Soem Ona Long Ol Narafala

“Oltaem yufala i mas rere blong ona long yufala.”​—ROM 12:10.

1, 2. (a) ?Yumi mas mekem wanem blong soem tingting daon? (b) ?Plante taem, Baebol i yusum wod ya “ona” olsem wanem? ?Hu i faenem se i isi blong soem fasin ya?

LONG faswan stadi, yumi tokbaot advaes ya we i kamaot long Tok blong God se: “Yufala i mas mekem tingting blong yufala i stap daon. Nao long fasin ya, yufala i save givhan gud long yufala. Baebol i talem se, “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (1 Pita 5:5) Wan rod blong soem tingting daon, hemia blong ona long ol narafala.

² Plante taem, Baebol i yusum wod ya “ona,” blong soemaot fasin blong respek, tinghae, mo tingbaot ol narafala. Yumi ona long ol narafala taem yumi kaengud long olgeta, respektem olgeta from wok we oli mekem, lesin long tingting blong olgeta, mo rere blong mekem ol gudfala samting we oli askem yumi blong mekem. Ol man we oli gat tingting daon, bambae i no hadwok long olgeta blong soem ona. Be, olgeta we oli flas, bambae i hadwok long olgeta blong soem trufala ona. Maet oli traem talem ol swit tok blong pulum narafala blong i glad long olgeta, no blong i leftemap olgeta.

Jeova i Ona Long Yumi

3, 4. ?Olsem wanem Jeova i soem ona long Ebraham, mo from wanem?

³ Jeova i soem eksampel long fasin blong ona. Hem i wokem yumi we yumi fri blong jus, hem i no stap kontrolem yumi olsem ol mesin. (1 Pita 2:​16) Taem hem i talem long Ebraham se bambae hem i spolem Sodom from rabis fasin i kam antap bigwan tumas, Ebraham i askem se: “?Sipos yu panisim ol man long ples ya, bambae yu spolem olgeta man evriwan? ?Bambae yu kilim ol man nogud wetem ol stret man tu? ?Sipos i gat fifti man i stap long taon ya we oli stap mekem i stret nomo, yu ting se bambae yu mas spolem olgeta man blong taon ya? Mi mi ting se yu save letem olgeta man blong taon ya oli stap laef, blong sevem fifti man ya we oli stap mekem i stret.” Jeova i ansa se bambae hem i no spolem taon ya sipos i gat 50 stret man oli stap long hem. Nao, wetem tingting daon, Ebraham i gohed i askem kwestin long Jeova. ?Olsem wanem sipos i gat 45, 40, 30, 20, no 10, stret man nomo long taon ya? Jeova i talemaot klia long Ebraham se bambae hem i no spolem Sodom sipos i gat 10 stret man nomo long taon ya.​—Jenesis 18:20-​33.

⁴ Jeova i save se namba blong ol stret man long Sodom, i no kasem ten. Nating se i olsem, hem i ona long Ebraham taem hem i lesin long tingting blong Ebraham mo i soem respek long hem. ?From wanem hem i ona long Ebraham? From we Ebraham i “bilif strong long Hae God, mo from we hem i bilif olsem, Hae God i luk hem se hem i wan stret man long fes blong hem.” Ol man oli stap singaot Ebraham se, “Fren blong God.” (Jenesis 15:6; Jemes 2:​23) Mo tu, Jeova i luk se Ebraham i ona long ol narafala man. Taem wan rao i kamaot bitwin ol man blong lukaot anamol blong Ebraham mo ol man blong lukaot anamol blong nefiu blong hem, Lot, Ebraham i soem ona long Lot. Hem i talem long Lot blong jusum fastaem ples we hem i wantem. Nao Lot i jusum ples we hem i ting se i gudwan moa, nao Ebraham i muf i go long narafala ples.​—Jenesis 13:​5-​11.

 5. ?Olsem wanem Jeova i ona long Lot?

