Olgeta Trufala Kristin Oli Man Blong Prij

“!Yumi sing long Hae God! !Yumi leftemap nem blong hem! Evri dei bambae yumi talemaot gud nius ya we hem i sevem yumi.”​—OL SAM 96:2.

 1. ?Wanem gudfala nius we ol man oli mas harem, mo olsem wanem ol Witnes blong Jeova oli soem gudfala eksampol long wok blong talemaot nius ya?

LONG wol ya ol trabol oli stap hapen evri dei. Taswe, i gud tumas blong harem we Baebol i talem se, i no longtaem, ol faet, ol man blong brekem loa, problem blong kakae we i sot, mo fasin blong harem nogud aninit long han blong narafala man, bambae oli finis. (Ol Sam 46:9; 72:​3, 7, 8, 12, 16) ?Yu ting se hemia wan gudfala nius we plante man oli mas harem? Yes, ol Witnes blong Jeova oli ting olsem. Tru ya, ol man long evri ples oli savegud ol Witnes from we oltaem oli stap talemaot ‘gud nius blong pis.’ (Aesea 52:7) Plante man oli mekem bigfala trabol long ol Witnes from we oli strong blong talemaot gud nius ya. Be ol Witnes oli wantem tumas blong mekem ol narafala man oli harem gud. From samting ya, long ol yia we oli pas, i kam kasem naoia, ol man oli save ol Witnes from fasin blong olgeta blong wok strong mo gohed olwe long wok ya.

 2. ?Wanem wan risen we i mekem se ol Witnes blong Jeova oli gat strong tingting blong prij?

² Strong tingting we ol Witnes blong Jeova oli gat tede, i sem mak long ol Kristin blong faswan handred yia. Niuspepa ya, L’Osservatore Romano blong Katolik jos i tokbaot olgeta se: “Stat long taem we ol faswan Kristin oli baptaes, oli harem save se wok blong talemaot Gospel long evri ples i impoten tumas. Taem wan man i harem ol tok blong Gospel hem i pasem i go long narafala man.” ?From wanem ol Witnes blong Jeova oli wok strong olsem ol faswan Kristin ya? Faswan samting hemia from se gud nius ya i kam long Jeova God hem wan. I no gat wan narafala samting moa we i save givim strong tingting ya long olgeta. Wok blong prij we oli mekem i laenap wetem tok blong man ya blong raetem Sam we i se: “!Yumi sing long Hae God! !Yumi leftemap nem blong hem! Evri dei bambae yumi talemaot gud nius ya we hem i sevem yumi.”​—Ol Sam 96:2.

 3. (a) ?Wanem narafala risen we i givim strong tingting long ol Witnes blong Jeova? (b) ?Olsem wanem God bambae i “sevem [ol man]”?

³ Ol tok ya blong man blong raetem Sam i mekem yumi tingbaot namba tu risen we i mekem se ol Witnes blong Jeova oli gat strong tingting blong prij. Mesej ya we oli stap talemaot hem i wan mesej we i save sevem man. Sam man oli wok blong givhan long ol sikman, oli traem mekem laef blong man mo trabol long saed blong mane i kam gud moa, no sam narafala samting bakegen, blong givhan long man. Hemia ol gudfala wok we yumi save presem olgeta from. Be ol wok ya we i blong halpem ol man i smol tumas taem yumi skelem wetem wanem we God bambae i mekem blong “sevem [ol man].” Jeova bambae i yusum Jisas Kraes blong sevem olgeta man we tingting blong olgeta i stap daon. Bambae hem i karemaot olgeta long sin, sik mo ded. !Nao olgeta ya bambae oli save laef gogo i no save finis! (Jon 3:​16, 36; Revelesen 21:​3, 4) Tede, rod we God bambae i yusum blong sevem olgeta man hem i wan long olgeta “bigbigfala wok” blong hem we ol Kristin oli talemaot taem oli obei long tok ya se: “Bambae yumi talemaot paoa blong hem long ol man blong ol narafala kantri. Bambae yumi talemaot ol bigbigfala wok blong hem long fes blong olgeta man. Hae God i hae we i hae, mo yumi mas presem hem, yumi mas leftemap nem blong hem. Hem i hae moa long ol narafala god, mo i stret blong yumi ona moa long hem, i winim we yumi ona long ol narafala god.”​—Ol Sam 96:​3, 4.

Eksampol Blong Masta

4-6. (a) ?Wanem namba tri risen we i mekem se ol Witnes blong Jeova oli gat strong tingting? (b) ?Olsem wanem Jisas i soemaot se hem i gat strong tingting blong talemaot gud nius?

