Laef Stori

Jeova i Halpem Mi Blong Winim Fasin Sem

RUTH L. ULRICH I TALEM STORI YA

Mi no moa save mekem wan samting, mi stat krae stret long doa blong pasta. Hem i jes finis blong talem plante giaman toktok agensem Charles T. Russell, faswan presiden blong Watch Tower Bible and Tract Society. Bambae mi eksplenem olsem wanem wan yangfala gel olsem mi, i stap visitim ol man.

MI MI bon long 1910, long wan plantesin long Nebraska, Yunaeted Stet. Famle blong mi i strong long saed blong skul. Evri moning mo sapa, afta we mifala i kakae, mifala i ridim Baebol tugeta. Papa i lukaot long Sande skul blong Metodis jos long smol taon ya, Winside, we i stap samwe 6 kilometa afsaed long plantesin blong mifala. Mifala i gat wan kat we hos i pulum. Kat ya, i gat ol windo we mifala i save satem taem weta i nogud. From samting ya, mifala i save go long jos evri sande moning.

Taem mi gat eit yia, smol brata blong mi i kasem sik ya polio mo Mama i tekem hem i go long wan spesel hospital long Iowa. Nating se Mama i lukaot gud long hem, brata blong mi i ded long hospital ya. Be, taem Mama i stap long Iowa, hem i mitim wan Baebol Studen, hemia ol Witnes blong Jeova long taem ya. Tufala i storian plante, mo tu Mama i folem woman ya i go long sam miting blong ol Baebol Studen.

Taem Mama i kamhom, hem i karem sam kopi blong buk ya Studies in the Scriptures, we Watch Tower Society i wokem. I no long taem biaen, hem i bilif se ol Baebol Studen oli stap tijim trutok, mo se ol tijing olsem sol i no save ded samtaem mo ol nogud man oli go long wan ples blong harem nogud blong olwe, oli ol tijing we oli giaman.—Jenesis 2:7; Prija 9:5, 10; Esikel 18:4.

Be, Papa i kros tumas mo i traem blokem Mama blong i no go long ol miting blong ol Baebol Studen. Papa i gohed blong tekem mi mo bigfala brata blong mi, Clarence, i go wetem hem long jos. Be taem Papa i no stap long haos, Mama i tijim mitufala long saed blong Baebol. From samting ya, mi mo brata blong mi, mitufala i gat jans blong skelem tijing blong ol Baebol Studen wetem tijing blong jos blong mifala.

Mi wetem brata blong mi Clarence, mitufala i go oltaem long Sande Skul, mo brata blong mi i askem plante kwestin we tija i no save ansarem. Taem mitufala i kamhom, mitufala i talemaot samting ya long Mama, mo mitrifala i tekem plante taem blong tokbaot ol kwestin ya. Nao biaen, mi lego jos mo mi joenem Mama blong go long ol miting blong ol Baebol Studen. Mo i no long taem biaen, Clarence tu i joenem mitufala.

Winim Fasin Blong Sem

Long Septemba 1922, mi mo Mama, mitufala i go long wan asembli blong ol Baebol Studen long Cedar Point, Ohio. Hemia wan asembli we mi no save fogetem. Kam kasem tede, mi save pijarem yet bigfala kaliko we oli openem, mo Joseph F. Rutherford, presiden blong Watch Tower Society long taem ya, i talemaot tok we i stap long kaliko ya long ol 18,000 man we oli stap. Tok ya i olsem se: “Talemaot King ya mo Kingdom blong hem.” Tok ya i rili kasem hat blong mi, mo mi luksave se i impoten tumas blong talemaot gud nius blong Kingdom blong God long ol narafala.—Matiu 6:9, 10; 24:14.

Long ol asembli stat long 1922 go kasem 1928, ol Baebol Studen oli tekem sam spesel disisen, mo oli raetemdaon ol tok blong ol disisen ya long ol smosmol pepa, nao oli seremaot long plante milian man long olgeta ples long wol. Mi mi longfala mo mi bunbun tu—oli stap singaot mi se greyhound (nem blong wan dog blong resis)—mo mi spid i go long ol haos wanwan blong seremaot ol pepa ya. Mi rili laekem wok ya. Be, wok blong storian wetem ol man, mo blong tokbaot Kingdom blong God long ol narafala, hem i wan wok we i no isi long mi blong mekem.

