Spirit Blong God i Kam Joen Long Tingting Blong Yumi

1-3. ?Wanem ol samting we i mekem se lafet blong pentekos i wan spesel dei? ?Mo olsem wanem ol samting ya oli mekem ol profet tok blong Baebol i kamtru? (Yu luk pija long stat blong stadi.)

HEMIA wan Sande moning long Jerusalem. Dei ya i spesel mo i dei blong harem gud. Ol man oli stap mekem lafet blong Pentekos, we hem i wan spesel lafet we oli mekem long taem blong tekemaot ol wit long garen. Long moning ya, hae pris i mekem sakrefaes olsem we i stap mekem oltaem. Biaen, samwe long 9 klok hem i mekem sakrefaes long tufala bred we i gat is long hem we oli mekem long faswan wit we oli tekemaot long garen. Hae pris i leftemap tufala bred ya i go antap blong givim long Jehova. Samting ya i hapen long pentekos long yia 33.—Levitikas 23:15-20.

² Long ol handred yia we i pas finis, hae pris i stap mekem sakrefaes ya blong tufala bred we i gat is long hem. Mo i gohed blong mekem olsem evri yia. Sakrefaes ya i klosap sem mak long wan impoten samting we i hapen long lafet blong pentekos long yia 33. Impoten samting ya i kamaot long 120 disaepol blong Jisas long Jerusalem, we oli stap prea long wan rum antap. (Ol Wok 1:13-15) Profet Joel i tokbaot samting ya 800 yia bifo. (Joel 2:28-32; Ol Wok 2:16-21) ?Wanem ya impoten samting we i hapen?

³ Ridim Ol Wok 2:2-4. Long dei blong Pentekos long yia 33, God i sanem tabu spirit i kam long ol Kristin ya mo hem i makemaot olgeta. (Ol Wok 1:8) Biaen, wan bigfala hip blong ol man oli kam raon long olgeta, nao ol disaepol ya oli stat blong tokbaot ol gudfala samting we oli jes luk mo oli harem. Aposol Pita i tokbaot samting we i jes hapen, mo from wanem samting ya i impoten tumas. Hem i talem long ol man ya se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala. Nao bambae God i givim Tabu Spirit ya long yufala.” Mo long dei ya i gat 3,000 man we oli baptaes, mo olgeta tu oli kasem tabu spirit.—Ol Wok 2:37, 38, 41.

 4. (1) ?From wanem yumi mas intres long samting we i hapen long lafet blong pentekos? (2) ?Wanem sam narafala impoten samting we maet i hapen long dei blong pentekos, plante yia bifo? (Yu luk ol not, pej 19.)

⁴ ?Hae pris mo sakrefaes we hem i mekem oltaem, long lafet blong pentekos i pija blong wanem? Hae pris hem i pija blong Jisas. Ol bred we hem i yusum, hem i pija blong ol disaepol blong Jisas we tabu spirit i makemaot olgeta. Ol disaepol ya oli sin man nomo taem Jehova i jusumaot olgeta, mo hem i singaot olgeta se, ol “fas kakae.” (Jemes 1:18) God i agri se oli kam ol pikinini blong hem, mo bambae oli rul olsem king wetem Jisas long Kingdom blong God long heven. (1 Pita 2:9) Jehova bambae i yusum Kingdom blong hem blong blesem ol man we oli obei long hem. Nating se bambae yumi laef long heven no long paradaes long wol ya, lafet blong pentekos long yia 33 i impoten tumas long yumi evriwan.^[1] —Yu luk ol not, pej 19.

 5. ?Yumi save olsem wanem se tabu spirit i no makemaot evri man long sem fasin?