⁴ Be i gat wan narafala risen, namba tri risen, from wanem ol Witnes blong Jeova oli gat strong tingting. Hemia from we oli folem eksampol blong Jisas Kraes. (1 Pita 2:21) Man ya, we i stret gud olgeta, i agri wetem fulhat blong hem blong mekem wok ya blong “talemaot gud nius long ol puaman.” (Aesea 61:1; Luk 4:​17-21) Taswe, hem i kam wan man blong prij, wan man blong talemaot gud nius. Hem i flatem olgeta ples long Galili mo Judia, i stap “talemaot gud nius blong kingdom.” (Matiu 4:​23, NW ) Hem i save se plante man bambae oli lesin long gud nius ya taswe hem i talem long ol man blong hem se: “I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.”​—Matiu 9:​37, 38.

⁵ Folem wanem we Jisas i talem long prea ya, hem i trenem ol narafala blong oli prij. Biaen, hem i sanem ol aposol blong hem oli goaot, olgeta nomo, mo i talem long olgeta se: “Taem yufala i go, yufala i mas talemaot [“prij,” NW ] se, ‘Taem blong God i kam King blong olgeta man long wol, i kam klosap finis [“Kingdom blong God i kam klosap finis,” NW ].’ ” ?Yu ting se i moagud sipos oli bin putumap sam grup blong man blong oli wok blong traem stretem problem we ol man oli stap fesem long laef blong olgeta long taem ya? ?No yu ting se i gud sipos oli bin joen long politik blong traem faet agensem ol kruked fasin we i kam antap bigwan long taem ya? Nogat. Jisas i talem klia wanem impoten samting we wan Kristin man blong prij i mas mekem, hem i se: “Taem yufala i go, yufala i mas talemaot [“prij,” NW ]” gud nius.​—Matiu 10:​5-7.

⁶ Biaen, Jisas i sanem wan narafala grup blong ol disaepol blong talemaot se: “Kingdom blong God i kam klosap finis.” Taem oli kambak long Jisas mo talemaot ol gudfala frut we oli kasem long wok blong prij, Jisas i glad bigwan. Hem i prea se: “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli savegud.” (Luk 10:​1, 8, 9, 21) Ol disaepol blong Jisas, we fastaem oli ol strong man blong hukum fis, wokem garen, mo ol narafala samting bakegen, oli olsem smol pikinini nomo taem yumi skelem olgeta wetem ol lida blong skul long nesen blong Isrel we olgeta oli kasem hae edukesen. Be ol disaepol oli kasem trening blong talemaot wan gud nius we i nambawan.

 7. ?Afta we Jisas i gobak long heven, ol man blong hem oli prij long hu fastaem?

⁷ Afta we Jisas i gobak long heven, ol man blong hem oli gohed blong karem gud nius blong sevem man i go long olgeta ples. (Ol Wok 2:​21, 38-40) ?Oli prij long hu fastaem? ?Oli go long ol man we oli no save God yet? Nogat. Oli prij fastaem long ol man Isrel we oli save Jeova bitim 1,500 yia finis. ?Oli gat raet blong prij long kantri ya we ol man blong hem oli wosipim Jeova finis? Yes. Jisas i bin talem long olgeta se: “Bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Ol Wok 1:8) Ol man Isrel oli nidim blong harem gud nius ya sem mak olsem ol man blong ol narafala kantri.

 8. ?Olsem wanem ol Witnes blong Jeova tede oli folem eksampol blong ol aposol blong Jisas long faswan handred yia?

⁸ Long sem fasin, ol Witnes blong Jeova tede oli prij long evri ples long wol. Oli wok wetem enjel ya we Jon i luk se “i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:6) Long yia 2001, oli stap mekem wok ya long 235 kantri mo aelan, we sam long ol ples ya oli talem se oli Kristin finis. ?I stret we ol Witnes blong Jeova oli prij long ol ples we Krisendom i stanemap jos blong hem finis? Sam man oli talem se i no stret, mo maet oli talem se ol Witnes oli stap “stilim sipsip” blong olgeta. Be, ol Witnes blong Jeova oli tingbaot Jisas taem hem i stap long wol, mo olsem wanem hem i kea bigwan long ol man Jiu we oli gat tingting daon. Nating se ol man Jiu oli gat ol pris blong olgeta finis, be Jisas i talemaot gud nius long olgeta. Hem i “sore tumas long olgeta, from we olgeta oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Matiu 9:36) ?Olsem wanem taem ol Witnes blong Jeova oli faenem wan man we i gat tingting daon mo we i no save Jeova mo Kingdom blong hem? ?I stret sipos oli no talemaot gud nius long man ya jes from we hem i gat wan skul finis? Sipos ol Witnes oli folem eksampol blong ol aposol blong Jisas, ansa blong kwestin ya i klia se, nogat. Yumi mas talemaot gud nius long “olgeta man long wol,” i no long sam man nomo.​—Mak 13:10.

