Laef Stori

Jeova i Singaot, Mi Obei, Mo Kasem Plante Blesing

MARIA DO CÉU ZANARDI I TALEM STORI YA

“Jeova i waes gud long ol samting we hem i mekem. Sipos hem i singaot yu, yu mas obei wetem tingting daon.” Tok ya we papa blong mi i talem 45 yia finis, i givhan long mi blong obei taem ogenaesesen blong Jeova i singaot mi blong mekem wok blong prij fultaem. Tede, mi stap glad yet long advaes ya blong papa blong mi, from we evri taem we mi bin obei long tok we i singaot mi, mi bin kasem blesing.

LONG 1928, Papa i mekem sabskripsen blong Wajtaoa, mo i stat blong intres long ol tok blong Baebol. From we mifala i stap long bus long Potugal, hem i no save joen wetem wan grup blong ol man blong God. Hem i stap kasem ol buk we oli sanem i kam nomo, mo i stap ridim wan Baebol we i blong tufala olfala bubu blong mi. Long 1949, mi mi gat 13 yia. Long taem ya, famle blong mifala i muf i go long Brasil, we i ples blong mama blong mi. Mifala i stap long wan ples jes afsaed long taon ya Rio de Janeiro.

Ol man we oli stap raonabaot long mifala, oli singaot mifala blong kam long jos blong olgeta, mo mifala i folem olgeta blong smoltaem. Papa i laekem blong askem kwestin long olgeta long saed blong helfaea, devel blong dedman, mo fiuja blong wol ya. Be olgeta oli no save ansarem ol kwestin ya. Oltaem Papa i stap talem se: “Yumi mas wet nomo blong ol trufala Baebol studen oli kam.”

Wan dei, i gat wan blaenman i kam long haos, hem i stap seremaot ol Wajtaoa mo Wekap! Papa i askem ol semfala kwestin ya long hem, mo hem i givim ol ansa we oli kamaot long Baebol. Long nekis wik, wan narafala Witnes blong Jeova i kam luk mifala. Hem i ansa long sam moa kwestin. Biaen, hem i talem se i mas go kwik blong go prij long “garen.” Papa i sapraes long tok ya, nao Witnes ya i soem Matiu 13:38 we i se: “Garen ya, hemia wol ya.” Papa i askem long hem se: “?Mi tu mi save kam?” Hem i ansa se: “Be yes.” !Mifala i glad bitim mak blong faenem trutok blong Baebol bakegen! Long nekis asembli, Papa i tekem baptaes, mo jes afta, long Novemba 1955, mi tu mi tekem baptaes.

Mi Obei Long Faswan Tok We i Singaot Mi

Wan yia haf biaen, mi kasem wan bigfala braon leta we i kam long hed ofis blong ol Witnes blong Jeova long Rio de Janeiro. Leta ya i singaot mi blong joen long wok blong prij fultaem. Long taem ya, mama blong mi i sik, ale mi askem advaes blong papa blong mi. Hem i talem wetem strong tingting se: “Jeova i waes gud long ol samting we hem i mekem. Sipos hem i singaot yu, yu mas obei wetem tingting daon.” Tok ya i givim paoa long mi, ale mi fulumap pepa we oli sanem i kam long mi blong joen long wok blong prij fultaem long Julae 1, 1957. Faswan ples we oli sanem mi mi go long hem, hemia wan taon klosap long Rio de Janeiro, nem blong hem Três Rios.

Fastaem, ol man blong taon ya oli fraet blong lesin long mifala, from we mifala i no stap yusum Katolik Baebol. Samting ya i kamgud taem mifala i stat blong stadi Baebol wetem Geraldo Ramalho, we hem i wan strong Katolik. Hem i givhan long mi blong kasem wan Baebol we pris long ples ya i saenem nem blong hem insaed long hem. Nao, taem wan man i tok blong blokem mifala, mi soem nem blong pris long Baebol ya, nao hem i no moa talem wan samting. Biaen, Geraldo i tekem baptaes.

Mi mi glad tumas long 1959, taem oli mekem wan seket asembli stret long medel blong taon ya Três Rios. Jif blong polis, we i stap stadi Baebol long taem ya, i mekem rod blong mifala i save putumap ol saen olbaot long taon blong talemaot asembli ya. Mi stap tri yia long taon ya, nao oli singaot mi blong go wok long wan narafala taon, nem blong hem Itu. Hem i stap samwe 110 kilometa longwe long São Paulo, saed i go long wes.