⁵ Long sem fasin, Jeova i soem ona long stret man ya Lot. Bifo we hem i spolem Sodom, hem i talem long Lot blong ronwe i go haed long wan ples we i gat ol hil. Be, Lot i talem se hem i no wantem go long ples ya, hem i wantem go long vilej ya Joa, we i stap klosap nomo, nating se vilej ya i stap long eria we bambae God i spolem. Nao Jeova i talem long Lot se: “Ale, i gud nomo. Bambae mi no spolem vilej ya.” Jeova i soem se hem i ona long Lot we i stap tru long hem. Hem i mekem wanem we Lot i askem long hem.​—Jenesis 19:15-​22; 2 Pita 2:​6-9.

 6. ?Olsem wanem Jeova i ona long Moses?

⁶ Taem Jeova i sanem Moses i gobak long Ijip blong lidim ol man blong Hem blong oli fri long fasin slef, mo blong askem Fero blong letem ol man blong God oli go, Moses i ansa se: “Hae God, yu yu Masta blong mi, be plis yu no sanem mi. Mi mi no man blong givim gudfala toktok.” Jeova i talem long Moses se: “Bambae mi mi givhan long yu long toktok blong yu, mo bambae mi talem long yu wanem we yu mas talemaot.” Nating se Jeova i talem olsem, be Moses i fraet yet. From samting ya, Jeova i talem sem tok bakegen long Moses mo i talem se bambae Hem i sanem brata blong hem, Eron, blong talemaot tok blong hem long ol man.​—Eksodas 4:​10-​16.

 7. ?From wanem Jeova i rere blong ona long ol man?

⁷ Olgeta eksampel ya, oli soem se Jeova i rere blong ona long ol narafala, antap moa, olgeta ya we oli wosipim hem. Samtaem, wanem we ol man oli askem i defren long tingting blong Jeova. Be Jeova i skelem ol samting ya mo i givim wanem we oli askem, sipos samting ya i no agensem stamba tingting blong hem.

Jisas i Ona Long Ol Narafala

 8. ?Olsem wanem Jisas i ona long wan woman we i sik tumas?

⁸ Jisas i folem eksampel blong Jeova. Hem tu i ona long ol narafala. Wan dei, taem Jisas i stap long medel blong plante man, i gat wan woman we sik blong woman i stap long hem oltaem gogo kasem 12 yia, we i no stop nating. Ol dokta oli no save winim sik blong hem. Folem Loa blong Moses, woman ya i no klin, mo hem i no mas stap klosap long ol man. Woman ya i kam biaen long Jisas, i tajem klos blong hem, nao sik blong hem i finis. Jisas i no yusum ol smosmol poen blong Loa, blong tok strong long woman ya from samting we hem i mekem, nogat. Be, hem i save problem blong woman ya, nao i ona long hem, i talem se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.”​—Mak 5:​25-​34; Levitikas 15:25-​27.

 9. ?Olsem wanem Jisas i ona long wan Hiten woman?

⁹ Long wan narafala taem, wan woman Kenan i talem long Jisas se: “Masta, yu Laen blong King Deved, plis yu sore long mi. Gel blong mi i gat wan devel i stap long hem, we i stap spolem hem tumas.” Jisas i save se God i sanem hem i kam long nesen blong Isrel, be i no long ol Hiten man. Taswe, hem i talem se: “I no stret blong man i tekem ol kakae blong pikinini blong hem [ol man Isrel], i sakem long ol [“smol,” NW] dog [ol Hiten man].” Be woman ya i ansa se: “Masta, i tru, be ol [“smol,” NW] dog tu, oli save kakae ol hafkakae we oli folfoldaon aninit long tebel blong masta blong olgeta.” Nao Jisas i talem long hem se: “Woman, bilif blong yu i strong tumas. Bambae i kamtru long yu, stret olsem we yu yu bilif.” Nao, gel blong woman ya i kam gud bakegen. Jisas i ona long Hiten woman ya from bilif blong hem. Taem Jisas i yusum tok ya “ol [“smol,” NW] dog,” be i no ol wael dog, hem i soem se hem i no mekem i strong tumas long ol Hiten man mo i soem fasin sore.​—Matiu 15:21-​28.

