Laen Blong Snek—?Olsem Wanem i Kam Long Klia Ples?

“Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala.”​—JENESIS 3:​15, NW.

 1. (a) ?From wanem Jeova i wan hapi God? (b) ?Wanem samting we hem i mekem blong yumi save haremgud olsem hem?

JEOVA, hem i wan hapi God, mo hem i gat gudfala risen blong stap hapi olsem. Hem i Man ya we i givim plante moa gudfala samting bitim ol narafala man. I no gat wan samting i save blokem ol stampa tingting blong hem blong oli kamtru. (Aesea 55:10, 11; 1 Timote 1:​11; Jemes 1:​17) Hem i wantem se ol man blong hem tu oli haremgud olsem hem, mo i givim plante nambawan samting blong mekem oli haremgud. Taswe, long taem we i gat wan bigfala trabol i kamaot long laef blong ol man​—fasin rebel long Iden​—hem i givim wan risen, blong yumi save putum tingting blong yumi i stap strong long wan gudfala fyuja.​—Rom 8:​19-​21.

 2. Taem Jeova i jajem ol rebel long Iden, ?olsem wanem hem i givim wan risen long ol pikinini blong Adam mo Iv blong tingting strong long gudfala fyuja?

² Wan long ol speret pikinini blong Jeova i agensem God mo i gyaman blong spolem nem blong God. Olsem nao, hem i mekem hem wan i kam Devel Setan. Hem i pulum faswan woman, Iv mo biaen, faswan man Adam, nao tufala i brekem loa we Jeova i bin talemaot klia long tufala. From samting ya, i stret nomo we tufala i kasem panis blong ded. (Jenesis 3:​1-​24) Be, taem Jeova i stap talemaot jajmen long tufala rebel ya, hem i givim wan risen long ol pikinini blong Adam mo Iv blong gat hop. ?Long wanem rod? Folem Jenesis 3:​15 (NW), Jeova i talem se: ‘Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu kakae bak blong leg blong hem.’ Profet tok ya i givhan blong kasem save long fulwan Baebol, mo long ol samting we oli hapen long wol ya mo long ol man blong Jeova, bifo mo naoia.

Mining Blong Profet Tok Ya

 3. Olsem Jenesis 3:​15 i talem, ?hu ya (a) Snek, (b) “woman,” (c) “laen” blong Snek, (d) “Laen” blong woman?

³ Blong kasem save long mining blong profet tok ya, tingbaot ol defren haf blong hem. Ol tok blong Jenesis 3:​15 i go long Snek​—i no wan prapa snek, be hemia we i yusum snek ya. (Revelesen 12:9) “Woman” i no minim Iv, be i minim ogenaesesen blong Jeova long heven, mama blong ol man blong Hem long wol ya we tabu speret i makemaot olgeta. (Galesia 4:​26) “Laen” blong Snek i minim laen blong Setan, ol pikinini blong hem​—ol rabis enjel, ol man mo ol ogenaesesen blong man we oli soemaot fasin blong Setan mo oli no laekem nating “laen” blong woman. (Jon 15:19; 17:15) Jisas Kraes, we God i makemaot hem wetem tabu speret long 29 K.T.,a hem nao i faswan long “laen” blong woman. Ol 144,000 man, we oli “bon bakegen . . . long wora mo long tabu speret,” we bambae oli rul wetem Kraes long Kingdom blong heven, oli seken haf blong laen ya we God i promes. Ol man ya oli stat blong joen long laen blong woman ya long Pentekos 33 K.T.​—Jon 3:​3, 5; Galesia 3:​16, 29.

 4. ?Olsem wanem Jenesis 3:​15 i joen wetem paradaes we bambae i kamaot long wol, we i fulap long ol man we oli no gat sin mo ded?

⁴ Man ya we gyaman tok blong hem i mekem se ol man oli lusum Paradaes, hem i yusum wan snek blong toktok long Iden. Jenesis 3:​15 i tokbaot wan taem we bambae oli smasem man ya we i toktok tru long snek ya. Biaen, bambae rod i open bakegen long ol man blong God blong laef long Paradaes, we i no gat sin mo ded. !Hemia bambae i wan hapi taem stret!​—Revelesen 20:​1-3; 21:​1-5.

