?Wanem Trutok Long Saed Blong God?

1, 2. ?From wanem i gud blong askem kwestin?

?YU YU luk finis, fasin blong ol pikinini blong askem kwestin? Taem ol pikinini oli jes lanem blong toktok, oli askem plante kwestin. Ol ae blong olgeta oli bigbigwan, oli lukluk yu mo oli askem olkaen kwestin olsem se: ?From wanem skae i blu? ?From wanem ol sta oli saen? ?Hu i tijim ol pijin blong singsing? Ating yu yu traem bes blong yu blong givim ansa long kwestin blong olgeta, be i no isi. Plante taem, afta we yu yu ansa, pikinini bambae i askem yet se: ?From wanem?

² I no ol pikinini nomo we oli stap askem kwestin. Taem yumi gruap, yumi gohed yet blong askem plante kwestin. Yumi mekem olsem from we yumi wantem faenem stret rod, yumi wantem save long ol denja we yumi mas lukaot long olgeta, no yumi askem kwestin jes blong save samting nomo. Be i luk olsem se plante man oli no moa askem kwestin, antap moa, ol kwestin we oli impoten tumas. I olsem se oli no moa traem faenem ansa blong sam samting.

 3. ?From wanem plante man oli no moa traehad blong faenem ansa long ol kwestin we oli impoten tumas?

³ Tingbaot kwestin ya we i stap long fored blong buk ya, kwestin we oli stap long fastok blong buk ya, mo bakegen, tingbaot ol kwestin we oli stap long fashaf blong japta ya. Hemia sam impoten kwestin we yumi save askem. Be plante man oli les finis blong traem faenem ansa blong ol kwestin ya. ?From wanem oli stop? ?Yu ting se Baebol i save givim ansa long olgeta? Samfala oli tingting se i had tumas blong traem kasem save long ol ansa we Baebol i givim. Sam narafala oli ting se sipos oli askem ol kwestin ya bambae ol man oli jikim olgeta, nao oli save sem. Mo samfala oli ting se i moagud ol lida blong skul mo ol tija nao oli ansa long ol kwestin ya. ?Olsem wanem long yu?

4, 5. ?Wanem sam long ol kwestin we oli impoten moa long laef blong yumi? ?From wanem i gud yumi traem faenem ansa long ol kwestin ya?

⁴ I sua se yu yu wantem faenem ansa long ol bigfala kwestin long saed blong laef. Ating samtaem yu yu bin tingbaot ol kwestin ya se: ‘?From wanem yumi laef? ?Laef we yumi gat naoia, hemia nomo, no bambae i gat narafala laef yet? ?God i olsem wanem?’ I gud blong askem ol kwestin olsem, mo i impoten we yu traehad gogo yu kasem ol ansa we oli stret mo tru. Tija ya Jisas Kraes, we ol man oli save long hem, i talem se: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.”​—Matiu 7:7.

⁵ Sipos yu “gohed blong lukaot” ansa long ol kwestin we oli rili impoten, bambae yu kasem plante gudgudfala frut from. (Ol Proveb 2:​1-5) Nomata wanem samting we maet ol man oli bin talem long yu, yu mas save se i gat ansa i stap, mo yu save faenem ol ansa ya long Baebol. I no hadwok tumas blong kasem save long ol ansa ya. Mo tu, ol ansa ya oli save givim wan gudfala fiuja long yu mo oli save mekem yu yu glad. Mo oli save halpem yu blong gat wan laef we i gud naoia. Fastaem, i gud yumi tokbaot wan kwestin we i bin mekem tingting blong plante man i fasfas.

 6. ?From wanem plante man oli ting se God i no kea long ol man we oli stap safa?

⁶ Maet plante man oli ansa long kwestin ya se ‘Nogat.’ Oli tingting se: ‘Sipos God i rili kea long man, bambae hem i no save letem wol ya i trabol olsem.’ Taem yumi lukluk raon long yumi, yumi luk se wol ya i fulap long ol faet, ol man oli no laeklaekem olgeta nating, mo oli harem nogud tumas. Mo tu, yumi wanwan, yumi stap sik, yumi safa, mo yumi lusum ol fren mo famle long ded. Taswe plante man oli talem se: ‘Sipos God i tingbaot yumi mo ol trabol we yumi kasem, bambae hem i blokem ol samting ya blong oli no hapen long yumi.’

