?Lav Blong Yu i Bigwan Olsem Wanem?

“Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.”—⁠MATIU 22⁠:⁠39.

 1. ?Sipos yumi lavem Jeova, from wanem yumi mas lavem ol man raonabaot long yumi tu?

TAEM wan man i askem Jisas se weswan loa i hae moa long ol narafala loa, hem i ansa se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” Nao, hem i tokbaot namba tu loa we i klosap sem mak olsem faswan ya, i se: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22⁠:​37, 39) Yes, fasin blong lavem ol man raonabaot i makemaot wan trufala Kristin. Sipos yumi lavem Jeova, yumi mas lavem ol man raonabaot long yumi. ?From wanem? From we yumi soem se yumi lavem God taem yumi obei long Tok blong hem, mo Tok blong hem i talem se yumi mas lavem ol man raonabaot long yumi. Taswe, sipos yumi no lavem ol brata mo sista blong yumi, yumi stap giaman nomo se yumi lavem God.​—⁠Rom 13⁠:8; 1 Jon 2:5; 4:​20, 21.

 2. ?Wanem kaen lav we yumi mas gat long ol man raonabaot long yumi?

² Taem Jisas i talem se yumi mas lavem ol man raonabaot long yumi, hem i no stap tokbaot fasin blong frengud nomo wetem ol narafala. Hem i stap tokbaot wan lav we i defren long hemia we i stap bitwin ol memba blong wan famle no bitwin wan man mo woman. Hem i stap tokbaot lav ya we Jeova i gat long ol man blong wok blong hem, mo lav we olgeta ya oli gat long hem. (Jon 17⁠:26; 1 Jon 4:​11, 19) Wan tija blong loa​—⁠we Jisas i luksave se hem i gat save​—⁠i agri wetem Jisas se yumi mas lavem God “long olgeta hat blong yumi, mo long olgeta tingting blong yumi mo long olgeta paoa blong yumi.” (Mak 12⁠:​28-34) Tok blong man ya i tru. Lav we wan Kristin i mas gat long God mo ol man raonabaot, i joen wetem filing mo save. Yumi harem save lav ya long hat blong yumi nao tingting blong yumi i stap lidim lav ya.

 3. (a) ?Olsem wanem Jisas i tijim wan “tija blong Loa” long fasin blong lavem ol man raonabaot long hem? (b) ?Olsem wanem parabol blong Jisas i stret long ol Kristin tede?

³ Buk blong Luk i soem se, taem Jisas i talem se yumi mas lavem ol man raonabaot, “wan tija blong Loa” i askem se: “?Be hu ol man ya we oli stap raonabaot long mi, we Loa ya i tokbaot?” Jisas i talem wan parabol blong ansa long kwestin ya. I gat wan man we ol narafala oli kilim hem, oli stilim olting blong hem, mo oli livim hem i stap long rod we i hafded. Nao, wan pris mo biaen wan Livaet, tufala i wokbaot i pas long ples ya. Tufala tugeta i no wantem givhan long man ya. Nao wan man Sameria i kam pas long ples ya, mo i luk man ya we i kasem kil, ale, hem i kaengud long man ya. ?Weswan long trifala man ya i soem lav long man we i gat kil? Ansa i klia nomo. (Luk 10⁠:​25-​37) Maet tija ya blong Loa i sek taem Jisas i talem se wan man Sameria i mekem i gud moa i winim wan pris mo wan Livaet. I klia se Jisas i wantem givhan long man ya blong i lavem ol man raonabaot long hem long fasin we i bigwan moa. Ol Kristin tu oli gat lav olsemia. Tingbaot olgeta ya we wan Kristin i mas soemaot lav long olgeta.

Lav Insaed Long Famle

 4. ?Wan Kristin i mas soemaot lav long hu fastaem?