 5. ?Wanem ol fasin we oli soem se wan man i pikinini blong Devel Setan?

⁵ Biaen long fasin rebel long Iden, wanwan man mo grup, oli stat blong soemaot ol fasin blong Devel Setan. Oli rebel, oli gyaman, oli spolem nem blong narafala, mo oli kilim man i ded, mo tu oli agensem samting we Jeova i wantem mo agensem ol man we oli wosip long Hem. Ol fasin ya oli makemaot olgeta we oli olsem laen no ol pikinini blong Devel Setan. Wan long olgeta, hemia Ken. Hem i kilim Ebel i ded, from we God i agri long wosip blong Ebel be i no agri long wosip blong Ken. (1 Jon 3:​10-​12) Nimrod i wan man we nem blong hem i makemaot hem olsem wan rebel, mo i kam wan strongfala man blong kilim ol anamol, mo wan king we i agensem Jeova. (Jenesis 10:9) Mo tu, i gat plante kingdom oli stanap biaen long hem, olsem Babilon, wetem ol gyaman skul blong olgeta we gavman i sapotem, mo oli mekem ol raf fasin we oli strong tumas long ol man blong wosip long Jeova.​—Jeremaea 50:29.

‘Yu Mo Woman Ya Bambae Yutufala i Enemi’

 6. ?Long wanem rod Setan i soem se hem i no laekem nating woman blong Jeova?

⁶ Stat long taem ya i kam kasem tede, Snek mo woman blong Jeova, tufala i enemi. Hemia se, Devel Setan mo ogenaesesen blong ol gudfala speret pikinini blong Jeova long heven, tufala i enemi. Setan i soem se hem i no laekem nating Jeova, taem hem i jikim Jeova mo i traem blong spolem ogenaesesen blong Jeova long heven, nao i pulum sam enjel blong lego prapa ples blong olgeta. (Proveb 27:11; Jud 6) Setan i soemaot fasin ya tu, taem hem i yusum ol rabis enjel blong hem blong traem blokem sam enjel we Jeova i sanem olgeta blong karem mesej blong hem. (Daniel 10:13, 14, 20, 21) I klia nomo se long ol yia 1900, Setan i traem blong spolem Kingdom blong Mesaea taem i jes stanap.​—Revelesen 12:​1-4.

 7. ?From wanem ol gudfala enjel blong Jeova oli no laekem nating hemia we i olsem Snek, be oli stap wet long wanem samting?

⁷ Woman blong Jeova, we i minim olgeta enjel we oli stap tru long God, olgeta tu oli no laekem nating hemia we i olsem Snek ya. Setan i gyaman blong spolem gudnem blong God. Hem i talem se evri man, mo ol enjel tu, oli no save holemstrong long God oltaem. Mo hem i wok strong blong pulum olgeta, blong oli lego long God. (Revelesen 12:⁠4a) Ol enjel, ol jerubim, mo ol seraf we oli stap tru long God, oli no laekem nating hemia we i mekem hem wan i kam Devel Setan. Be, oli wet long Jeova blong stretem bisnes ya long stret taem mo rod blong hem.​—Skelem wetem Jud 9.

Agensem Laen Blong Woman Blong God

 8. ?Setan i stap luklukgud blong faenemaot hu?

⁸ Long semtaem, Setan i stap luklukgud blong faenemaot hu nao Laen blong woman we profet tok i talemaot, hemia we Jeova i talem se bambae i smasem hed blong Snek. Taem enjel i kamdaon long heven blong talem se Jisas, we i bon long Betlehem, hem i ‘Sevya, Mesaea ya we i Masta blong yumi,’ hemia i wan bigfala pruf se bambae hem i kam olsem Laen blong woman we profet tok i bin talemaot.​—Luk 2:​10, 11.

