?From Wanem Yu Save Trastem Ol Gospel Blong Baebol?

“Olgeta ya oli win bigwan. Ol man oli spenem bigfala mane blong wokem ol muvi long saed blong olgeta . . . oli wokem ol buk tu we ol man oli pem olgeta moa i bitim ol narafala buk . . . mo ol Kristin grup oli yusum olgeta tu. Oli mekem se sam niufala jos oli stanap, mo oli mekem sam man oli ting se i bin gat wan plan blong haedem trutok.”—SUPER INTERESSANTE, WAN NIUSPEPA BLONG BRASIL.

?WANEM samting ya we i pulum tingting blong ol man olsemia? Niuspepa ya i stap tokbaot sam hanraet we ol man oli faenem samwe long ol yia 1950. Oli faenem ol hanraet ya long wan vilej long Ijip, nem blong hem, Nag Hammadi, mo long sam narafala ples long Ijip. Ol man oli talem se ol hanraet ya oli blong ol gospel, sam leta, mo sam narafala tok we i kamaot long God, be hemia i no tru. Plante man oli singaot ol hanraet ya mo ol narafala hanraet olsem, se Gnostic no Apocrypha.a

?I Rili Gat Wan Plan Blong Haedem Trutok?

Yumi laef long wan taem we fulap man oli no moa trastem Baebol mo ol skul. From samting ya, plante man tede oli intres bigwan long ol hanraet blong Gnostic mo Apocrypha. Ol hanraet ya oli jenisim tingting blong plante man long saed blong ol tijing blong Jisas Kraes mo Kristin skul we hem i stanemap. Wan buk i talem se: “Gospel blong Tomas mo sam narafala [buk] blong Apocrypha, oli stret long tingting blong wan grup blong man we i stap kam antap tede: hemia ol man we oli wantem save long God, be oli no trastem ol jos.” Long kantri blong Brasil, oli faenemaot se “i gat bitim 30 grup we ol bilif blong olgeta oli stanap long Apocrypha.”

I gat sam man we oli ting se long ol yia 300 K.T.,b Katolik Jos i mekem wan plan blong haedem trutok long saed blong Jisas. Oli tingting tu se oli haedem sam stori blong laef blong Jisas we oli stap long ol hanraet blong Apocrypha. Mo oli ting se ol man we oli tanem ol fo Gospel long ol Baebol tede, oli jenisim sam toktok insaed long olgeta. Taem oli faenem ol hanraet blong Apocrypha, plante moa man oli agri long ol tingting ya. Wan woman we hem i tijim kos long saed blong ol jos, nem blong hem Elaine Pagels, i talem se: “Naoia yumi stat blong luksave se wanem we yumi kolem Kristin skul mo Kristin kastom, hem i kamaot long sam hanraet nomo. Be i gat plante narawan bakegen.”

Plante man we oli stadi dip olsem Misis Pagels, oli ting se i no Baebol nomo we i stamba blong Kristin bilif. Oli ting se i gat plante narafala buk tu we oli stamba blong bilif ya, olsem ol hanraet blong Apocrypha. Olsem nao, i gat wan program we i kamaot long BBC, nem blong hem Ol Save Blong Baebol We i No Klia, “Trufala Meri Blong Magdala.” Long program ya, oli talem se ol hanraet blong Apocrypha oli soemaot se, Meri blong Magdala hem i “tijim ol narafala disaepol mo i lidim olgeta long saed blong bilif. Hem i no wan disaepol nomo, be hem i mekem wok blong aposol long ol narafala aposol.” Wan man blong raetem ol stori long niuspepa blong Brasil (O Estado de S. Paulo), nem blong hem Juan Arias, i tokbaot wok we oli ting se Meri blong Magdala i mekem, i se: “Tede, evri samting i lidim yumi blong bilif se Kristin skul we Jisas i stanemap long taem bifo, i wan skul ‘blong ol woman.’ Yumi tingting olsem from we ol faswan jos haos, hemia haos blong ol woman. Mo ol woman oli lidim ol jos ya olsem ol pris mo bisop.”