Olgeta Faswan Kristin Oli Man Blong Prij

 9. ?Long faswan handred yia, hu olgeta long Kristin skul we oli joen long wok blong prij?

⁹ ?Long faswan handred yia, hu olgeta we oli joen long wok blong prij? Ol pruf oli soem se olgeta Kristin oli joen long wok ya. Wan man blong raetem buk, nem blong hem W. S. Williams, i makem se: “Plante buk oli talem se olgeta Kristin long faswan Kristin skul . . . oli stap prijimaot gospel.” Baebol i tokbaot samting we i hapen long dei blong Pentekos long yia 33 K.T. i se: “Olgeta evriwan [ol man mo ol woman], Tabu Spirit i kam fulap long olgeta, nao oli stat toktok long ol lanwis blong ol narafala man, olsem we Spirit ya i givim paoa long olgeta blong oli save toktok olsem.” Ol man, ol woman, ol yangfala mo ol olfala, ol slef mo fri man, evriwan oli joen long wok blong prij. (Ol Wok 1:14; 2:​1, 4, 17, 18; Joel 2:​28, 29; Galesia 3:28) Taem oli agensem ol Kristin, mekem se plante oli mas ronwe long Jerusalem, “olgeta ya we . . . oli go wanwan, oli goaot long evri ples, oli stap talemaot gud nius blong Jisas.” (Ol Wok 8:4) Yes, olgeta we “oli go wanwan,” i no minim wan spesel grup blong man nomo we oli gat raet blong prij. Nogat.

10. ?Wanem tufala wok we ol man blong Jisas oli mekem bifo we nesen blong ol man Jiu i lus?

¹⁰ Samting ya i tru long olgeta faswan yia blong Kristin skul. Jisas i talemaot profet tok ya se: “Bambae ol man oli talemaot gud nius ya blong kingdom long olgeta ples long wol, blong givim witnes long olgeta nesen. Nao biaen, bambae en i kam.” (Matiu 24:​14, NW ) Taem ol tok ya oli kamtru long faswan handred yia, gud nius i go finis long plante ples bifo we ol ami blong Rom oli agensem ol man Jiu mo spolem skul mo politik blong olgeta. (Kolosi 1:23) Mo tu, olgeta man blong Jisas oli obei long oda ya se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.’ (Matiu 28:​19, 20) Ol faswan Kristin oli no mekem olsem sam lida blong skul tede oli stap mekem, we oli pulum ol man blong bilif long Jisas mo biaen oli letem olgeta oli wosipim God folem prapa tingting blong olgeta nomo. Defren olgeta, ol faswan Kristin ya oli tijim ol man blong oli kam ol disaepol blong Jisas. Oli mekem ol man ya oli joen long ol grup we oli kolem se kongregesen, mo oli trenem olgeta blong olgeta tu oli talemaot gud nius mo pulum narafala man i kam disaepol. (Ol Wok 14:​21-23) Ol Witnes blong Jeova tede oli mekem sem samting.

11. ?Hu olgeta we tede oli stap talemaot beswan gud nius ya we olgeta man oli mas harem?

¹¹ Plante Witnes blong Jeova oli folem fasin blong Pol, Banabas, mo sam narafala man long faswan handred yia, taem oli mekem wok blong misinari long narafala kantri. Wok blong olgeta i karem plante frut, from we oli no joen long politik mo oli no letem wan samting i pulum olgeta oli gowe long wok ya blong talemaot gud nius. Oli folem nomo oda ya blong Jisas se: “Taem yufala i go, yufala i mas prij.” Be, i no olgeta Witnes blong Jeova we oli mekem wok blong misinari long narafala kantri. Plante long olgeta oli wok fultaem blong kasem mane blong laef, mo sam long olgeta oli stap yet long skul. Sam long olgeta oli gat ol pikinini blong lukaotem. Be nating se i olsem, olgeta Witnes oli talemaot gud nius ya we oli bin lanem. Ol yangfala mo ol olfala, ol man mo ol woman, evriwan oli glad tumas blong obei long tok ya blong Baebol we i se: “Yu mas talemaot tok blong hem [“yu mas prij,” NW ]. Nating we ol man oli wantem harem tok ya no oli no wantem harem, be oltaem yu yu mas strong blong talemaot [“yu mas strong blong prij,” NW ].” (2 Timoti 4:2) Oli mekem olsem ol Kristin long faswan handred yia, we oli gohed ‘blong tijim ol man mo talemaot gud nius ya blong Jisas, se hem i Mesaea.’ (Ol Wok 5:42) Oli stap talemaot beswan gud nius we olgeta man oli mas harem.

