Stadi 8

Famle Laef We i Mekem God i Glad

?Wanem wok blong hasban insaed long famle? (1)

?Hasban i mas mekem wanem fasin long waef blong hem? (2)

?Wanem wok blong wan papa? (3)

?Wanem wok blong waef insaed long famle? (4)

?Jeova i askem ol papa mama mo ol pikinini blong mekem wanem? (5)

?Baebol i talem wanem long saed blong fasin blong seraot mo divos? (6, 7)

1. Baebol i talem se hasban i hed long famle blong hem. (1 Korin 11:⁠3) Hasban i mas gat wan waef nomo. Tufala i mas mared stret folem loa.​—⁠1 Timote 3:2; Taetas 3:⁠1.

2. Hasban i mas laekem waef blong hem olsem we hem i stap laekem hem wan. Hem i mas mekem long waef blong hem olsem we Jisas i mekem long ol man blong hem. (Efesas 5:​25, 28, 29) Hem i neva mas kilim waef blong hem, no mekem i nogud long hem long wan narafala fasin. Be, hem i mas soem ona mo respek long hem.​—⁠Kolosi 3:19; 1 Pita 3:7.

3. Wan papa i mas wokhad blong lukaotgud long famle blong hem. Hem i mas givim kakae, klos, mo haos long waef mo ol pikinini blong hem. Mo tu, hem i mas givim olgeta samting we famle blong hem i nidim long saed blong speret. (1 Timote 5:⁠8) Hem i lidim famle blong hem mo i halpem olgeta blong lanem moa long saed blong God mo ol stampa tingting blong Hem.​—⁠Dutronome 6:​4-9; Efesas 6:⁠4.

4. Waef i mas givhangud long hasban blong hem. (Jenesis 2:18) Hem i mas halpem man blong hem blong tijim mo trenem ol pikinini blong tufala. (Proveb 1:⁠8) Jeova i wantem se waef i mas lukaotgud long famle blong hem wetem lav. (Proveb 31:​10, 15, 26, 27; Taetas 2:​4, 5) Hem i mas gat bigfala respek long hasban blong hem.​—⁠Efesas 5:​22, 23, 33.

5. God i wantem se ol pikinini oli mas obei long papa mama blong olgeta. (Efesas 6:​1-3) Hem i wantem se ol papa mama oli mas tijim mo stretem ol pikinini blong olgeta. Ol papa mama oli mas spenem taem wetem ol pikinini blong olgeta mo stadi Baebol wetem olgeta. Oli mas givim olgeta samting we oli nidim long saed blong speret mo filing. (Dutronome 11:​18, 19; Proveb 22:​6, 15) Blong stretem pikinini, ol papa mama oli neva mas yusum fasin we i strong tumas mo we i nogud.​—⁠Kolosi 3:⁠21.

6. Taem man mo woman we i mared tufala i faenem se i hadwok blong joengud, tufala i mas traem folem ol advaes blong Baebol. Baebol i pusum yumi blong soem lav mo blong fogivim narafala. (Kolosi 3:​12-14) Tok blong God i no pulum tufala blong seraot, olsem we hemia rod blong winim ol smol trabol we oli kamaot. Be maet waef i jusum blong lego hasban blong hem sipos (1) hasban i no wantem givim ol samting we famle blong hem i nidim, (2) sipos hasban i kilim hem nogud mekem se helt mo laef blong hem i stap long denja, no (3) sipos hasban i agensem hem strong we i blokem hem fulwan blong mekem wosip long Jeova.​—⁠1 Korin 7:​12, 13.

7. Man mo woman we i mared, tufala i mas stap tru long tufala. Sipos wan hasban no waef i karem wan narafala man no woman, hem i mekem sin agensem God mo agensem hasban no waef blong hem. (Hibrus 13:⁠4) Wan Kristin i gat raet blong divos mo mared bakegen from risen ya nomo, hemia sipos hasban no waef blong hem i karem wan narafala man no woman. (Matyu 19:​6-9; Rom 7:​2, 3) Jeova i no laekem nating we man mo woman i divos from risen we i no stanap long Baebol, nao oli go mared wetem wan narafala man no woman bakegen.​—⁠Malakae 2:​14-16.

[Tok blong pija long pej 17]

God i wantem se ol papa mama oli mas tijim mo stretem ol pikinini blong olgeta

[Tok blong pija long pej 17]

Wan papa we i gat lav i givim olgeta samting we famle blong hem i nidim long saed blong bodi mo speret