?Yu Yu “Rere Blong Obei”?

 1. ?From wanem i had long yumi blong obei?

?SAMTAEM yu yu faenem i had blong obei? King Deved tu i harem olsem, taswe hem i prea long God se: “Yu pulum mi blong mi glad nomo blong obei long yu.” (Sam 51:12) Deved i lavem Jehova. Be samtaem hem i faenem i had blong obei, mo yumi tu yumi olsem. ?From wanem? Faswan risen se, yumi bon wetem fasin ya blong no obei. Seken, Setan i traem blong mekem yumi rebel agensem Jehova, olsem hem. (2 Kor. 11:3) Namba tri, yumi laef long wan wol we i fulap long fasin rebel mo hemia nao “spirit ya we i stap wok naoia long ol man we oli no stap obei.” (Efes. 2:2) Taswe yumi mas wok had blong faet agensem sin, devel Setan, mo rabis wol ya, blong yumi save obei long Jehova mo long olgeta we hem i putumap blong lidim yumi.

 2. ?I minim wanem se yumi “rere blong obei”? (Jemes 3:17)

² Ridim Jemes 3:17. Aposol Jemes i talem se ol man we oli waes oli “rere blong obei.” Hemia i min se yumi mas wantem mo rere blong obei long olgeta we Jehova i trastem olgeta blong oli lidim yumi. I tru, Jehova i no ekspektem yumi blong obei long ol man we oli askem yumi blong no obei long ol komanmen blong hem.—Wok 4:​18-20.

 3. ?From wanem Jehova i wantem se yumi obei long ol haeman?

³ Maet yumi harem se i isi blong obei long Jehova i bitim we yumi obei long man, from we oltaem ol daereksen we Jehova i givim oli stret gud. (Sam 19:7) Be ol man we oli lidim yumi oli no stret gud. Nating se i olsem, papa blong yumi long heven i givim wok ya long ol perens, ol haeman blong gavman, mo ol elda blong lidim yumi. (Prov. 6:20; 1 Tes. 5:12; 1 Pita 2:​13, 14) Taem yumi obei long olgeta, yumi stap obei long Jehova. Taswe naoia bambae yumi tokbaot olsem wanem yumi save obei long ol man we Jehova i putumap blong lidim yumi, nating se samtaem yumi no agri long ol daereksen we oli talem mo folem olgeta.

 4. ?From wanem plante pikinini oli no obei long perens blong olgeta?

⁴ Ol yangfala oli laef long medel blong ol narafala yangfala we oli “no obei long papa mo mama blong olgeta.” (2 Tim. 3:​1, 2) ?From wanem plante long olgeta oli no obei? Samfala oli harem se perens blong olgeta i gat tu fes. Oli talem long olgeta blong mekem sam samting, be olgeta wan oli no stap mekem. Samfala oli gat tingting ya se ol advaes blong perens blong olgeta i olfala, i no save givhan, mo se oli strik tumas. ?Sipos yu yu wan yangfala, yu tu yu harem olsem? Plante oli faenem i had blong folem komanmen ya blong Jehova se: “Yufala i mas obei long papa mo mama blong yufala, olsem Masta blong yumi i wantem, from we fasin ya i stret.” (Efes. 6:1) ?Wanem i save halpem yumi blong mekem olsem?

 5. ?From wanem Jisas i beswan eksampol long fasin ya blong obei long perens? (Luk 2:​46-52)

⁵ Yu save lanem fasin blong obei tru long wan nambawan eksampol, hemia Jisas. (1 Pita 2:​21-24) Hem i stret gud olgeta mo i laef wetem wan perens we i no stret gud. Be Jisas i ona long perens blong hem nating se samtaem tufala i mestem o oli no kasemsave long hem. (Eks. 20:12) Tingbaot samting we i hapen taem Jisas i gat twelef yia. (Ridim Luk 2:​46-52.) Perens blong hem i no luksave se oli mestem hem i stap long Jerusalem. Hemia i responsabiliti blong Josef mo Meri blong meksua se evri pikinini oli kambak wetem tufala afta long lafet. Taem Josef mo Meri i faenem Jisas, Meri i blemem hem. Jisas i save talem stret long hem se samting we hem i mekem i no stret. Be hem i no mekem olsem, hem i toktok kaen mo i respektem tufala. Nating se Josef mo Meri i “no kasem save mining blong tok ya we hem i talem long tufala,” be Jisas i “gohed blong putum hem i stap aninit long tufala.”

