Ransom Wan ‘Nambawan Presen’ We Papa i Givim

 1. ?Wanem sam gudfala samting we ransom i mekem blong yumi?

RANSOM sakrefaes blong Jisas i openem rod long plante blesing. Wan long olgeta, hemia se hem i openem doa long olgeta pikinini blong Adam we oli laekem stret fasin, blong wan dei, oli save joen long famle blong God. Wan narafala blesing, hemia se yumi save harem gud blong laef olwe. Antap moa, ransom i joen wetem sam samting we oli impoten tumas long evriwan we oli stap long heven mo long wol.—Hibrus 1:8, 9, NW.

 2. (1) ?Wanem impoten samting we Jisas i tokbaot long prea blong hem? (Yu luk pija long stat blong stadi.) (2) ?Bambae yumi tokbaot wanem long stadi ya?

² Samwe tu yia bifo we Jisas i ded, hem i tijim ol disaepol blong hem, blong oli prea se: “Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem samting we yu wantem i kamtru long wol ya olsem long heven.” (Matiu 6:9, 10, NW) Bambae yumi luk olsem wanem ransom i mekem nem blong Jehova i tabu, Kingdom blong hem i kam, mo i mekem samting we God i wantem i kamtru.

 3. ?Nem ya Jehova i soemaot wanem? ?Olsem wanem Setan i spolem nem blong Jehova?

³ Fastaem, Jisas i prea blong nem blong Jehova i tabu. Nem ya Jehova i soemaot se hem i hu. Hem nomo i gat olgeta paoa mo fasin blong hem i stret gud. Jisas tu singaot hem se Papa we i “tabu.” (Jon 17:11) From we Jehova i tabu, evri samting we hem i mekem mo olgeta loa blong hem, oli tabu. Be long Iden, Setan i kwestinim raet we God i gat blong putum rul we ol man oli mas folem. Setan i giaman long saed blong Jehova, mo i spolem nem blong hem.—Jenesis 3:1-5.

 4. ?Olsem wanem Jisas i mekem nem blong God i tabu?

⁴ Be Jisas i lavem nem blong Jehova, mo i mekem evri samting we hem i naf blong mekem, blong mekem nem ya i tabu. (Jon 17:25, 26) ?Hem i mekem olsem wanem? Tru long ol samting we hem i mekem mo long ol tijing blong hem, Jisas i givhan long ol narafala blong oli luksave se ol loa we Jehova i givim oli stret, mo evri samting we hem i askem blong yumi mekem, i blong givhan long yumi. (Ridim Ol Sam 40:8-10.) Nating se Setan i mekem we hem i safa gogo i ded, be Jisas i gohed blong holemstrong long God. Hem i pruvum se wan man we i stret gud olgeta i naf blong obei fulwan long Jehova.

 5. ?Olsem wanem yumi save mekem nem blong Jehova i tabu?

⁵ ?Olsem wanem yumi save soemaot se yumi lavem nem blong Jehova? Tru long ol fasin blong yumi. Jehova i wantem se yumi tabu. (Ridim 1 Pita 1:15, 16.) Hemia i min se yumi wosipim hem nomo, mo yumi obei long hem long fulhat blong yumi. Nating se ol narafala oli mekem i nogud long yumi, be yumi traem bes blong yumi blong folem ol tijing blong Jehova. Taem yumi mekem ol loa blong Jehova i wok long laef blong yumi, yumi stap leftemap nem blong hem. (Matiu 5:14-16) Yumi pruvum se ol loa blong hem oli gud mo se Setan i wan man blong giaman. Yumi no stret gud olgeta, taswe bambae yumi mekem ol mastik. Be nating se i olsem, yumi tanem tingting blong yumi, mo yumi no moa mekem eni samting we i save sakem doti long nem blong Jehova.—Ol Sam 79:9.

 6. ?From wanem Jehova i luk yumi olsem ol stret man, nating se yumi sinman?

⁶ Nomata se tabu spirit i makemaot yumi no yumi “ol narafala sipsip,” be Jehova i fogivim ol sin blong yumi taem yumi bilif long ransom. Hem i akseptem olgeta we oli givim laef blong olgeta i go long hem, blong oli kam ol man blong hem. Hem i talemaot se ol tabu Kristin oli stret man mo oli pikinini blong hem. Mo hem i talemaot se “ol narafala sipsip” oli stret man mo oli fren blong hem. (Jon 10:16; Rom 5:1, 2; Jemes 2:21-25) Taswe, tede tu ransom i mekem se yumi save fren gud wetem Papa blong yumi, mo mekem nem blong hem i tabu.

 7. ?Ransom i mekem se yumi save kasem wanem blesing?

