!Yu Yu Sas Long Ae Blong Jehova!

 1. ?Wanem samting we Jehova i luk long ol man blong hem?

JEHOVA GOD “i glad long ol man blong hem.” (Sam 149:4) !Hemia i mekem yumi glad tumas! Jehova i luk ol gudfala fasin blong yumi, hem i luk ol samting we yumi naf blong mekem, mo hem i pulum yumi i kam long hem. !Sipos yumi stap tru long hem, bambae hem i stap klosap long yumi blong olwe!—Jon 6:44.

 2. ?From wanem i had blong samfala oli bilif se Jehova i lavem olgeta?

² Maet sam man oli se: ‘Mi save se Jehova i lavem grup blong ol man blong hem, ?be olsem wanem mi save sua se hem i lavem mi?’ ?Wanem i save pulum wan man blong askem kwestin olsem? Oksanab we i safa bigwan taem hem i smol, i talem se: “Mi mi glad tumas taem mi baptaes mo mi stat blong paenia. Be 15 yia afta, mi harem nogud tumas taem mi tingbaot ol nogud samting we oli hapen long mi, taem mi smol. Ale mi stap tingting se Jehova i no moa glad long mi, mo se i no stret blong hem i lavem mi.” Sista Yua i wan paenia, mo hem tu i kasem plante trabol taem hem i pikinini. Hem i talem se: “Mi givim laef blong mi i go long Jehova from we mi wantem mekem hem i glad. Be mi save se bambae hem i neva lavem mi.”

 3. ?Bambae yumi tokbaot wanem long stadi ya?

³ Ating yu yu lavem Jehova tumas olsem tufala sista ya, be maet yu no sua se hem i lavem yu. ?From wanem yu mas bilif strong se hem i rili kea long yu? ?Mo wanem i save halpem yu blong sakemaot negatif tingting ya? Bambae yumi luk ansa blong tufala kwestin ya.

 4. ?From wanem i denja blong no bilif se Jehova i lavem yumi?

⁴ Lav i gat paoa blong pusum man blong mekem samting. Sipos yumi bilif strong se Jehova i lavem yumi mo i sapotem yumi, hemia bambae i pusum yumi blong mekem wok blong hem long fulhat blong yumi, nating se laef blong yumi i no isi. Be sipos yumi no bilif se God i kea long yumi, “bambae [yumi] no gat naf paoa.” (Prov. 24:10) Mo taem tingting blong yumi i foldaon mo yumi no moa bilif se God i lavem yumi, bambae i isi blong Setan i atakem yumi.—Efes. 6:16.

 5. ?Wanem i hapen long sam brata sista we oli no bilif se Jehova i lavem olgeta?

⁵ Sam brata sista tede oli kam slak, from we oli ting se Jehova i no lavem olgeta. Jemes we i wan elda, i talem se: “Nating se mi wok long Betel mo mi prij wetem wan kongregesen we i toktok narafala lanwis, be mi no rili sua sipos Jehova i akseptem ol sakrefaes blong mi. Mo mi no sua tu sipos hem i stap lesin long ol prea blong mi.” Eva we i wan fultaem paenia, i talem se: “Mi faenemaot se i denja tumas blong man i bilivim se Jehova i no lavem hem, from we tingting ya i save afektem evri samting we hem i mekem. Bambae hem i no moa wantem tekem ol kakae long spirit, mo i no moa glad long wok blong Jehova.” Michael we i wan haftaem paenia mo i wan elda, i talem se: “Sipos yu no bilif se God i kea long yu, bambae yu drif i gowe long hem.”

 6. ?Yumi mas mekem wanem sipos yumi stat blong tingting se God i no lavem yumi?

⁶ Ol ekspiriens ya oli soem se ol negatif tingting oli save spolem man. ?Be yumi mas mekem wanem sipos yumi stat blong tingting se God i no lavem yumi? !Yumi mas sakemaot tingting ya kwiktaem! Ol tingting olsem oli mekem man “i no save stap kwaet,” taswe i gud yu askem Jehova blong i tekemaot, mo i putum ‘pis blong [hem] we bambae i lukaot gud long hat mo tingting blong [yu].’ (Sam 139:23; fut.; Fil. 4:6, 7) Mo tingbaot se i no yu wan nomo we yu filim olsem. Plante narafala brata sista tu oli stap traehad blong winim nogud tingting ya. Bifo tu, ol man blong Jehova oli mas faet agensem ol negatif tingting ya. Tingbaot lesen we yumi save lanem long eksampol blong Pol.

 7. ?Wanem ol problem we Pol i fesem?

