Mekem Hop Blong Yu i Stap Strong

 1. ?Jehova i givim wanem hop long yumi?

JEHOVA i givim nambawan hop long yumi blong laef olwe. Samfala oli hop blong laef olwe long heven olsem ol spirit man. (1 Kor. 15:50, 53) Be bighaf blong yumi i hop blong laef olwe long wol ya wetem gudfala helt mo glad. (Rev. 21:3, 4) Nating se yumi stap wet blong laef olwe long heven o long wol ya, be hop blong yumi i impoten tumas.

 2. ?Hop blong yumi i wan drim nomo? ?From wanem yu talem olsem?

² Tok ya “hop” long Baebol, i min se “yumi ekspektem ol gudfala samting blong hapen.” Yumi sua se hop blong yumi bambae i kamtru long fiuja from we hop ya i kam long Jehova. (Rom 15:13) Yumi save ol promes blong hem, mo yumi save se oltaem hem i mekem ol promes blong hem i kamtru. (Nam. 23:19) Yumi bilif strong se Jehova i wantem mekem ol samting we hem i talem mo hem i gat paoa blong mekem. Taswe, hop blong yumi i no wan drim nomo, be i gat ol pruf blong hem mo i stanap long ol samting we oli rili bin hapen.

 3. ?Bambae yumi tokbaot wanem long stadi ya? (Ol Sam 27:14)

³ Papa blong yumi long heven i lavem yumi, mo i wantem se yumi trastem hem. (Ridim Ol Sam 27:14.) Taem hop blong yumi long Jehova i strong, yumi naf blong no fraet mo stap glad nomata wanem samting i hapen long yumi. Bambae yumi tokbaot olsem wanem hop i protektem yumi. Fastaem bambae yumi tokbaot se hop i olsem wan angka mo wan hat blong faet. Mo afta bambae yumi tokbaot olsem wanem yumi save mekem hop ya i kam strong moa.

 4. ?Olsem wanem hop i olsem wan angka? (Hibru 6:19)

⁴ Long leta we aposol Pol i raetem i go long ol Hibru, hem i talem se hop i olsem wan angka. (Ridim Hibru 6:19.) Plante taem Pol i travel long sip, mo hem i save se oli yusum angka blong holem sip i stap wanples we taed i no pulum. Wan taem, hem i stap long sip taem wan strong win i girap. Long taem ya, hem i luk ol sela oli sakem angka, blong strong win ya i no smasem sip long ol bigfala ston. (Wok 27:29, 39-41) Olsem wan angka, hop i holemtaet yumi, blong yumi no gowe long Jehova taem yumi fesem ol trabol we oli olsem ol strong win. Strong hop blong yumi i mekem yumi stanap strong, mo yumi bilif se ol gudfala samting bambae oli kamaot yet long fiuja. Yumi no mas fogetem woning blong Jisas se bambae oli ronem mo kilim yumi. (Jon 15:20) Be sipos yumi tingting dip long ol nambawan promes blong fiuja, bambae yumi save gohed strong long rod ya we yumi stap folem finis.

 5. ?Olsem wanem hop i givim paoa long Jisas nating se bambae hem i ded?

⁵ Traem tingbaot olsem wanem hop i halpem Jisas blong stanap strong, nating we hem i save se bambae hem i ded. Long dei blong Pentekos 33 K.T., aposol Pita i talemaot wan profet tok we i kamaot long buk blong Ol Sam. Profet tok ya i tokbaot kwaet tingting mo strong bilif blong Jisas, i se: “Bambae mi stap wet long yu, from we bambae yu no livim mi mi stap long Gref, mo bambae yu no letem bodi blong man we i holemstrong long yu, i roten. . . . Yu mekem mi mi glad tumas taem mi stap long fored blong yu.” (Wok 2:25-28; Sam 16:8-11) Jisas i save se bambae hem i ded, be hem i gat strong hop se God bambae i mekem hem i laef bakegen, nao bambae hem i glad blong joen bakegen wetem Papa blong hem long heven.—Hib. 12:2, 3.

 6. ?Wan brata i talem wanem long saed blong hop?

⁶ Hop i givhan long plante brata mo sista finis, blong oli stanap strong. Tingbaot wan brata blong Inglan, nem blong hem Leonard Chinn. Long Wol Wo Wan, oli putum hem long prisen from we hem i no wantem joen long ami. Hem i stap long wan rum hem wan blong tu manis, mo afta long taem ya, oli fosem hem blong wok had bitim mak. Biaen Leonard i raetem se: “Ol samting we i hapen long laef blong mi, i mekem mi mi luksave se yumi mas gat hop blong yumi save stanap strong. Yumi gat eksampol blong Jisas, ol aposol, ol profet, mo yumi gat ol gudfala promes blong Baebol tu. Olgeta samting ya i givim hop long yumi long saed blong fiuja, mo i givim paoa long yumi blong stanap strong.” Hop i wan angka long laef blong Leonard, mo i save kam wan angka blong yumi tu.