10. ?Wanem bigfala lesen we Jisas i tijim long ol disaepol blong hem, mo from wanem oli nidim samting ya?

¹⁰ Jisas i gohed blong tijim ol disaepol blong hem blong gat tingting daon mo blong ona long ol narafala, from we oli no lego yet fasin ya we oli tingbaot olgeta nomo. Wan taem, afta we ol disaepol oli rao, Jisas i talem long olgeta se: “ ‘?Wanem samting ya we yufala i stap rao from long rod?’ Be olgeta oli no save ansa long hem, from we long rod, oli stap rao se hu long olgeta i hae moa.” (Mak 9:​33, 34) Mo bakegen, long naet bifo we Jisas i ded, “oli rao from tingting ya se hu nao i hae moa long olgeta.” (Luk 22:24) From samting ya, taem oli stap long lafet blong Pasova, Jisas “i tekem wan besin, i kafsaedem wota i go long hem. Nao i stat wasem leg blong ol man blong hem.” !Hemia i rili wan bigfala lesen! Jisas i Pikinini blong God, mo hem nomo i namba tu biaen long Jeova. Nating se i olsem, hem i wasem leg blong ol disaepol blong hem, blong tijim olgeta long fasin ona. Hem i talem se: “Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.”​—Jon 13:​5-​15.

Pol i Soem Ona

11, 12. ?Afta we Pol i kam wan Kristin, hem i lanem wanem, mo olsem wanem hem i folem samting ya long wan bisnes wetem Filimon?

¹¹ Pol i folem eksampel blong Kraes. Hem tu i soem ona long ol narafala. (1 Korin 11:1) Hem i talem se: “Mifala i no traem blong mekem ol man oli presem mifala . . . Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem.” (1 Tesalonaeka 2:​6, 7) Wan mama i keagud long ol pikinini blong hem. Afta we Pol i kam Kristin, hem i lanem tingting daon mo i soem ona long ol Kristin brata sista blong hem, taem i kaengud long olgeta. Long rod ya, hem i respektem fasin fri blong olgeta. Wanem we i hapen long Pol taem hem i stap kalabus long Rom i soemaot samting ya.

¹² Slef ya Onesimas, we i ronwe long masta blong hem, i lesin long tijing blong Pol. Nao hem i kam wan Kristin mo tu i frengud wetem Pol. Filimon, masta blong Onesimas, i laef long Esia Maena, mo hem tu i wan Kristin. Pol i raetem wan leta i go long Filimon, mo i talemaot we Onesimas i stap givhangud long hem, se: “Hem i stap wetem mi, blong tekem ples blong yu, blong givhan long mi.” Nating se i olsem, be Pol i sanem Onesimas i gobak long Filimon, from we hem i raetem se: “Mi no wantem fosem yu blong yu mekem olsem. Mi mi wantem blong yu yu mekem long tingting blong yu nomo. From samting ya, sipos yu no agri blong givhan long mi olsem, mi bambae mi no save holem hem i stap.” Pol i no yusum nem ya aposol blong kasem samting blong givhan long hem wan, nogat. Be hem i ona long Filimon, taswe hem i no askem blong holem Onesimas i stap long Rom. Mo tu, Pol i askem strong long Filimon blong ona long Onesimas, mo mekem i gud long hem olsem we “hem i no wan slef nomo, be hem i moa long slef. !Hem i wan gudfala brata blong yumi!”​—Filimon 13-​16.

Soem Fasin Ona Long Taem Blong Yumi

13. ?Rom 12:10 i talem long yumi blong mekem wanem?