⁷ Long Lodsprea, Jisas i talem se: “Yu mekem Kingdom blong yu i kam.” ?Ransom i joen olsem wanem long Kingdom blong God? Jisas mo ol 144,000 man we God i jusumaot olgeta long wol ya, oli mekemap Kingdom blong God. Ransom i mekem se olgeta ya oli save laef bakegen long heven. (Revelesen 5:9, 10; 14:1) Bambae oli king mo oli pris, mo oli rulum wol wetem Jisas blong wan taosen yia. Long taem ya, Jehova bambae i yusum Kingdom blong mekem fulwol i kam paradaes, mo givhan long olgeta man blong oli kam stret gud olgeta. Nao ol man blong Jehova long heven mo long wol, oli save kam wan famle nomo. (Revelesen 5:13; 20:6) Bambae Jisas i spolem Setan mo i tekemaot olgeta problem we hem i mekem.—Jenesis 3:15.

 8. (1) ?Olsem wanem Jisas i givhan long ol disaepol blong oli kasem save se Kingdom i impoten? (2) ?Olsem wanem yumi soemaot se yumi sapotem Kingdom tede?

⁸ Jisas i givhan long ol disaepol, blong oli kasem save se Kingdom blong God i impoten tumas. ?Hem i mekem olsem wanem? Stret afta we Jisas i baptaes, hem i stat blong “talemaot gud nius” blong Kingdom blong God long evri ples we hem i go long hem. (Luk 4:43) Mo hem i talem long ol disaepol se oli go talemaot hem long “olgeta ples long wol.” (Ol Wok 1:6-8) Tede, wok blong talemaot Kingdom i givim janis long plante man blong oli save long ransom, mo blong oli save laef aninit long rul blong Kingdom ya. Yumi soemaot se yumi sapotem Kingdom, taem yumi givhan long ol tabu Kristin blong talemaot gud nius long fulwol.—Matiu 24:14; 25:40.

 9. ?From wanem yumi sua se stamba tingting blong Jehova bambae i kamtru?

⁹ ?Jisas i minim wanem taem hem i talem se: “Yu mekem samting we yu wantem i kamtru”? Taem Jehova i talem se wan samting bambae i hapen, samting ya i mas hapen. (Aesea 55:11) Fasin rebel we Setan i mekem i no stopem Jehova. ?Wanem stamba tingting blong Jehova long saed blong wol? Hem i wantem se wol ya bambae i fulap long ol pikinini blong Adam mo Iv we oli stret gud olgeta. (Jenesis 1:28) Sipos Adam mo Iv i ded we tufala i no gat pikinini, stamba tingting ya blong God bambae i no kamtru. Taswe Jehova i letem tufala i gat ol pikinini. Ransom i givim janis long olgeta man we oli bilif, blong oli kam stret gud olgeta mo laef olwe. Jehova i lavem ol man, mo hem i wantem se yumi kasem nambawan laef ya we hem i rerem blong yumi.

10. ?Olsem wanem ransom i mekem i gud long ol dedman?

¹⁰ ?Olsem wanem long plante bilian man we oli ded be oli no gat janis blong save Jehova? Jehova i wantem se ol man oli laef. Taswe bambae hem i mekem ol dedman oli laef bakegen. Ransom i mekem se oli save laef bakegen. Biaen bambae oli gat janis blong save Jehova mo laef olwe. (Ol Wok 24:15) Jehova i stamba blong laef. Taem Jehova i mekem ol dedman oli laef bakegen, hem i kam Papa blong olgeta. (Ol Sam 36:9) Long Lodsprea, Jisas i talem se Jehova i ‘Papa blong yumi long heven.’ (Matiu 6:9) Jehova i givim wan impoten wok long Jisas, blong mekem ol dedman oli laef bakegen. Jisas i talem se: “Mi nao, mi stamba blong laef bakegen long ded. Mi nao mi stamba blong laef.”—Jon 6:40, 44; 11:25.

11. ?Wanem stamba tingting blong God long “bigfala hip blong ol man”?

¹¹ Mo tu, Jisas i talem se: “Man we i stap mekem ol samting we God i wantem, hem nao i brata blong mi, mo i sista blong mi, mo i mama blong mi.” (Mak 3:35) God i wantem se ol man long olgeta kantri mo laen mo lanwis, oli wosipim hem. Baebol i tokbaot olgeta se oli “wan bigfala hip blong ol man, we olgeta i plante we plante, i no gat man i save kaontem olgeta.” Oli bilif long ransom mo oli wantem obei long God. Oli presem hem se: “God blong yumi, hem i King, i stap sidaon long bigfala jea blong hem. Hem wetem Smol Sipsip ya, tufala ya nao i wokem rod blong sevem mifala.”—Revelesen 7:9, 10.

12. ?Wanem tri samting we yumi lanem long Lodsprea?

¹² Long Lodsprea, yumi lanem plante samting long saed blong Jehova mo stamba tingting blong hem long saed blong ol man. Faswan, yumi mas mekem evri samting we yumi naf blong mekem, blong nem blong Jehova i tabu mo blong ona long hem. (Aesea 8:13) Ransom sakrefaes blong Jisas we i save sevem yumi, i leftemap nem blong God tu. Nem blong Jisas i minim “Jehova i Sevem Man.” Namba tu, Jehova bambae i yusum Kingdom blong hem, blong mekem se olgeta man we oli obei long hem, oli kasem blesing from ransom. Mo namba tri, yumi sua se i no gat wan samting i save stopem stamba tingting blong Jehova blong i no kamtru.—Ol Sam 135:6; Aesea 46:9, 10.