Ol Red, Blu, Mo Yala Buk

Mi wetem wan narafala gel we i mekem wok blong prij fultaem, mitufala i lukaotem ples blong slip, gogo, wan wido woman we nem blong hem Maria, i soem kaen fasin, i letem mitufala i kam stap long haos blong hem, stret long medel blong taon. Maria i mekem olsem we mitufala i stret pikinini blong hem. Be, i no longtaem, Katolik bisop blong Itu i kam luk hem mo i talem long hem blong sanemaot mitufala. Maria i no wantem, hem i se: “Taem man blong mi i ded, yu yu no mekem wan samting blong leftemap tingting blong mi. Be ol Witnes blong Jeova oli givhan long mi, nating se mi mi no joen long skul blong olgeta.”

Long taem ya, wan woman i talem long mitufala se ol pris long Itu oli talem long ol Katolik se i tabu blong ridim “red buk ya we i tokbaot Setan.” Oli stap tokbaot buk ya we i stanap long Baebol, nem blong hem “Let God Be True.” Mitufala i bin seremaot buk ya long semfala wik ya. From we ol pris oli putum “tabu” long red buk ya, mitufala i mekemrere wan fastok blong seremaot blu buk ya (“New Heavens and a New Earth”). Taem ol pris oli kasem save se mifala i jenisim buk ya, mifala i jenis bakegen i go long yala buk ya (What Has Religion Done for Mankind?) mo mifala i gohed long fasin ya. !Gudsap mifala i gat plante buk blong ol defdefren kala ya!

Afta we mi stap wan yia long Itu, mi kasem toktok we i singaot mi blong wok blong smoltaem long Betel, hemia hed ofis blong ol Witnes blong Jeova long Rio de Janeiro. Mi mas givhan blong mekem rere sam samting blong wan asembli we ol Witnes blong ful kantri bambae oli kam long hem. Mi glad blong obei long tok ya we i singaot mi.

Sam Narafala Blesing Mo Traem

I gat plante wok blong mekem long Betel, mo mi mi glad blong mekem enikaen wok. !I gud tumas blong joen wanples evri moning blong storian long vas blong dei, mo bakegen long sapa long Mande blong stadi long Wajtaoa! Ol prea blong Otto Estelmann mo sam narafala we oli stap longtaem finis long Betel, oli tajem filing blong mi bigwan, from we oli kamaot stret long hat blong olgeta.

Afta long asembli ya, mi fulumap olting blong mi long bokis blong gobak long Itu. Be mi sek we Grant Miller, brata we i lukaot long Betel, i givim wan leta long mi blong singaot mi blong stap wok oltaem long Betel. Ale, mi serem wan rum wetem Sista Hosa Yazedjian, we hem i stap wok yet long Betel long Brasil. Long taem ya, i gat wan smol grup blong 28 nomo we oli stap long Betel, mo mifala evriwan i frengud.

Long 1964, wan yangfala brata we i stap prij fultaem, nem blong hem João Zanardi, i kam long Betel blong kasem trening blong kam wan seket elda, hemia brata we i wokbaot i go blong visitim ol wanwan kongregesen. Biaen, hem i go mekem wok ya long wan ples klosap. Sam samtaem, hem i kam long Betel blong karem ol ripot blong hem oli kam, ale mitufala i storian smol. Nao brata we i lukaot long Betel i givim raet long João blong kam joen long stadi blong Wajtaoa evri Mande long sapa, ale samting ya i givim janis long mitufala blong pasem moa taem tugeta. Long Ogis 1965, mitufala i mared. Taem oli singaot mi blong folem man blong mi long wok blong hem olsem seket elda, mi mi glad blong obei.

Long taem ya, i no isi blong wokbaot olbaot long bus blong Brasil blong mekem wok ya. Mi no save fogetem ol visit we mitufala i mekem long grup blong ol pablisa long Aranha, long Stet blong Minas Gerais. Fastaem, mitufala i mas ron long tren, afta, mitufala i wokbaot long leg nomo. Antap long hemia, mitufala i mas karem ol bigfala bokis, taepraeta, mesin blong soem sinema, ol basket blong prij, mo fulap buk. Oltaem mitufala i glad tumas blong luk olfala brata ya Lourival Chantal, we i stap wet long ples we tren i stop long hem, blong givhan long mitufala wetem olting blong mitufala.

