Wol

Nating se ol man oli stap traehad blong mekem ol gudfala samting, wol i kasem plante trabol long olgeta histri we i pas finis. Samting ya i mekem sam man oli wari, olsem David Lawrence, man ya blong raetem buk bifo, i se: “ ‘Pis long wol’—kolosap evri man oli wantem. ‘Mekem i gud long olgeta man’—kolosap olgeta man long wol oli wantem mekem samting ya. ?Be wanem i rong? ?From wanem faet i stap kamaot, nating se ol man oli gat ol tingting ya insaed long olgeta?”

?Ating samting ya i narakaen? Ol man oli wantem stap long pis, be oli no stap laeklaekem olgeta mo oli stap faet agens long olgeta—mo wetem nogud fasin. Tingbaot ol nogud fasin blong kilim man i ded. Ol man oli stap yusum ol posen gas, ol nogud kalabus, ol masket blong sutum faea, ol faea bom, mo ol narafala nogud fasin blong kilim man i ded mo fasin blong faet blong mekem man i harem i nogud gogo i ded we i no gat sore nating.

?Yu ting se ol man, we oli stap wantem pis mo gladtaem, olgeta nomo oli naf blong tingbaot ol nogud fasin ya blong mekem agens long narafala man? ?Wanem paoa i pusum ol man blong mekem ol nogud fasin olsem no i pulum olgeta gogo oli oli harem se oli mas mekem ol samting we oli nogud? ?Samtaem yu stap tingbaot sipos i gat sam rabis paoa we man i no save luk oli stap kontrolem ol man blong oli mekem ol raf fasin ya?

Ol Rula Blong Wol Ya Oli Kam Long Klia Ples

I no nid blong stap talem prapa tingting blong yumi long samting ya, from we Baebol i soemaot klia se i gat wan man we i waes, ol man oli no save luk hem, i stap kontrolem ol man mo ol nesen. Baebol i se: “Olgeta man blong wol oli stap long paoa blong Setan.” Mo Baebol i talem se: “Nem blong hem ‘Setan’ no ‘Man we i agensem man’. Hem i gyaman long olgeta man long wol finis, i lidim olgeta oli go krangke.”—1 Jon 5:19; Revelesen 12:9.

Taem “Setan i traem [Jisas]” wan taem, Jisas i no talem se Setan i no rula blong wol ya, no gat. Baebol i eksplenem wanem i hapen. “Nao bakegen, Setan i tekem Jisas i go antap long wan bigfala hil, nao i soemaot long hem olgeta kantri long wol ya wetem ol gudgudfala samting we oli gat. Nao i talem long hem, i se ‘Olgeta samting ya bambae mi mi givim long yu, sipos yu foldaon long mi, yu mekem wosip long mi.’ Be Jisas i ansa long hem, i se ‘Yu goaot yu, Setan.’ ”—Matyu 4:1, 8-10.

Tingbaot samting ya. Setan i traem Jisas taem hem i wantem givim “olgeta kantri long wol ya” long hem. ?Yu ting se samting ya i rili wan traem long Jisas sipos Setan i no rula long ol kantri ya? No gat, bambae i no rili wan traem long Jisas ya. Mo makem, Jisas i no talem long Setan se olgeta gavman blong wol oli no blong Setan, no gat, be hem i save talem samting ya long Setan sipos ol kantri oli no stap aninit long paoa blong Setan. !Taswe, Devel Setan we ol man oli no save luk hem, hem i rili rula blong wol ya! Baebol i singaotem hem se “rabis god blong wol ya.” (2 Korin 4:4) ?Be, olsem wanem wan rabis man olsem i kasem bigfala paoa ya?

Man ya we biaen i kam Setan, fastaem hem i wan enjel we God i wokem, be hem i kam jelas from haenem blong God. Hem i agensem raet ya we God i gat blong rul. Blong mekem samting ya hem i toktok tru long maot blong snek blong toktok long faswan woman, Iv blong trikem hem mo hem i pulum hem mo hasban blong hem, Adam, blong tufala i folem hem bitim we tufala i obei long God. (Jenesis 3:1-6; 2 Korin 11:3) Hem i talem tu se hem i save tanem tingting blong olgeta pikinini we oli no bon yet long Adam mo Iv blong oli tanem baksaed long God. Taswe God i letem taem long Setan blong traem pruvum tok blong hem, be Setan i no save mekem.—Job 1:6-12; 2:1-10.

I gud blong makem se, Setan i no stap rulum wol ya hem wan nomo. Hem i pulum plante narafala enjel tu blong oli joen wetem hem blong agensem God. Olgeta ya oli kam olsem ol rabis enjel, oli stap halpem Setan blong oli mekem ol nogud fasin. Baebol i tokbaot olgeta taem hem i givim woning long ol Kristin se: “Taem Setan i stap wokem ol gyaman trik blong hem, be bambae yufala i save stanap. Olgeta ya we yumi stap faet agens long olgeta, long laef ya blong yumi, oli no man. Yumi stap faet agens long . . . ol jif blong ol devel we oli stampa blong ol tudak long wol ya, mo ol rabis devel we oli stap olbaot long wol.”—Efesas 6:11, 12.