 7. ?Olsem wanem ol trabol oli save mekem hop blong yumi i kam strong moa? (Rom 5:3-5; Jemes 1:12)

⁷ Taem yumi kasem ol trabol, mo yumi luk olsem wanem Jehova i halpem yumi mo i glad long yumi, hop blong yumi i kam strong moa. (Ridim Rom 5:3-5; Jemes 1:12.) Yumi kasem hop we i strong moa, i bitim taem we yumi stat blong bilif long gud nius. Setan i wantem se ol trabol oli winim yumi, be Jehova i save halpem yumi blong stanap strong.

 8. ?Olsem wanem hop i olsem wan hat blong faet? (1 Tesalonaeka 5:8)

⁸ Baebol i talem tu se hop i olsem wan hat blong faet. (Ridim 1 Tesalonaeka 5:8.) Wan soldia i werem hat blong faet blong protektem hed blong hem taem ol enemi oli traem kilim hem. Taem yumi stap faet agensem Setan, yumi mas protektem tingting blong yumi long ol atak blong hem. Hem i yusum plante samting blong traem pulum yumi mo spolem tingting blong yumi. Olsem we hat blong faet i protektem hed blong soldia, hop i protektem tingting blong yumi, nao yumi save holemstrong long Jehova.

 9. Taem man i no gat hop, ?wanem i hapen?

⁹ Hop blong yumi blong laef olwe bambae i givhan long yumi blong mekem ol waes desisen. Be sipos hop blong yumi i kam slak mo yumi stat blong tingbaot ol samting we yumi nomo i wantem, bambae yumi save fogetem promes blong laef olwe. Tingbaot sam Kristin long Korin bifo. Oli lusum bilif long wan impoten promes blong God, hemia hop blong laef bakegen. (1 Kor. 15:12) Pol i talem se olgeta we oli no moa gat hop blong laef bakegen, oli laef blong mekem ol samting we olgeta nomo oli wantem naoia. (1 Kor. 15:32) Tede, plante we oli no gat hop long ol promes blong God, oli mekem evri samting we oli wantem blong harem gud long laef naoia. Be yumi trastem ol promes blong God long saed blong fiuja. Hop blong yumi i olsem wan hat blong faet we i protektem tingting, mo i blokem yumi blong no tingbaot yumi nomo, olsem nao yumi no spolem fasin fren we yumi gat wetem Jehova.—1 Kor. 15:33, 34.

10. ?Olsem wanem hop i protektem yumi long ol giaman tingting?

¹⁰ Hop i save protektem yumi tu, blong yumi no ting se yumi nating nomo, nao yumi no traehad blong mekem Jehova i glad. Maet samfala oli talem se: ‘Mi no save laef olwe, mi no gud inaf. Bambae mi neva inaf blong mekem samting we God i wantem.’ Traem tingbaot Elifas, giaman fren blong Job, we i talem sem samting long Job, i se: “?From wanem man we i blong ded nomo i mas kam klin?” Mo hem i tokbaot God se: “!Yu luk! Hem i no trastem ol tabu man blong hem, mo heven tu i no klin long ae blong hem.” (Job 15:14, 15) !Hemia wan giaman toktok! Setan nao i wantem se yumi tingting olsem. Hem i save se sipos yumi gohed blong tingting olsem, bambae yumi lusum hop. Taswe yumi mas sakemaot ol giaman tingting ya, mo putum tingting blong yumi i stap strong long ol promes blong Jehova. Hem i wantem se yu laef olwe mo hem i wantem givhan long yu blong kasem laef ya. !Yu no mas gat tu tingting!—1 Tim. 2:3, 4.

11. ?From wanem yumi mas rere blong wet blong luk hop blong yumi i kamtru?

¹¹ I no isi blong mekem hop blong yumi i stap strong. Maet yumi harem se yumi wet longtaem finis blong luk ol promes blong God oli kamtru. Be Jehova i laef olwe, taswe wan longfala taem long tingting blong yumi, i sot nomo long tingting blong hem. (2 Pita 3:8, 9) Bambae hem i mekem ol promes blong hem oli kamtru long nambawan fasin, be maet hem i no mekem long taem we yumi ekspektem. ?Olsem wanem yumi save mekem hop blong yumi i stap strong, taem yumi wet blong luk ol promes blong God oli kamtru?—Jem. 5:7, 8.

