Lukaotgud Long Olting Blong Masta

¹ Long taem blong Baebol, ol masta oli trastemgud bosman blong olgeta. Ebraham i givim wok long bosman blong hem, blong faenem wan waef blong boe blong hem, Aesak. (Jen. 24:​1-4) I olsem we, bosman ya i mas meksua se laen blong Ebraham i gohed. !Hemia wan bigfala wok ya! !Yumi luksave from wanem aposol Pol i talem se: “Taem we masta i putum wok long han blong bosman blong hem, man ya i mas lukaotgud blong mekem ol samting we masta blong hem i talem long hem”!​—1 Kor. 4:2.

Wok We i Stap Long Han Blong Ol Kristin

² Baebol i tokbaot sam haf blong Kristin wok blong prij olsem wok we God i putum long han blong yumi. Eksampel, aposol Pol i talem long ol Kristin long Efesas se, ‘from gladhat blong God, hem i putum wok ya long han blong mi, blong bambae mi save givhan long yufala.’ (Efes. 3:2; Kol. 1:​25) Hem i tingbaot wok blong hem blong karem gud nyus i go long ol nesen, olsem wan wok we God i putum long han blong hem, mo we i mas lukaotgud long hem. (Wok 9:​15; 22:21) Aposol Pita i raet i go long ol tabu brata blong hem, i se: ‘Oltaem yufala i mas rere blong tekem yufala i go insaed long haos blong yufala, we i no gat man i stap tok smosmol from. Stret long presen we yufala wanwan i kasem, yufala i mas yusum presen ya blong givgivhan long yufala, olsem ol gudfala bosman we God i soemaot gladhat blong hem long olgeta long ol defdefren fasin.’ (1 Pita 4:​9, 10; Hib. 13:16) Ol sas samting we ol Kristin ya long faswan handred yia oli gat, oli kamaot from gladhat blong Jeova nomo. Taswe, ol Kristin ya oli olsem bosman blong ol samting ya, mo oli mas yusum olting ya long Kristin fasin.

³ Tede, ol Wetnes blong Jeova oli gat semfala tingting. Oli givim laef blong olgeta i go long Jeova God, mo oli tingbaot olgeta samting we oli gat​—laef, helt, mo ol sas samting blong olgeta​—olsem ol frut blong ‘gladhat we God i soemaot long ol defdefren fasin.’ From we oli ol gudfala bosman, oli harem se oli mas talemaot long Jeova God olsem wanem oli yusum ol samting ya. Mo tu, God i givim save long olgeta long saed blong gud nyus. Hemia wan narafala samting we hem i putum long han blong olgeta, mo we oli wantem yusum long nambawan rod: blong leftemap nem blong Jeova mo blong halpem ol narafala blong kasem save long trutok.​—Mat. 28:19, 20; 1 Tim. 2:​3, 4; 2 Tim. 1:​13, 14.

⁴ ?Olsem wanem ol Wetnes blong Jeova oli stap soemaot se oli mekemgud wok blong olgeta olsem ol bosman? Ripot i soemaot se las yia, long olgeta ples blong wol, oli spenem bitim wan bilyan haoa blong talemaot ‘gud nyus blong kingdom,’ mo oli stadi Baebol wetem bitim 4,500,000 man we oli intres. (Mat. 24:14) Mo tu, bigfala presen mane we oli givim blong halpem wok blong prij long olgeta ples blong wol mo blong sapotem ol Haos Kingdom long ples blong olgeta, i soemaot se oli stap holemgud wok blong olgeta olsem ol bosman blong Jeova. Mo tu, oli tekem ol elda we oli goraon blong visitim ol kongregesen wetem sam narafala oli kam long haos blong olgeta, mo oli kaengud long ol narafala we oli gat nid​—olsem olgeta we oli stap kasem hadtaem from ol faet. Olsem wan grup, ol trufala Kristin oli stap lukaotgud long olting blong Masta.

‘Bosman We i Holemgud Wok Blong Hem, Mo i Waes’

⁵ I no yumi wanwan nomo we God i putum wok long han blong yumi, be ogenaesesen blong hem tu. Jisas i talem se tabu Kristin kongregesen long wol, hem i ‘bosman we i holemgud wok blong hem, mo i waes.’ (Luk 12:42) Wok blong ‘bosman ya we i holemgud wok blong hem’ i blong “seraot ol kakae” mo blong lidim wok blong talemaot gud nyus long olgeta ples blong wol. (Rev. 12:17) Wan narafala samting, se Hed Kampani we i wok long nem blong grup ya we i olsem ‘bosman we i holemgud wok blong hem,’ i meksua se i yusumgud ol presen mane, we i blong givhan long wok long olgeta ples blong wol. Ol man we oli givim ol presen mane ya oli trastem grup ya. ‘Bosman ya we i holemgud wok blong hem mo i waes’ i meksua se i yusum mane ya long stret rod, long waes fasin, we i no westem, mo long beswan fasin.