6-7. ?Wanem i save halpem ol yangfala blong oli obei long ol perens blong olgeta?

⁶ Ol yangfala, ?yufala i harem se i had blong obei long perens blong yufala taem oli mekem mastik, o taem oli no kasemsave long yufala? ?Long taem olsem yufala i save mekem wanem? Faswan samting, tingbaot filing blong Jehova. Baebol i talem se taem yufala i obei long ol perens blong yufala, “Masta i glad.” (Kol. 3:20) Jehova i save se samtaem ol perens blong yufala oli no kasemsave long yufala o samtaem oli putumap sam rul we i no isi blong folem. Nating se i olsem, taem yufala i jusum blong obei, yufala i mekem Jehova i glad.

⁷ Seken samting, tingbaot filing blong perens blong yu. Taem yu obei long perens blong yu, yu mekem tufala i glad mo oli trastem yu. (Prov. 23:​22-25) Mo tu, bambae yu kam klosap moa long tufala. Wan brata blong Beljiom, nem blong hem Alexandre, i talem se: “Taem mi stat blong obei oltaem long perens blong mi, frensip blong mifala i jenis, i kamgud moa mo mifala i glad moa.”b Nambatri samting, tingbaot olsem wanem fasin blong obei naoia bambae i halpem yu long fiuja. Paulo, we i laef long Brasil, i talem se: “Taem mi stat blong obei long ol perens blong mi, hemia i halpem mi blong obei long Jehova mo long olgeta we oli stap lidim yumi.” Baebol i tokbaot wan impoten risen blong obei long perens blong yu, i se: “Bambae yufala i gat gudfala laef, mo bambae laef blong yufala long graon ya, i longfala.”—Efes. 6:​2, 3.

 8. ?From wanem plante yangfala oli jusum blong obei long ol perens blong olgeta?

⁸ Plante yangfala oli luksave se taem oli obei, gudfala samting i kamaot from. Luiza, we hem tu i blong Brasil, i talem se plante yangfala we oli gat sem yia olsem hem oli gat wan fon. Taswe hem i no kasemsave from wanem perens blong hem i no letem hem blong i gat wan fon blong sam taem. Be biaen, hem i luksave se perens blong hem i stap protektem hem. Naoia hem i luksave se taem hem i obei long perens blong hem, hem i no mas harem se tufala i strik tumas. From we ol advaes blong tufala hemia nao stret samting we hem i nidim. Elizabeth, wan yangfala sista blong Yunaeted Stet i faenem i had yet samtaem blong obei long perens blong hem. Hem i se: “Taem mi no kasemsave fulwan from wanem perens blong mi i putumap wan rul, mi traem tingtingbak long ol taem ya we ol rul we tufala i bin putum oli protektem mi.” Monica, we i laef long Amenia, i talem se oltaem i gat gudfala samting i kamaot taem hem i obei long perens blong hem, i bitim we hem i no obei.

 9. ?Wanem tingting blong plante man long fasin ya blong obei long loa?

⁹ Plante man oli luksave se yumi nidim ol gavman mo yumi mas obei long sam loa we “ol haeman” oli putumap. (Rom 13:1) Be sam long ol man ya oli ting se i no nid blong obei long ol loa we oli no laekem o we oli ting se i no stret. Eksampol, hemia blong pem ol takis. Long wan kantri long Yurop, plante man oli ting se “i oraet nomo blong oli no pem takis sipos oli ting se i no stret.” Hemia nao from wanem long kantri ya plante sitisen oli no stap pem evri takis we gavman i askem olgeta blong pem.

10. ?Nating se yumi no laekem sam loa, be from wanem yumi obei?

¹⁰ Baebol i talem se ol man blong gavman nao oli stap mekem ol man oli safa mo se Setan i stap kontrolem olgeta, mo i no longtaem bambae oli lus. (Sam 110:​5, 6; Pri. 8:9; Luk 4:​5, 6) Mo tu, Baebol i talem se “eni man we i agensem ol haeman ya, hem i agensem plan we God i putum.” Naoia we i stap, Jehova i letem ol gavman oli rul blong mekem se oli save kontrolem evri samting, mo hem i ekspektem yumi blong obei long olgeta. Taswe “ol samting we i stret blong olgeta oli kasem, [yumi] mas givim long olgeta,” hemia i minim se yumi mas pem ol takis, respektem olgeta, mo obei long olgeta. (Rom 13:​1-7) Maet yumi harem se wan loa i strong tumas, i no stret o maet yumi harem se sipos yumi obei long loa ya bambae yumi spenem plante mane. Be yumi obei long ol haeman ya from we Jehova nao i talem long yumi blong mekem olsem, sipos samting we oli askem yumi blong mekem i no brekem ol loa blong hem.—Wok 5:29.