Plante man oli tinghevi long ol hanraet blong Apocrypha i bitim ol hanraet blong Baebol. Samting ya i mekem sam impoten kwestin oli stanap: ?Ol hanraet blong Apocrypha tu oli stamba blong Kristin bilif? Taem ol hanraet ya oli agensem ol klia tijing blong Baebol, ?yumi mas bilif long Baebol no long ol hanraet ya? ?I tru se, long ol yia 300, i gat wan plan blong haedem ol hanraet ya? ?Oli rili bin tekemaot sam impoten save long ol fo Gospel, blong haedem save long saed blong Jisas, Meri blong Magdala, mo sam narafala man? Blong ansa long ol kwestin ya, bambae yumi tokbaot wan long ol fo Gospel blong Baebol, hemia Gospel blong Jon.

Pruf We i Stap Long Gospel Blong Jon

Long Ijip, jes afta long yia 1900, oli faenem wan impoten haf blong hanraet blong Gospel blong Jon, hemia Jon 18:31-33, 37, 38. Tede oli singaot hanraet ya se Papyrus Rylands 457 (P⁵²), mo oli holem i stap long Laebri blong John Rylands, long Manchester, Inglan. Hanraet ya i olfala moa, i bitim ol narafala hanraet blong Kristin Grik haf blong Baebol we oli stap yet tede. Plante man we oli stadi long ol hanraet, oli ting se ol man oli mekem hanraet ya long yia 125 K.T., hemia samwe long 25 yia nomo afta we Jon i ded. Samting we i mekem olgeta oli sapraes, hemia se hanraet ya, klosap i sem mak stret long ol narafala hanraet we ol man oli mekem biaen. Oli faenem hanraet ya long Ijip. Samting ya i soemaot se, long yia 125 K.T., oli tekem wan kopi blong gospel blong Jon i go long Ijip finis. Hemia i sapotem tingting blong Baebol se Jon nao i raetem gospel blong hem, mo hem i raetem long ol yia bifo 100 K.T. Yes, Jon i luk wetem prapa ae blong hem, ol samting we hem i raetem long gospel blong hem.

Oli raetem ol hanraet blong Apocrypha long ol yia 100 K.T. Hemia i bitim 100 yia afta we ol samting long Gospel blong Jon oli hapen. Sam man blong hae save oli traem talem se ol hanraet blong Apocrypha oli stanap long sam hanraet mo kastom we oli olfala moa, be i no gat pruf blong samting ya. Ale, i stret blong askem kwestin ya: ?Bambae yu trastem moa toktok blong ol man we oli luk ol samting ya wetem prapa ae blong olgeta, no ol man we oli laef wan handred yia afta we ol samting ya i hapen? Ansa i klia nomo.c

?Olsem wanem long tok ya se oli jenisim ol Gospel blong Baebol blong haedem sam samting long saed blong laef blong Jisas? Tingbaot Gospel blong Jon. ?I gat pruf i stap se oli jenisim hanraet ya long ol yia 300 K.T.? Blong ansa long kwestin ya, yumi mas rimemba se wan long ol stamba hanraet we Baebol tede i stanap long hem, hemia wan hanraet blong ol yia 300 K.T., we nem blong hem Vatican 1209. Sipos Baebol blong yumi i gat ol jenis long hem we oli mekem long ol yia 300 K.T., ol jenis ya oli mas stap long hanraet ya Vatican 1209. I gud se i gat wan narafala hanraet tu blong bighaf blong gospel blong Luk mo Jon, nem blong hem Bodmer 14, 15 (P⁷⁵). Hemia, oli raetem long ol yia 175 K.T. kasem 225 K.T. Ol man we oli stadi long ol hanraet oli talem se hem i klosap sem mak long Vatican 1209. Ale, samting ya i pruvum se oli no jenisim wan bigfala samting long ol Gospel blong Baebol.

