!Sapotem Rul Blong Jehova!

1, 2. ?Yu mas kasemsave long wanem samting? (Yu luk pija long stat blong stadi.)

LONG las stadi, yumi tokbaot samting we Setan i talem agensem Jehova, se hem i no gat raet blong rul. Hem i talem se Jehova i no rul gud, mo ol man bambae oli glad moa sipos olgeta nomo oli rul. ?Olsem wanem? ?Tok ya blong Setan i tru? Traem tingbaot sipos ol man oli save laef olwe mo rulum olgeta bakegen. ?Bambae oli glad moa i bitim we God i rulum olgeta? ?Yu bambae yu glad moa sipos yu laef olwe mo yu folem tingting blong yu nomo?

² Yu nomo yu mas tingting gud mo ansa long ol kwestin ya. Nao bambae yu kasemsave se, rul blong Jehova i beswan mo i stret we yu sapotem rul ya fulwan. Naoia bambae yumi luk ol tok blong Baebol we oli soemaot se Jehova i gat raet blong rulum heven mo wol.

 3. ?From wanem Jehova i gat raet blong rul?

³ Jehova nomo i gat raet blong rul olsem King blong heven mo wol, from we hem i gat olgeta paoa, mo hem i wokem evri samting. (1 Kronikel 29:11; Ol Wok 4:24) Long wan vison, ol 144,000 king we oli rul wetem Jisas oli talem se: “Jehova, God blong mifala. Yu yu gat bigfala paoa, mo yu mekem olgeta samting. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli ona long yu.” (Revelesen 4:11) From we Jehova i wokem olgeta samting, hem i gat raet blong rul long evri samting long heven mo long wol.

 4. Nating se yumi fri blong jus, ?be from wanem yumi no gat raet blong agensem God?

⁴ Setan i no wokem wan samting nating, taswe hem i no gat raet blong rul long heven mo wol. Setan wetem Adam mo Iv, oli flas taem oli agensem rul blong Jehova. (Jeremaea 10:23) I tru, oli fri blong jus. Be hemia i no min se oli gat raet blong sakemaot rul blong Jehova. Yumi gat raet blong jusum samting we yumi mekem evri dei, be yumi no gat raet blong agensem God ya we i wokem yumi. Taem yumi agensem God, yumi no yusum gud fasin ya we yumi fri blong jus. Yumi ol man, yumi nidim Jehova blong i lidim yumi mo i rul long yumi.

 5. ?From wanem ol desisen blong Jehova oli stret?

⁵ I gat wan narafala risen from wanem Jehova i gat raet blong rul. Oltaem hem i yusum paoa blong hem long fasin we i stret nomo. Hem i talem se: “Fasin blong mi blong lavem man i gudfala tumas, mo ol wok we mi mi stap mekem long wol ya, oli gud mo oli stret nomo. Ol samting ya nao, mi mi glad long olgeta.” (Jeremaea 9:24) Jehova i stret gud olgeta, taswe hem i no nidim ol loa we man i putumap, blong save samting we i stret. Ol man nao oli mas folem ol loa we hem i putumap. Man we i raetem Ol Sam i tokbaot Jehova se: “Yu yu King, we fasin blong yu, oltaem yu stap mekem i stret, oltaem yu stap jajem ol man long stret rod.” Taswe, ol loa, ol rul, mo ol desisen blong Jehova oli stret nomo. (Ol Sam 89:14; 119:128) Setan i stap talem se rul blong Jehova i no stret. Be Setan i no save mekem se wol ya i fulap long stret fasin.

 6. ?Wanem narafala risen we i soemaot se Jehova i gat raet blong rul?

⁶ I gat wan narafala risen from wanem Jehova i gat raet blong rul. Hem i gat bigfala save mo waes blong lukaot gud long ol samting long heven mo wol. Yumi luksave samting ya, taem yumi tingbaot se hem i givim paoa long Pikinini blong hem, blong i tekemaot ol sik we ol dokta oli no save winim. (Matiu 4:23, 24; Mak 5:25-29) Long tingting blong yumi, hemia ol merikel, be Jehova i no luk se oli merikel. Hem i save gud se bodi i wok olsem wanem, taswe i no had blong hem i mekem i kam gud bakegen. Hem i naf tu blong mekem dedman i laef bakegen, mo blong finisim ol disasta.

 7. ?Olsem wanem Jehova i waes moa i bitim ol man long wol blong Setan?