⁷ ?Yu yu filim se laef blong yu i had tumas from we yu gat plante responsabiliti, be yu no naf blong mekem evriwan? Sipos yes, bambae yu kasemsave long Pol. Hem tu i stap wari, i no from wan kongregesen nomo, be “from ol kongregesen.” (2 Kor. 11:23-28) ?Yu yu lusum glad blong yu from we yu stap siksik oltaem? Pol tu i stap harem nogud from “wan samting we i olsem wan ropnil we i stap stikim [hem].” Maet hemia wan sik, mo hem i wantem tumas se sik ya i finis. (2 Kor. 12:7-10) ?Ol slak fasin blong yu oli mekem tingting blong yu i foldaon? Samtaem Pol tu i filim olsem. Taem hem i tokbaot hem, hem i talem se: “!Mi mi no glad nating!” Hemia from we oltaem hem i mas faet agensem ol slak fasin blong hem.—Rom 7:21-24.

 8. ?Wanem i halpem Pol blong dil wetem ol problem blong hem?

⁸ Be Pol i gohed blong mekem wok blong Jehova, nating se hem i fesem ol problem ya. ?Wanem i givhan long hem blong stanap strong? Hem i savegud ol slak fasin blong hem, be nating se i olsem, hem i bilif fulwan long ransom. Hem i save promes ya blong Jisas we i se: “Olgeta man we oli soemaot se oli bilif long [Jisas], oli no ded be oli kasem laef we i no save finis.” (Jon 3:16; Rom 6:23) Yes, Pol i soemaot se hem i bilif long ransom. Hem i bilif se sipos wan man i mekem wan bigfala sin be biaen i tanem tingting blong hem, Jehova i rere blong fogivim hem.—Sam 86:5.

 9. ?Yumi lanem wanem long ol tok blong Pol long Galesia 2:20?

⁹ Mo tu, Pol i bilif se God i lavem hem tumas, from we hem i save se God i sanem Jisas blong i ded from hem. (Ridim Galesia 2:20.) Makem tok blong hem long en blong vas ya. Hem i se: “Pikinini blong God . . . i lavem mi, nao i givim laef blong hem from mi.” Pol i no ting se hem i nogud tumas, nao God i no save lavem hem. Hem i no gat tingting ya se: ‘Yes, Jehova bambae i lavem ol brata blong mi, be bae hem i no save lavem mi.’ Nogat. Hem i rimaenem ol Kristin blong Rom se: “Taem yumi man blong mekem sin yet, Kraes i ded blong sevem yumi.” (Rom 5:8) !Yes, God i lavem yumi evriwan!

10. ?Yumi lanem wanem long Rom 8:38, 39?

¹⁰ Ridim Rom 8:38, 39. Pol i sua fulwan se lav blong God i strong. Hem i raetem se i no gat samting “i save tekemaot yumi long lav ya blong God.” Pol i save se Jehova i soem longfala tingting long nesen blong Isrel. Mo hem i save se Jehova i sore long hem. I olsem we Pol i stap talem se: ‘Jehova i sanem stret Pikinini blong hem blong i ded from mi. Taswe mi no gat eni risen blong talem se hem i no lavem mi.’—Rom 8:32.

11. Nating se Pol i bin mekem ol sin we 1 Timoti 1:12-15 i tokbaot, ?from wanem hem i sua se God i lavem hem?

¹¹ Ridim 1 Timoti 1:12-15. I sua se Pol i mas harem nogud sam samtaem from ol samting we hem i mekem bifo. !Yumi no sapraes taem hem i talem se hem i “mowas long olgeta” sinman! Bifo we hem i save trutok, hem i stap go long olgeta taon blong ronem ol Kristin, nao i sakem samfala long kalabus, mo i agri blong oli kilim sam narafala oli ded. (Wok 26:10, 11) !Traem tingbaot filing blong Pol, sipos hem i mitim wan yangfala Kristin we hem nao i bin agri blong oli kilim i ded papa mo mama blong hem! Yes Pol i mas harem nogud taem hem i tingbaot ol mastik blong hem, be hem i save se hem i no save jenisim ol samting ya. Hem i akseptem se Kraes i ded from hem, mo hem i raetem se: “Be from kaen fasin blong God, mi mi kam wan aposol.” (1 Kor. 15:3, 10) ?Hemia i tijim yumi long wanem lesen? Yu mas akseptem se Kraes i ded from yu, mo hem i openem rod finis blong yu mo Jehova i frengud mo yutufala i lavlavem yutufala. (Wok 3:19) Samting we i impoten long ae blong God, hem i samting we yumi mekem naoia mo long fiuja, i no ol mastik we yumi mekem bifo, nomata se yumi Witnes finis long taem ya o nogat.—Aes. 1:18.

12. ?Olsem wanem 1 Jon 3:19, 20 i save halpem yumi, sipos yumi ting se God i no lavem yumi?