 9. Afta we Jisas i bon, ?olsem wanem Setan i soem se hem i wan enemi we i nogud olgeta?

⁹ Smoltaem biaen, bigfala fasin agens blong Setan i kam klia, taem hem i lidim ol hiten man we oli talemaot fyuja from ol sta, blong mekem wan spesel wok blong hem. Hem i tekem olgeta oli go fastaem long King Herod long Jerusalem. Biaen, hem i lidim olgeta oli go long Betlehem, long wan haos we oli luk smol boe ya Jisas wetem mama blong hem, Meri. Smoltaem biaen, King Herod i talem long ol soldia blong hem, blong oli go kilim i ded olgeta pikinini boe long Betlehem mo ol ples raonabaot, we oli gat tu yia, mo olgeta we oli no gat tu yia yet. Long rod ya, Herod i soem fasin blong Setan blong no laekem nating Laen blong woman. Herod i savegud se hem i stap traem blong kilim i ded hemia we bambae i kam Mesaea. (Matyu 2:​1-6, 16) Histri i soem se King Herod i wan man we i gat nogud fasin, i wan man blong gyaman, mo blong kilim man i ded​—hem i wan laen blong Snek stret.

10. (a) Afta we Jisas i baptaes, ?olsem wanem Setan hem wan i traem blong blokem stampa tingting blong Jeova long saed blong Laen we ol profet tok i talem? (b) ?Olsem wanem Setan i yusum ol lida blong skul blong ol man Jyu blong mekem plan blong hem i stanap?

¹⁰ Afta we tabu speret i makemaot Jisas long 29 K.T. mo voes blong Jeova i kamaot long heven blong soem se Jisas i Pikinini blong hem, Setan i traem plante taem blong mekem Jisas i foldaon. Hem i wantem blokem stampa tingting blong Jeova long saed blong Pikinini blong Hem. (Matyu 4:​1-​10) Be from we hem i no winim, ale hem i traem blong yusum ol man bakegen blong mekem plan blong hem i kamtru. Sam long ol man we hem i yusum blong daonem Jisas, hemia ol tu fes lida blong skul. Oli gyaman mo oli spolem nem blong Jisas. Hemia ol fasin we Setan hem wan i bin yusum. Taem Jisas i talem long wan man we haf bodi blong hem i ded, i se, “Yu no fraet. Ol sin blong yu mi mi tekemaot finis,” ol tija blong Loa, oli no wet blong luk sipos man ya i kamgud bakegen. Be, oli girap, oli talem se Jisas i tok nogud long God. (Matyu 9:​2-7) Taem Jisas i mekem ol sikman oli gud bakegen long Sabat dei, ol Farisi oli tok agens long hem, oli talem se hem i brekem loa blong Sabat, nao oli mekem miting blong traem faenem rod blong kilim hem i ded. (Matyu 12:​9-​14; Jon 5:​1-​18) Taem Jisas i ronemaot rabis speret long wan man, ol Farisi oli talem se “Bielsebal, jif blong ol devel, hem nomo i stap givim paoa long hem.” (Matyu 12:22-​24) Afta we Jisas i mekem Lasros i laef bakegen long ded, plante man oli bilif long Jisas. Be ol jif pris mo ol Farisi, oli miting bakegen blong traem kilim hem i ded.​—Jon 11:47-​53.

11. Tri dei bifo we Jisas i ded, ?hem i soem klia se hu i laen blong Snek, mo from wanem i olsem?

¹¹ Jisas i savegud rabis plan blong olgeta. Taswe, long Naesan 11, 33 K.T., hem i no fraet blong go insaed long haos prea long Jerusalem mo talemaot klia jajmen we bambae oli kasem. Olsem wan grup, ol tija blong Loa mo ol Farisi oli soemaot klia se oli wanem kaen man. Taswe, Jisas i talem se: “Ol tija blong Loa mo ol Farisi, sore tumas long yufala. Yufala i gat tu tingting. I olsem we yufala i stap lokem doa long fes blong ol man we oli wantem kam we God i king blong olgeta. Yufala i no wantem blong kam we God i king blong yufala, mo yufala i stap blokem ol narafala man tu, oli no save kam.” Jisas i talem klia se oli haf blong laen blong Snek. Hem i talem se: ‘!Yufala i olsem snek! !Yufala i olsem pikinini blong snek stret! !Yufala i man blong ronwe nomo! ?Weswe yufala i ting se yufala i save ronwe long panis blong yufala, bambae yufala i no go long Gehena?’ (Matyu 23:13, 33) Tok ya we hem i yusum i laenap wetem profet tok blong Jenesis 3:​15.