 7. (a) ?Olsem wanem ol lida blong skul oli mekem plante man oli ting se God i no gat sore? (b) ?Baebol i tijim wanem long saed blong ol traem we oli mekem yumi safa?

⁷ Wan samting we i moa nogud yet, se samtaem, ol lida blong skul nao oli givim tingting long man se God i no gat sore. ?Oli mekem samting ya olsem wanem? Taem wan trabol i kasem man, ol lida blong skul oli talem se hemia wil blong God. I olsem we oli stap blemem God nao from ol rabis samting we oli stap hapen. ?Be tok ya long saed blong God, hem i tru? ?Baebol i tijim wanem? Jemes 1:13 (NTB) i ansa se: “Taem ol samting oli kam blong traem yufala, bambae yufala i no talem se, ‘Ol samting ya blong traem mi oli kamaot long God.’ From we i no gat samting nogud we i save kam traem God. Mo i no fasin blong God blong traem man.” Taswe, yumi neva mas ting se God nao i stamba blong ol nogud samting we i stap hapen long wol raonabaot long yumi. (Job 34:​10-12) I tru, God i letem ol trabol oli hapen long wol. Be fasin ya blong letem trabol i kam, i defren tumas long fasin ya blong mekem trabol.

8, 9. (a) ?Olsem wanem fasin ya blong letem trabol i stap, i defren tumas long fasin ya blong mekem trabol? (b) ?From wanem i no stret nating blong tok agensem desisen blong God blong letem man i jusum rod we i nogud?

⁸ Tingbaot wan papa we i waes mo i gat lav. Hem i gat wan pikinini boe we i bigman finis, be pikinini ya i stap yet long haos blong papa blong hem. Wan dei, pikinini ya i mekem stronghed nao i tekem olting blong hem mo i aot long haos. Papa blong hem i no blokem hem. Ale, pikinini ya i gohed folem rod blong hem, i mekem nogud fasin mo i kasem trabol. ?Yu ting se papa nao i stamba blong ol trabol we i kasem pikinini ya? Nogat. (Luk 15:​11-13) Long sem fasin, taem ol man oli jusum blong folem wan rod we i nogud, God i no blokem olgeta. Be biaen, taem ol man ya oli kasem trabol from nogud desisen blong olgeta, i no God we i stamba blong ol trabol ya. Tru ya, i no stret nating blong blemem God from olgeta trabol we i stap kasem ol man.

⁹ God i gat ol gudfala risen blong letem ol man oli gohed blong folem nogud rod we oli jusum. God i wokem olgeta samting, hem i waes mo i gat olgeta paoa, taswe, hem i no nid blong eksplenem ol risen ya long yumi man. Be from we God i lavem yumi, hem i wantem we yumi save long ol risen ya. Bambae yumi lanem moa long saed ya long Japta 11. Be naoia i gud yumi mekem tingting blong yumi i klia long samting ya se, God i no stamba blong ol trabol we yumi kasem. !Defren olgeta, hem nomo i save soem rod long yumi blong winim ol trabol!​—Aesea 33:2.

10. ?From wanem yumi save trastem God se bambae hem i karemaot ol nogud frut blong rabis fasin?

¹⁰ Wan narafala impoten samting we yumi mas tingbaot se, God i tabu. (Aesea 6:3) Hemia i min se olgeta tingting, fasin, mo aksen blong hem oli klin. I no gat rong i stap long hem. Taswe, yumi save trastem hem fulwan. Hem i defren olgeta long ol man, we plante taem oli save kam nogud. Nating se wan man i gat hae posisen mo i gat stret fasin, man ya i no gat paoa blong karemaot trabol we ol rabis man oli mekem. Be God i gat olgeta paoa. Hem i naf blong karemaot ol nogud frut blong rabis fasin, mo bambae hem i mekem olsem. !Yes, taem we God i tekem aksen, bambae hem i finisim ol trabol mo nogud fasin blong olwe!​—Ol Sam 37:​9-11.