Mi mi gat fasin blong sem bigwan. Evri yia, taem mama i singaot ol famle nomo oli kam long haos blong mifala, mi mi sem mo mi fraet tumas. Mi ronwe, mi go haed long rum blong mi mo mi no save kamaot. Wan dei, Mama i wantem tekem wan foto blong fulwan famle, mo hem i talem long mi blong kamaot long rum blong mi. Mi no wantem joenem olgeta, nao Mama i pulum mi blong kam afsaed, be mi krae bigwan, mi no wantem kam afsaed.

Be, wan dei, mi mekemap maen blong mi, nao mi tekem sam buk we oli eksplenem Baebol, mi putum insaed long bag blong mi. Mi talem bakegen mo bakegen se, “Mi mi no save mekem samting ya,” be stret biaen, mi gat tingting ya se, “Mi mas mekem samting ya.” Ale, mi goaot long wok blong prij. Biaen, mi glad tumas we mi winim fraet blong mi. Yes, afta long wok blong prij, mi harem gud moa i winim we mi stap long wok blong prij. Raonabaot long taem ya nao, mi faenem pasta we i mekem mi mi krae, we mi tokbaot hem long stat blong stori ya. Be taem ol yia oli pas, Jeova i halpem mi, nao mi save storian wetem ol man long doa blong olgeta, mo samting ya i givim moa glad long mi. Ale, long 1925, mi givim laef blong mi i go long Jeova mo mi tekem baptaes.

Statem Wok Blong Fultaem Paenia

Taem mi gat 18 yia, mi pem wan trak wetem mane we mi kasem long wan anti blong mi. Nao mi statem wok blong paenia, hemia nem blong olgeta we oli prij fultaem. Tu yia biaen, hemia long 1930, mi mo wan fren blong mi, mitufala i agri blong go long wan narafala ples blong prij. Long taem ya, Clarence i statem wok blong paenia finis. I no long taem biaen, oli singaot hem blong go wok long Betel, hedkwota blong ol Witnes blong Jeova long Brooklyn, New York.

Raonabaot long taem ya, papa mo mama blong mitufala i seraot. Ale, mi mo Mama, mitufala i bildim wan smol haos we i gat wil, blong trak i save pulum, mo mitufala i stat blong paenia tugeta. Hemia nao taem we Bigfala Hadtaem i kasem Yunaeted Stet. I no isi long mitufala blong gohed long wok blong paenia, be mitufala i gat strong tingting blong no lego wok ya. Mitufala i givimaot ol buk we oli tokbaot Baebol long olgeta man, mo oli pem wetem faol, eg, ligim, ol olfala batri, mo alaminiom aean we i nogud. Ol olfala batri mo alaminiom aean, mifala i salem bakegen blong winim mane blong pem bensin blong trak mo ol narafala samting we mitufala i nidim. Blong sevem mane, mi lanem blong putum gris long trak mo blong jenisim oel. Mitufala i luk we Jeova, folem promes blong hem, i openem rod blong halpem mitufala blong winim ol traem.—Matiu 6:33.

Mekem Wok Olsem Misinari

Long 1946, mi kasem wan leta we i askem mi blong go long namba seven klas blong Wajtaoa Baebol Skul blong Gilead, klosap long South Lansing, New York. Long taem ya, mi mo Mama i paenia tugeta blong bitim 15 yia finis. Mama i no wantem blokem jans we mi gat blong kasem trening blong kam misinari. Taswe hem i leftemap tingting blong mi blong akseptem jans ya blong go long Skul blong Gilead. Afta we mifala i kasem stefeket blong mifala, mi mo Martha Hess blong Peoria, Illinois, mitufala i wok tugeta long misinari wok. Oli sanem mitufala wetem tu narafala bakegen i go long Cleveland, Ohio. Mifala i prij long ples ya wan yia, mo afta oli mas sanem mifala i go long wan narafala kantri.

Long 1947, oli sanem mi mo Martha i go long Hawaii. From we i isi nomo blong muf i go long kantri ya, Mama tu i muf i kam mo i stap klosap long mitufala long taon blong Honolulu. Helt blong Mama i kam nogud, taswe, antap long wok blong misinari, mi mas halpem hem tu. Mi lukaot gud long hem go kasem we hem i ded long Hawaii long 1956, taem hem i gat 77 yia. Taem mifala i kam long Hawaii, i gat samwe long 130 Witnes, be long taem we Mama i ded, namba ya i go antap bitim wan taosen, mo i no moa nidim ol misinari blong givhan.