12, 13. (a) ?Olsem wanem ol jif pris mo ol tija blong Loa oli givim moa pruf blong makemaot papa blong olgeta? (b) ?Hu i joen wetem olgeta? (c) Blong mekem profet tok blong Jenesis 3:​15 i kamtru, ?olsem wanem Laen blong woman i kasem kil long leg blong hem?

¹² ?Oli mekem wanem taem oli harem tok blong Jisas? ?Tingting blong olgeta i stikim olgeta, nao oli askem God blong i sore long olgeta? ?Oli tanem tingting blong olgeta from rabis fasin we oli mekem? !No gat! Mak 14:1 i talem se long nekis dei, long wan miting long yad blong hae pris, “ol jif pris mo ol tija blong Loa oli stap traem lukaot wan rod blong tekem Jisas blong kilim hem. Be oli wantem mekem long rod blong stil.” Oli gohed blong soem tingting blong wantem kilim man i ded, hemia tingting we i kamaot long Setan, we fastaem, Jisas i kolem hem se man blong kilim man i ded. (Jon 8:​44) Smoltaem biaen, Judas Iskariot we Setan i pulum hem blong mekem apostasi,b hem i joenem olgeta. Judas i lego Laen blong woman blong God we i no gat fol, nao i joen long laen blong Snek.

¹³ Eli long moning blong Naesan 14, ol memba blong kot blong skul blong ol man Jyu, oli holem Jisas olsem wan presina, oli tekem hem i go long hedgavman blong Rom. Long ples ya, ol jif pris nao, oli lidim ol man blong singaot se Jisas i mas ded. Taem Paelet i askem se, ‘?Yufala i wantem blong mi nilim king blong yufala long pos?’ ol jif pris nao oli ansa se, “Mifala i no gat king. Sisa nomo i king blong mifala.” (Jon 19:​6, 15) Yes, long olgeta samting we oli mekem, oli pruvum se oli haf blong laen blong Snek. Be i no olgeta nomo. Ol tok blong Matyu 27:​24, 25 we i kamaot long God, i talem se: ‘Paelet i tekem wan besin wora, nao long fes blong olgeta man, hem i wasem han blong hem.’ Nao olgeta man oli talem se: “Ded blong hem i bisnes blong mifala, blad blong hem bambae i stap long mifala wetem ol pikinini blong mifala.” Olsem nao, plante man Jyu long taem ya oli soem klia se oli haf blong laen blong Snek. Bifo we dei ya i finis, Jisas i ded. Setan i yusum laen blong hem long wol ya blong kakae leg blong Laen blong woman blong God.

14. Taem snek i kakae leg blong Laen blong woman, ?from wanem samting ya i no minim se Setan i win?

¹⁴ ?Olsem wanem? ?Setan i win? !No gat! Jisas Kraes i winim wol mo masta blong wol ya. (Jon 14:30, 31; 16:33) Hem i stap tru long Jeova go kasem we hem i ded. Hem i ded olsem wan man we i stretgud olgeta. Long rod ya, hem i givim praes blong ransom we i stret blong pembak laef we Adam i lusum. Olsem nao, hem i openem rod blong laef we i no save finis, long olgeta we oli bilif long sakrifaes ya mo oli obei long ol loa blong God. (Matyu 20:28; Jon 3:​16) Jeova i mekem Jisas i laef bakegen long ded, mo i go antap long heven we i no save ded bakegen samtaem. Long stret taem we Jeova i makemaot, bambae Jisas i smasemgud Setan. Profet tok long Jenesis 22:16-​18 i talem se bambae Jeova i yusum laen ya we i stap tru long hem, blong givim blesing long olgeta famle long wol we oli mekem ol samting we oli mas mekem blong kasem blesing ya.

