“Mi Singaotem Yufala Se Ol Fren”

 1. ?Yu mas mekem wanem blong fren gud wetem wan man?

PLANTE taem, fas samting we yu mekem blong fren gud wetem wan man, i blong spenem taem wetem hem. Taem yutufala i serem ol tingting mo tokbaot ol samting long laef blong yutufala, yutufala i fren gud. Be i gat sam samting we i mekem i no isi blong fren wetem Jisas. ?Wanem ol samting ya?

 2. ?Wanem fas samting we i mekem i had blong fren gud wetem Jisas?

² Fas samting we i mekem i had blong fren gud wetem Jisas, se yumi neva luk hem samtaem. Plante long ol fas Kristin tu oli neva luk hem. Be aposol Pita i talem se: “Nating se yufala i neva luk Kraes, be yufala i lavem hem. Nating se yufala i no luk hem naoia, be yufala i soemaot se yufala i bilif long hem.” (1 Pita 1:8) Taswe, yumi save fren gud wetem Jisas, nating se yumi neva luk hem samtaem.

 3. ?Wanem namba tu samting we i mekem i had blong fren gud wetem Jisas?

³ Namba tu samting se yumi no save toktok long Jisas. Taem yumi prea, yumi toktok long Jehova. I tru, yumi prea long nem blong Jisas, be yumi no toktok i go long hem. Blong talem stret, Jisas i no wantem se yumi prea long hem. ?From wanem? From we prea i wan haf blong wosip blong yumi we i mas go long Jehova nomo. (Mat. 4:10) Nating se i olsem, yumi save soemaot se yumi lavem Jisas.

 4. ?Wanem namba tri samting we i had, mo bambae yumi tokbaot wanem long stadi ya?

⁴ Namba tri samting se Jisas i stap long heven, taswe yumi no save spenem taem wetem hem. Nating se i olsem, i gat rod blong save gud Jisas. Bambae yumi tokbaot fo samting we yumi save mekem blong fren moa wetem hem. Be fastaem, bambae yumi tokbaot: ?From wanem i impoten blong fren gud wetem Kraes?

 5. ?From wanem yumi mas fren gud wetem Jisas? (Yu luk tufala bokis ya, ““Fren Gud Wetem Jisas, Nao Yu Save Fren Gud Wetem Jehova” mo “Yu Mas Gat Stret Tingting Long Jisas.”)

⁵ Sipos yumi wantem fren gud wetem Jehova, yumi mas fren gud wetem Jisas. ?From wanem i olsem? I gat tu risen. Faswan, Jisas i talem long ol disaepol blong hem se: “Papa i lavem yufala from we yufala i lavem mi.” (Jon 16:27) Mo hem i talem tu se: “I no gat man i save kam long Papa blong mi, sipos hem i no pas long mi.” (Jon 14:6) Sipos yumi wantem fren wetem Jehova be yumi no fren gud wetem Jisas fastaem, i olsem se yumi traem blong go insaed long wan haos be yumi no pas long doa. Jisas i yusum wan pijatok olsem, taem hem i talem se hem nao i “doa we ol sipsip oli pas long hem.” (Jon 10:7) Namba tu risen se, Jisas i soemaot gud ol fasin blong Papa blong hem. Hem i talem long ol disaepol se: “Man we i luk mi, hem i luk Papa tu.” (Jon 14:9) Taswe, wan impoten rod blong save gud Jehova i blong stadi long laef blong Jisas. Taem yumi kasem save moa long Jisas, yumi lavem hem moa. Mo taem yumi fren moa wetem Jisas, yumi lavem Papa blong hem moa.

 6. ?Wanem narafala risen blong fren gud wetem Jisas? Eksplenem.

⁶ Sipos yumi wantem kasem ansa blong ol prea blong yumi, yumi mas fren gud wetem Jisas. I no naf blong talem long en blong prea se, “long nem blong Jisas.” Yumi mas kasem save olsem wanem Jehova i yusum Jisas blong ansarem ol prea. Jisas i talem long ol aposol se: “Nomata wanem samting we yufala i askem long nem blong mi, mi bambae mi mekem.” (Jon 14:13) I tru se Jehova nao i harem mo i ansarem ol prea blong yumi, be hem i givim paoa long Jisas blong mekem samting we hem i wantem i kamtru. (Mat. 28:18) Taswe, bifo we God i ansa long prea blong yumi, hem i luk sipos yumi folem ol advaes blong Jisas, olsem hemia: ‘Sipos yufala i fogivim ol man, Papa blong yufala long heven tu bambae i fogivim yufala. Be sipos yufala i no fogivim ol man, Papa blong yufala tu bambae i no fogivim yufala.’ (Mat. 6:14, 15) !I impoten tumas we yumi kaen long ol narafala olsem we Jehova mo Jisas i kaen long yumi!