I no gat wan samting long ol hanraet, mo i no gat wan narafala samting tu, blong pruvum se, long ol yia 300 K.T. oli jenisim hanraet blong Jon mo ol narafala Gospel. Wan man we i wok long Yunivesiti blong Cambridge, nem blong hem Dokta Peter M. Head, i jekemgud ol hanraet we oli faenem long ples ya Oxyrhynchus, long Ijip. Nao hem i raetem se: “Ol hanraet ya oli agri nomo wetem ol impoten hanraet we Baebol tede i stanap long olgeta [we oli raetem long ol bigfala leta long ol yia 300 K.T. mo afta long taem ya]. I no gat wan samting long ples ya, we i save pulum yumi blong jenisim tingting we yumi gat finis long saed blong ol hanraet blong NT [Niutesteman].”

?Yumi Save Talem Wanem?

Long yia 150 K.T., olgeta Kristin long wol oli save ol fo Gospel blong Baebol finis—hemia Matiu, Mak, Luk, mo Jon—mo oli agri long olgeta. Long ol yia 160 K.T. kasem 175 K.T., man ya Tatian i raetem hanraet ya we plante man oli yusum, nem blong hem Diatessaron (wan Grik tok we i minim “long ol fo”). Hanraet ya i stanap long ol fo Gospel blong Baebol, i no long eniwan long “ol gospel” blong Gnostic. (Lukluk bokis ya “Hanraet We i Pruvum Se Ol Gospel Oli Tru.”) I gud blong tingbaot toktok we man ya Irenaeus i talem klosap long yia 200 K.T. Hem i talem se i mas gat fo Gospel nomo, from we i gat fo kona blong wol, mo tu, win i save kam long fo saed nomo. Ating yu harem se i narakaen blong skelem ol Gospel olsem. Nating se i olsem, be tok blong hem i soemaot se long taem ya i gat fo Gospel blong Baebol nomo, i no gat ol narawan antap long olgeta.

?Ol samting we yumi tokbaot finis oli soemaot wanem? Oli soemaot se Kristin Grik haf blong Baebol wetem ol fo Gospel we yumi gat tede, oli stap sem mak olsem oli bin stap long ol yia 100 K.T. I no gat wan pruf se samfala oli wokem wan plan long ol yia 300 K.T. blong jenisim mo haedem sam haf blong Baebol we i kamaot long God. Defren olgeta, Bruce Metzger, we i stadi dip long ol tok blong Baebol, i raetem se: “Long ol yia klosap long 200 K.T. . . . ol man blong bilif we oli kamaot long ol defren ples, mo we oli stap long ol kongregesen olbaot long ol ples klosap long Mediterenian Si, mo long ol narafala ples stat long Inglan go kasem Mesopotamia, oli bilif mo agri finis long bighaf blong Niutesteman.”

Tufala aposol ya Pol mo Pita, oltaem tufala i leftemap trutok blong Baebol. Tufala tugeta i givim strong woning long ol Kristin se oli no mas bilif long ol tok we i defren long tijing we oli kasem finis. Traem ridim wanem we Pol i raetem long Timoti long saed ya, i se: “Timoti, yu mas holemgud olgeta samting ya we God i putum finis long han blong yu. Bambae yu no go joen long ol toktok ya we i no blong ona long God, mo long ol krangke toktok ya we oli talem se i fasin blong man i kam waes. Ol man we oli toktok olsem oli giaman nomo, mo plante man we oli stap folem fasin ya, oli gowe finis long fasin blong bilif.” Pita tu i talem se: “Taem mifala i talemaot long yufala, se Jisas Kraes Masta blong yumi i gat paoa, mo bambae hem i kambak bakegen [“stap,” NW], be mifala i no kasem ol samting ya long ol storian olbaot, nogat. Mifala tri, we long ae blong mitrifala, mifala i luk laet ya we i saenaot long Kraes, we i saen we i saen.”—1 Timoti 6:20, 21; 2 Pita 1:16.