Oli rentem wan haos long Aranha blong mekem ol miting long hem. Mitufala i slip long wan rum biaen long haos ya. Long wan saed blong rum ya, i gat wan faea we mitufala i yusum blong kukum kakae, mo blong hotem wota we ol brata oli karem i kam long ol baket. Toelet, hemia wan hol long graon we oli digim long medel blong wan plantesen blong bambu we i stap klosap. Long naet, mitufala i livim wan laet i laet fulnaet blong ronem ol bebet we oli save givim sik ya Chagas. Evri moning, nus blong mitufala i blak from smok blong laet ya we mitufala i bin pulum long naet. !Wan niufala samting bakegen!

Mitufala i stap wok long wan ples long Stet blong Paraná, nao mitufala i kasem wan bigfala braon leta we i kam long hed ofis bakegen. !Ogenaesesen blong Jeova i singaot mitufala bakegen! Naoia, mitufala i mas go wok long Potugal. Leta ya i talem long mitufala blong tingting gud long Luk 14:28, se mitufala i mas kaontem praes bifo we mitufala i agri blong go long ples ya. Hemia from we gavman i bin putum tabu long Kristin wok blong ol Witnes long Potugal, mo polis i holem plante brata finis.

?Olsem wanem? ?Bambae mitufala i rere blong go long wan kantri we maet oli save ronem mitufala mo mekem plante trabol long mitufala? João i talem se: “?Sipos ol Kristin brata blong yumi oli save stap long Potugal mo holemstrong long wok blong Jeova, from wanem yumitu no save mekem sem mak?” Mi mi agri from we mi tingbaot ol tok blong papa blong mi we i pulum mi fastaem: “Sipos Jeova i singaot yu, yu mas obei mo trastem hem.” I no longtaem, mitufala i stap long Betel long São Paulo, blong kasem moa advaes mo blong rere ol pepa blong mitufala from trip ya.

João Maria Mo Maria João

Long Septemba 6, 1969, mitufala i aot long haba blong Santos, São Paulo Stet, long sip ya Eugênio C. Afta naen dei long sip, mifala i kasem Potugal. Blong plante manis, mitufala i wok wetem ol brata we oli stap plante yia finis long ples ya. Mifala i wokbaot long ol smosmol rod blong Alfama mo Mouraria, long olfala haf blong taon ya Lisbon. Ol brata ya oli tijim mitufala blong lukaot gud, blong ol polis oli no save holem mitufala.

Mifala i stap mekem ol miting blong kongregesen long haos blong ol Witnes nomo. Taem mifala i luk se ol man raonabaot oli kasem save se mifala i stap miting, mifala i jenisim ples blong miting kwiktaem i go long wan narafala haos. Olsem nao, ol polis oli no save kam blokem miting mo holem ol brata. Mifala i stap kolem ol asembli se ol lafet. Mifala i stap mekem ol asembli ya long Monsanto Pak, jes afsaed long Lisbon, mo long Costa da Caparica, hemia wan ples long bus klosap long solwota. Mifala i putum ol klos we oli olbaot nomo blong go long ol asembli ya, mo tu, sam brata oli stanap wanwan olbaot blong gad. Taswe, sipos wan man i kam we maet i wantem mekem trabol long mifala, ale mifala i gat taem blong stopem ol tok blong asembli, mo stat pleplei, kakae, no singsing.

Blong mekem i strong moa long ol polis blong luksave mifala, mifala i jenisim nem blong mifala tu. Ol brata oli singaot mitufala se João Maria mo Maria João. Mifala i neva yusum ol prapa nem blong mifala long ol leta no long ol ripot. Oli givim ol namba nomo long mifala. Mo tu, mi mi no wantem save long adres blong ol brata. Olsem nao, sipos polis i holem mi, oli no save trikim mi blong talemaot ples we ol Kristin brata blong mi oli stap long hem.