⁶ Wan samting we i soem se hem i stap yusum ol presen mane ya long waes fasin, hemia wok blong ol Wetnes blong Jeova blong prentem ol buk, we i kam antap bigwan long ol yia 1900. Ol Baebol mo ol buk we oli tokbaot Baebol​—magasin, buk, buklet, traket, mo Kingdom Nyus​—oli bin mekem wan bigfala wok blong talemaot “gud nyus” long ‘ol las dei ya.’ (Mak 13:10; 2 Tim. 3:1) Mo Wajtaoa hem i stap yet olsem nambawan rod blong givimaot ‘kakae long stret taem blong hem’ long “famle blong God” mo ol fren blong olgeta, hemia ‘bigfala kampani’ blong “ol narafala sipsip.”​—Mat. 24:45; Efes. 2:​19; Rev. 7:9; Jon 10:16.

⁷ Fastaem, ol kampani blong wol we oli prentem ol buk, oli wokem ol buk blong ol Wetnes blong Jeova. Be long ol yia 1920, ol man blong Jeova oli luk se i moagud we olgeta nomo oli wokem ol buk ya, mo praes i daon moa tu. Ale, long 1920, oli statem wok ya smosmol fastaem, nao sloslou, hem i gru gogo i kam bigwan olgeta long Bruklin, Nyu Yok. Long 1967, ol faktri blong olgeta blong prentem ol buk oli kavremap fo bigfala haf blong Bruklin. Sam narafala kantri tu oli prentem ol buk, be bighaf blong olgeta oli mas stop taem Namba Tu Bigfala Faet Blong Wol i kamaot.

⁸ Nating se wok blong prentem ol buk i kam bigwan long Yunaeted Stet, hem i no naf blong wokem olgeta buk blong olgeta ples blong wol. Taswe, long ol yia biaen long faet, plante narafala kantri oli stat, no oli gohed nomo, blong prentem ol magasin mo buk, olsem Denmak, Engglan, Gris, Kanada, Saot Afrika, Swiselan, mo Wes Jemani. Jes afta long yia 1970, wok ya i stat long Brasil, Filipin, Finlan, Gana, Japan, Naejeria, mo Ostrelya. Sam long ol kantri ya oli wokem ol magasin nomo, be sam oli wokem ol buk tu. Jes afta 1970, sam misinari blong Gilead oli kasem trening blong yusum ol mesin blong prentem ol buk, nao oli go long sam long ol kantri ya blong halpem ol brata blong prentem ol buk.

⁹ Long ol yia 1980, namba blong ol kantri we oli prentem ol magasin i kasem 51.a !Hemia i nambawan rod blong yusum olting blong Masta! !Hem i bigfala pruf se wok blong Kingdom i stap gru! !Mo hem i soemaot fulwan se ol milyan Wetnes blong Jeova wanwan we oli gat gladhat blong givim presen, oli ‘ona long Jeova wetem ol sas samting blong olgeta’! (Prov. 3:9) Long rod ya, oli pruvum se oli ol nambawan bosman we oli lukaotgud long ol blesing we Jeova i givim long olgeta long ol defdefren fasin.

Wan Jenis Long Tingting

¹⁰ Long ol yia 1970 mo jes afta long 1980, ol man oli wokem sam nyufala fasin blong prentem ol buk, mo ol Wetnes blong Jeova tu oli folem ol nyufala rod ya. Bifo, oli bin yusum ol olfala letapres mesin. Sloslou, oli jenis i go long ol nyufala ofset mesin. Long rod ya, oli save wokem ol naesfala buk wetem ol pija long plante kala, i no ol pija long tu kala nomo (blak wetem wan narafala kala), olsem oli bin wokem wetem ol olfala letapres mesin. Mo tu, ol nyufala save long saed blong kompyuta i jenisim fulwan, wok blong mekemrere ol buk blong prentem. Ol Wetnes blong Jeova oli wokem wan nyufala rod long kompyuta we oli kolem MEPS (Multilanguage Electronic Phototypesetting System), we naoia i givhan long wok blong prentem ol buk long bitim 370 lanwis. I no gat wan kampani blong wol we i gat wan rod olsem MEPS, we i givhan blong wokem ol buk long plante defren lanwis.