¹³ Tok blong God i givim advaes ya se: “Oltaem yufala i mas rere blong ona long yufala.” (Rom 12:10) Samting ya i minim se yumi no mas wet long narafala blong soem ona long yumi fastaem. Yumi mas tekem faswan step blong soem ona. “I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.” (1 Korin 10:24; 1 Pita 3:​8, 9) Taswe, ol man blong Jeova oli lukaot rod blong soem ona insaed long famle blong olgeta, long ol Kristin insaed long kongregesen, mo long ol narafala man we oli stap raonabaot long olgeta.

14. ?Olsem wanem hasban mo waef, tufala i save soem ona long tufala?

¹⁴ Baebol i talem se: “Kraes, hem i hed blong man, mo man, hem i hed blong woman blong hem.” (1 Korin 11:3) Jeova i askem ol man blong mekem i gud long waef blong olgeta olsem we Kraes i mekem long kongregesen. Fas Pita 3:7 i talem se hasban i mas ‘ona long woman blong hem, from we woman i no strong olsem man.’ Hasban i save soem fasin ya taem hem i rere blong lesin mo tingtinggud long ol tok blong waef blong hem. (Jenesis 21:12) Sipos samting we waef i talem i no brekem rul blong Baebol, maet fastaem, i gud we hasban i lesin long hem, givhan long hem mo i kaengud long hem. Woman tu “i mas ona gud long man blong hem.” (Efesas 5:​33) Woman i mas lesin long man blong hem. I nogud we oltaem, hem i wantem win. Hem i no mas tok daonem no traem faenem poen long man blong hem. Woman i soem tingting daon taem hem i no traem blong bos long hasban blong hem, nating se hem i gat moa save blong mekem sam samting.

15. ?Olsem wanem blong soem se yumi tingbaot ol olfala, mo ol olfala oli mas mekem wanem?

¹⁵ Insaed long Kristin kongregesen, i gat olgeta we i stret blong yumi ona gud long olgeta. Sam long olgeta ya, hemia ol olfala. “Yufala i mas bodaon long ol olfala [man mo woman], mo yufala i mas ona gud long olgeta.” (Levitikas 19:32) Samting ya i tru moa long saed blong olgeta we oli bin mekem wok blong Jeova long plante yia finis. Yes, “waet hea, hemia i olsem wan gudfala hat blong king we ol man oli putum long hed blong man blong ona long hem.” (Ol Proveb 16:31) Ol elda oli mas soem eksampel long saed ya. Oli mas soem respek long ol Kristin brata mo sista we oli olfala moa long olgeta. Ol olfala tu oli mas soem respek long ol yangfala, antap moa, ol yangfala we oli stap mekem wok ya blong lukaot long ol sipsip.​—1 Pita 5:​2, 3.

16. ?Olsem wanem ol papa mama mo ol pikinini oli save ona long olgeta?

¹⁶ Ol pikinini oli mas ona long papa mama blong olgeta: “Ol pikinini. Yufala i mas obei long papa mo mama blong yufala, from we yufala i joen long Masta blong yumi. Hemia i stret fasin blong yufala i mekem. Loa ya we i talem se, ‘Yufala i mas ona long papa mo mama blong yufala,’ hemia i faswan long ol loa ya we i gat promes i stap long hem. Promes ya i talem se, ‘Sipos yufala i mekem olsem, bambae ol samting blong laef blong yufala i save ron gud, mo bambae laef blong yufala long graon ya, i longfala.’ ” Ol papa mo mama tu, oli mas ona long ol pikinini blong olgeta, from we oli kasem oda blong ‘no mekem ol samting long ol pikinini blong olgeta we i save mekem olgeta oli kros, be oli mas tijim mo stretem olgeta olsem we Masta i wantem.’​—Efesas 6:​1-4; Eksodas 20:12.

17. ?I stret blong yumi soem “dabol ona” long hu?

