Jona i Kasem Save Long Fasin Sore Blong Jeova

JEOVA i wantem givim wan wok long profet blong hem, Jona. Hemia long ol yia 800 B.K.T., long taem ya we Jeroboam 2 i king long Isrel. Jona, hem i blong Gatefa, wan taon long graon blong ol pikinini blong Sebulan. (Josua 19:​10, 13; 2 King 14:⁠25) God i sanem Jona i go long bigfala taon blong ol man Asiria, Nineve, bitim 800 kilomita longwe long taon blong hem, long saed i go long not-is. Jona i mas givim woning long ol man Nineve se God bambae i spolem olgeta.

Maet tingting blong Jona i olsem: ‘?From wanem mi mas go long taon ya mo nesen ya? Ol man ya oli no givim ona long God. Ol man Asiria ya, we oltaem oli wantem mekem blad i ron, oli no olsem ol man Isrel. Oli neva mekem wan kontrak wetem Jeova. !Ol man blong rabis nesen ya oli save tingbaot woning blong mi olsem tok blong statem wan faet, nao bambae oli kam spolem Isrel! !Narafala man i save go, be mi, mi no save go! Bambae mi go kwik long Jopa, mi tekem wan sip, mo mi ronwe i go long narafala ples​—⁠mi go olwe long Tasas, long narasaed blong Gret Si. !Hemia nao samting we bambae mi mekem!’​—Jona 1:​1-3.

!Trabol Long Solwora!

Smoltaem biaen, Jona i kasem Jopa, wan haba long solwora blong Mediterenia. Hem i pem pasis blong hem, nao i jyam long wan sip we i aot blong go long Tasas, long Spen, bitim 3,500 kilomita longwe long Nineve, long saed i go long wes. Taem sip i stap long medel si, profet ya i wantem slip, ale i godaon insaed long sip, i slip. Smoltaem biaen, Jeova i mekem wan strong win i girap. Ol boskru oli fraet tumas, mo oli singaot long ol god blong olgeta wanwan blong oli givhan long olgeta. Solwora i rolem sip i go mo i kam, i leftemap i go antap mo i sakem i godaon, mekem se ol boskru oli sakem ol kago oli go long solwora, blong mekem sip i no moa hevi. Nating se i olsem, i luk olsem se bambae sip i draon. Nao Jona i harem we kapten i singaot strong, i se: “?From wanem yu stap slip? !Yu girap, singaot long god blong yu! Ating trufala God bambae i sore long yumi, nao bambae yumi no lus.” Jona i girap mo i go antap long dek.​—Jona 1:​4-6.

Ol boskru oli talem se: “Yufala i kam, yumi sakem daes. Olsem nao, bambae yumi faenemaot se hu man i stampa blong trabol ya.” Daes i soemaot se Jona nao i stampa blong trabol ya. Traem tingbaot Jona long taem ya. Tingting blong hem i trabol tumas, taem ol boskru oli talem se: “Plis, ?yu talem long mifala se hu nao i stampa blong trabol ya? ?Wanem wok blong yu, mo yu yu kam long weples? ?Wanem kantri blong yu, mo yu yu blong wanem laen?” Jona i talem se hem i wan Hibru, mo hem i wosip long “Jeova, we i God blong heven,” mo se hem i fraetgud mo i onagud long “Hemia we i wokem solwora mo graon.” Strongfala win ya i kasem olgeta from we hem i no obei, i no wantem tekem mesej blong God i go long Nineve, be i wantem ronwe long fes blong Jeova.​—Jona 1:​7-​10.

