?Wanem Mining Blong Ol Trabol Ya?

JISAS KRAES i talem sam saen we bambae oli soemaot se “en blong fasin blong laef blong wol ya i kam” hemia faet, kakae i sot, sik, mo graon i seksek.—Matiu 24:1-8, NW; Luk 21:10, 11.

Stat long yia 1914, i gat ol faet oli kamkamaot bitwin long ol kantri mo ol laen blong man. Plante faet oli stat from we ol lida blong skul oli pusum nus blong olgeta i go long politik, mo long taem blong yumi, wok blong ol teroris i mekem plante faet i stat.

Nating se save blong ol saentis i givhan long ol man blong kasem moa kakae, be plante handred milian man yet oli sot we oli sot long kakae. Evri yia, plante milian man oli ded from we oli no gat kakae.

Ol strong sik tu oli haf blong saen we Jisas i givim. Afta Wol Wo Wan, wan strong kof i tekemaot laef blong 21 milian man. Bifo long taem ya, i gat sam strong sik long wanwan ples blong wol. Be strong kof ya i kasem evri kona blong wol wetem ol aelan we oli stap farawe tu. Naoia AIDS i stap kasem plante ples blong wol hareap nomo, mo ol sik olsem tibi, malaria, sitsitwota, oli stap gohed blong spolem fulap man long ol pua kantri.

Evri yia, i gat bitim 10,000 ripot oli kamaot se graon i seksek, samtaem i seksek bigwan, samtaem i smol nomo. Nating se naoia i gat plante mesin blong makem paoa blong ol etkwek mo blong ripotem olgeta, be plante taem yumi harem long nius se graon i seksek bigwan long wan ples we i gat fulap man long hem.

Narafala samting we Baebol i talem, hemia se: “Be yu mas save samting ya se, long ol las dei bambae i wan taem we i strong tumas, bambae i had blong winim ol trabol. Bambae ol man oli save laekem olgeta nomo, bambae oli laekem mane tumas, oli man blong mekem flas, tingting blong olgeta i antap tumas, bambae oli tok nogud long God, oli no obei long papa mama blong olgeta, oli no man blong talem tangkiu, mo oli no gat fasin blong stap tru long God mo long narafala man. Bambae oli no gat sore long ol narafala man, oli no save agri wetem narafala, oli giaman blong spolem nem blong narafala, oli no save bos long tingting blong olgeta, oli wael olgeta. Bambae oli no laekem ol samting we oli gud, oli man blong spolem ol fren blong olgeta, oli stronghed, mo oli flas tumas. Bambae oli laekem moa ol pleplei, i winim we oli laekem God. Long fes blong ol man, i luk olsem we oli stap fasgud long God, be oli giaman nomo, oli no wantem nating we paoa blong God i wok long laef blong olgeta. Ol man olsem, bambae yu no go klosap nating long olgeta.”—2 Timoti 3:1-5, NW.

?Olsem wanem? ?Yu yu agri se yumi laef long ‘wan taem we laef i strong tumas mo i had blong winim ol trabol’?

?Yu yu luk we ol man oli laekem olgeta wan tumas, oli laekem mane tumas, mo flas tingting i stap lidim olgeta?

Ating i no gat man we i save agensem tok ya se ol man oli wantem mekem samting we olgeta nomo i wantem, oli no gat tangkiu, oli no wantem agri wetem narafala, mo oli no stap tru long God mo ol narafala.

?Yu yu save se ol pikinini we oli no wantem obei long papa mama blong olgeta mo ol man we oli no gat sore nating, oli stap kam plante moa long evri ples blong wol, i no long sam ples nomo?

Ating yu luksave finis se ol man blong wol ya oli laekem pleplei bitim mak, be oli no strong blong laekem ol samting we oli gud. Hemia nao ol tok we Baebol i talem finis blong soemaot tingting mo fasin blong ol man long “ol las dei.”

?Yu ting se yumi nidim sam moa saen yet blong makem taem ya we yumi stap laef long hem? Jisas i talem wan narafala samting we bambae i kamaot long taem ya, hemia se ol man blong hem bambae oli talemaot gud nius blong Kingdom long olgeta ples blong wol. (Matiu 24:14) ?Olsem wanem? ?Samting ya i kamtru?

Wan magasin we i stap tokbaot Baebol mo i kamaot oltaem, nem blong hem Wajtaoa, hem i talemaot gud nius blong Kingdom blong Jeova. Oli stap wokem magasin ya long plante moa lanwis i bitim ol narafala magasin long wol.