¹¹ MEPS wetem sam narafala nyufala rod, oli givhan bigwan long wok blong givimaot kakae long stret taem blong hem. Wan long ol narafala rod ya, hemia fasin blong sanem mesej long kompyuta i go long ol narafala kompyuta. Bifo, wetem olfala fasin blong wok, ol save long ol magasin blong ol narafala lanwis, i kamaot sam manis no maet wan yia afta we i kamaot long Engglis. Be naoia, long 115 lanwis, semfala save i kamaot long Wajtaoa long semtaem, mo long 62 lanwis, semfala save i kamaot long Wekap! long semtaem. Hemia i min se long fulwol, bitim 95 pesen blong ol man we oli go long Wajtaoa Stadi blong ol Wetnes blong Jeova evri wik, oli stadi long semfala save long semtaem. !Wan nambawan blesing ya! !Tru ya, ol nyufala rod blong prentem buk oli nambawan fasin blong yusum olting blong Masta!

Ol Defren Nid Blong Ogenaesesen

¹² Ol nyufala rod ya oli jenisim nid blong ogenaesesen blong ol Wetnes blong Jeova long wol, long saed blong wok blong prentem ol buk. Ol nyufala ofset mesin oli moa kwik i bitim ol olfala letapres mesin, be oli sas moa tu. Wetem ol nyufala rod blong kompyuta we oli givhan long wok blong raetem ol buk, tanem i go long narafala lanwis, mekem ol pija mo ol defren kaen raeting, ol man oli save mekem plante moa samting i bitim bifo, be i sas moa tu. Kwiktaem nomo, i kam klia se i sas tumas blong prentem ol magasin long 51 kantri. Taswe, long ol yia 1990, ‘bosman we i holemgud wok blong hem’ i lukluk bakegen long samting ya. ?Hem i tekem wanem disisen?

¹³ Hem i skelemgud bisnes ya, nao i faenemaot se sipos sam kantri nomo oli mekem wok blong prentem olgeta buk blong fulwol, bambae oli yusum “ol sas samting” we ol Wetnes blong Jeova mo ol fren blong olgeta oli givim olsem presen, long fasin we i moagud. Ale, sloslou oli katem namba blong ol kantri we oli prentem ol buk. Naoia, Jemani i stap prentem ol magasin mo buk blong plante kantri long Is mo Wes Yurop, wetem sam narafala kantri we bifo olgeta nomo oli bin prentem ol buk blong olgeta. Itali i prentem ol buk blong sam ples long Afrika mo saotis Yurop, wetem Gris mo Albania. Long Afrika, Naejeria mo Saot Afrika nomo oli prentem ol magasin. Semfala fasin i kamaot long plante narafala ples blong wol tu.

Sam Samting We Oli Skelem

¹⁴ Long Julae 1998, bambae wok blong prentem ol magasin i no moa gohed long sam kantri blong Yurop, olsem Denmak, Franis, Gris, Netalan, Ostria, mo Swiselan. Bambae Briten, Finlan, Itali, Jemani, Spen, mo Swiden, oli mekem bigfala wok ya blong prentem ol buk blong ol kantri blong Yurop. ?Olsem wanem oli tekem disisen se weswan kantri bambae i gohed blong prentem ol buk mo weswan kantri bambae i no moa prentem? Olsem oltaem, ‘bosman we i holemgud wok blong hem’ i folem rul blong lukaot long olting blong Masta long waes fasin, ale hem i skelemgud praes blong prentem ol buk long ol wanwan kantri mo praes blong sanemaot ol buk ya. Hem i skelem tu ol loa blong ol wanwan kantri, blong luk se loa blong wanem kantri i laenap moa wetem wok blong prentem mo sanemaot ol buk.

¹⁵ Bigfala risen blong stopem wok blong prentem ol buk long sam kantri mo joenem i go long sam narafala kantri, hemia from we plan ya i wokgud. I moa isi we wan kantri i prentem ol buk blong plante kantri, mo long fasin ya, yumi stap yusumgud ol mesin ya we oli sas. Naoia, wok blong prentem ol buk i stap gohed long ol kantri we praes blong prentem buk i daon moa, i gat ol samting we oli nidim blong prentem, mo i gat gudfala rod blong sanemaot ol buk. Taswe, yumi stap yusumgud olting blong Masta. Be, taem sam kantri oli no moa prentem ol buk, hemia i no min se wok blong prij bambae i stop long ol kantri ya. No gat. Bambae oli gat fulap buk mo magasin blong yusum, mo ol handred taosen Wetnes blong Jeova long ol kantri ya oli save gohed strong blong talemaot “gud nyus ya blong pis” i go long olgeta man. (Efes. 2:​17) Jenis ya i no jes mekem se praes blong prentem ol buk i godaon, be i mekem sam narafala gudfala samting i kamaot tu.