Ol boskru oli askem se: “?Bambae mifala i mekem wanem long yu, blong solwora i kam kwaet?” Solwora i kam moa raf. Nao Jona i talem se: “Yufala i holem mi, yufala i sakem mi i go long solwora, nao bambae solwora i kam kwaet. Mi mi save se from mi nao, bigfala win ya i kasem yufala.” Ol boskru oli no wantem sakem profet blong Jeova i go long solwora. Oli save se sipos oli sakem hem, bambae hem i ded. Taswe, oli traem blong mekem sip i go kasem soa. Be oli no winim, ale ol boskru oli singaot, se: “!O Jeova, plis yu no letem mifala i lus from sol blong man ya! !Yu no mekem we mifala i gat fol from blad blong stret man ya! !From we yu, O Jeova, yu mekem ol samting we yu yu glad long hem!”​—Jona 1:​11-​14.

!Oli Sakem Hem i Go Long Solwora!

Nao, ol boskru oli sakem Jona i go long solwora. Taem hem i draon i godaon long solwora, strong win ya i stat blong kam kwaet. Taem ol boskru oli luk samting ya, ‘oli fraet bigwan long Jeova, oli givim wan sakrifaes i go long hem mo oli mekem strong promes.’​—Jona 1:​15, 16.

Taem Jona i stap draon i go dip moa long solwora, i sua se hem i stap prea. Biaen, hem i harem olsem we hem i stap glis i gotru long wan ples we i sofsof. Nao hem i glis i go insaed long wan bigfala hol. !Hem i sapraes se, hem i save pulum win yet! Taem Jona i stap tekemaot ol gras blong solwora we i fas raon long hed blong hem, hem i luksave se hem i stap long wan ples we i narakaen olgeta. Yes, “Jeova i sanem wan bigfala fis i kam blong solemdaon Jona. Ale, Jona i stap insaed long bel blong bigfala fis ya long tri dei mo tri naet.”​—Jona 1:⁠17.

Jona i Prea Wetem Fulhat Blong Hem

Jona i gat taem blong prea, taem hem i stap insaed long bigfala fis. Sam long ol tok blong hem oli sem mak long sam tok blong Ol Sam. Biaen, Jona i raetemdaon ol prea blong hem, we oli soem se hem i harem nogud mo hem i sore from rong we hem i mekem. Eksampel, long tingting blong hem, bel blong fis bambae i kam Seol no beregraon blong hem. Taswe hem i prea olsem: “From we mi mi harem nogud tumas, taswe mi singaot long Jeova, nao hem i ansa long mi. Long bel blong Seol, mi mi singaot long yu blong yu halpem mi. Nao yu harem voes blong mi.” (Jona 2:​1, 2) Tufala Singsing Blong Asen​—⁠singsing ya we ol man Isrel oli singim taem oli stap wokbaot i go antap long Jerusalem evri yia blong mekem lafet​—⁠tufala i talemaot sem tingting.​—Ol Sam 120:1; 130:​1, 2.

Taem Jona i stap tingbaot olsem wanem hem i godaon long solwora, hem i prea se: “Taem yu [Jeova], yu sakem mi mi go long solwora, long hat [medel] blong dipsi, wan bigfala reva i stap raon long mi. Yu mekem ol bigbigfala wef oli brok antap long mi.”​—Jona 2:3; skelem wetem Ol Sam 42:7; 69:2.

Jona i fraet se bambae God i no moa save glad long hem from we hem i no obei. Hem i fraet tu se bambae hem i no save luk haos prea blong God bakegen. Hem i prea se: “Mo long saed blong mi, mi talem se: ‘!Yu yu ronemaot mi finis long fes blong yu! ?Olsem wanem mi save luk tabu haos prea blong yu bakegen?’ ” (Jona 2:⁠4; skelem wetem Ol Sam 31:22.) Samting we i hapen long Jona i nogud tumas. Taswe hem i talem se: “Wora i stap raon long mi go kasem sol blong mi [kolosap hem i ded]. Solwora i kavremap mi fulwan. Ol gras [blong solwora] oli fas long hed blong mi.” (Jona 2:⁠5; skelem wetem Ol Sam 69:⁠1.) Traem tingbaot trabol blong Jona. Hem i gohed blong talem se: “Mi mi godaon olgeta, mi stap long stampa blong ol bigfala hil [insaed long fis]. Ol bigfala doa blong graon [olsem hemia blong beregraon] oli blokem mi blong olwe. Be yu, O Jeova, God blong mi, yu tekemaot mi long hol, yu givim laef long mi [long namba tri dei].”​—Jona 2:6; skelem wetem Ol Sam 30:3.