12. Folem Hibru 11:1, 6, ?olsem wanem hop i joen wetem bilif?

¹² Sipos yumi stap klosap long Jehova, hop blong yumi bambae i stap strong, from hem nao bambae i mekem hop ya i kamtru. Baebol i talem se blong gat hop, yumi mas bilif strong se Jehova i stap mo “hem bambae i givim pei long ol man we oli stap traehad blong faenem hem.” (Ridim Hibru 11:1, 6.) Moa we yumi bilif se Jehova i stap, moa we tingting blong yumi i strong se bambae hem i mekem ol promes blong hem oli kamtru. Naoia bambae yumi tokbaot sam samting we oli save mekem yumi fren moa wetem Jehova, mo mekem hop i stap strong.

13. ?Olsem wanem yumi save kam klosap long God?

¹³ Prea long Jehova, mo ridim Baebol. Nating se yumi no save luk Jehova, be yumi save kam klosap long hem. Taem yumi toktok long hem long prea, yumi save gat strong tingting se hem i lesin long yumi. (Jer. 29:11, 12) Taem yumi ridim Baebol mo tingting dip long hem, yumi stap lesin long God. Taem yumi ridim ol stori we oli soemaot olsem wanem Jehova i lukaot gud long ol man blong hem bifo, hop blong yumi i kam strong moa. Evri samting long Tok blong God “oli blong tijim yumi. Nao yumi save gat hop from we Ol Tok Blong Baebol oli mekem yumi harem gud mo oli mekem se yumi save stanap strong longtaem.”—Rom 15:4.

14. ?From wanem i gud blong tingbaot ol samting we Jehova i mekem long ol narafala?

¹⁴ Tingting dip blong luksave olsem wanem Jehova i holem ol promes blong hem. Tingbaot samting we God i mekem long Ebraham mo Sera. Tufala i olfala tumas blong gat pikinini. Be God i promes se bambae tufala i gat wan pikinini. (Jen. 18:10) ?Wanem tingting blong Ebraham? Baebol i talem se: ‘Hem i bilif se hem i save kam papa blong plante nesen.’ (Rom 4:18) Ebraham i no save olsem wanem God bambae i mekem promes blong hem i kamtru, be hem i gat strong bilif se promes ya bambae i kamtru. Mo hemia nao samting we i hapen. (Rom 4:19-21) Ol stori ya oli tijim yumi se yumi save trastem Jehova blong i mekem ol promes blong hem oli kamtru, nating we i luk olsem se i no posibol.

15. ?From wanem i gud yumi tingbaot ol samting we God i mekem finis long yumi?

¹⁵ Tingbaot samting we Jehova i mekem finis long yu. I gud yu tingbaot olsem wanem sam promes blong Baebol oli kamtru finis long yu. Wan long olgeta, hemia promes we Jisas i mekem se Papa blong hem bambae i givim evri samting we yu nidim blong laef. (Mat. 6:32, 33) Mo tu, Jisas i promes se sipos yu askem tabu spirit long Jehova, bambae hem i givim. (Luk 11:13) Jehova i mekem ol promes ya oli kamtru finis. Ating yu save tingbaot sam narafala promes tu we hem i mekem i kamtru long yu. Olsem, hem i promes blong fogivim yu, kamfotem yu, mo givim ol samting we yu nidim blong stap klosap long hem. (Mat. 6:14; 24:45; 2 Kor. 1:3) Taem yu tingting dip long ol samting we God i mekem long yu finis, hop blong yu i kam strong moa long samting we bambae hem i mekem long yu long fiuja.

16. ?From wanem hop i wan sas presen?

¹⁶ Hop blong laef olwe hem i wan sas presen we God i givim. Yumi wantem tumas blong luk nambawan fiuja ya, we yumi sua se bambae i kamtru. Hop i olsem angka blong yumi, i mekem yumi stanap strong taem yumi fesem ol bigfala trabol, taem oli ronem mo kilim yumi, mo taem yumi fesem ded. Mo tu, hop i olsem wan hat blong faet, i protektem tingting blong yumi, nao yumi sakemaot ol samting we i rong, mo yumi gohed blong mekem samting we i stret. Hop ya we Baebol i givim, i halpem yumi blong save gud God, mo i soemaot se hem i lavem yumi tumas. Hop ya i givhan bigwan long yumi sipos yumi mekem se i stap strong, mo i klia gud long tingting blong yumi.

17. ?From wanem hop i mekem yumi glad?

¹⁷ Long leta we aposol Pol i raetem long ol Kristin long Rom, hem i talem se: “Yufala i mas glad from we yufala i gat hop.” (Rom 12:12) Pol i glad from we hem i sua se sipos hem i stap holemstrong long God, bambae hem i kasem laef olwe long heven. Yumi tu, yumi save glad long hop blong yumi, from we yumi sua se Jehova bambae i mekem ol promes blong hem oli kamtru. Wan man blong raetem Ol Sam i talem se: “Man we . . . i glad, hem i putum hop blong hem long Jehova we i God blong hem, . . . Man ya we i stap holem promes blong hem oltaem.”—Sam 146:5, 6.