15. (a) Afta we Jisas i ded, ?olsem wanem ol aposol blong hem oli gohed blong mekem laen blong Snek i kam long klia ples? (b) ?Wanem ol narafala fasin agens we laen blong Snek i bin soemaot kam kasem taem blong yumi?

¹⁵ Afta we Jisas i ded, ol Kristin we tabu speret i makemaot olgeta, oli gohed blong mekem laen blong Snek i kam long klia ples, olsem Masta blong olgeta i bin mekem. Tabu speret i pusum aposol Pol blong givim woning agens long “Man blong Brekem Loa” we bambae i kamtru “long paoa blong Setan.” (2 Tesalonaeka 2:​3-​10) I klia se “Man” ya, we i minim wan grup, hem i ol lida blong Krisendom. Laen blong Snek i stap ronem mo mekem nogud tumas long ol man blong Jisas Kraes. Long profet tok blong Revelesen 12:17, aposol Jon i talemaot se, bambae Setan i gohed blong faet agens long smol grup blong laen blong woman blong God kam kasem taem blong yumi. Hemia nao samting we i bin kamaot. Long plante kantri, ol man oli putum tabu long wok blong ol Wetnes blong Jeova, oli ronem olgeta, oli putum olgeta long kalabus, no oli sakem olgeta long ol rabis kalabus from we oli stanap strong long saed blong Kingdom blong God mo ol stret rod blong hem.

Mekem Laen Blong Snek i Kam Long Klia Ples Long Taem Blong Yumi

16. Tede, ?hu ya olgeta we oli kam long klia ples olsem laen blong Snek, mo olsem wanem?

¹⁶ Ol trufala Kristin oli folem eksampel blong Jisas Kraes. Oli no kam slak, oli no fraet blong gohed blong mekem laen blong Snek i kam long klia ples. Long 1917, ol Baebol Studen, hemia nem blong ol Wetnes blong Jeova long taem ya, oli wokem buk ya The Finished Mystery. Buk ya i mekem fasin tu fes blong ol lida blong Krisendom i kam long klia ples. Biaen, long 1924, oli prentem wan pepa we i talemaot disisen blong olgeta, nem blong hem Ecclesiastics Indicted. Oli seremaot 50 milyan pepa olsem, long olgeta ples long wol. Long 1937, J. F. Rutherford, presiden blong Watch Tower Sosaeti long taem ya, i givim tu strongfala pablik tok we tufala i soemaot klia laen blong Setan. Nem blong tufala tok ya, “Mekem i Kam Long Klia Ples,” mo “Ol Skul mo Kristianiti.” Long yia we i kam biaen, hem i givim wan pablik tok long radyo telefon long London, Engglan, nem blong tok ya “Tingbaot Ol Pruf.” Ol man we oli hivap long 50 asembli long ol defren kantri, oli lesin long tok ya. Wan manis biaen, wan radyo blong Yunaeted Stet we i kasem plante ples, i karem tok ya “Rul Blong Ol Fasis no Fasin Fri.” Antap long ol tok ya, ol buk olsem Enemies mo Religion mo tu Uncovered, oli mekem laen blong Setan i kam moa long klia ples. Naoia, long 65 lanwis, i gat buk ya Revelesen​—⁠Kolosap i Kasem Nambawan En Blong Hem!c we i laenap wetem ol save we oli prentem finis biaen long yia 1920. Buk ya i soemaot klia se ol lida blong politik we oli gat kruked fasin mo oli griri, wetem ol bigfala bisnes we oli spolem ol man, oli sam long ol impoten memba blong laen blong Snek long wol ya. Oltaem, ol lida blong politik oli stap gyaman blong lidim ol man blong olgeta oli go krangke. Oli mekem se ol man oli no tingbaot blad olsem wan tabu samting, mo oli agensem ol man blong Jeova (olsem nao, oli soem se oli no laekem nating laen blong woman blong God). Taem oli mekem olsemia, oli soemaot klia se oli haf blong laen blong Snek. Samting ya i sem mak long ol kruked bisnesman. Tingting blong olgeta i no stikim olgeta taem oli gyaman blong winim mane, nao oli wokem mo salem olting we oli save se bambae i givim sik long man.