⁴ Ol Kristin oli lavem ol memba blong famle blong olgeta​—⁠ol waef oli lavem hasban blong olgeta, ol hasban oli lavem waef blong olgeta, ol papa mama oli lavem ol pikinini blong olgeta. (Prija 9⁠:9; Efesas 5:​33; Taetas 2:⁠4) I tru, plante famle oli gat lav ya we i save joenemgud olgeta from we hem i wan filing we yumi bon wetem. Be long nius, yumi harem se ol mared oli brok, ol hasban mo waef oli faet, mo ol pikinini oli no kasem lav mo oli harem nogud. Samting ya i soemaot se ol famle tede oli stap fesem hadtaem, mo ol gudfala filing we i stap bitwin ol memba blong wan famle oli no naf blong mekem famle i stanap strong. (2 Timoti 3:1-3) Blong winim ol problem long famle, ol Kristin oli mas wokem lav ya we Jeova mo Jisas tufala i gat.​—⁠Efesas 5:​21-​27.

 5. ?Ol papa mama oli lukluk i go long hu blong halpem olgeta blong tijim ol pikinini blong olgeta, mo plante long olgeta oli kasem wanem gudfala frut?

⁵ Ol Kristin papa mama oli tingbaot ol pikinini blong olgeta olsem wan sas presen we Jeova i givim long olgeta blong oli lukaot. Taswe oli lukluk i go long Jeova nomo blong halpem olgeta blong tijim gud ol pikinini blong olgeta. (Ol Sam 127:​3-5; Ol Proveb 22⁠:6) Long rod ya, oli wokem Kristin lav, mo lav ya i halpem olgeta blong blokem ol pikinini blong olgeta long ol trap we plante yangfala tede oli foldaon long hem. From samting ya, plante Kristin papa mama oli kasem bigfala glad. Tingbaot eksampol blong wan mama long Netalan. Mama ya i stap taem pikinini boe blong hem i tekem baptaes wetem ol 575 man we oli baptaes long Netalan las yia. Hem i raetem se: “Long taem ya nao, mi kasem pei from hadwok we mi mekem long ol 20 yia we oli pas. Taem mo paoa we mi bin spenem​—⁠wetem soa, traehad, mo sore we oli bin kasem mi​—⁠naoia mi fogetem olgeta evriwan.” Mama ya i glad tumas we boe blong hem i jusum blong mekem wok blong Jeova. Long ol 31,089 man blong talemaot gud nius long Netalan las yia, i gat plante we papa mama blong olgeta nao i lanem olgeta blong lavem Jeova.

 6. ?Olsem wanem Kristin lav i save mekem mared i strong moa?

⁶ Pol i talem se lav i “save joenemgud olgeta samting, blong oli kam wan.” Lav ya i save mekem se wan mared i stap strong oltaem nating se i gat ol traem. (Kolosi 3:​14, 18, 19; 1 Pita 3:​1-7) Long Rurutu, wan smol aelan we i stap 700 kilometa longwe long Tahiti, wan man i stat stadi Baebol wetem ol Witnes blong Jeova. Be woman blong hem i agensem hem bigwan. Ale, woman ya i tekem ol pikinini blong tufala, i lego man ya, mo i go stap long Tahiti. Nating se i olsem, man ya i gohed blong soem lav long woman blong hem. Oltaem hem i sanem mane mo i telefon blong askem sipos woman ya mo ol pikinini oli nidim sam samting. Long rod ya, man ya i traem bes blong hem blong folem Kristin fasin. (1 Timoti 5⁠:8) Hem i prea oltaem se famle blong hem i mas joen tugeta bakegen, mo biaen, woman blong hem i kambak. Taem oli joen bakegen, man ya i mekem i gud long woman blong hem. Hem i soemaot ‘lav, mo fasin stanap strong oltaem, mo kwaet fasin.’ (1 Timoti 6⁠:​11, NW ) Long 1998, hem i baptaes, mo biaen, hem i glad tumas taem woman blong hem i wantem stadi Baebol. Stadi ya i wan nomo long olgeta 1,351 stadi we ol Witnes oli mekem long Tahiti las yia.

 7. ?Wan man long Jemani i talem se wanem samting i givhan long hem blong mekem mared blong hem i kam strong moa?