Plante handred yia bifo, profet Aesea i raetem tok ya we God i givim long hem se: “Gras i stap kam drae, mo flaoa i stap lusum kala, be tok blong God blong yumi bambae i stap olwe, gogo i no save finis.” (Aesea 40:8) Yumi save bilif strong se God ya we i givim ol tok long ol man blong oli raetem long Baebol, hem i holem ol tok ya i stap gud long ol yia we oli pas. Hem i mekem olsem from we “hem i wantem sevem olgeta man, mo i wantem we olgeta man bambae oli save trutok blong hem.”—1 Timoti 2:4.

[Ol futnot]

[Tok blong makem poen long pej 9]

Papyrus Rylands 457 (P⁵²), wan haf blong Gospel blong Jon, we oli raetem long ol yia 100 K.T., hemia i no longtaem tumas afta we Jon i raetem gospel ya

[Bokis blong pija long pej 11]

Hanraet We i Pruvum Se Ol Gospel Oli Tru

Jes afta we Kristin skul i stat, samfala we oli agens long hem oli talem se ol Gospel oli no laenapgud, wan i agensem narawan, ale man i no save trastem ol stori blong olgeta. Wan man Siria we i raetem ol buk (samwe long yia 110 K.T. kasem 180 K.T.), nem blong hem Tatian, i pruvum se yumi save trastem ol Gospel. Hem i harem se sipos hem i save joenem ol stori blong ol fo Gospel mo putum olgeta long wan buk nomo, bambae i no moa luk olsem se wan i agensem narawan.

Ale, Tatian i mekemrere blong joenem ol Gospel ya. Yumi no save sipos hem i raetem buk blong hem long Grik no long lanwis blong Siria. Nomata se i olsem wanem, be samwe long yia 170 K.T., Tatian i finisim buk ya we nem blong hem Diatessaron, wan Grik tok we i minim “long ol fo.” ?From wanem yu yu mas intres long hanraet ya we i no kamaot long God?

Long ol yia 1800, ol man we oli agens oli talemaot tingting blong olgeta se ol man oli stat raetem ol Gospel afta long yia 150 K.T. nomo, taswe man i no save trastem gud ol stori blong olgeta. Be ol olfala hanraet blong Diatessaron we oli faenem afta long taem ya, oli pruvum gud se ol man we oli laef long yia 150 K.T., oli save finis ol fo Gospel mo oli bilif long olgeta, be i no long ol narafala hanraet.

Taem ol man oli faenem Diatessaron mo sam pepa long lanwis Arabik, Armenia, Grik, mo Latin, we oli eksplenem hanraet ya, samting ya i pulum Masta Frederic Kenyon, we i stadi dip long ol tok blong Baebol, blong raetem se: “Ol samting ya we oli faenem oli mekem se yumi save sakemaot enikaen tingting we i hafhaf long saed blong Diatessaron. Ol samting ya oli pruvum se ol man we oli laef long yia 170 K.T. oli tinghae moa long ol fo Gospel blong Baebol, i bitim olgeta narafala stori long saed blong laef blong Sevia blong yumi.”

[Ol foto]

TATIAN

Diatessaron long lanwis Arabik

[Tok blong pija long pej 8]

(Lukluk niuspepa)

“c.” i minim “circa,” no “samwe long.”

33 K.T.

Jisas i ded

c. 41

Matiu i raetem Gospel blong hem

c. 58

Luk i raetem Gospel blong hem

c. 65

Mak i raetem Gospel blong hem

c. 98

Jon i raetem Gospel blong hem

125

Rylands 457 (P52)

c. 140

Oli stat mekem ol hanraet blong Apocrypha

c. 175

Bodmer 14, 15 (P75)

Ol yia 300 K.T.

Vatican 1209

[Tok blong pija long pej 10]

Vatican 1209

Hanraet ya Vatican 1209, we oli raetem long ol yia 300 K.T., i soemaot se i no gat wan bigfala jenis long ol hanraet blong ol Gospel

[Credit Line]

From the book Bibliorum Sacrorum Graecus Codex Vaticanus, 1868

[Credit Line blong pija long pej 9]

© The Trustees of the Chester Beatty Library, Dublin