11-12. Folem Luk 2:​1-6, ?Meri mo Josef i mekem wanem blong obei long loa, mo wanem i kamaot from? (Mo tu, yu luk pija.)

¹¹ Yumi save folem eksampol blong Josef mo Meri we oli rere blong obei long ol haeman, nating se i no isi. (Ridim Luk 2:​1-6.) Taem Meri i gat samwe naen manis, hem mo Josef i fesem wan samting we i had tumas. Ogastas i putumap wan loa se olgeta man we oli laef long ol ples we Rom i rulum, oli mas gobak long ples we oli bon long hem blong rejista. Taswe Josef mo Meri i mas travel i go long Betlehem, mo oli wokbaot krosem plante bigfala hil we i samwe 150 kilometa. Trip ya i had, speseli long Meri. Maet tufala i wari long helt blong Meri mo bebi ya. Maet tufala i stap tingbaot se wanem bambae i hapen sipos pikinini ya i bon taem oli stap wokbaot long rod. Tufala i wari olsem from we bebi ya nao hem i Mesaea ya we Jehova i promes blong sanem. ?Olsem wanem? ?Ol samting ya bambae oli pulum tufala blong no wantem obei long loa we Ogastas i putumap?

¹² Josef mo Meri i no letem ol wari ya i blokem tufala blong no obei long loa. Jehova i glad we tufala i obei mo i lukaotgud long tufala. Meri i sef taem oli kasem Betlehem mo i bonem bebi ya we i helti gud. !Antap long hemia, hem i givhan blong mekem profet tok blong Baebol i kamtru!—Maeka 5:2.

13. ?Fasin blong yumi blong obei i save mekem wanem long ol brata mo sista?

¹³ Taem yumi obei long ol haeman, ?olsem wanem hemia i mekem i gud long yumi wan mo ol narafala? Wan samting se yumi blokem panis we yumi save kasem sipos yumi no obei long ol loa. (Rom 13:4) Mo tu, taem yumi obei long haeman, oli save gat gudfala tingting long saed blong ol Witnes blong Jehova. Eksampol, plante yia bifo long Naejeria ol soldia oli kam insaed long wan Haos Kingdom long taem blong miting blong lukaotem ol man we oli no wantem pem takis. Be lida blong ol soldia ya i talem long olgeta blong oli aot i se: “Ol Witnes blong Jehova oltaem oli pem ol takis.” Evri taem we yu obei long loa, yu stap givhan blong holemtaet gudnem we Ol Witnes blong Jehova oli gat. Mo wan dei gudnem ya i save protektem ol brata mo sista blong yu.—Mat. 5:16.

14. ?Wanem i halpem wan sista blong i “rere blong obei” long ol haeman?

¹⁴ Maet i no oltaem we yumi wantem obei long ol haeman. Joanna wan sista long Yunaeted Stet i talem se: “I had blong mi obei long ol haeman from we oli bin mekem i no stret long sam famle blong mi.” Be Joanna i jusum blong jenisim tingting we hem i gat long saed blong ol haeman. Traem luk samting we hem i mekem. Fastaem, hem i stop blong ridim toktok we ol man oli postem long sosol media we i save pulum hem blong gat nogud tingting long ol haeman. (Prov. 20:3) Nambatu, hem i prea blong Jehova i halpem hem, mo blong i trastem Jehova moa i bitim gavman blong man we i jenis oltaem. (Sam 9:​9, 10) Nambatri, hem i ridim ol buk blong yumi we oli tokbaot fasin ya blong stap nutrol. (Jon 17:16) Naoia Joanna i se from we hem i respektem mo i obei long ol haeman, hem i harem se “tingting blong hem i kwaet mo hem i glad.”

15. ?Wanem i save mekem se i had blong yumi obei long ol daereksen we i kam long oganaesesen?