⁷ Long Jemani wan man i agensem woman blong hem we i laekem trutok blong Baebol. Man ya i bilif strong se ol Witnes blong Jeova oli stap giaman long woman blong hem. Be biaen, man ya i raetem wan leta i go long Witnes ya we i bin prij long woman blong hem, i se: “Tangkiu blong tekem waef blong mi i go long ol Witnes blong Jeova. Fastaem, mi mi wari from we mi harem fulap nogud stori long saed blong olgeta ya. Be taem mi folem woman blong mi i go long ol miting, mi luksave se tingting blong mi i rong olgeta. Mi save se ol tok ya we mi harem oli trutok ya, mo samting ya i mekem mared blong mitufala i kam strong moa.” Long olgeta 162,932 Witnes blong Jeova long Jemani​—⁠mo 1,773 long ol aelan we branj ofis blong Tahiti i stap lukaot long olgeta​—⁠i gat plante famle we oli joengud from lav ya we i kamaot long God.

Lavem Ol Kristin Brata

8, 9. (a) ?Hu i tijim yumi blong lavem ol brata blong yumi, mo lav ya i pusum yumi blong mekem wanem? (b) Givim wan eksampol blong soem se lav i save halpem ol brata blong givgivhan long olgeta.

⁸ Pol i talem long ol Kristin long Tesalonaeka se: “God i tijim yufala finis, se yufala i mas lavlavem yufala.” (1 Tesalonaeka 4⁠:9) Ol man we “Jeova i tijim olgeta,” oli lavlavem olgeta. (Aesea 54⁠:13, NW ) Oli soemaot lav ya long ol aksin blong olgeta. Pol i talem se: “Oltaem yufala i givgivhan long yufala from we yufala i lavlavem yufala.” (Galesia 5:​13; 1 Jon 3:​18) Oli soem lav ya taem oli go luk ol brata mo sista blong olgeta we oli sik, taem oli leftemap tingting blong ol man we oli harem nogud, mo taem oli givhan long olgeta we oli no strong. (1 Tesalonaeka 5:​14) Trufala Kristin lav blong yumi i mekem yumi harem olsem se yumi stap finis long wan paradaes long saed blong spirit.

⁹ Long Kongregesen ya Ancon​—⁠wan long ol 544 kongregesen long Ekwado​—⁠ol brata sista oli soem lav blong olgeta long wan rod we i nambawan. Wan bigfala trabol long saed blong mane i kamaot long kantri ya, mekem se plante long olgeta oli lusum wok mo oli no gat mane. Ale, blong winim smol mane, ol brata sista ya oli mekem disisen blong salem kakae long ol man blong hukum fis we oli stap kamhom afta we oli bin huk fulnaet. Evri wan, ol pikinini tu, oli joen tugeta long wok ya. Oli mas stat kuk long 1 klok naet blong mekem se i gat kakae i rere long 4 klok moning, taem ol man blong hukum fis oli kamhom. Ol brata sista oli seremaot mane ya we oli winim, folem nid blong olgeta wanwan. Fasin ya blong givgivhan long olgeta i soemaot trufala Kristin lav.

10, 11. ?Olsem wanem yumi save soem lav long ol brata we maet yumi no save olgeta nating?

¹⁰ Be, yumi no soemaot lav long ol Kristin ya nomo we yumi save gud olgeta. Aposol Pita i talem se: “Yufala i mas lavem olgeta Kristin man.” (1 Pita 2:​17) Yumi lavem olgeta brata mo sista from we olgeta evriwan oli man blong wosipim Jeova God. Ol trabol we ol brata sista blong yumi oli kasem, oli givim janis long yumi blong soemaot lav ya. Eksampol, long sevis yia blong 2000, bigfala wota we i spolemgud plante ples long Mosambik mo faet we i stap gohed bitwin ol man long Angola, i mekem fulap man i pua tumas. Ol trabol ya oli mekem se plante long ol 31,725 brata long Mosambik mo plante long ol 41,222 brata long Angola oli fesem bigfala hadtaem. Taswe, ol Witnes long Saot Afrika, wan kantri klosap long Mosambik mo Angola, oli sanem fulap samting blong givhan long ol brata blong olgeta long tufala kantri ya. Olgeta ya we oli gat “plante samting” oli soemaot lav blong olgeta taem oli rere blong givim sam samting blong givhan long ol brata blong olgeta we oli trabol.​—⁠2 Korin 8:​8, 13-​15, 24.