11. (a) ?Wanem tingting blong God taem gudfala man i safa? (b) ?Wanem tingting blong God taem hem i luk trabol we yu yu stap kasem?

¹¹ Taem ol trabol ya i stap gohed yet, God i stap luk ol samting we i hapen long wol mo long laef blong yu. ?Wanem tingting blong hem long ol samting ya? Baebol i tijim se God i “laekem ol fasin we i stret.” (Ol Sam 37:28) Samting ya i min se hem i tingting plante long wanem samting we i stret mo wanem samting we i no stret. Hem i no laekem taem man i mekem i no stret long narafala. Baebol i talem se taem rabis fasin i kam plante long wol ya bifo, “tingting blong [God] i kam nogud” from samting we hem i luk. (Jenesis 6:​5, 6) God i no jenis. (Malakae 3:6) Tede tu, hem i no laekem blong luk we ol man oli stap safa long evri ples long wol. Hem i no laekem nating blong luk we man i stap harem nogud. Baebol i talem se: ‘Oltaem hem i stap tingbaot yumi.’​—1 Pita 5:7.

12, 13. (a) ?From wanem yumi save gat ol gudfala fasin olsem lav? ?Lav i pusum yumi blong tingting olsem wanem long saed blong ol samting we oli stap hapen long wol? (b) ?From wanem yu yu sua se God bambae i wantem finisim ol trabol long wol?

¹² ?Olsem wanem yumi save sua se God i no laekem blong luk man i safa? I gat sam nara pruf bakegen. Baebol i tijim se God i wokem ol man blong oli tekem fasin blong hem. (Jenesis 1:26) Taswe, sipos yumi ol man, yumi save wokem ol gudfala fasin, i min se God tu i gat ol gudfala fasin. Tingbaot: ?Yu yu harem gud taem yu luk we ol gudfala man oli stap safa? Sipos yu yu harem nogud taem yu luk we man i mekem i nogud long narafala man, yu save sua se God i harem nogud moa taem hem i luk samting ya.

¹³ Wan long ol beswan samting we ol man oli save mekem, hemia se oli save soem lav. Hemia tu wan fasin blong God. Baebol i tijim se “God i stamba blong fasin ya blong lavem man.” (1 Jon 4:8) Yumi gat lav from we God i gat lav. ?Yu ting se lav i save pusum yu blong wantem finisim fasin safa mo ol nogud fasin long wol? ?Sipos yu yu gat paoa blong mekem samting ya, bambae yu mekem? !I sua se bambae yu mekem! Taswe yu save sua se God tu bambae i finisim fasin safa mo ol nogud fasin long wol ya. Ol promes we yu bin ridim long fastok blong buk ya oli no ol drim nomo, mo oli no ol samting we yumi wantem nomo se i kamtru. Ol promes blong God oli rili samting we oli mas kamtru. Be blong yu bilif long ol promes ya yu mas save moa long saed blong God we i mekem ol promes ya.

14. ?Wanem nem blong God, mo from wanem i gud blong yusum nem ya?

¹⁴ ?Sipos yu wantem se wan man i save yu, wanem faswan samting we bambae yu mekem? Ating bambae yu talem nem blong yu long hem. ?Ale, olsem wanem long God? ?Hem i gat wan nem? Plante skul oli talem se nem blong hem “God” no “Masta” nomo. Be hemia i no ol prapa nem ya. Hemia ol taetel nomo, sem mak olsem ol taetel ya “king” mo “presiden.” Baebol i tijim se God i gat plante taetel. Sam long ol taetel ya hemia “God” mo “Masta.” Be, Baebol i tijim se God i gat prapa nem blong hem. Nem ya hem i Jehova. Ol Sam 83:18 (NW ) i talem se: “Plis yu mekem olgeta oli save se yu, we nem blong yu Jehova, yu nomo yu Hae God long olgeta ples long wol.” Sipos Baebol blong yu i no gat nem blong God long hem, i gud yu ridim toktok we i stap long Diksonari long pej 195-197 blong buk ya. Toktok ya i talem from wanem oli no raetem nem blong God long sam Baebol. Be wan samting we i tru long saed ya se, nem blong God i stap plante taosen taem long ol olfala hanraet blong Baebol. Taswe, Jehova i wantem we yu save nem blong hem mo yu yusum nem ya. Yes, i olsem we hem i yusum Baebol blong talemaot hem long yu.