13. ?From wanem yumi baptaes?

¹³ Wan impoten rod blong soemaot se yumi glad tumas long ransom, hemia taem yumi givim laef blong yumi long Jehova mo yumi baptaes. Long rod ya, yumi soemaot se yumi bilif long ransom mo “yumi man blong Jehova.” (Rom 14:8, NW) Taem yumi baptaes, yumi askem long Jehova blong i givim wan ‘tingting we i klin gud’ long yumi. (1 Pita 3:21) Jehova i ansa taem hem i mekem yumi kasem ol blesing blong ransom ya. Mo yumi sua se bambae hem i givim evri samting we hem i promes blong givim.—Rom 8:32.

14. ?From wanem Jehova i talem se yumi mas lavem ol man?

¹⁴ Evri samting we Jehova i mekem, hem i mekem from bigfala lav blong hem. Hem i wantem se evriwan we oli wosipim hem, oli folem fasin blong hem, mo oli lavlavem olgeta. (1 Jon 4:8-11) Taem yumi lavem ol man, yumi soemaot klia se yumi wantem kam ol “pikinini blong Papa blong [yumi] long heven.” (Matiu 5:43-48) Faswan loa we i hae moa long ol narawan, hemia blong lavem Jehova. Mo sekenwan, hemia blong lavem ol man. (Matiu 22:37-40) Wan rod blong soemaot lav long ol man, hemia blong tijim olgeta long gud nius blong Kingdom blong God. Sipos yumi obei long Jehova nao yumi lavem ol man, speseli ol brata blong yumi, lav we yumi gat long hem bambae i “kam fulap long laef blong yumi.”—1 Jon 4:12, 20.

15. (1) ?Wanem blesing we yumi kasem naoia? (2) ?Wanem blesing we bambae yumi kasem long fiuja?

¹⁵ Jehova i mekem yumi sua se from we yumi bilif long ransom, bambae hem i “tekemaot ol sin” blong yumi. Hem i save fogivim yumi fulwan. (Ridim Ol Wok 3:19-21.) Olsem we yumi tokbaot finis, ransom i mekem se Jehova i save adoptem sam man blong oli kam ol pikinini blong hem long heven. Olgeta ya oli ol tabu Kristin. (Rom 8:15-17) Hem i invaetem ol “narafala sipsip” blong oli joen long famle blong hem long wol. Afta we oli kam stret gud olgeta, Setan bambae i traem olgeta laswan. Sipos oli holemstrong long Jehova, bambae hem i adoptem olgeta blong oli kam olsem ol pikinini blong hem tu. (Rom 8:20, 21; Revelesen 20:7-9) Jehova bambae i lavem evri pikinini blong hem oltaem. Blesing we i kamaot from ransom bambae i gohed gogo i no save finis. (Hibrus 9:12) Jehova i givim nambawan presen ya long yumi, mo i no gat man i save tekemaot presen ya.

16. ?Olsem wanem ransom i givhan long yumi blong kamfri?

¹⁶ Sipos yumi tanem tingting blong yumi from ol sin blong yumi, i no gat wan samting we Setan i save mekem blong blokem yumi, blong yumi no kam famle blong Jehova. Jisas i ded “wan taem nomo.” Ransom ya i pemaot sin blong yumi blong olwe. (Hibrus 9:24-26) Adam i mekem se yumi stap ded, be sakrefaes blong Jisas i mekem se bambae yumi kasem laef we i no save. Ransom i save mekem se yumi kamfri long wol blong Setan, mo yumi no fraet long ded.—Hibrus 2:14, 15.

17. ?Lav blong Jehova i minim wanem long yu?

¹⁷ Ol promes blong God bambae oli kamtru oltaem. Ol loa we Jehova i putum long ol samting we hem i wokem, oli neva jenis. Long sem fasin, Jehova bambae i neva jenis. Bambae hem i neva mekem yumi harem nogud. (Malakae 3:6) Jehova i givim presen blong laef long yumi, be i no hemia nomo. Hem i givim lav blong hem tu long yumi. “Yumi savegud fasin blong God blong lavem yumi, mo yumi bilif se hem i lavem yumi. God, hem i stamba blong fasin blong lavem man.” (1 Jon 4:16) Ol promes blong hem oli kamtru oltaem. I no longtaem, bambae wol ya i kam wan naesfala paradaes. Evriwan we oli laef bambae oli folem fasin blong Jehova mo oli lavlavem olgeta. Biaen, olgeta man blong God long heven mo long wol, bambae oli talem se: “God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkiu long hem, oli mas ona long hem, oli mas talemaot hae nem blong hem, mo oli mas talemaot paoa blong hem, gogo i no save finis. Amen.”—Revelesen 7:12.