⁵ Ol disaepol we oli stap long rum antap, bambae oli no save fogetem dei ya. Wanwan long olgeta i gat wan samting olsem faea antap long hed blong hem. Jehova i mekem we oli save toktok long ol narafala lanwis. Olgeta oli save gud se tabu spirit i makemaot olgeta. (Ol Wok 2:6-12) Be wan samting olsem faea i no kamaot antap long hed blong ol narafala Kristin, taem tabu spirit i makemaot olgeta. Eksampol, Baebol i no talem se wan samting olsem faea i kamaot antap long hed blong ol 3,000 Kristin we tabu spirit i makemaot olgeta long dei ya. Tabu spirit i makemaot ol Kristin ya nomo taem oli baptaes. (Ol Wok 2:38) Be i no evri Kristin we tabu spirit i makemaot olgeta stret long taem we oli baptaes. Taem ol man Sameria oli baptaes, tabu spirit i makemaot olgeta sam dei biaen. (Ol Wok 8:14-17) Mo tu, tabu spirit i makemaot Konilias mo ol man we oli stap long haos blong hem, bifo we oli baptaes. Hemia i no wan samting we i hapen oltaem.—Ol Wok 10:44-48.

 6. ?Evri tabu Kristin oli kasem wanem? ?Mo samting ya i mekem se oli save gud long wanem?

⁶ I klia nomo se, ol Kristin oli harem save se tabu spirit i makemaot olgeta long defdefren fasin. Samfala oli harem save samting ya long sem taem we Jehova i makemaot olgeta. Sam narafala oli harem save samting ya samtaem biaen. Be aposol Pol i tokbaot samting we i kamaot long wanwan long olgeta taem tabu spirit i makemaot olgeta. Hem i se: “Nao God i putum mak blong hem long yufala, se yufala i man blong hem, from we hem i givim Tabu Spirit long yufala, olsem we hem i promes finis. From we Tabu Spirit ya i stap long laef blong yumi, yumi save savegud we bambae yumi save kasem ol samting ya we God i makemaot finis, se oli blong yumi.” (Efesas 1:13, 14) Samting ya i soemaot se Jehova i yusum tabu spirit blong hem blong mekem ol Kristin ya oli save gud se hem i jusumaot olgeta blong oli go long heven. Long rod ya, tabu spirit i mekem we oli save “kasem ol samting ya,” hemia se long fiuja bambae oli laef olwe long heven, be i no long wol ya.—Ridim 2 Korin 1:21, 22; 5:5.

 7. ?Wan Kristin we tabu spirit i makemaot, i mas mekem wanem blong go long heven?

⁷ Taem tabu spirit i makemaot wan Kristin, hem i harem save se bambae hem i go long heven. ?Be hemia i min se Kristin ya i mas i go long heven? Nogat. Bambae hem i go long heven nomo, sipos hem i holem strong long Jehova. Pita i tokbaot samting ya, i se: “Ol brata mo sista. God i jusumaot yufala, mo i singaot yufala blong yufala i man blong hem. Mo from ol samting ya, yufala i mas traehad [gohed, NW] moa blong soemaot samting ya oltaem long laef blong yufala. Sipos yufala i mekem olsem, bambae yufala i no save foldaon samtaem. Nao long fasin ya, bambae God i givim raet long yufala blong yufala i go insaed long niufala wol [Kingdom, NW] ya we bambae i no save lus samtaem, we Jisas Kraes, Masta mo Sevia blong yumi, hem i king long hem.” (2 Pita 1:10, 11) Taswe, wan Kristin we tabu spirit i makemaot, i no mas letem wan samting i blokem hem blong mekem wok blong Jehova. Sipos hem i no holem strong long Jehova, bambae hem i no go long heven, nating se tabu spirit i makemaot hem.—Hibrus 3:1; Revelesen 2:10.

8, 9. (1) ?From wanem i had blong plante man oli kasem save samting we i hapen, taem tabu spirit i makemaot wan man? (2) ?Wan man no wan woman i save olsem wanem se bambae hem i go long heven?

⁸ Plante man blong God tede, oli harem se i had blong kasem save samting we i hapen long wan man taem tabu spirit i makemaot hem. I stret nomo blong oli harem olsem, from we tabu spirit i no makemaot olgeta. Jehova i wokem ol man blong oli laef long wol, be i no long heven. (Jenesis 1:28; Ol Sam 37:29) Be biaen, Jehova i jusumaot sam man long wol ya, blong oli mekem wok olsem king mo pris long heven. From samting ya, taem Jehova i makemaot olgeta, blesing we bambae oli kasem long wol ya, mo fasin blong olgeta blong tingting i jenis. Taswe, taem we Jehova i makemaot olgeta, oli save se bambae oli go long heven.—Ridim Efesas 1:18.