15. ?Nem ya Jehova i soemaot wanem long saed blong God?

¹⁵ Nem ya we God i karem, i gat bigfala mining. Nem ya Jehova, i minim se God i save mekem eni promes we hem i talem i kamtru, mo hem i save wok folem eni plan we i stap long tingting blong hem.a Nem blong God i spesel, i no gat nara nem we i olsem. Nem ya i blong God nomo. I gat plante samting we oli soem se Jehova i spesel, i no gat narafala man olsem hem. ?Olsem wanem hem i spesel?

16, 17. ?Yumi lanem wanem long saed blong Jehova from ol taetel ya: (a) God we i gat ‘Olgeta Paoa’? (b) ?‘King we rul blong hem i stap gogo i no save finis’? (c) ?“Man we i Wokem olgeta samting”?

¹⁶ Taem yumi ridim Ol Sam 83:18 yumi luk we hem i tokbaot Jehova se: “Yu nomo yu Hae God.” Long sem fasin, Baebol i tokbaot Jehova se hem nomo i gat “olgeta paoa.” Revelesen 15:3 i talem se: “[Jehova God], yu yu gat olgeta paoa. Ol wok blong yu oli bigwan olgeta, mo oli gudfala tumas. Yu yu King blong olgeta kantri mo ol fasin blong yu oli stret gud, oli tru.” Taetel ya, God we i gat ‘Olgeta Paoa’, i tijim yumi se Jehova i gat moa paoa i bitim eni narafala laef samting. I no gat narafala man we paoa blong hem i sem mak long paoa blong Jehova; hem nomo i gat paoa we i bigwan olgeta. Long 1 Timoti 1:​17, Jehova i karem taetel ya “King we rul blong hem i stap oltaem nomo, gogo i no save finis.” Taetel ya i mekem yumi tingbaot wan narafala samting we i mekem se i no gat man i olsem Jehova. Yes, Jehova nomo we i no gat stat blong hem, hem i bin stap laef olwe. Ol Sam 90:2 i talem se: “Yu yu God we yu stap we yu stap, mo bambae yu save stap oltaem, gogo i no save finis.” ?Yu no ting se ol tok ya oli mekem yumi harem se yumi smol, yumi nating nomo, mo yumi wantem ona long Jehova? !Si!

¹⁷ Wan narafala samting we i mekem se i no gat man i olsem Jehova, hemia se hem nomo i Wokem olgeta samting. Long Revelesen 4:11 yumi ridim se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” !Evri samting we yu save tingbaot, olsem ol enjel long heven, ol sta we oli fulumap skae long naet, ol frut we oli hang long ol tri, mo ol fis we oli swim long solwota no reva, olgeta samting ya oli stap olsem from we Jehova nao i mekem olgeta!

18. ?From wanem sam man oli harem se oli no save kam klosap long God? ?Be Baebol i tijim wanem?

¹⁸ Sam man oli harem se oli fraet lelebet long Jehova, taem oli ridim ol toktok we i soemaot ol nambawan fasin blong Hem. Oli ting se God i hae tumas mo se oli no save kam klosap long hem, mo oli tingting tu se God i no stap tingbaot olgeta from we oli smol tumas. ?Be tingting ya i stret? Nogat. Baebol i tijim samting we i defren olgeta. Hem i tokbaot Jehova se: “God ya i no stap longwe long yumi nating.” (Ol Wok 17:27) Mo tu, Baebol i pulum yumi blong mekem olsem se: “Yufala i mas stap klosap long God, nao hem bambae i kam stap klosap long yufala.”​—Jemes 4:8.

19. (a) ?Olsem wanem yumi save kam klosap long God, mo wanem gudfala blesing we bambae yumi kasem from? (b) ?Wanem sam gudfala fasin blong God we oli pulum yu yu kam long hem?