Long 1957, mi mo Martha, mitufala i kasem wan leta long Watch Tower Society, we i askem mitufala blong go long Japan. Faswan samting we mifala i tingbaot, hemia blong lanem lanwis Japan. Long taem ya, mi gat 48 yia, mo Martha i gat 44 yia. Be mitufala i putum evri samting long han blong Jeova mo mitufala i akseptem blong go.

Long 1958, afta long intenasnal asembli long Yankee Stadium mo Polo Grounds, long New York, mitufala i jam long wan sip blong go long Tokyo. Taem mifala i kam klosap long haba blong Yokohama, mifala i fesem wan strongfala win. Long ples ya, Don mo Mabel Haslett, Lloyd mo Melba Barry, mo sam narafala misinari bakegen oli kam blong mitim mitufala. Long taem ya, i gat 1,124 Witnes nomo long Japan.

Kwiktaem nomo mitufala i stat blong lanem lanwis Japan mo blong joen long wok blong prij long ol haos wanwan. Mitufala i raetem ol toktok blong mitufala long lanwis blong Japan, be mitufala i yusum ol leta long Inglis, blong mitufala i save ridim. Ol man blong haos oli ansa long mitufala se, “Yoroshii desu” no, “Kekko desu,” we mitufala i lanem se, tok ya i minim, “Hem i oraet nomo” no, “Hem i gud nomo.” Be oli stap yusum ol tok ya tu blong talem se, no, oli no laekem. Taswe, plante taem mitufala i no sua sipos man blong haos i intres no nogat. Mining blong ol tok ya i dipen long saon blong voes blong man we i talem mo fes blong hem. I tekem taem blong mitufala i lan blong luksave samting ya.

Ol Stori We i Mekem Hat Blong Mifala i Glad

Wan dei, taem mi stap traehad yet blong toktok lanwis Japan, mi visitim ples blong slip blong ol man we oli wok long wan Mitsubishi Kampani, mo mi storian wetem wan woman we i gat 20 yia. Hem i gohed gud long Baebol stadi blong hem mo i tekem baptaes long 1966. Wan yia biaen, hem i stat blong paenia mo i no long taem biaen, hem i kam olsem wan spesel paenia. Hem i mekem wok ya kam kasem naoia. Oltaem, eksampel blong hem i leftemap tingting blong mi bigwan. Hem i bin yusum taem mo paoa blong hem blong prij fultaem stat long taem we hem i yangfala kam kasem tede.

I no isi nating blong holem ol trutok blong Baebol long ol kantri we ol man blong hem oli no Kristin. Be nating se i olsem, plante taosen man oli winim traem ya. Sam long olgeta, mi mi bin stadi Baebol wetem olgeta. Oli sakemaot ol sas olta blong Budis mo Sinto we ol man Japan oli putum long haos blong olgeta folem kastom blong olgeta. Samtaem ol famle oli ting se fasin ya i no soem respek long ol bubu we oli ded. Taswe olgeta we oli lanem trutok oli nidim fasin no fraet blong sakemaot ol olta ya. Wanem we olgeta oli mekem i pulum yumi blong tingbaot wanem we ol faswan Kristin oli mekem taem oli sakemaot olgeta samting we oli joen wetem giaman wosip.—Ol Wok 19:18-20.

Mi tingbaot wan Baebol studen, wan mared woman, we i wantem tekem famle blong hem, oli aot long Tokyo. Hem i wantem muf i go long wan niufala haos we i no gat wan samting long hem we i joen long hiten wosip. Ale, woman ya i talemaot tingting blong hem long hasban blong hem, mo hasban blong hem i agri long disisen ya. Hem i glad tumas blong storian wetem mi long bisnes ya. Be biaen, hem i tingbaot se hem i bin pem wan bigfala raon glas, we i sas tumas mo glas ya i stap yet long bokis blong hem. Taem hem i pem glas ya, oli talem se samting ya i save givim glad long famle blong hem. Hem i ting se glas ya i joen wetem giaman wosip, taswe hem i brekem wetem hama mo sakem.

Mi harem gud tumas mo i wan bigfala blesing taem mi luk se woman ya mo sam narafala bakegen oli rere blong sakem ol sas samting we oli joen wetem giaman wosip mo we oli no fraet blong statem wan niufala laef blong mekem wok blong Jeova. Oltaem, mi talem tangkiu long Jeova from we mi bin haremgud long misinari wok long Japan blong bitim 40 yia.