¹⁷ Yumi mas ona tu long olgeta we oli stap wok strong blong givhan long kongregesen: “Ol elda we oli stap wok strong long wok blong lidim ol man, [“i stret we oli kasem dabol ona,” NW]. Tok ya i stret long olgeta we oli stap hadwok blong prij mo blong tijim ol man.” (1 Timoti 5:​17) Wan rod blong soem dabol ona long olgeta, hemia taem yumi mekem wanem we Hibrus 13:17 i talem, se: “Yufala i mas ona long ol [“man ya we oli stap lidim,” NW] yufala, mo yufala i mas obei long ol tok blong olgeta.”

18. ?Yumi mas mekem wanem long olgeta we oli no joen long kongregesen?

¹⁸ ?Olsem wanem long ol man we oli stap afsaed long kongregesen? ?Yumi mas ona long olgeta tu? Yes. Eksampel, yumi kasem oda ya se: “Yumi evriwan i mas ona long gavman.” (Rom 13:1) Hemia ol gavman blong wol ya we Jeova i letem olgeta blong rul go kasem taem we Kingdom blong hem i tekem ples blong olgeta. (Daniel 2:​44) Taswe, yumi ‘mas pem ol hed takis long man we i tekem hed takis, mo yumi mas pem takis blong ol samting blong yumi i go long man we i tekem takis ya. Man we i stret blong yumi ona long hem, yumi mas ona long hem, mo man we i stret blong yumi obei long hem, yumi mas obei long hem.’ (Rom 13:7) Yumi mas “ona long olkaen man [mo woman].”​—1 Pita 2:​17, NW.

19. ?Olsem wanem yumi save “mekem i gud” long ol narafala mo soem ona long olgeta?

¹⁹ I tru, yumi mas ona long olgeta ya tu we oli stap afsaed long kongregesen. Be, i gud yumi makem wanem we Tok blong God i talem: “Oltaem, sipos yumi gat janis, yumi mas mekem i gud long olgeta man. Antap moa, yumi mas mekem olsem long olgeta ya we oli brata mo sista blong yumi from we olgeta tu oli bilif long Kraes.” (Galesia 6:​10) Yes, beswan rod blong “mekem i gud” long ol narafala, hemia blong givhan long olgeta blong luksave nid blong olgeta long saed blong spirit mo blong kasem ol nid ya. (Matiu 5:3) Yumi save mekem olsem taem yumi folem advaes blong aposol Pol se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.” Taem yumi yusum evri rod wetem waes fasin, blong givim witnes, mo “mekem wok ya blong talemaot gud nius,” yumi stap mekem i gud long olgeta man, mo yumi stap soem ona long olgeta tu.​—2 Timoti 2:​15; 4:5.

Ona Long Jeova

20. ?Wanem i hapen long Fero mo ol ami blong hem, mo from wanem?

²⁰ Jeova i ona long ol man we hem i wokem. Taswe, i stret nomo we yumi ona gud long hem. (Ol Proveb 3:9; Revelesen 4:​11) Tok blong Jeova i talem se: “Man we i ona long mi, mi bambae mi ona long hem. Be man we i tingting nating long mi, mi bambae mi tingting nating long hem.” (1 Samuel 2:​30) Taem Fero blong Ijip i kasem oda blong letem ol man blong God oli go, hem i mekem flas, i ansa se: “?Hu ya Hae God ya? ?Weswe mi mi mas harem hem?” (Eksodas 5:2) Taem Fero i sanem ol ami blong hem oli go blong kilim ol man Isrel, Jeova i mekem se Red Si i seraot long tu haf, blong ol man Isrel oli save gokros. Be taem ol man Ijip oli kam biaen, Jeova i mekem se solwota ya i kam fulap bakegen long ples blong hem. “Ol soldia blong king blong Ijip wetem ol kat blong faet blong hem hem [Jeova] i sakem olgeta oli go draon long Red Si.” (Eksodas 14:26-​28; 15:4) Fero i flas tumas, hem i no wantem ona long Jeova. From samting ya, hem i kasem bigfala trabol.​—Ol Sam 136:15.

