Oli Mekem Samting We Jeova i Wantem

Eksampel Blong Stap Tru Mo Blong Lego Samting We Yumi Nomo i Wantem

WAN moning, yangfala Elaesa i girap blong go tanem graon long garen. Hem i tingbaot dei ya olsem ol narafala dei nomo. Be, samting we i hapen i mekem se dei ya i moa impoten i bitim ol narafala dei long laef blong hem. Taem Elaesa i stap wok long garen, hem i sapraes blong luk Elaeja i kamtru, hemia nambawan profet blong ol man Isrel. Maet Elaesa i tingting se: ‘?Weswe nao hem i kam luk mi?’ Hem i kasem ansa blong kwestin ya kwiktaem nomo. Elaeja i sakem klos we i makemaot hem olsem profet, i go antap long Elaesa. Long fasin ya, hem i soemaot se Elaesa nao bambae i tekem ples blong hem. Elaesa i no tingting nating long samting ya we Elaeja i mekem blong singaot hem. Wantaem nomo, hem i lego garen blong hem blong kam man blong wok blong Elaeja.​—1 King 19:19-​21.

Samwe long sikis yia biaen, stret taem i kam blong Elaeja i gowe long ol man. Plante oli talem se fasin we Elaeja i gowe long taem ya, i “wan store we i pulum tingting blong ol man moa” i bitim ol narafala store long Hibru haf blong Baebol.

Elaeja i Mekemrere Blong Go

Elaeja i wantem wokbaot i go long Betel, Jeriko, mo Jodan blong lukluk ol ples ya laswan taem. Hemia i min se bambae tufala i mas wokbaot plante kilomita, we long sam ples tufala i mas klaem ol bigfala hil. Long evri taem we tufala i stop smol blong spel long trep ya, Elaeja i talem long Elaesa blong i lego hem nomo. Be Elaesa i strong blong stap wetem masta blong hem gogo kasem en.​—2 King 2:​1, 2, 4, 6.

Taem oli stap long Betel mo long Jeriko, “ol pikinini blong ol profet” oli kam luk Elaesa.a Oli askem long hem se: “?Yu yu save se tede, bambae Jeova i tekem masta blong yu i gowe long yu, i no moa bos long yu?” Hem i ansa long olgeta se: “Mi save samting ya finis. Yufala i stap kwaet.”​—2 King 2:​3, 5.

Nao, Elaeja mo Elaesa tufala i folem rod i go long Jodan Reva. Taem oli kasem Jodan, Elaeja i mekem wan merikel, mo longwe lelebet long tufala, i gat samwe 50 pikinini blong ol profet oli stap lukluk. “Elaeja i tekem klos blong hem we i makemaot hem olsem wan profet, i rolem klos ya, mo i kilim wora wetem hem. Sloslou, wora ya i seraot long tu haf, wan saed i go olsem, narasaed i go olsem. Ale, tufala i wokbaot i gokros long drae graon nomo.”​—2 King 2:8.

Taem tufala i gokros finis, Elaeja i talem long Elaesa se: “Askem eni samting we yu wantem se mi mekem blong yu bifo we God i karemaot mi.” Elaesa i askem Elaeja blong givim “tu haf” blong speret blong hem​—hemia i min se, dabol long olgeta samting we loa i talem se wan papa i mas givim i go long fasbon pikinini boe blong hem. Yes, Elaesa i ona bigwan long Elaeja, olsem we fasbon pikinini boe i ona long papa blong hem. Antap long hemia, God i makemaot Elaesa blong i tekem wok blong Elaeja olsem profet blong Hem long Isrel. Taswe, samting ya we Elaesa i askem i stret nomo, mo hem i no askem from we i stap tingbaot hem wan nomo. Nating se i olsem, Elaeja i save se Jeova nomo i save givim samting we Elaesa i askem, taswe wetem tingting daon, hem i ansa se: “Yu askem wan samting we i strong ya.” Nao hem i gohed i se: “Sipos yu yu luk we God i tekemaot mi, ale, bambae yu save kasem samting ya we yu yu askem. Be sipos yu no luk, bambae yu no save kasem samting ya.”​—2 King 2:​9, 10; Dutronome 21:17.

I sua se tingting blong Elaesa i strong moa nao blong no lego masta blong hem nating. Ale, “ol hos mo wan kat blong faet we faea i laet long olgeta,” i kamtru. Long fored blong ae blong Elaesa we i sapraes bigwan, wan bigfala win i karem Elaeja i go​—yes, wan merikel i karem hem i go long wan narafala ples.b Elaesa i pikimap klos we profet Elaeja i lego i stap, mo i wokbaot i gobak long Jodan Reva. Hem i kilim wora, mo i se: “?Wehem Jeova, God blong Elaeja, yes, Hem i wea?” Ol wora oli seraot, mo samting ya i soemaot klia se God i agri long Elaesa olsem man we i tekem wok blong Elaeja.​—2 King 2:11-14.

Sam Lesen Blong Yumi

Taem Elaeja i singaot Elaesa blong kam mekem wan spesel wok wetem hem, wantaem nomo Elaesa i lego garen blong hem blong givhan long nambawan profet ya blong Isrel. I klia se, sam long ol wok ya oli nating nomo, olsem wok ya blong “kafsaedem wora long han blong Elaeja.”c (2 King 3:​11) Be nating, Elaesa i tinghae long wok ya, mo hem i wokbaot folem Elaeja oltaem.

Plante man blong wok blong God tede, oli soemaot semkaen tingting ya we oli rere blong lego plante samting blong mekem wok blong God. Samfala oli lego “garen” blong olgeta, wok we i givhan long olgeta blong kasem ol samting blong laef, blong talemaot gud nyus long ol ples farawe, no blong kam memba blong famle blong Betel. Sam narafala oli wokbaot i go long ol kantri longwe blong givhan blong bildim ol haos blong Sosaeti. Plante oli glad blong mekem wok we yumi save talem se i smol nomo. Be, i no gat wan slef blong Jeova we wok blong hem i no impoten. Jeova i gat tangkyu long olgeta evriwan we oli glad blong mekem wok blong hem, mo bambae hem i blesem olgeta from we oli lego plante samting.​—Mak 10:29, 30.

Elaesa i folem Elaeja gogo kasem en. Hem i gat jans blong lego olfala profet ya, be hem i no wantem. I klia se, gudfala fasin fren we hem i gat wetem Elaeja i mekem se hem i glad nomo blong stap tru mo soemaot lav ya long hem. Tede, ol man blong God oli traehad blong mekem fasin fren blong olgeta wetem God i kam strong moa, mo oli traehad blong joengud moa wetem ol narafala man blong bilif. Fasin ya blong joengud bambae i kasem blesing, from we Baebol i tokbaot Jeova i se: “Man we i stap tru long yu bambae yu yu save stap kolosap long hem oltaem.”​—2 Samuel 22:26.

[Ol futnot]