“Ol Merikel” Long Taem Blong Yumi

Taem mi tingtingbak long bitim 70 yia we mi spenem long wok blong prij fultaem, mi sapraes long wan samting we mi mi luk olsem merikel long taem blong yumi. Taem we mi mi yangfala mo mi gat fasin blong sem, mi neva ting se mi save spenem ful laef blong mi blong go storian wetem ol man long saed blong wan Kingdom, we bighaf blong ol man oli no intres long hem. Be, i no mi nomo we i mekem samting ya, mi mi luk we plante handred, maet plante taosen, oli mekem sem mak. !Mo wok blong olgeta i karem nambawan frut from we smol namba blong wan taosen Witnes blong Jeova long Japan long 1958, i kam antap bitim 222,000 tede!

Taem mi mo Martha, mitufala i kam long Japan fastaem, oli askem mitufala blong go stap long branj ofis long Tokyo. Long 1963, oli bildim wan niufala branj ofis long ples ya, we i gat sikis stori blong hem, mo mitufala i laef long ples ya kam kasem tede. Long Novemba 1963, mitufala i stap wetem ol 163 man we oli harem tok blong dedikesen we Lloyd Barry, we i lukaot long branj ofis blong mifala i givim. Long taem ya, i gat 3,000 Witnes long Japan.

Mi haremgud tumas blong luk se wok blong talemaot Kingdom i gru bigwan, we namba blong ol pablisa i bitim 14,000 long 1972. Long taem ya, oli bildim wan bigfala branj ofis long taon blong Numazu. Be long 1982, namba blong olgeta we oli talemaot Kingdom long Japan i bitim 68,000, nao long taon blong Ebina, samwe 80 kilometa afsaed long Tokyo, oli bildim wan branj ofis we i bigfala moa.

Long sem taem, oli mekem olfala branj ofis we i stap long Tokyo i kam niuwan bakegen. Biaen, oli yusum haos ya olsem ples blong slip blong bitim 20 misinari we oli bin wok long Japan blong 40, no 50 yia. Mi mo Martha, sista ya we mitufala i bin wok wanples blong plante yia, mitufala tu i stap long ples ya. Wan dokta mo waef blong hem we i wan nes, tufala tu i stap long haos blong mifala. Wetem lav, tufala i stap lukaot long helt blong mifala. I no long taem i pas, wan narafala nes i joenem tufala, mo sam Kristin sista oli kam evri dei blong givhan long olgeta blong lukaot long mifala. Tu memba blong Betel long Ebina, tufala i stap jenis, wan afta narawan, blong kukum kakae mo klinim haos blong mifala. Yes i tru se Jeova i mekem i gud tumas long mifala.—Ol Sam 34:8, 10.

Wan bigfala samting we i makem laef blong mi olsem wan misinari, i hapen las Novemba, 36 yia afta long dedikesen blong haos ya we mifala ol olfala misinari, mifala i stap long hem. Long Novemba 13, 1999, mi stap wetem ol 4,486 man, we plante handred blong olgeta, oli Witnes blong Jeova long plante yia mo oli kamaot long 37 kantri. Mifala i stap wanples blong lesin long tok blong dedikesen from we oli bin mekem branj ofis blong Watch Tower Bible and Tract Society long Ebina, Japan, i kam bigfala moa. Naoia i gat klosap 650 memba long famle long branj ofis ya.

Long klosap 80 yia we mi talemaot mesej blong Baebol, i stat long taem ya we mi fraet blong storian wetem ol man long ol haos wanwan, Jeova i bin givim paoa long mi. Hem i bin halpem mi blong winim fasin sem. Mi bilif strong se Jeova i save yusum eni man we i trastem hem, olgeta ya tu we oli sem bigwan olsem mi. !Yes, mi haremgud tumas, we mi bin yusum laef blong mi blong tokbaot God blong mi, Jeova, long ol strenja!

[Tok blong pija long pej 21]

Wetem Mama mo Clarence, we hem i aot long Betel blong kam visitim mifala

[Tok blong pija long pej 23]

Mifala wetem ol memba blong klas, mifala i stap stadi long garen blong Skul blong Gilead long South Lansing, New York

[Tok blong pija long pej 23]

Lefsaed: Mi, Martha Hess, mo Mama, long Hawaii

[Tok blong pija long pej 24]

Raetsaed: Ol memba blong misinari hom blong mifala long Tokyo

[Tok blong pija long pej 24]

Daon: Mi wetem Martha Hess, sista we mitufala i bin wok wanples blong plante yia

[Tok blong pija long pej 25]

Long Novemba, taem mifala i dediketem branj ofis blong mifala we oli mekem i kam bigfala moa long Ebina