?Jenisim Bilif Blong Man No Talemaot Gud Nius?

12. ?Tok ya ‘mekem proselaet’ i rili minim wanem, mo wanem tingting blong sam man long mining blong tok ya?

¹² Long Grik lanwis i gat wan wod we oli raetem pro·se’ly·tos we i minim “proselaet no man we i jenisim skul blong hem.” Hemia i joen wetem tok ya we i minim “mekem proselaet,” no “pulum man blong jenisim skul blong hem.” Tede, samfala oli talem se fasin ya blong pulum man blong jenisim skul blong hem, i denja. Niuspepa we Wol Kaonsel blong ol Jos i wokem, i talem se man we i “jenisim bilif blong narafala hem i mekem sin ya.” ?From wanem? Buk ya, Catholic World Report i talem se: “Otodoks Jos i mekem tumas toktok long saed blong fasin ya blong pulum man blong jenisim skul, ale from samting ya, naoia long tingting blong ol man, tok ya ‘mekem proselaet’ i minim fosem man blong jenisim skul blong hem.”

13. Storian long sam samting we oli hapen finis blong soem se i nogud blong fosem man blong jenisim skul blong hem.

¹³ ?I tru se i nogud blong pulum man blong jenisim skul blong hem? Yes, samtaem fasin ya i save mekem nogud long man. Jisas i talem se ol tija blong loa mo ol Farisi oli stap pulum man blong kam disaepol be i blong spolem olgeta nomo. (Matiu 23:15) I sua se fasin ya blong fosem man blong jenisim skul, hem i rong. Josephus, we i man blong raetem histri, i storebaot John Hyrcanus, wan man blong grup ya we oli kolem ol Makabi. Josephus i talem se, taem John i winim kantri blong ol man Edom, hem i “letem olgeta oli stap long kantri blong olgeta sipos evriwan oli sakomsaes mo folem loa blong ol man Jiu.” Sipos ol man Edom oli agri blong laef aninit long rul blong ol man Jiu, hemia i min se oli mas folem skul blong ol Jiu tu. Mo tu, ol man blong histri oli talem se long ol yia seven handred K.T., Charlemagne i winim ol kantri long not Yurop we i ples blong ol hiten man, nao hem i kilim olgeta mo fosem olgeta blong oli joenem skul blong hem.a ?Be olsem wanem taem ol man not Yurop mo ol man Edom ya oli joen long narafala skul ya? ?Oli wosip wetem fulhat blong olgeta? Tingbaot King Herod we hem i wan man Edom. ?Yu ting se hem i rili folem Loa blong Moses taem hem i traem kilim i ded Jisas we i pikinini yet?​—Matiu 2:​1-18.

14. ?Sam misinari blong Krisendom oli mekem olsem wanem blong pulum ol man oli kam long skul blong olgeta?

¹⁴ ?Tede i gat sam skul we oli fosem man blong joen wetem olgeta? Yes, i gat. Sam misinari blong Krisendom oli pulum man i kam long skul blong olgeta taem oli givim skolasip long olgeta blong go long narafala kantri. No samfala oli talem long ol refuji we oli hanggri se oli mas sidaon mo lesin long jos sevis fastaem bifo we jos i save givim smol kakae long olgeta. Long wan asembli we ol lida blong Otodoks Jos oli mekem long 1992, oli talem se “sam man oli yusum mane no ol sas samting blong pulum narafala blong jenisim skul, mo samtaem oli yusum fasin blong kilim man.”

15. ?Ol Witnes blong Jeova oli mekem proselaet folem mining blong tok ya we ol man oli tingbaot tede? Eksplenem.

¹⁵ I no stret nating blong fosem man blong jenisim skul blong hem. Ol Witnes blong Jeova oli no stap mekem samting olsem.b Taswe, i no stret blong talem se oli stap mekem proselaet, folem mining blong tok ya we ol man oli tingbaot tede. Defren olgeta, oli folem fasin blong ol Kristin blong faswan handred yia, we oli talemaot gud nius long olgeta man. Ale, sipos wan man i intres, oli askem sipos hem i wantem kasem moa save mo stadi Baebol. Ol man ya we oli intres oli lan blong trastem God mo stamba tingting blong hem, mo oli wokem wan bilif we i stanap nomo long stret save blong Baebol. From samting ya, oli singaot long nem blong God, Jeova, blong hem i sevem olgeta. (Rom 10:​13, 14, 17) Wanwan man nomo i mas jus sipos hem i wantem agri wetem gud nius ya no nogat. I no gat samting we i fosem olgeta blong agri. Sipos i gat samting we i fosem olgeta, wosip blong olgeta bambae i nating nomo. God i agri nomo long wosip we man i mekem wetem fulhat blong hem.​—Dutronome 6:​4, 5; 10:12.