⁹ ?Be wanem i mekem se wan man no wan woman i harem save se bambae hem i go long heven? Yu traem luk samting we Pol i talem long ol tabu Kristin long Rom we ol man oli singaot olgeta se ol tabu man. Hem i talem long olgeta se: “Tabu Spirit ya we God i givim finis long yufala, hem i no blong mekem yufala i olsem ol slef nomo blong God, we yufala i fraet long hem, nogat. Spirit ya i blong mekem yufala i pikinini blong God. Mo long paoa blong Spirit ya, taem yumi prea, yumi stap talem long God se, “Papa blong mifala.” Spirit ya blong God i kam joen long tingting blong yumi, blong talemaot we yumi pikinini blong God.” (Rom 1:7, NW; 8:15, 16) Jehova i yusum tabu spirit blong hem, blong mekem wan man no wan woman i save gud se bambae hem i go rul wetem Jisas.—1 Tesalonaeka 2:12.

10. ?Fas Jon 2:27 i minim wanem taem i talem se wan tabu Kristin i no nidim wan man blong tijim hem?

¹⁰ Olgeta we Jehova i singaot olgeta blong go long heven, oli no nidim wan man i talem long olgeta se tabu spirit i makemaot olgeta. Jehova i mekem se olgeta wan oli harem save se tabu spirit i makemaot olgeta. Aposol Jon i talem long ol tabu Kristin se: “Yufala i kasem Tabu Spirit finis long Kraes we hem i Tabu Man blong God, nao yufala evriwan i gat save.” Hem i talem tu long olgeta se: “Kraes i givim Tabu Spirit long yufala finis, mo Spirit ya i stap long yufala yet. Naoia yufala i no nidim wan man blong i tijim yufala, from we Tabu Spirit ya we yufala i kasem, hem i stap tijim yufala long evri samting. Mo ol samting ya we hem i stap tijim yufala long hem, oli tru nomo, oli no blong giaman. Olsem we spirit ya i tijim yufala finis, laef blong yufala i mas stap joen long laef blong Kraes.” (1 Jon 2:20, 27) Ol tabu Kristin oli nidim we Jehova i tijim olgeta olsem ol narafala man. Be oli no nidim wan man i talem long olgeta se tabu spirit i makemaot olgeta. Jehova i yusum tabu spirit, blong mekem i klia gud long olgeta se Hem i makemaot olgeta.

11, 12. ?Maet wan tabu Kristin i gat wanem tingting? ?Be hem i harem save wanem?

¹¹ Taem tabu spirit i makemaot ol Kristin, oli jenis bigwan. Hemia nao from wanem Jisas i talem se oli “bon bakegen.” (Jon 3:3, 5) Jisas i talem tu se: “I nogud yu sapraes from we mi talem long yu se, ‘Yu yu mas bon bakegen, yu mas kam niufala man.’ Win i stap blu long wanem ples we hem i wantem blong i blu long hem. Yu harem noes blong hem, be yu no save weples win ya i aot long hem, mo weples i stap go long hem. Be olgeta man we oli bon long Tabu Spirit oli olsem samting ya nomo.” (Jon 3:7, 8) I klia nomo se, ol tabu Kristin oli no save eksplenem filing we oli gat taem tabu spirit i makemaot olgeta, long wan man we tabu spirit i no makemaot hem.^[2]—Yu luk ol not, pej 19.