21. ?From wanem Jeova i agensem Belsasa, mo wanem frut i kamaot from?

²¹ King Belsasa blong Babilon i no wantem ona long Jeova. Long wan lafet, taem oli stap dring waen, hem i jikim Jeova, i stap dring long ol tabu kap we oli wokem long gol mo silva, we oli tekem long tempel long Jerusalem. Mo long sem taem, hem i stap presem ol god blong hem. Daniel, wan man blong Jeova, i talem long Belsasa se: “Yu no mekem tingting blong yu i kamdaon nating . . . Yu girap yu agens long Hae God ya we i stap long heven.” Long sem naet ya nomo, ol man oli kam, oli kilim Belsasa i ded, mo kingdom blong hem i lus.​—Daniel 5:​22-​31.

22. (a) ?From wanem Jeova i kros tumas long ol man Isrel mo ol lida blong olgeta? (b) ?Hu ya we Jeova i glad long olgeta, mo oli kasem wanem frut?

²² Long faswan handred yia K.T.,a King Herod i stap givim wan tok, nao olgeta man oli singaot bigwan, oli talem se: “Hemia i no man ya we i stap toktok long yumi. Hemia wan god ya.” King ya i wan man nomo, be hem i agri long tok ya se hem i wan god. Hem i wantem se oli leftemap hem. Nao “wan enjel blong Hae God i mekem King Herod i foldaon, from we hem i no save leftemap nem blong God.” (Ol Wok 12:21-​23) Herod i ona long hem wan, hem i no ona long Jeova. From samting ya, Jeova i kilim hem i ded. Ol lida blong skul long taem ya oli no ona nating long God. Nao oli girap, oli mekem rabis plan blong kilim Pikinini blong hem, Jisas, i ded. Sam lida, oli save se Jisas i stap tijim trutok, be oli no biaenem hem, from we “oli wantem tumas we ol man oli glad long olgeta, i winim we oli wantem blong God i glad long olgeta.” (Jon 11:47-​53; 12:42, 43) Fulwan nesen blong Isrel i no ona nating long Jeova mo Man ya we i stap wok long nem blong Hem, Jisas. From samting ya, Jeova i no moa ona long olgeta. Hem i lego olgeta, nao ol enemi oli kam spolem gud olgeta mo tempel blong olgeta. Be Jeova i sevem ol man we oli ona long hem mo Pikinini blong hem.​—Matiu 23:38; Luk 21:20-​22.

23. ?Yumi mas mekem wanem blong laef long niufala wol blong God? (Ol Sam 37:​9-​11; Matiu 5:5)

²³ Olgeta we oli wantem laef long niufala wol blong God, afta we hem i spolem rabis wol ya, oli mas ona mo obei long God mo Pikinini blong hem, Jisas Kraes. (Jon 5:​22, 23; Filipae 2:​9-​11) Olgeta we oli no ona long tufala, “bambae God i tekemaot olgeta oli gowe long [wol ya].” Be ol stret man we oli ona mo obei long God mo Kraes, “bambae oli save stap gud long [wol ya].”​—Ol Proveb 2:​21, 22.

[Futnot]

Tingtingbak

◻ ?I minim wanem blong ona long ol narafala, mo olsem wanem Jeova i ona long ol man?

◻ ?Olsem wanem Jisas mo Pol, tufala i ona long ol narafala?

◻ ?Long taem blong yumi, i stret blong yumi ona long hu?

◻ ?From wanem yumi mas ona long Jeova mo Jisas?

[Tok Blong Pija Long Pej 17]

Jeova i ona long Ebraham taem Hem i lesin long ol tok blong Ebraham

[Tok Blong Pija Long Pej 18]

Long ol gudfala mared, ol hasban mo waef oli ona long olgeta