 7. ?Hu olgeta we bambae oli kasem blesing from ransom sakrefaes blong Jisas?

⁷ Olgeta nomo we oli fren gud wetem Jisas bambae oli kasem blesing from ransom sakrefaes. ?Olsem wanem yumi save samting ya? Jisas i talem se hem i “rere blong ded blong sevem ol fren blong hem.” (Jon 15:13) Ol man blong Jehova we oli laef bifo we Jisas i kam long wol, bambae olgeta tu oli mas kasem save long hem mo lavem hem. Taem ol stret man mo woman olsem Ebraham, Sera, Moses, mo Rehab oli laef bakegen, bambae oli mas kam fren blong Jisas blong oli save kasem laef we i no save finis.—Jon 17:3; Wok 24:15; Hib. 11:8-12, 24-26, 31.

8-9. Folem Jon 15:4, 5, ?taem yumi fren wetem Jisas, yumi naf blong mekem wanem? ?From wanem hemia i impoten?

⁸ Yumi glad blong wok wetem Jisas long wok blong prij mo tijim ol man long gud nius blong Kingdom. Taem Jisas i stap long wol, hem i tijim ol man. Mo afta we hem i gobak long heven mo i kam hed blong kongregesen, hem i gohed blong lidim wok blong prij mo tijim ol man. Hem i tinghae long yu taem hem i luk we yu traehad blong givhan long plante man, blong oli save hem mo Papa blong hem. Tru ya, yumi save mekem wok ya nomo sipos Jehova mo Jisas i givhan long yumi.—Ridim Jon 15:4, 5.

⁹ Baebol i talem klia se sipos yumi wantem we Jehova i glad long yumi, yumi mas lavem Jisas mo gohed blong lavem hem. Taswe, bambae yumi tokbaot fo samting we yumi save mekem blong kam ol fren blong Jisas.

10. ?Wanem fas samting we yumi mas mekem blong kam fren blong Jisas?

¹⁰ (1) Kasem save long Jisas. Yumi save mekem olsem, sipos yumi ridim ol buk blong Matiu, Mak, Luk, mo Jon. Taem yumi tingting dip long ol stori blong Baebol we oli tokbaot laef blong Jisas, yumi lavem mo respektem hem from we hem i kaen long ol man. Traem tingbaot fasin we hem i mekem long ol disaepol blong hem. Nating se hem i Masta blong olgeta, hem i no mekem olsem we oli slef blong hem. Be hem i talemaot ol tingting mo filing blong hem long olgeta. (Jon 15:15) Taem oli harem nogud, hem tu i harem nogud, mo samtaem hem i krae wetem olgeta. (Jon 11:32-36) Ol man we oli agensem hem tu, oli talem se hem i kam fren blong ol man we oli lesin long hem. (Mat. 11:19) Taem yumi folem fasin we Jisas i mekem long ol disaepol blong hem, yumi fren gud wetem ol narafala, yumi harem gud, mo yumi lavem mo respektem Jisas moa.

11. ?Wanem namba tu samting we yumi mas mekem blong kam fren blong Jisas? ?From wanem samting ya i impoten?

¹¹ (2) Yu mas gat tingting mo fasin blong Jisas. Sipos yumi kasem save moa long Jisas mo yumi gat tingting blong hem, bambae yumi fren moa wetem hem. (1 Kor. 2:16) ?Olsem wanem yumi save gat tingting mo fasin blong Jisas? Wan samting se, Jisas i wantem moa blong givhan long ol narafala i bitim we hem i tingbaot hem wan. (Mat. 20:28; Rom 15:1-3) From we hem i gat tingting olsem, hem i rere blong lego samting we hem nomo i wantem, mo hem i fogivim narafala. Hem i no hareap blong kros long ol man we oli jajem hem. (Jon 1:46, 47) Mo hem i no gohed blong tingbaot ol mastik we man i mekem. (1 Tim. 1:12-14) Hem i talem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) I gud yumi wanwan i askem se: “?Mi mi stap folem fasin blong Jisas mo mekem evri samting we mi naf blong mekem blong gat pis wetem ol brata mo sista?”