Nating se oli putum tabu long wok blong mifala, mi mo João i gat strong tingting blong tekem evri janis blong prij. Mitufala i save se, enitaem nomo, maet mitufala i no moa fri blong mekem wok ya. Mitufala i lanem blong trastem fulwan Papa blong mitufala long heven, Jeova. Hem i Man blong Lukaotgud long yumi, mo hem i yusum ol enjel blong hem long ol rod we i mekem mitufala i harem se mitufala “i stap luk God ya we man i no save luk long ae blong hem.”—Hibrus 11:27.

Wan taem, mi wetem wan Kristin sista i stap prij long ol haos wanwan long Porto, nao mitufala i mitim wan man we i singaot mitufala i kam insaed. Sista ya i talem ‘yes’ wantaem nomo, taswe mi no gat jus, mi mas folem hem i go insaed. Be mi sek long wan foto we i stap insaed, i soem wan ami long yunifom. Mi mi harem nogud tumas. ?Bambae mitufala i mekem wanem naoia? Man blong haos ya i talem long mitufala blong sidaon, nao hem i askem long mi se: “?Bambae yu yu letem boe blong yu i joen long ami sipos oli singaot hem blong joen?” Mi mas lukaot gud olsem wanem mi ansa long kwestin ya. Mi prea long hat blong mi, nao long kwaet fasin mi ansa se: “Sore, mi mi no gat pikinini, mo mi sua se sipos mi askem wan kwestin long yu we i no laenap wetem laef blong yu, bambae yu ansa long mi long sem fasin.” Hem i no moa toktok. Ale mi gohed se: “Sipos yu bin askem long mi blong talemaot filing blong mi taem mi lusum wan brata no papa blong mi, mi mi save ansa, from we brata mo papa blong mi tufala evriwan i ded finis.” Wota i kam fulap long ae blong mi taem mi stap toktok, mo mi luk se hem tu i rere blong krae. Nao hem i talem se woman blong hem i jes ded i no longtaem. Ale hem i lesin gud taem mi eksplenem promes blong laef bakegen long ded. Nao mitufala i talem tata long hem long gudfala fasin, mo mitufala i aot we mitufala i sef. Mitufala i livim bisnes ya long han blong Jeova.

Long taem ya we oli putum tabu long wok blong prij, mifala i givhan long plante man we hat blong olgeta i stret, blong oli kasem save long trutok. Long Porto nao we man blong mi i statem wan stadi wetem wan bisnesman we i gohed gud, nem blong hem Horácio. Biaen, boe blong hem Emílio we i wan gudfala dokta, hem tu i jusum blong stanap long saed blong Jeova, mo i tekem baptaes. Tru ya, i no gat samting we i save blokem tabu spirit blong Jeova.

“Yumi No Save Wanem Samting We Jeova Bambae i Letem i Hapen”

Long 1973, oli singaot mi mo João blong go long Brussels, Beljiom, blong joen long Intenasnal Asembli ya “God i Win.” Plante taosen brata blong Spen mo Beljiom oli stap long asembli ya, wetem plante moa we oli kam long Mosambik, Angola, Kep Verde, Madira, mo Asores. Brata Knorr we i kam long hedkwota long New York, i mekem laswan tok blong asembli ya, nao hem i talem se: “Holemstrong long wok blong Jeova. Yumi no save wanem samting we Jeova bambae i letem i hapen. !Yumi no save, maet nekis taem yufala i stap long wan intenasnal asembli long Potugal!”

Long nekis yia, gavman i tekemaot tabu we hem i bin putum long wok blong prij long Potugal. Mo olsem Brata Knorr i bin talem, mifala i mekem faswan intenasnal asembli long Lisbon long 1978. !Mifala i harem gud tumas blong wokbaot long ol rod long Lisbon wetem ol saen we mifala i fasem long bodi blong mifala blong givim witnes, mo seremaot ol magasin, mo singaot ol man oli kam lesin long pablik tok! Hemia i olsem wan drim we i kamtru.

Plante long ol Kristin brata long Potugal oli bin stap long kalabus mo oli bin stanap strong tru long ol raf fasin, olsem, taem ol enemi oli wipim olgeta from we oli no wantem joen long faet. Taswe, lav we mitufala i gat long olgeta ya i gru i kam bigwan. Mitufala i wantem tumas blong gohed blong wok long Potugal. Be i no kamaot olsemia. Long 1982, João i faenemaot se hem i gat wan bigfala sik blong hat, mo hed ofis i talem long mitufala se i moagud we mitufala i gobak long Brasil.