¹⁵ Jehova i wantem se yumi “mas obei long olgeta we oli stap lidim” kongregesen. (Hib. 13:17) Nating se Jisas, we i lida blong yumi, i stret gud olgeta, be hem i yusum sam sinman blong lidim yumi long wol ya. Maet i had blong yumi obei long olgeta, speseli sipos oli askem yumi blong mekem wan samting we yumi no wantem mekem. I gat wan taem we i had tu long Aposol Pita blong i obei. Taem wan enjel i talem long hem blong kakae ol animol we oli no klin folem loa blong Moses, !Pita i no wantem obei, i no wan taem nomo, be tri taem! (Wok 10:​9-16) ?From wanem? From we Pita i harem se daereksen ya i narakaen, mo samting ya i defren long wanem we hem i stap mekem oltaem. !Sipos i had long Pita blong obei long daereksen blong wan enjel we i stret gud, yumi no sapraes se samtaem i had long yumi tu blong obei long daereksen blong ol man we oli no stret gud olgeta!

16. Nating we Pol i harem se daereksen we hem i kasem i no stret, ?be hem i mekem wanem? (Wok 21:​23, 24, 26)

¹⁶ Aposol Pol i “rere blong obei” nating we hem i harem se daereksen we hem i kasem i no stret. Ol Kristin we oli man Jiu oli harem nius i stap goraon se Pol i stap pulum ol man “blong oli lego Loa blong Moses” mo blong oli no respektem loa ya. (Wok 21:21) Ale ol Elda long Jerusalem oli talem long Pol blong i tekem fo man i go long tempol mo oli mekem olgeta i kam klin blong soemaot se oli stap obei long loa. Be Pol i save se ol Kristin oli no moa stap aninit long Loa. Mo hem i save tu se hem i no mekem wan samting we i rong. Be yet, Pol i no fraet. “Long nekis dei, Pol i tekem ol man ya nao olgeta evriwan oli mekem ol samting blong oli klin folem Loa.” (Ridim Ol Wok 21:​23, 24, 26.) Yes from we Pol i obei long daereksen we hem i kasem, hemia i givhan blong mekem se ol brata oli joengud.—Rom 14:​19, 21.

17. ?Yumi lanem wanem long ekspiriens blong Stephanie?

¹⁷ Wan sista we nem blong Stephanie, i faenem i had blong obei long wan desisen we ol brata long kantri blong hem oli mekem. Hem mo hasban blong hem i glad blong prij long wan smol grup we i toktok wan narafala lanwis. Biaen branj ofis i talem se smol grup ya bambae i no moa gohed, mo oli sanem kapol ya i gobak long wan kongregesen we i toktok lanwis blong tufala. Stephanie i talem se: “Mi mi no glad nating. Long tingting blong mi, mi ting se i no gat bigfala nid long lanwis we mitufala i toktok long hem.” Nating se i olsem, hem i gohed blong sapotem niufala daereksen ya, hem i se: “Samtaem biaen, mi luksave se hemia i wan gudfala desisen. Mitufala i kam papa mo mama blong plante long kongregesen we famle blong olgeta i no stap long trutok. Mo naoia mi stap stadi wetem wan sista we i stap gohed gud bakegen long trutok. Mo tu, mi gat moa taem blong mekem pesnel stadi blong mi. Tingting blong mi i kam klia, from mi save se mi mekem bes blong mi blong obei.”

18. ?Wanem frut i kamaot taem yumi obei?

¹⁸ Yumi save lanem blong obei. Jisas i “lanem fasin blong obei, taem ol samting oli mekem hem i safa.” (Hib. 5:8) Olsem Jisas, plante taem yumi lanem blong obei taem yumi fesem ol hadtaem. Eksampol, taem COVID-19 pandemik i stat, oli askem blong yumi no moa joen long ol miting long Haos Kingdom mo prij long ol haos wanwan. ?Long taem ya, yu bin faenem i had blong obei? Nating se i olsem, fasin blong yu blong obei i protektem yu, i halpem kongregesen blong i joengud, mo i mekem Jehova i glad. Naoia yumi evriwan i rere blong obei long eni instraksen we bambae yumi kasem long taem blong bigfala trabol. !Sipos yumi obei, hemia bambae i sevem laef blong yumi!—Job 36:11.

19. ?From wanem yu wantem obei?

¹⁹ Yumi lanem se taem yumi obei yumi kasem plante blesing. Mo yumi jusum blong obei long Jehova from we yumi lavem hem mo yumi wantem mekem hem i glad. (1 Jon 5:3) Yumi no save pembak Jehova from olgeta samting we hem i mekem blong yumi. (Sam 116:12) Be yumi save obei long hem mo long olgeta we oli stap lidim yumi. Sipos yumi obei, yumi soemaot se yumi waes. Mo taem yumi soemaot se yumi waes, bambae yumi mekem hat blong Jehova i glad.—Prov. 27:11.