Nating se Jona i stap long bel blong fis, hem i no gat tingting se: ‘Mi harem nogud tumas, mi no save prea.’ Be hem i prea se: “Jeova, taem sol blong mi i kam slak tumas insaed long mi [kolosap hem i ded], mi tingbaot yu nomo [wetem bilif se paoa mo fasin sore blong yu i bigwan bitim mak]. Nao prea blong mi i kasem yu long tabu haos blong yu.” (Jona 2:​7) Jeova i stap long haos blong hem long heven, nao i harem prea blong Jona, mo i sevem hem.

Long en blong prea blong Jona, hem i talem se: “Olgeta we oli stap wosip long ol gyaman god, [oli stap trastem ol pija blong ol gyaman god we oli ded], oli lego kaen fasin mo lav [oli lego Hemia we i stap soem fasin ya]. Be long saed blong mi, bambae mi stap talem tangkyu long yu oltaem [Jeova God], hemia i olsem sakrifaes we mi mi givim i go long yu. Samting we mi bin promes [naoia mo long ol narafala taem], bambae mi mekem. Jeova nomo i save sevem man.” (Jona 2:​8, 9; skelem Ol Sam 31:6; 50:14.) Profet ya, we i tanem tingting blong hem from rong we hem i mekem, i save se God nomo i gat paoa blong sevem hem long ded. Taswe, hem i talem (olsem King Deved mo Solomon i talem bifo) se Jeova nomo i save sevem man.​—Ol Sam 3:8; Proveb 21:31.

Jona i Obei

Afta we Jona i tingting plante mo i prea wetem fulhat blong hem, hem i harem wan paoa i pusum hem i gobak long sem rod we hem i bin pas long hem blong kam insaed long fis. Biaen, fis ya i traot, ale Jona i kamaot long sanbij. (Jona 2:⁠10) Jona i talem tangkyu tumas long God we i sevem hem. Ale naoia hem i obei taem God i talem long hem se: “Jona, yu girap, yu go long bigfala taon ya, Nineve, yu talemaot ol tok we mi talem long yu blong talemaot long olgeta.” (Jona 3:​1, 2) Jona i girap, i stat blong wokbaot from bigfala taon blong ol man Asiria. Taem hem i faenemaot wanem dei we hem i stap long hem, hem i kasem save se hem i bin stap tri dei long bel blong fis. Profet ya i wokbaot i go, i krosem Reva Yufretes long bigfala kona blong hem long wes. Ale, hem i wokbaot i go long is, i gokros long narasaed blong Mesopotamia long not, go kasem Reva Taegris. Mo biaen, hem i kasem bigfala taon ya.​—Jona 3:⁠3.

Jona i go insaed long bigfala taon ya Nineve. Hem i wokbaot i go krosem taon ya long wan dei, mo i talem se: “Fote dei nomo biaen, bambae Nineve i lus.” ?God i mekem wan merikel long Jona blong i toktok lanwis blong ol man Asiria? Yumi no save. Nating sipos hem i toktok long Hibru lanwis nao wan man i tanem i go long lanwis blong Asiria, be mesej blong hem i karem frut. Ol man Nineve oli stat blong bilif long God. Oli talemaot se bambae oli livim kakae mo putum ol rabis klos we oli somap long bag nomo, stat long olgeta we oli haeman, go kasem olgeta we oli no gat nem. Taem tok i kasem king blong Nineve, hem i girap long jea blong hem, i tekemaot ol klos blong king, i putum ol rabis klos we oli somap long bag nomo, nao i sidaon long ases blong faea.​—Jona 3:​4-6.