Bigfala Traem

Ol brata long hed ofis long Brasil oli kasem save long trabol blong mitufala mo oli sanem mitufala i go wok long Quiririm kongregesen, long Taubaté, São Paulo Stet. Sik blong João i kam strong moa, mo i no longtaem, hem i no moa save goaot long haos. Olgeta we oli wantem stadi Baebol, oli kam long haos blong mitufala nomo, mo i gat wan miting blong prij evri dei long haos ya wetem buk stadi evri wik. Ol samting ya oli givhan long mitufala blong stap strong long saed blong bilif.

Kam kasem we João i ded long Oktoba 1, 1985, hem i mekem bes blong hem long wok blong Jeova. Taem hem i ded, mi mi harem nogud mo tingting blong mi i foldaon, be mi wantem tumas blong gohed blong wok long ples we mi stap long hem. Long Eprel 1986 wan trabol i kasem mi bakegen, ol stilman oli brekem lok long haos blong mi mo oli stilim klosap evri samting. Hemia fastaem long laef blong mi we mi harem se mi stap mi wan nomo, mo mi fraet. Wan gudfala Kristin brata mo sista i singaot mi blong kam stap wetem tufala blong smoltaem, mo mi glad blong mekem olsem.

Ded blong João mo wok blong ol stilman i mekem i had moa long mi blong mekem wok blong Jeova tu. Taem mi stap prij, mi harem mi fraet smol. Mi raetem leta i go long hed ofis blong tokbaot trabol ya, nao oli singaot mi blong go stap smoltaem long Betel, gogo mi harem gud bakegen long filing blong mi. !Gudfala taem ya i givim paoa long mi bakegen!

Taem mi harem gud smol, mi agri blong go wok long wan taon long stet blong São Paulo, nem blong hem Ipuã. Mi mi stap bisi long wok blong prij, be sam samtaem tingting blong mi i foldaon smol. Taem samting ya i hapen, mi singaot ol brata long Quiririm long telefon, nao wan famle i kam stap wetem mi blong sam dei. !Samting ya i rili leftemap tingting blong mi! Long faswan yia we mi stap long Ipuã, i gat 38 brata mo sista oli mekem trip ya blong kam luk mi.

Long 1992, sikis yia afta we João i ded, ogenaesesen blong Jeova i singaot mi bakegen blong muf i go long Franca, long São Paulo Stet, mo mi stap prij fultaem yet long ples ya. Teritori long ples ya i karem plante frut. Long 1994, mi stat blong stadi Baebol wetem mea blong taon ya. Long taem ya, hem i stap mekem kampen blong kam wan minista long palemen blong Brasil. Nating se hem i bisi oltaem, mitufala i mekem stadi evri Mande long aftenun. Blong mekem se i no gat samting i blokem stadi, hem i no ansa long telefon. !Mi mi glad tumas taem mi luk we sloslou, hem i lego politik, mo tu, blong luk we trutok i givhan long hem blong mekem mared blong hem i kamgud bakegen! Hem wetem woman blong hem, tufala tugeta i tekem baptaes long 1998.

Taem mi tingting bak, mi save talem se laef blong mi we mi yusum blong prij fultaem i bin fulap long ol bigfala blesing mo gudfala wok. From we mi bin obei long Jeova taem ogenaesesen blong hem i singaot mi, mi bin kasem plante nambawan blesing. Mo mi gat strong tingting blong obei long ol tok we maet mi kasem yet long fiuja, blong singaot mi blong wok.

[Tok blong pija long pej 25]

Long 1957, taem mi jes stat prij fultaem, mo tede

[Tok blong pija long pej 26]

Olgeta we oli wok long Betel long Brasil long 1963, wetem mi long namba tu laen, long lefsaed

[Tok blong pija long pej 27]

Mared blong mitufala long Ogis 1965

[Tok blong pija long pej 27]

Asembli long Potugal taem oli putum tabu long wok blong mifala

[Tok blong pija long pej 28]

Mifala i prij long ol rod blong Lisbon long 1978, long Intenasnal Asembli “Bilif i Win”