12. ?Wanem namba tri samting we yumi mas mekem blong kam fren blong Jisas? ?Olsem wanem blong mekem samting ya?

¹² (3) Givhan long ol brata blong Kraes. Taem yumi givhan long ol tabu brata blong Jisas, long tingting blong hem, i olsem we yumi givhan long hem. (Mat. 25:34-40) Bigfala samting we yumi save mekem blong givhan long olgeta, hemia blong joen fulwan long wok we Jisas i givim, blong talemaot Kingdom mo pulum ol man oli kam disaepol. (Mat. 28:19, 20; Wok 10:42) Ol brata blong Kraes oli nidim “ol narafala sipsip” blong givhan long olgeta, blong oli save finisim bigfala wok ya blong prij long fulwol. (Jon 10:16) Sipos yu yu wan long ol narafala sipsip, evri taem we yu joen long wok blong prij, yu soemaot se yu lavem ol tabu Kristin mo Jisas tu.

13. ?Olsem wanem blong folem advaes blong Jisas long Luk 16:9?

¹³ Mo tu, yumi save kam fren blong Jehova mo Jisas sipos yumi yusum ol rij samting blong yumi blong sapotem wok we tufala i stap lidim. (Ridim Luk 16:9.) Yumi save givim presen mane blong sapotem wok blong Kingdom long fulwol. Hemia i givhan long wok blong prij long ol ples farawe, mo long wok blong bildim mo lukaot gud long ol haos wosip, mo tu, blong halpem olgeta we disasta o narafala trabol i spolem olgeta. Mo tu, yumi save givim presen mane blong sapotem kongregesen blong yumi, mo blong halpem sam brata mo sista we oli nidim sam samting. (Prov. 19:17) Hemia sam rod blong givhan long ol brata blong Kraes.

14. Folem Efesas 4:15, 16, ?wanem namba fo samting we yumi mas mekem blong kam fren blong Jisas?

¹⁴ (4) Sapotem ol plan blong Kristin kongregesen. Yumi fren moa wetem hed blong kongregesen, Jisas, taem yumi wok gud wetem olgeta we oli lukaot long kongregesen. (Ridim Efesas 4:15, 16.) Naoia yumi stap traehad blong waes moa long fasin blong yusum ol Haos Kingdom. Plan ya i sevem plante mane we oganaesesen i save yusum long ol narafala samting. Long sam ples, tu kongregesen i kam wan nomo, taswe taem mak blong teritori i jenis, sam pablisa oli mas muv i go long narafala kongregesen. Maet oli bin stap long wan kongregesen blong plante yia, mo oli lavem tumas ol brata mo sista ya. !Yumi save se Jisas i glad tumas blong luk se ol gudfala disaepol ya oli rere blong folem plan ya!

15. ?Olsem wanem bambae yumi fren moa wetem Jisas long fiuja?

¹⁵ Olgeta we tabu spirit i makemaot olgeta, oli gat hop blong stap wetem Jisas blong olwe, mo rul wetem hem long Kingdom blong God. Olgeta ya bambae oli luk hem, toktok wetem hem, mo spenem taem wetem hem. (Jon 14:2, 3) Olgeta tu we oli gat hop blong laef long wol, bambae oli kasem lav mo kea blong Jisas. I tru se bambae oli no luk Jisas, be bambae oli gohed blong fren moa wetem hem, taem oli harem gud long laef ya we Jehova mo Jisas i givim.—Aes. 9:6, 7.

16. ?Wanem ol blesing we yumi kasem taem yumi kam fren blong Jisas?

¹⁶ Taem yumi obei long tok blong Jisas blong kam fren blong hem, yumi kasem plante blesing. Naoia yumi kasem lav mo kea blong hem. Long fiuja, yumi gat janis blong kasem laef blong olwe. Mo samting we i moa impoten se, taem yumi fren wetem Jisas, yumi kasem wan presen we i sas we i sas, hemia blong fren gud wetem Papa blong hem Jehova. !Tru ya, i wan bigfala blesing taem Jisas i singaot yumi se fren blong hem!