¹¹ Wan narafala rod blong soem lav, hemia taem ol brata long plante kantri oli givhan blong bildim ol Haos Kingdom mo Haos Asembli long ol kantri we ol brata oli no gat evri samting we oli nidim blong bildim haos. Wan eksampol, hemia long Solomon Aelan. Nating se i gat fulap trabol long kantri ya, namba blong ol man blong talemaot gud nius long Solomon Aelan i go antap long 6 pesen las yia, mekem se naoia i gat 1,697 man evriwan blong talemaot gud nius. Oli mekem plan blong bildim wan Haos Asembli. Nating se plante manples oli stap ronwe long kantri ya, ol brata blong Ostrelia oli stap kam givhan blong bildim haos ya. Biaen, ol brata ya tu oli mas aot long kantri, be bifo we oli aot, oli trenemgud ol brata long Solomon blong finisim fandesen blong haos ya. Ol brata long Ostrelia oli sanem ol aean we i nidim blong finisimgud nambawan haos ya blong wosip. Long taem ya we plante haos oli foldaon, bambae haos wosip ya i givim nambawan witnes long nem blong Jeova mo i makem lav blong ol brata.

Olsem God, Yumi Lavem Ol Man Long Wol

12. ?Sipos yumi folem fasin blong Jeova bambae yumi mekem wanem long ol man we oli no gat sem bilif olsem yumi?

¹² ?Yumi stap lavem nomo ol famle mo ol Kristin brata sista blong yumi? Sipos yumi “folem fasin blong [God]” bambae yumi no mekem olsem. Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Efesas 5⁠:1; Jon 3:​16) Yumi mas mekem olsem Jeova God. I gud we yumi soem lav long enikaen man​—⁠long olgeta ya tu we oli no gat sem bilif olsem yumi. (Luk 6:​35, 36; Galesia 6:​10) Yumi soem se yumi lavem enikaen man, taem yumi talemaot gud nius blong Kingdom mo tokbaot bigfala lav we God i gat taem hem i mekem rod blong sevem yumi. Man we i lesin mo i obei, hem i save kasem laef.​—⁠Mak 13⁠:10; 1 Timoti 4:​16.

13, 14. ?Sam brata oli mekem wanem, we i soem se oli gat bigfala lav long ol man we oli no Witnes?

¹³ Tingbaot fo brata we oli spesel paenia long Nepal. Oli mas go prij long saot wes blong kantri ya. Long ol faef yia we oli jes pas, oli soem lav taem oli holem longfala tingting blong prij long ol taon mo vilej raonabaot long ples ya. Blong kasem olgeta man long eria ya, plante taem oli mas ron plante aoa long baskel, nating se ples i hot olsem 40 digri. Be, gudfala frut i kamaot from we oli gat lav mo “tingting blong olgeta i longfala blong mekem ol stret fasin.” Naoia i gat wan grup we i joen blong mekem buk stadi long wan long ol vilej ya. (Rom 2⁠:⁠7) Long Maj 2000, i gat 32 man oli kam blong harem pablik tok we seket elda i mekem taem hem i visitim ples ya. Las yia, namba blong ol man blong talemaot gud nius long Nepal i kasem 430​—⁠namba ya i go antap long 9 pesen. I klia se Jeova i stap blesem traehad mo lav blong ol brata long kantri ya.

¹⁴ Long Kolombia, sam brata we oli spesel paenia blong smoltaem, oli go prij long ol Indian we oli kolem olgeta ol Wayuu. Blong mekem olsem, oli mas lanem wan niufala lanwis, be oli kasem blesing from lav we oli soem. Nating se bigfala ren i foldaon, 27 man oli kam blong lesin long wan pablik tok. Lav mo strong tingting blong wok, olsem we ol paenia ya oli soem, i mekem se namba blong ol man blong talemaot gud nius long Kolombia i go antap long 5 pesen, mekem se naoia i gat 107,613 man blong talemaot gud nius long ples ya. Long Denmak, wan olfala sista i wantem talemaot gud nius long ol narafala man, be hem i handikap. Hem i no letem samting ya i blokem hem, be hem i stat raetem ol leta blong kasem olgeta we oli intres. Naoia, hem i stap raetem leta long 42 man mo i stap mekem 11 Baebol stadi. Hem i wan long ol 14,885 man blong talemaot gud nius long Denmak las yia.