Evri yia, ol Witnes blong Jeova oli spenem bitim 1,000 milian aoa blong storian wetem ol man long saed blong Kingdom blong God.

Ol Witnes oli stap wokem ol buk long klosap 400 lanwis blong eksplenem Baebol, mo sam long ol lanwis ya oli blong ol smosmol kantri we i no gat plante man long olgeta. Ol Witnes blong Jeova oli mekem gud nius ya i go long olgeta kantri. Oli stap prij long plante smosmol aelan mo kantri we oli no gat bigfala paoa nating long wol ya. Raon long wol, ol Witnes oli gat wan program we oli folem, blong tijim ol man long saed blong Baebol.

Tru ya, gud nius blong Kingdom blong God i stap goaot long olgeta ples blong wol we i gat man. Hemia bambae i no jenisim tingting blong olgeta man evriwan, be bambae i givim wan witnes long olgeta. Ol man long evri ples oli stap kasem janis blong soemaot sipos i impoten long tingting blong olgeta blong save hu i wokem heven mo wol, mo sipos oli wantem obei long ol loa blong hem mo lavem ol man raonabaot long olgeta.—Luk 10:25-27; Revelesen 4:11.

Klosap nao, Kingdom blong God bambae i spolem ol rabis man long wol ya mo i mekem fulwol i kam wan paradaes.—Luk 23:43.

[Bokis blong pija long pej 6]

?Ol Las Dei Blong Wanem?

Ol las dei i no minim en blong olgeta man. Baebol i talem se ol man we oli mekem samting we God i wantem, oli gat janis blong kasem laef we i no save finis.—Jon 3:16, 36; 1 Jon 2:17.

Ol las dei i no minim en blong graon tu. Tok blong God i promes se graon we man i stap long hem bambae i stap blong olwe.—Ol Sam 37:29; 104:5; Aesea 45:18.

Ol las dei i minim en blong ol raf fasin mo ol fasin we oli no soem lav, wetem ol man we oli wantem gohed blong folem ol nogud fasin ya.—Ol Proveb 2:21, 22.

[Bokis/Foto blong pija long pej 7]

?Baebol Hem i Rili Tok Blong God?

Plante taem, ol profet long Baebol oli talem se: ‘Hae God i talem se.’ (Aesea 43:14; Jeremaea 2:2) Jisas Kraes, Pikinini blong God, hem tu i talem stret se ‘ol tok we hem i talem, oli no kamaot long hem.’ (Jon 14:10) Baebol i talem klia se: “Olgeta tok blong Baebol oli kamaot long God.”—2 Timoti 3:16.

Wan grup we i givimaot ol Baebol (Yunaeted Baebol Sosaeti) i talem se Baebol i stap long 2,200 lanwis. I no gat wan narafala buk we oli wokem long plante lanwis olsem. Kam kasem naoia oli givimaot fo taosen milian Baebol. Bakegen, i no gat wan narafala buk we oli givimaot plante olsem. ?Olsem wanem? ?Yu ting se hemia i stret long wan buk we i karem tok blong God i go long ol man?

Blong kasem save long plante moa samting we i pruvum se Baebol i kamaot long God, ridim japta 2 blong buk ya ?Wanem Samting We Baebol i Rili Tijim? we ol Witnes blong Jeova oli wokem.

Sipos yu ridim Baebol wetem tingting ya se i rili Tok blong God, samting ya bambae i givhan bigwan long yu.

[Bokis/Foto blong pija long pej 8]

?Wanem Ya Kingdom Blong God?

Hem i wan spesel gavman long heven, we Jeova, trufala God we i wokem heven mo wol, i putumap. —Jeremaea 10:10, 12.

Baebol i talem se God i givim paoa blong rul long Jisas Kraes. (Revelesen 11:15) Taem Jisas i stap long wol, hem i soemaot se God i givim bigfala paoa finis long hem. Paoa ya i mekem se hem i naf blong kwaetem win mo solwota, tekemaot olkaen sik, mo mekem dedman i laef bakegen. (Matiu 9:2-8; Mak 4:37-41; Jon 11:11-44) Profet tok blong Baebol we i kamaot long God i talem se God bambae i “putumap [Jisas] i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.” (Daniel 7:13, 14) Nem blong gavman ya hemia Kingdom blong heven. Naoia Jisas Kraes i stap rul long gavman ya long heven.

[Tok blong pija long pej 7]

Wok blong talemaot gud nius long olgeta ples blong wol