¹² Maet wan tabu Kristin i stap tingting se, ‘?From wanem Jehova i no jusum narafala man, be i jusum mi?’ Mo tu, maet hem i stap tingting se, ?bambae mi mi naf blong mekem gud ol wok blong mi? Nating se i olsem, hem i harem save se Jehova i makemaot hem. Mo tu, hem i glad bigwan mo i talem bigfala tangkiu long Jehova from presen ya we Jehova i givim long hem. Ol tabu Kristin ol harem olsem Pita, taem hem i talem se: “I gud yumi talem tangkiu long God we hem i God mo Papa blong Jisas Kraes, Masta blong yumi. God ya, hem i sore tumas long yumi, nao from samting ya, hem i mekem we yumi bon bakegen, yumi gat niufala laef. Samting ya hem i mekem, taem hem i mekem Jisas Kraes i laef bakegen long ded. Nao from we yumi kam ol niufala man, tingting blong yumi i stap strong long Jisas Kraes, mo i stap kam strong moa oltaem long hem. Mo yumi save se bambae yumi kasem ol gudgudfala samting ya we God i putumgud olgeta oli stap long heven, se oli blong ol man blong hem. Long ples ya ol samting ya oli no save kam nogud, mo oli no save kam roten, mo oli no save lus, from we God i stap lukaot gud long olgeta.” (1 Pita 1:3, 4) Taem ol tabu Kristin oli ridim ol tok ya, oli save gud se Papa blong olgeta nao, i stap toktok long olgeta wanwan.

13. ?Olsem wanem tingting blong wan man we tabu spirit i makemaot hem i jenis? ?Mo wanem i mekem se tingting blong hem i jenis?

¹³ Taem Jehova i no makemaot ol tabu Kristin yet blong oli go long heven, oli gat blesing ya blong laef olwe long wol ya. Ol Kristin ya oli putum tingting blong olgeta long taem ya we Jehova bambae i mekem wol ya i kam paradaes, taem Hem i tekemaot ol rabis man. Maet oli stap tingbaot se, bambae oli welkamem wan famle no fren blong olgeta, we i laef bakegen. Mo tu, oli stap tingbaot se bambae oli bildim haos blong olgeta, oli planem ol tri mo oli stap kakae ol frut blong hem. (Aesea 65:21-23) ?Be from wanem oli stat blong gat defren tingting? ?Oli jenisim tingting blong olgeta from we oli stap harem nogud mo oli kasem plante trabol long wol ya? ?Oli harem se laef olwe long wol ya bambae i mekem se oli no glad? ?Oli wantem harem se laef long heven bambae i olsem wanem? Nogat. Jehova nao i jusumaot olgeta blong oli go laef long heven. Taswe, taem Jehova i makemaot olgeta, hem i yusum tabu spirit blong jenisim fasin blong olgeta blong tingting, mo blesing we fastaem oli putum tingting blong olgeta long hem.

14. ?Ol tabu Kristin oli harem olsem wanem long laef we oli gat long wol ya?

¹⁴ ?Hemia i min se ol tabu Kristin oli wantem ded? Pol i talem se bodi blong ol tabu Kristin long wol ya i olsem wan “haos tapolen,” mo hem tokbaot tu filing we oli gat, i se: “Taem yumi stap yet long haos tapolen ya blong yumi long wol ya, yumi stap harem nogud tumas, we yumi stap pulum win blong yumi from. I no from we yumi wantem lusum bodi ya we i blong wol. Be yumi wantem blong bodi ya we i blong heven, bambae i kam kavremap yumi, blong bambae fasin blong laef blong hem i jenisim ol samting ya blong ded, we i blong bodi ya blong wol.” (2 Korin 5:4) Ol tabu Kristin oli no wantem ded. Oli harem gud long laef we oli gat long wol ya, mo oli wantem mekem wok blong Jehova evridei wetem ol famle mo fren blong olgeta. Be nating se i olsem, oli tingbaot ol samting we God i promes blong mekem long olgeta long fiuja.—1 Korin 15:53; 2 Pita 1:4; 1 Jon 3:2, 3; Revelesen 20:6.

15. ?Wanem i soemaot se tabu spirit i no makemaot wan man?

