!Tok Blong Jeova i Stap Blong Yu Yusum Evri Dei!

¹ Evri dei yumi stap kasem ol niufala samting we oli traem bilif blong yumi. Maet wan we i no serem bilif blong yu i traem pulum yu blong kampani wetem hem olsem boefren no gelfren blong hem. Maet tija blong yu i wantem yu blong folem wan rod blong kasem wan wok we i winim bigfala mane. No maet bos blong yu i wantem se yu wok moa aoa oltaem. Maet helt blong yu i stap kam nogud. I tru, ol traem ya oli save kasem yu enitaem. Be rimemba, yu no stap yu wan. Oltaem Jeova i rere blong givim waes we yu nidim blong winim ol traem ya. Wan rod blong kasem tok blong Jeova oltaem, hemia tru long fasin blong ridim mo tingting dip long ol vas mo toktok insaed long buk ya, Ridimgud Ol Tok Blong Baebol Evri Dei. ?Yu stap yusumgud nambawan buk ya?

² Help i Stap: Aesea 30⁠:20 (NW) i tokbaot Jeova olsem “Bigfala Tija” we ol man blong hem oli save lukluk i go long hem blong kasem help. Hem i stap givim ol stret samting we yu nidim blong winim ol traem blong bilif blong yu. ?Olsem wanem hem i stap mekem samting ya? Nekiswan vas i eksplenem: “Bambae yufala i harem wan tok biaen long yufala i talem se: ‘Hemia rod ya. Yufala olgeta man, yufala i wokbaot long hem.’ ” Tede, Jeova i stap givim tok blong hem tru long Baebol, mo ol buk we “slef we i stret mo waes” i prentem. (Mat. 24⁠:​45, NW) I gat plante advaes insaed long ol Wajtaoa, we oli tokbaot klosap evri haf blong Kristin laef. Sipos yu stap luklukbak long ol Wajtaoa we oli tokbaot long Ridimgud Ol Tok Blong Baebol Evri Dei, samting ya i save givhan long yu blong hivimap plante save. Save ya i impoten tumas, from we bambae hem i halpem yu blong winim enikaen trabol.​—⁠Aes. 48⁠:⁠17.

³ Makemaot Taem Blong Rid: Nating se moning i wan bisi taem, wan mama i bin makemaot taem blong ridim mo storeyan long saed blong vas blong dei wetem pikinini boe blong hem, taem tufala i dring ti. Ol storeyan wetem prea, hemia ol laswan toktok we boe ya i harem evri moning bifo we hem i aot long haos i blong go long skul. Ol gudfala toktok ya oli mekem hem i naf blong stanap strong mo blokem rabis fasin long saed blong seks, blong no joen nating long fasin blong soemaot sapot long kantri, mo blong no fraet blong prij long ol studen mo tija tu. Long skul ya, hem wan nomo i wan Witnes. Be nating se i olsem, hem i neva harem se hem i stap hem wan.

⁴ Lukluk i go long Jeova mo Tok blong Hem blong lidim yu long laef. Sipos yu mekem olsem, bambae yu harem se hem i wan trufala man, mo i wan gudfala fren we yu save trastem. !Lukluk i go long hem evri dei! Plante milyan man oli stap ridim Tok blong God evri dei, mo sipos yu yu mekem olsem, bambae ae blong yu i save “luk Bigfala Tija” blong yumi.