!Jona i sapraes tumas! King blong Asiria i sanem sam man blong karem mesej ya i go long evriwan se: ‘Yufala ol man mo woman, yufala ol anamol blong velej, ol buluk mo ol sipsip, yufala i no mas kakae wan samting nating. I no mas gat wan long yufala we i kakae. Mo yufala i no mas dring wora tu. Mo evriwan, oli mas putum ol klos we oli somap long bag nomo, ol man mo woman mo ol anamol blong velej. Nao yufala i mas prea strong long God mo yufala i kambak. Yufala evriwan i mas lego ol rabis fasin mo ol raf fasin blong yufala. Sipos yumi mekem olsem, ating bambae trufala God i jenisim tingting blong hem. Nao bambae hem i sore long yumi mo i no letem kros blong hem we i olsem faea i kasem yumi, i spolem yumi.’​—Jona 3:​7-9.

Ol man Nineve oli obei long oda blong king blong olgeta. Taem God i luk se oli lego ol rabis fasin blong olgeta, hem i sore tumas from bigfala trabol we hem i bin talem se bambae i mekem long olgeta. Ale hem i no mekem trabol ya i kamaot. (Jona 3:​10) From we oli tanem tingting blong olgeta, oli gat tingting daon, mo oli bilif, Jeova i jenisim tingting blong hem, ale i no spolem olgeta.

Profet We i Kros

Fote dei i pas mo i no gat wan samting i hapen long Nineve. (Jona 3:4) Taem Jona i luksave se bambae God i no spolem ol man Nineve, hem i no glad nating. Hem i kros we i kros, nao i prea se: “O, Jeova, taem mi mi stap long ples blong mi, mi tingbaot bisnes ya finis. Hemia nao risen from wanem mi ronwe i go long Tasas. Mi mi save se yu yu wan God we yu gat lav mo sore. Yu no save kros kwik mo yu kaen tumas long ol man, mo yu sore from trabol blong olgeta. Mo naoia, O Jeova, plis yu tekemaot laef blong mi. I moa gud we mi mi ded, i bitim we mi stap laef.” Blong ansa long hem, God i askem kwestin ya: “?Jona, i stret blong yu kam kros olsem?”​—Jona 4:​1-4.

Nao, Jona i girap, i goaot long taon. Hem i wokbaot i go long is saed, nao i wokem wansaed haos, blong i sidaon insaed long hem, i haed long san. Hem i stap wet blong luk se wanem bambae i hapen long Nineve. Nao, Jeova i sore long hem, ‘i mekem wan rop i gru, i go antap long haos we Jona i wokem, blong haedem hem long san, mo blong tekemaot hem long trabol blong hem.’ !Jona i haremgud tumas long rop ya! Be Jeova i sanem wan wom i go blong kakae stampa blong rop ya, nao rop ya i stat blong kam drae. Smoltaem biaen, hem i drae olgeta. Mo tu, God i sanem hot win i kam long is saed. Naoia san i stap kilimgud hed blong profet ya, we hed blong hem i raon from. Hem i gohed blong askem long God blong i ded. Bakegen mo bakegen, Jona i talem se: “I moa gud mi mi ded, i bitim we mi stap laef.”​—Jona 4:​5-8.

Naoia, Jeova i toktok. Hem i askem long Jona, i se: “?Jona, i stret we yu yu kam kros bitim mak from rop ya?” Jona i ansa: “Yes, i stret we mi kros olsem, we kolosap mi ded from.” Nao Jeova i talem ol tok long Jona we i minim olsem: ‘Yu yu sore long rop ya, we yu yu no wok nating blong mekem i gru i kam bigwan. Hem i gru bigwan long wan naet nomo, ale long nekis dei, hem i ded bakegen.’ God i talem tu se: ‘?Mo, long saed blong mi, bambae mi mi no sore long bigfala taon ya Nineve, we i gat bitim 120,000 man long hem we oli no save nating se raet han blong olgeta i defren long lef han, mo sore long ol anamol blong olgeta tu?’ (Jona 4:​9-​11) Stret ansa long kwestin ya i klia nomo.