¹⁵ Maet yu stap tingbaot sipos Jehova i makemaot yu blong go long heven. Sipos yu harem se hem i makemaot yu, i gud yu tingting gud long ol kwestin ya: ?Yu yu harem se yu wok strong long wok blong prij? ?Yu yu glad blong stadi long Baebol mo lanem ol dip “tingting blong God” we man i no save faenemaot? (1 Korin 2:10) ?Yu yu harem se Jehova i stap blesem ol wok we yu mekem, long wok blong prij? ?Yu harem se yu wantem mekem ol samting we Jehova i wantem i bitim ol narafala samting? ?Yu lavem tumas ol brata mo sista mo yu wantem givhan long olgeta blong oli mekem wok blong Jehova? ?Yu luk ol pruf we i soemaot se Jehova i givhan long yu long plante samting, long laef blong yu? Sipos yu ansa yes long evri kwestin ya, ?hemia i min se Jehova makemaot yu blong go long heven? Nogat, i no minim olsem. ?From wanem? From evri man blong Jehova oli gat sem filing ya, nating se tabu spirit i makemaot olgeta no nogat. Mo tu, Jehova i save givim tabu spirit long evri man blong hem, nating se bambae oli laef long heven no long wol. Sipos yu stap tingbaot se bambae yu go long heven no nogat, hemia i min se Jehova i no makemaot yu blong go long heven. Ol man we Jehova i jusum olgeta, oli no stap tingting plante long samting ya. Oli harem save se bambae oli go long heven.

16. ?Yumi save olsem wanem se i no evriwan we oli kasem tabu spirit, bambae oli go long heven?

¹⁶ Baebol i tokbaot sam man blong Jehova, we oli kasem tabu spirit, be oli no go long heven. Wan long olgeta hemia, Jon baptaes. Jisas i talem se, i no gat wan man we i hae moa, i winim Jon Baptaes. Be biaen, hem i talem se Jon Baptaes bambae i no go rul olsem king long heven. (Matiu 11:10, 11) Jehova i givim tabu spirit long Deved tu. (1 Samuel 16:13) Tabu spirit i givhan long Deved blong i kasem save long ol dip samting we Jehova i stap mekem, mo i lidim hem blong i raetem sam buk blong Baebol. (Mak 12:36) Nating se i olsem, aposol Pita i talem se: “Deved i no go antap long heven.” (Ol Wok 2:34) Jehova i yusum tabu spirit blong hem blong givim paoa long olgeta ya blong oli mekem ol samting blong sapraes, be Hem i no yusum tabu spirit blong makemaot olgeta se bambae oli go long heven. ?Hemia i min se ol man ya oli no holemstrong long Jehova, mo oli no naf blong rul long heven? Nogat. Hemia i minim se, Jehova bambae i mekem olgeta oli laef bakegen long paradaes long wol ya.—Jon 5:28, 29; Ol Wok 24:15.

17, 18. (1) ?Wanem blesing we plante man blong God tede, oli putum tingting blong olgeta long hem? (2) ?Wanem ol kwestin we bambae yumi tokbaot long nekis stadi?

¹⁷ Plante man blong God tede, bambae oli no go long heven. Ol man olsem Ebraham, Deved, Jon Baptaes, mo plante narafala man mo woman bakegen we Baebol i tokbaot, oli putum tingting blong olgeta long laef long wol ya, we gavman blong God bambae i rul long hem. (Hibrus 11:10) I gat 144,000 man we bambae oli rul wetem Jisas long heven. Be Baebol i tokbaot se i gat sam “narafala pikinini” blong God we oli laef yet long wol ya long taem blong lasdei. (Revelesen 12:17) Plante long ol 144,000 man ya oli ded finis mo oli stap long heven.

¹⁸ Be sipos wan man i talem se tabu spirit i makemaot hem, ?ol man we bambae oli laef long wol oli mas mekem olsem wanem long hem? Sipos wan man long kongregesen blong yu i stat blong kakae bred mo dring waen long Memoriol, ?bambae yu mas mekem wanem long hem? ?Mo olsem wanem sipos namba blong olgeta we oli talem se tabu spirit i makemaot olgeta i stap go antap? ?Samting ya bambae i mekem yu yu wari? Bambae yumi ansa long ol kwestin ya, long nekis stadi.