Kwestin

Pol i raetem se: “Long saed blong loa, mi mi ded finis, loa ya i kilim mi mi ded. Nao from we mi mi ded long saed blong loa, mi save laef long saed blong God.”—Gal. 2:19.

Samting we Pol i raetem, i laenap wetem stamba poen we hem i wantem makem long ol kongregesen long provins blong Galesia, we ol man Rom oli rul long hem. Sam Kristin long ol kongregesen ya oli stat blong folem ol tijing blong ol giaman tija. Ol man ya oli stap tijim se blong man i sef, hem i mas folem olgeta Loa blong Moses, speseli loa ya se man i mas sakomsaes. Be Pol i save se God i no moa askem ol man we oli bilif blong oli mekem sakomsaes. Pol i yusum ol strong tok blong mekem ol man ya oli tingting, mo blong pruvum se ol tijing ya oli giaman, mo blong mekem ol brata ya oli bilif strong moa long ransom sakrefaes blong Jisas Kraes.—Gal. 2:4; 5:2.

Baebol i talem klia se taem wan man i ded, hem i no moa kasem save long wan samting mo i no gat wan samting we i save spolem hem. (Pri. 9:5) Taem Pol i talem se “loa ya i kilim mi mi ded,” hem i minim se Loa blong Moses i no moa gat eni paoa long laef blong hem. Pol i sua fulwan se from bilif we hem i gat long ransom sakrefaes, hem i “laef long saed blong God.”

?Olsem wanem “loa” i jenisim situesen blong Pol? Pol i talem se: “Wan man i stret man nomo from hem i bilif long Jisas Kraes, be i no from we hem i folem loa.” (Gal. 2: 16) I tru, loa i mekem wan impoten samting i kamtru. Pol i eksplenem long ol man Galesia se: “Hem i joenem Loa ya, blong soemaot ol nogud samting we ol man oli mekem. Loa ya i stanap gogo kasem taem we pikinini ya we promes ya i stap tokbaot, i kamtru.” (Gal. 3: 19) Yes, Loa i soemaot se ol sinman oli no save folemgud Loa, mo oli nidim wan sakrefaes we i stretgud olgeta. Taswe Loa i lidim ol man i go long “pikinini ya,” hemia Kraes. Taem wan man i soemaot se hem i bilif long Jisas Kraes, God i save talemaot se man ya i wan stret man. (Gal. 3: 24) Taswe, Pol i kam wan stret man from we tru long Loa, hem i akseptem Jisas mo i bilif long hem. Hemia nao olsem wanem ‘loa ya i kilim Pol i ded,’ mo hem i “laef long saed blong God.” Naoia Loa i no moa gat paoa long hem, be God nao i gat paoa long hem.

Pol i talem sem tingting ya long leta we hem i raetem i go long ol man Rom. Hem i se: “Ol brata blong mi, sakrefaes blong Kraes i mekem se Loa i no moa fasem yufala . . . yumi kam fri long Loa from we hem i no moa gat paoa long yumi.” (Rom 7: 4, 6) Vas ya mo hemia long Galesia 2:19, i soemaot se Pol i no stap tokbaot kaen ded ya we man i kasem from i brekem Loa. Defren olgeta, hem i stap tokbaot fasin ya we man i kam fri. Loa i no moa gat paoa long hem mo long olgeta we oli olsem hem. Oli kam fri from we oli bilif long ransom blong Kraes.