¹⁹ ?Yu yu save kam klosap long God olsem wanem? Faswan samting, i gud yu gohed blong mekem samting ya we yu stap mekem naoia​—gohed blong lanem moa long saed blong God. Jisas i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) !Yes, Baebol i tijim yumi se taem yumi lanem moa long saed blong Jehova mo Jisas, yumi save kasem ‘laef we i no save finis’! Olsem yumi luk finis, “God, hem i stamba blong fasin blong lavem man.” (1 Jon 4:16) Jehova i gat plante narafala gudfala fasin we oli save pulum yumi i go long hem. Baebol i talem se Jehova i wan God we i ‘gat sore long man, mo i stap givhan long man long gladhat blong hem, hem i no save kros kwik, oltaem hem i stap lavem man mo oltaem hem i stap holemstrong promes blong hem.’ (Eksodas 34:6) Hem i ‘gud tumas long yumi, i stap fogivim yumi, i stap tekemaot ol sin blong yumi.’ (Ol Sam 86:5) God i stap mekem tingting blong hem i longfala. (2 Pita 3:9) Hem i stap tru long ol man blong hem. (Revelesen 15:​4, NW ) Moa we yu ridim Baebol, moa we bambae yu luk olsem wanem Jehova i soemaot ol fasin ya wetem plante narafala gudfala fasin blong hem bakegen.

20-22. (a) ?From we yumi no save luk God, samting ya i blokem yumi blong kam klosap long hem? Eksplenem. (b) ?Sam man we oli ting se oli stap halpem yu, maet oli mekem wanem? ?Be yu yu mas mekem wanem?

²⁰ I tru, yu no save luk God from we hem i wan spirit man. (Jon 1:18; 4:24; 1 Timoti 1:17) Be taem yu stadi Baebol mo yu lanem moa long saed blong hem, bambae yu save hem olsem wan trufala man. Olsem man blong raetem Sam i talem, bambae yu save “lukluk ol gudgudfala fasin blong hem.” (Ol Sam 27:4; Rom 1:20) Moa we yu lanem samting long saed blong Jehova, moa we bambae hem i kam olsem wan trufala man long tingting blong yu. Ale bambae yu lavem hem moa mo yu harem se yu stap klosap long hem.

²¹ Bambae yu kasem save moa from wanem Baebol i tijim yumi blong tingbaot Jehova olsem Papa blong yumi. (Matiu 6:9) Hem nao i givim laef long yumi, mo hem i wantem tu se yumi gat wan gudfala laef. I sem mak nomo long wan papa we i gat lav, nao i wantem we ol pikinini blong hem oli gat gudfala laef. (Ol Sam 36:9) Baebol i tijim tu se ol man oli save kam fren blong Jehova. (Jemes 2:23) Tingbaot samting ya: !Yu yu save kam wan fren blong God ya we i Wokem heven mo wol!

²² Taem yu stap stadi long Baebol, bambae i gat sam man we oli traem stopem yu. Ating olgeta ya oli wari se bambae yu jenisim ol bilif blong yu, ale oli ting se sipos oli blokem yu oli rili stap mekem i gud long yu. Be yu no mas letem wan man i blokem yu blong kam fren blong Jehova, hemia beswan fren we man i save gat.

23, 24. (a) ?From wanem i gud we yu gohed blong askem ol kwestin long saed blong samting we yu stap lanem? (b) ?Nekis japta bambae i tokbaot wanem samting?

²³ I gat sam samting we, fastaem, bambae yu no kasem save long olgeta. Yu nidim tingting daon blong askem narafala blong halpem yu, mo yu no mas letem sem i blokem yu blong askem help. Jisas i talem se i gud blong gat tingting daon, olsem wan pikinini. (Matiu 18:​2-4) Yumi save se ol pikinini oli askem plante kwestin. God i wantem we yu tu yu askem kwestin mo yu faenem ol ansa. Baebol i talem gudfala toktok long saed blong sam man long taem bifo we oli bin wantem tumas blong save God moa. Ol man ya oli jekem gud ol vas blong Baebol blong meksua se samting we oli stap lanem, hemia trutok.​—Ol Wok 17:11.

²⁴ Beswan rod blong save Jehova hemia blong stadi long Baebol. Baebol i wan buk we i defren olgeta long ol narafala buk. ?Hem i defren olsem wanem? Nekis japta bambae i tokbaot samting ya.