¹⁶ Wan samting se, bighaf blong ol nyufala mesin blong prentem buk long Denmak, Gris, Netalan, mo Swiselan, oli go long Filipin mo Naejeria. Samfala blong Yurop we oli savegud olsem wanem blong yusum ol mesin ya, oli glad blong go trenem ol man long ol narafala kantri ya blong yusum ol mesin ya. Taswe, naoia ol kantri ya oli stap kasem ol nambawan magasin, olsem plante narafala kantri oli bin kasem bifo.

¹⁷ Wan narafala gudfala samting se: Naoia sam kantri nomo, hemia olgeta we oli prentem ol magasin, oli pem blong prentem ol magasin. From samting ya, long ol kantri we oli no moa prentem ol magasin, i gat mane i stap blong yusum long ol narafala rod, olsem bildim ol Haos Kingdom mo givhan long ol brata blong yumi long ol pua kantri. Taswe, taem yumi yusumgud olting blong Masta, yumi folem tok we Pol i raetem long ol man Korin, se: “Mi no wantem mekem i strong long yufala, blong bambae mi save mekem i isi long sam narafala man, no gat. Mi mi wantem mekem i sem mak long olgeta man. Naoia, from we yufala i gat plante samting, i stret blong yufala i givhan long sam narafala man we oli sot. . . . Hemia i rod blong mekem i stret long olgeta man.”​—2 Kor. 8:13, 14.

¹⁸ Plan ya we sam kantri nomo oli prentem olgeta magasin, i mekem se ol Wetnes blong Jeova long olgeta ples blong wol oli joengud moa. Nating se bifo, ol Wetnes long Denmak oli prentem ol magasin blong olgeta, be naoia oli glad nomo we Jemani i mekem wok ya. Oli talem tangkyu long ol brata blong olgeta long Jemani. ?Ol Wetnes blong Jeova long Jemani oli kros from we ol presen mane blong olgeta i stap givhan blong wokem ol buk blong Denmak​—no Rasia, no Yukren, no sam narafala kantri? !No gat! Oli glad from we naoia ol brata blong olgeta long ol kantri ya oli save yusum presen mane blong olgeta long wan narafala rod.

Lukaotgud Long Ol Samting

¹⁹ Long evri Haos Kingdom blong ol Wetnes blong Jeova long wol, i gat wan smol bokis i stap we oli raetem long hem se, “Presen Mane Blong Givhan Long Wok Blong Sosaeti Long Olgeta Ples Blong Wol​—Matyu 24:14.” Ol presen mane we ol man oli putum long ol bokis ya from we oli wantem nomo, i blong yusum long eniples we i gat nid. ‘Bosman we i holemgud wok blong hem’ i tekem disisen olsem wanem blong yusum mane ya. Taswe, maet presen mane we i stap long bokis long wan kantri, i sapotem wok blong ol Wetnes blong Jeova long wan narafala kantri we i stap plante taosen kilomita longwe. Samtaem, presen mane i givhan long ol Kristin brata we wan trabol i kasem olgeta, olsem hariken, graon i seksek bigwan, mo ol faet long kantri blong olgeta. Mo tu, mane ya i stap givhan blong sapotem ol misinari long bitim 200 kantri.

²⁰ Long ol kongregesen blong ol Wetnes blong Jeova, wan taem evri manis oli tekem sam menet nomo blong ridimaot ol kaon blong kongregesen. I no gat kleksin long ol Haos Kingdom mo asembli. I no gat leta i goaot long ol wanwan man blong askem olgeta blong givim mane. Oli no pem sam man blong mekem fanresing. I gat wan haf nomo evri yia long Wajtaoa we i eksplenem samting we man i mas mekem sipos hem i wantem givim presen mane long Watch Tower Bible and Tract Society, blong sapotem wok blong olgeta long ful wol. Wekap! i no stap tokbaot mane blong Sosaeti. Taswe, ?olsem wanem ol bigbigfala wok oli save gohed long olgeta ples blong wol, olsem wok blong talemaot gud nyus, wokem ol Haos Kingdom, lukaot long olgeta we oli wok fultaem long wan spesel wok blong Sosaeti, mo givhan long ol Kristin we oli gat nid? Jeova i mekem wan nambawan blesing i kamaot long ol man blong hem, hemia se oli gat fasin blong givim presen wetem gladhat. (2 Kor. 8:2) Mifala i tekem jans ya blong talem tangkyu long evriwan we oli bin joen blong ‘ona long Jeova wetem ol sas samting’ blong olgeta. Oli save sua se ‘bosman we i holemgud wok blong hem’ bambae i gohed blong lukaotgud long olting blong Masta. Mo yumi prea se Jeova bambae i gohed blong blesem ol plan blong mekem wok i kam bigwan moa long olgeta ples blong wol.

[Futnot]