Jona i tanem tingting blong hem, nao i stap laef gogo i raetem buk ya blong Baebol we i karem nem blong hem. ?Olsem wanem hem i save se ol boskru oli fraet long Jeova, oli givim sakrifaes, mo oli mekem strong promes long Hem? Maet God i givim save ya long hem. Sipos no, wan long ol boskru no pasenja i talemaot long hem long haos prea.​—Jona 1:​16; 2:​4.

“Saen Blong Profet Jona”

Taem ol tija blong Loa mo ol Farisi oli askem Jisas Kraes blong mekem wan saen, hem i talem se: “Yufala man blong naoia, yufala i wantem luk saen. Be yufala i man nogud, yufala i stap mekem i krangke long God, olsem woman we i stap mekem i krangke long man blong hem. Bambae yufala i no gat saen. Saen blong profet Jona bifo, hemia nomo God i save givim long yufala.” Nao Jisas i gohed blong talem se: “Olsem we Jona i stap tri dei mo tri naet long bel blong bigfala fis, ale, long sem fasin, mi mi Pikinini blong Man, bambae mi stap tri dei mo tri naet insaed long graon.” (Matyu 12:​38-​40) Long taem blong ol man Jyu, dei i stat taem san i godaon. Kraes i ded long Fraede aftenun, Naesan 14, long yia 33 K.T. Oli putum dedbodi blong hem long hol bifo we san i godaon long dei ya. Naesan 15 i stat long sapa ya, i go kasem we san i godaon long Sarede, namba seven dei mo laswan dei blong wik. Ale, Naesan 16 i stat mo i go kasem we san i godaon long dei we yumi kolem Sande. Olsem nao, Jisas i ded mo i stap long hol long haf blong dei ya Naesan 14, long ful dei blong Naesan 15, mo tu long naet blong Naesan 16. Taem sam woman oli kam long hol long Sande moning, hem i girap finis, i laef bakegen.​—Matyu 27:​57-​61; 28:​1-7.

Jisas i stap tri dei long hol. Taswe, ol enemi blong hem oli luk “saen blong profet Jona,” be Kraes i talem se: “Ol man blong Nineve bifo oli save stanap blong talemaot poen blong yufala. From we taem olgeta oli harem Jona i prij, oli tanem tingting blong olgeta from sin blong olgeta. Be yufala i luk, mi mi hae moa long Jona.” (Matyu 12:41) !Samting ya i tru tumas! Jisas Kraes​—⁠profet we i hae moa long Jona​—⁠hem i stap long medel blong ol man Jyu. Jona i wan saen we i naf blong mekem ol man Nineve oli tanem tingting blong olgeta. Be wok blong prij we Jisas i mekem i gat moa paoa mo pruf blong sapotem hem i bitim hemia we Jona i mekem. Nating se i olsem, ol man Jyu oli no bilif long hem.​—Jon 4:​48.

Olsem wan nesen, ol man Jyu oli no mekem tingting blong olgeta i stap daon blong luksave Profet ya we i hae moa long Jona, mo oli no bilif long Hem. ?Be olsem wanem long ol bubu blong olgeta bifo? Olgeta tu, oli no gat bilif mo tingting daon. Yes, i klia se Jeova i sanem Jona i go long Nineve blong soem se ol man Nineve we oli tanem tingting blong olgeta, oli moa gud bitim ol stronghed man Isrel, we oli no gat bilif mo tingting daon nating.​—Skelem wetem Dutronome 9:​6, 13.

?Olsem wanem long Jona? Hem i lanem se fasin sore blong God i bigwan tumas. Mo tu, fasin ya we Jeova i mekem long Jona, taem Jona i toktok smol from we hem i sore long ol man Nineve we oli tanem tingting blong olgeta, i mas blokem yumi blong no komplen taem Papa blong yumi long heven i soem sore long ol man long taem blong yumi. Yes, yumi mas glad se evri yia, plante taosen man oli bilif long Jeova mo oli kam long hem wetem tingting daon.