Lavem Ol Enemi Blong Yu

15, 16. (a) ?Jisas i talem se lav blong yumi i mas bigwan olsem wanem? (b) ?Olsem wanem ol brata oli soem lav long wan man we i bin talem ol giaman tok agensem ol Witnes blong Jeova?

¹⁵ Jisas i talem long tija ya blong Loa se hem i mas tingbaot man Sameria olsem wan man we hem i mas gat lav long hem. Long Bigfala Toktok antap long hil, Jisas i go moa, i talem se: “Yufala i harem finis we ol tija oli talem bifo se, ‘Yu mas lavem ol man we oli stap raonabaot long yu, be yu mas agensem ol enemi blong yu.’ Be mi mi talem long yufala, se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala. Long fasin ya, bambae yufala i soemaot we yufala i pikinini blong Papa blong yufala long heven.” (Matiu 5:​43-​45) Nating sipos wan man i agensem yumi, yumi mas traem blong “holemstrong ol stret fasin . . . blong winim ol rabis fasin.” (Rom 12⁠:​19-​21) Sipos i gat janis, yumi save serem samting ya we i sas tumas wetem olgeta, hemia trutok.

¹⁶ Long Yukren, niuspepa ya Kremenchuk Herald i tokbaot ol Witnes blong Jeova se oli wan grup blong man we i denja. Hemia i no wan tok we i nating nomo, from we long Yurop, sam man oli tokbaot ol Witnes blong Jeova long fasin ya, mo oli pulum ol man blong tingting se i gud blong putum tabu mo blokem wok blong ol Witnes. Taswe ol brata oli go luk man we i raetem niuspepa ya mo askem hem blong prentem wan narafala stori blong stretem toktok ya. Man ya i agri, be taem hem i prentem stori ya hem i raetem wan smol tok blong talem se faswan tok we i bin kamaot long niuspepa ya i stanap long ol pruf. Ale, ol brata oli go long hem wetem sam moa toktok bakegen blong prentem. Nao man ya i luksave se faswan stori blong niuspepa ya i rong olgeta, mo hem i prentem wan smol tok blong talemaot mastik ya we i kamaot long niuspepa. Blong stretem problem ya wetem lav, ol brata oli storian wetem man ya long fasin we i klia mo i kaen, mo from samting ya, gudfala frut i kamaot.

?Olsem Wanem Yumi Save Gat Lav?

17. ?Wanem i soemaot se i no isi oltaem blong soem lav long ol narafala?

¹⁷ Taem wan bebi i bon, kwiktaem nomo papa mama blong hem tufala i lavem hem. Be, fasin blong soem lav long ol bigman i no wan samting we i save kamaot kwiktaem olsem. Ating hemia nao from wanem Baebol i talem bakegen mo bakegen se yumi mas lavlavem yumi​—⁠hemia wan samting we yumi mas wokhad blong mekem. (1 Pita 1:​22; 4⁠:8; 1 Jon 3:​11) Jisas i save se bambae i gat sam samting oli kam traem lav blong yumi. Taswe hem i talem se yumi mas fogivim brata blong yumi “olwe gogo i no save finis.” (Matiu 18⁠:​21, 22) Mo tu, Pol i talem se yumi mas gohed blong stap “givgivhan” long yumi. (Kolosi 3:12, 13) Yumi no sapraes long tok ya se: “Fasin ya we man i stap lavem ol man, yufala i mas traehad blong folem.” (1 Korin 14⁠:⁠1) ?Olsem wanem yumi save mekem samting ya?

18. ?Wanem i save halpem yumi blong gat lav long ol narafala?