¹² Taem yu stap tingbaot se Jisas i ded from ol sin blong yu, maet yu talem se: ‘Mi mi nogud, taswe God i no save givim presen ya long mi.’ ?From wanem maet yu gat tingting ya? Hat blong yumi i save giaman long yumi, nao yumi save ting se yumi gud blong nating nomo, mo se God i no lavem yumi. (Ridim 1 Jon 3:19, 20.) Long taem olsem, yumi mas tingbaot se “God i hae moa long hat blong yumi.” Fasin blong hem blong lavem yumi mo fogivim yumi, i strong moa i bitim ol negatif tingting blong yumi. Yumi mas lanem blong akseptem tingting blong hem long saed blong yumi. Blong mekem olsem, yumi mas stadi oltaem long Tok blong hem, prea oltaem, mo joen oltaem wetem ol gudfala man blong hem. ?From wanem i impoten blong mekem olsem?

13. ?Olsem wanem stadi Baebol i save halpem yumi? (Mo yu luk bokis ya “?Olsem Wanem Baebol i Halpem Olgeta?”)

¹³ Stadi Baebol evri dei, nao bambae yu luk ol gudfala fasin blong Jehova. Bambae yu haremsave se hem i lavem yu. Sipos evri dei yu tingting dip long wan smol haf blong Baebol, hemia bambae i halpem yu blong tingting gud moa, nao yu save “stretem olgeta samting” long tingting mo long hat blong yu. (2 Tim. 3:16) Elda ya Kevin, hem i faet agensem filing ya se hem i nogud. Hem i talem se: “Taem mi ridim mo mi tingting dip long Ol Sam 103, hemia i halpem mi blong mi stretem tingting blong mi, mo blong mi kasemsave long tingting we Jehova i gat long saed blong mi.” Eva we yumi tokbaot finis, i talem se: “Long en blong dei, mi tingting dip long ol tingting blong Jehova. Hemia i givim pis long hat blong mi, mo i mekem bilif blong mi i strong.”

14. ?Olsem wanem prea i save halpem yumi?

¹⁴ Prea oltaem. (1 Tes. 5:17) Ol man oli frengud wetem narafala taem oli storian gud tugeta, mo oli serem filing blong olgeta. Hemia i sem mak long frensip blong yumi wetem Jehova. Taem yumi talemaot ol filing, ol tingting, mo ol wari blong yumi long hem, yumi stap soemaot se yumi trastem hem mo se yumi save we hem i lavem yumi. (Sam 94:17-19; 1 Jon 5:14, 15) Yua we yumi tokbaot finis, i se: “Taem mi prea, mi no jes talemaot ol samting we mi mekem long dei ya. Be mi openem hat blong mi tu long hem, mo mi talemaot ol filing blong mi. Sloslo, mi no moa luk Jehova olsem wan bos blong kampani, be olsem wan Papa we i lavem tumas ol pikinini blong hem.”—Yu luk bokis ya “?Yu Ridim Finis?”

15. ?Olsem wanem Jehova i soem se hem i intres long yumi?

¹⁵ Joen wetem ol gudfala fren. Olgeta ya oli ol presen we Jehova i givim. (Jem. 1:17) Papa blong yumi long heven i intres bigwan long yumi, nao hem i givim wan famle blong ol brata mo sista we oli “soemaot lav oltaem.” (Prov. 17:17) Long leta blong Kolosi, Pol i tokbaot sam Kristin we oli halpem hem, mo hem i talem se olgeta oli “givhan bigwan” long hem. (Kol. 4:10, 11) Kraes Jisas tu i nidim help blong ol fren blong hem, hemia ol enjel mo ol man, mo hem i glad tumas taem oli halpem hem.—Luk 22:28, 43.

16. ?Olsem wanem ol gudfala fren oli halpem yumi blong kam klosap long Jehova?

¹⁶ ?Yu yu stap askem mo akseptem help blong ol gudfala fren long kongregesen? I no rong blong talemaot ol wari blong yumi long wan fren we i bigman long spirit, hemia i save protektem yumi. Jemes we yumi tokbaot finis, i talem se: “Taem mi frengud wetem ol Kristin we oli bigman long spirit, hemia i givhan bigwan long mi. Taem ol negatif tingting oli kam kavremap mi, ol gudfala fren ya oli lesin long mi wetem longfala tingting, mo oli rimaenem mi se oli lavem mi. Tru long olgeta, mi luksave se Jehova i lavem mi mo i kea long mi.” !Yes, i impoten tumas we yumi gohed blong frengud wetem ol brata sista blong yumi!

17-18. ?Yumi mas lesin long hu, mo from wanem?

¹⁷ Setan i wantem se yumi stop blong mekem samting we i stret. Hem i wantem we yumi no bilif se Jehova i lavem yumi, mo se hem i no save sevem yumi from we yumi nogud. Be olsem we yumi luk, hem i stap giaman nomo.

¹⁸ Jehova i lavem yu. Yu yu sas long ae blong hem. Sipos yu obei long hem, bambae yu “gohed blong stap long lav blong” hem foreva, olsem we i hapen long Jisas. (Jon 15:10) Taswe yu no lesin long Setan o long hat blong yu we i stap jajem yu. I gud yu lesin long Jehova we i luk gudfala samting long yumi evriwan. !I gud yu bilif strong se hem i “glad long ol man blong hem,” mo long yu tu!