17. ?Wanem jans i open yet long ol wanwan haeman we maet oli livim ol nogud fasin blong wol ya?

¹⁷ I no evri man we i joen long ol skul blong wol, ol politik, mo ol bisnes, we bambae i stap olsem haf blong laen blong Snek go kasem en. Sam long ol man mo woman ya oli jenis, mo oli laekem ol Wetnes blong Jeova. Oli yusum paoa blong olgeta blong givhan long ol Wetnes, mo biaen, oli folem trufala wosip. (Skelem wetem Ol Wok 13:​7, 12; 17:​32-​34.) Ol man olsem oli bin harem tok ya we i singaot olgeta se: “Ol king. Yufala i mas harem tok ya we mi talem, se yufala i mas lukaot. Ol lida blong wol. Yufala i mas lanem mining blong samting ya. Yufala i mas wok blong Hae God, we yufala i onagud long hem. I gud yufala i fraet long hem, nao yufala i bodaon long hem. Sipos no, kros blong hem bambae i kam kwiktaem, nao wantaem nomo, bambae yufala i ded. Olgeta man we oli stap go long hem blong hem i lukaotgud long olgeta, oli save haremgud.” (Ol Sam 2:​10-​12) !Yes, evriwan we oli wantem se Jeova i glad long olgeta, i impoten tumas we oli mekem wan samting naoia, bifo we Jaj long heven i satem doa nao oli no moa gat jans!

18. ?Hu ya ol man blong wosip long Jeova, we oli no haf blong laen blong woman?

¹⁸ Laen blong woman, hemia: olgeta nomo we bambae oli mekemap Kingdom blong heven. Olgeta ya oli no plante. (Revelesen 7:​4, 9) Be, i gat wan bigfala hif blong ol narafala man tu. Yes, i gat plante milyan blong olgeta ya, oli stap wosip long Jeova, mo oli stap wet blong laef foreva long paradaes long wol. Long toktok mo fasin blong olgeta, oli talem long ol man we Jeova i makemaot olgeta, se: ‘Bambae mifala i go wetem yufala, from we mifala i harem we God i stap wetem yufala.’​—Sekaraea 8:​23.

19. (a) ?Olgeta man oli mas jusum wanem samting? (b) ?Hu ya ol man we ol Wetnes blong Jeova oli singaot olgeta blong soem waes fasin mo mekem wan samting taem oli gat jans yet?

¹⁹ Naoia, i stret taem we olgeta man oli mas jusum rod blong olgeta. ?Bambae oli wosip long Jeova mo leftemap hae rul blong hem? ?No bambae oli letem Setan i rul long olgeta, tru long fasin blong mekem ol samting we hem i glad long olgeta? I gat faef milyan man blong olgeta nesen, we oli jusum blong stap long saed blong Jeova, mo oli joen wetem laen blong hem we i stap tru long hem, hemia olgeta we bambae oli rul long Kingdom. Ol eit milyan narafala, oli stadi Baebol finis wetem ol Wetnes blong Jeova no oli joen long ol miting blong olgeta. Ol Wetnes blong Jeova, oli talem long olgeta ya se: Yufala i gat jans yet. Jusum blong stanap strong long saed blong Jeova nomo. Luksave Jisas Kraes olsem Laen we ol profet tok oli talem. Long glad fasin, joen wetem ogenaesesen blong Jeova long wol. I gud we yu tu yu kasem olgeta blesing we bambae Hem i givim tru long rul blong King ya, Jisas Kraes.

[Ol futnot]

?Yu Yu Rimemba?

◻ ?Hu ya Snek we Jenesis 3:​15 i tokbaot? ?Mo hu ya woman?

◻ ?Wanem ol fasin we oli soem se wan man i laen blong Snek?

◻ ?Olsem wanem Jisas i mekem laen blong Snek i kam long klia ples?

◻ ?Tede, i kam klia se hu ya oli laen blong Snek?

◻ ?Wanem samting we man i mas mekem kwik blong i aot long laen blong Snek?

[Tok Blong Pija Long Pej 10]

Jisas i soemaot klia se ol lida blong skul we oli gat fasin tu fes oli blong laen blong Snek