¹⁸ Fastaem, yumi mas tingbaot oltaem lav ya we yumi gat long Jeova God. Lav ya i gat paoa blong pulum yumi blong lavem ol man raonabaot long yumi. ?From wanem? From we taem yumi mekem olsem, yumi stap soemaot se yumi folem fasin blong Papa blong yumi long heven, mo yumi givim ona mo presem hem. (Jon 15:8-​10; Filipae 1:9-11) Seken samting se, yumi mas traem blong luk ol samting olsem we Jeova i luk olgeta. Evri taem we yumi mekem sin, yumi sin agensem Jeova. Be, bakegen mo bakegen hem i fogivim yumi mo i gohed yet blong lavem yumi. (Ol Sam 86⁠:5; 103:​2, 3; 1 Jon 1⁠:9; 4:​18) Sipos yumi gat tingting olsem Jeova, bambae yumi rere moa blong lavem ol narafala mo fogivim ol mastik we oli mekem long yumi. (Matiu 6⁠:12) Namba tri samting se, yumi mas mekem long ol narafala olsem we yumi wantem blong oli mekem long yumi. (Matiu 7:​12) From we yumi sinman, plante taem yumi nidim fasin fogif. Eksampol, taem yumi talem ol tok we oli stikim narafala, yumi wantem se oli tingbaot we yumi evriwan i save mekem mastik long ol tok blong yumi. (Jemes 3:2) Sipos yumi wantem ol narafala oli soem lav long yumi, yumi tu, yumi mas soem lav long olgeta.

19. ?Olsem wanem yumi save kasem help blong tabu spirit taem yumi wantem wokem fasin ya lav?

¹⁹ Namba fo samting se, yumi mas askem tabu spirit blong halpem yumi from we lav i wan frut blong tabu spirit. (Galesia 5:​22, 23) Fasin blong frengud wetem narafala, gat filing long famle, mo lav bitwin wan man no woman, oli ol filing we yumi bon wetem. Be blong gat lav olsem Jeova, hemia lav ya we i joenemgud olgeta samting oli kam wan nomo, yumi nidim we tabu spirit blong Jeova i givhan long yumi. Yumi save kasem help blong tabu spirit taem yumi ridim Baebol. Eksampol, sipos yumi stadi long laef blong Jisas, bambae yumi luk ol fasin we hem i mekem long ol narafala, mo bambae yumi lanem blong folem fasin blong hem. (Jon 13⁠:​34, 35; 15⁠:12) Mo tu, yumi save askem Jeova blong i givim tabu spirit long yumi, antap moa, taem yumi faenem se i had blong soem lav. (Luk 11⁠:13) Laswan samting se, yumi save wokem lav sipos yumi stap klosap long Kristin kongregesen. Taem yumi joen wetem ol brata mo sista we oli gat lav, samting ya i halpem yumi blong gat lav tu.​—⁠Ol Proveb 13⁠:⁠20.

20, 21. ?Long sevis yia blong 2000, olsem wanem ol Witnes blong Jeova oli soemaot lav blong olgeta?

²⁰ Las yia, i gat 6,035,564 man blong talemaot gud nius raon long wol. Ol Witnes blong Jeova oli spenem 1,171,270,425 aoa blong faenem ol man blong talemaot gud nius long olgeta. Lav nao i pusum olgeta blong gohed strong long wok ya nating se ples i hot, i gat ren, no ples i kolkol. Lav i pulum olgeta blong toktok wetem ol fren long skul mo long wok, no blong storian wetem ol man long rod mo long ol narafala ples bakegen. Plante long ol man we ol Witnes oli visitim, oli no intres mo sam oli agensem olgeta. Be, i gat sam we oli soem intres, mekem se ol Witnes oli visitim bakegen 433,454,049 man, mo oli mekem 4,766,631 Baebol stadi.a

²¹ !Olgeta samting ya oli pruvum lav we ol Witnes blong Jeova oli gat long God blong olgeta mo long ol man raonabaot long olgeta! Lav ya bambae i neva kam kolkol. Yumi sua se long sevis yia blong 2001, bambae yumi givim moa witnes long olgeta man. !Jeova bambae i gohed blong blesem ol trufala man blong hem we oli stap wok strong, from we oli soemaot lav ‘long olgeta samting we oli mekem’!—⁠1 Korin 16:14.

[Futnot]

?Yu Yu Save Eksplenem?

• ?Yumi folem fasin blong hu taem yumi lavem ol man raonabaot long yumi?

• ?Lav blong yumi i mas bigwan olsem wanem?

• ?Sam brata sista oli mekem wanem we i soemaot Kristin lav?

• ?Olsem wanem yumi save wokem Kristin lav?

[Tok blong pija long pej 15]

Kristin lav i save mekem wan famle i joengud

[Tok blong pija long pej 17]

Lav i pulum yumi blong serem hop blong yumi wetem ol narafala man