Blokem Ol Rabis Speret

Olgeta rabis rula blong wol ya we ol man oli no save luk olgeta, oli wantem gyaman long olgeta man, oli wantem tanem tingting blong ol man blong oli no wosip long God. Wan rod we ol rabis speret oli stap yusum blong mekem olsem, hemia taem oli sapotem tingting ya se man i stap laef afta we hem i ded finis, nating se Tok blong God i soemaot klia se taem man i ded hem i no save wan samting. (Jenesis 2:17; 3:19; Esikel 18:4; Ol Sam 146:3, 4; Eklesiastis 9:5, 10) Olsem nao, wan rabis speret, i save tekem voes blong man we i ded finis, maet i save toktok wetem ol famle no ol fren blong man ya we i ded finis, maet hem i yusum wan kleva no hem i mekem “voes” i kamaot long ples blong ol speret. !“Voes ya” i gyaman nomo, hem i olsem voes blong man ya we i ded finis, be rili hem i wan rabis enjel!

Taswe sipos yu harem wan “voes” olsem, yu no mas letem samting ya i trikim yu. Yu no mas lesin long samting we hem i talem, mo yu mas talem olsem Jisas, se: “!Yu goaot yu, Setan!” (Matyu 4:10; Jemes 4:7) Yu no mas traem faenemaot sam samting long saed blong ples blong ol speret ya blong mekem se yu joen wetem ol rabis speret. Fasin ya i olsem we yu wok wetem ol rabis speret, mo God i givim woning long ol man we oli stap wosip long hem blong oli no joen long enikaen fasin we i olsem. Baebol i blokem fasin blong “man blong talemaot ol samting we oli stap haed, . . . no man we i go luk kleva, no man we i stap soemaot ol samting we bambae oli save kamtru, no man we i wantem toktok wetem ol dedman.”—Dutronome 18:10-12; Galesia 5:19-21; Revelesen 21:8.

From we fasin blong wok wetem ol rabis speret i mekem man i stap aninit long paoa blong ol rabis enjel, taswe yu mas blokem ol wok blong hem, nating se i luk olsem pleplei, no yu save glad long hem. Hemia ol fasin ya blong lukluk insaed long glas, yusum ol wija bod, ESP, ridim ol mak blong han, no fasin blong lukluk ol sta. Ol rabis speret oli save mekem ol noes tu mo ol samting blong fraet oli stap hapen long haos we oli stap long hem.

Mo tu, ol rabis speret oli wok long ol slak fasin blong ol man we oli no stretgud olgeta taem oli yusum ol buk, sinima, video we oli stap soem ol rabis fasin mo ol krangke fasin long saed blong seks. Ol devel oli save se sipos man i no tekemaot ol rong tingting ya long tingting blong hem bambae hem i stap oltaem long tingting blong hem mo bambae i lidim man blong mekem rabis fasin—olsem ol devel oli bin mekem.—Jenesis 6:1, 2; 1 Tesalonaeka 4:3-8; Jud 6.

Tru ya, plante man bambae oli laf long tingting ya se ol rabis speret oli stap rulum wol ya. Be yumi no sapraes from oli no bilif, Baebol i talem se: “Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:14) Nambawan trik blong hem i blong mekem ol man oli no luksave se hem mo ol rabis enjel blong hem oli rili stap. !Be yu no mas foldaon long trik ya! Devel Setan mo ol rabis enjel blong hem oli rili stap, mo yu mas gohed blong blokem olgeta oltaem.—1 Pita 5:8, 9.

!Yumi glad se i no longtaem Setan mo ol rabis speret blong hem bambae oli no moa stap! Baebol i talem se: “Mo wol ya [wetem ol rabis speret rula] . . . oli stap lus. Be man we i stap mekem ol samting we God i wantem, hem i stap we bambae i no save lus samtaem.” (1 Jon 2:17) !Bambae i wan gudfala samting blong man ya we i gat rabis paoa i lus! Taswe i gud blong stap long medel blong ol man we oli stap mekem wil blong God mo haremgud long laef we i no save finis long nyufala wol blong God we stret fasin i stap long hem.—Ol Sam 37:9-11, 29; 2 Pita 3:13; Revelesen 21:3, 4.

Oli yusum Baebol long Bislama mo New World Translation of the Holy Scriptures.

[Tok Blong Pija Long Pej 4]

?Yu ting se Setan i save givim olgeta kantri long wol long Jisas sipos oli no blong hem?