Wok Blong Prij Long Taem Blong Yumi

16. ?Wanem i soem se wok blong prij we ol Witnes blong Jeova oli mekem long taem blong yumi i kam antap?

¹⁶ Long taem blong yumi, ol Witnes blong Jeova oli talemaot gud nius blong Kingdom long plante moa ples olsem we Matiu 24:14 i talem. Wan long ol tul we oli yusum plante long wok blong prij hemia magasin ya Wajtaoa.c Taem ol faswan Wajtaoa oli kamaot long 1879, oli stap prentem 6,000 kopi nomo long wan lanwis. Be long yia 2001, hemia bitim 122 yia biaen, oli prentem 23,042,000 kopi blong magasin ya long 141 lanwis. Namba ya i go antap folem wok blong prij we ol Witnes blong Jeova oli stap mekem. Traem luk hamas aoa we oli spenem evri yia long wok blong prij long ol yia 18 handred, mo skelem wetem 1,169,082,225 aoa we oli spenem long wok blong prij long yia 2001. Tingbaot olgeta 4,921,702 man we oli bin kasem wan fri Baebol stadi long sem yia ya. !Hemia i rili wan bigbigfala wok we i nambawan tumas! Yes, i gat 6,117,666 man blong talemaot Kingdom oli mekem olgeta wok ya.

17. (a) ?Wanem ol giaman god we plante man oli stap wosipim tede? (b) ?Olgeta man, nomata wanem lanwis, kantri no wok blong olgeta, oli mas save wanem?

¹⁷ Man blong raetem Sam i talem se: “Olgeta god ya blong ol man blong ol narafala kantri oli giaman god nomo, oli no save mekem wan samting, be Hae God ya [“Jeova,” NW ], hem i mekem skae wetem olgeta samting we i stap long hem.” (Ol Sam 96:5) Long wol tede, ol man oli wosip long plante samting, olsem, kantri blong olgeta, saen blong kantri blong olgeta, ol haeman, ol sas samting long laef, mo mane tu. (Matiu 6:24; Efesas 5:5; Kolosi 3:5) Mohandas K. Gandhi, i bin talem wan taem se: “Mi mi bilif strong se . . . ol man long Yurop tede oli Kristin long toktok nomo. Be rili, oli stap wosip long Mammon [hemia mane].” I klia se ol man long evri ples oli nidim blong harem gud nius. Evriwan, nomata wanem lanwis blong olgeta, kantri blong olgeta no wok blong olgeta, oli nidim blong save Jeova mo ol stamba tingting blong hem. Yumi wantem tumas we olgeta ya oli obei long tok ya blong man blong raetem Sam, i se: “Yumi leftemap nem blong hem [“Jeova,” NW ] from ol gudgudfala samting blong hem mo from paoa blong hem. !Nem blong hem i hae we i hae! !Yumi presem hem!” (Ol Sam 96:​7, 8) Ol Witnes blong Jeova oli halpem ol man blong save Jeova nao bambae oli save presem hem long wei we i stret. Yes, olgeta we oli lesin long ol tok ya oli kasem bigfala blesing. ?Wanem blesing we oli kasem? Bambae yumi tokbaot samting ya long nekis stadi.

[Ol Futnot]

Yu Yu Save Eksplenem?

• ?From wanem ol Witnes blong Jeova oli gat strong tingting blong prij?

• ?From wanem ol Witnes blong Jeova oli prij long ol ples we Krisendom i stanemap jos long hem finis?

• ?From wanem ol Witnes blong Jeova oli no mekem proselaet folem mining blong tok ya we ol man oli tingbaot tede?

• ?Olsem wanem wok blong prij we ol Witnes blong Jeova oli mekem tede i kam antap?

[Tok blong pija long pej 9]

Jisas i gat strong tingting blong prij mo hem i trenem ol narafala blong mekem wok ya tu

[Tok blong pija long pej 10]

Olgeta Kristin long faswan handred yia oli joen long wok blong prij

[Tok blong pija long pej 11]

I no stret nating blong fosem man blong jenisim skul blong hem