⁷ Ol man long wol blong Setan oli no naf blong putum pis long wol. Oli no save mekem se wan kantri i gat pis wetem narafala kantri, no ol man long wan kantri oli gat pis. Jehova nomo i gat waes blong putum pis long wol. (Aesea 2:3, 4; 54:13) Yumi gat sem tingting olsem aposol Pol se: “!Tru, ol . . . waes, mo save blong [God] oli dip tumas! !Man i no naf blong kasem save long jajmen blong hem! !Mo man i no naf blong kasem save long ol rod blong hem!”—Rom 11:33.

 8. ?Wanem fasin blong God we i tajem hat blong yu?

⁸ Olsem yumi luk finis, Baebol i soemaot klia se Jehova nomo i gat raet blong rul mo rul blong hem i beswan. Wan risen se, hem i lavem ol man. Yumi harem gud tumas taem yumi tingbaot se ‘hem i gat sore long man, i stap givhan long man long gladhat blong hem, i no save kros kwik, i lavem man, mo i stap holemstrong promes blong hem.’ (Eksodas 34:6) Hem i respektem yumi, i no mekem yumi harem se yumi nating nomo. Hem i lukaot gud long yumi, i bitim we yumi save lukaot gud long yumi bakegen. Setan i stap talem se Jehova i blokem ol man blong Hem blong oli no kasem ol gudfala samting, be hemia ol giaman toktok. Jehova i givim Pikinini blong hem we hem i lavem tumas, blong yumi save kasem laef blong olwe.—Ridim Ol Sam 84:11; Rom 8:32.

 9. ?Olsem wanem yumi save se God i intres long yumi wanwan?

⁹ Jehova i lavem ol man blong hem olsem wan grup. Be hem i intres tu long ol man wanwan. Traem tingbaot: Long taem bifo, Jehova i yusum ol jaj blong 300 yia. Oli lidim neson blong hem mo oli winim ol enemi. Long ol taem ya, Jehova i tingbaot ol man wanwan, olsem woman ya Rut. Rut i no blong Isrel, mo hem i mas lego plante samting blong joen wetem ol man blong Jehova. Be Jehova i blesem hem, i givim wan hasban mo wan pikinini boe long hem. Antap long samting ya, Mesaea i kamaot long laen blong boe ya. Mo tu, Jehova i meksua se stori blong Rut i stap long Baebol. Taem Rut i laef bakegen mo i faenemaot ol samting ya, ?yu ting se bambae hem i harem olsem wanem?—Rut 4:13; Matiu 1:5, 16.

10. ?Olsem wanem yumi save se Jehova i no mekem i strong tumas long ol man we hem i rulum?

¹⁰ Jehova i no mekem i strong tumas long ol man we hem i rulum. Ol man we oli obei long hem oli harem se oli fri, mo oli glad. (2 Korin 3:17) Deved i tokbaot Jehova se: ‘Bigfala laet we i stap saen raonabaot long hem i soemaot we hem i King, nem blong hem i hae we i hae. Paoa blong hem i bigwan tumas, mo hem i stamba blong glad.’ (1 Kronikel 16:7, 27) Etan i raetem Sam ya we i talem se: “Olgeta we oli stap singsing blong presem yu, oli glad tumas. Oltaem yu yu kaen gud long olgeta, nao i olsem we oli stap wokbaot long delaet. Yu yu mekem olgeta oli harem gud, i stat long moning go kasem long sapa.”—Ol Sam 89:15, 16.

11. ?Olsem wanem yumi mekem bilif blong yumi i strong se rul blong Jehova i beswan?

¹¹ Taem yumi tingting dip long ol gudfala samting we Jehova i mekem long yumi, yumi bilif strong se rul blong hem i beswan. Yumi wantem talem olsem man blong raetem Sam ya, se: “Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples.” (Ol Sam 84:10) Jehova i wokem yumi, taswe hem i save gud samting we i mekem yumi glad. Hem i givim plante samting long yumi, i bitim wanem we yumi nidim. Ol samting we Jehova i askem, oli blong mekem i gud long yumi nomo. Nating se yumi mas lego sam samting, be sipos yumi obei long hem oltaem, bambae yumi glad.—Ridim Aesea 48:17.

12. ?Wanem bigfala risen blong sapotem rul blong Jehova?

¹² Baebol i talem se, taem rul blong Kraes blong wan taosen yia i finis, samfala bambae oli agensem rul blong Jehova bakegen. (Revelesen 20:7, 8) ?From wanem? From we, Setan bambae i traem pulum ol man blong oli tingbaot olgeta nomo. Bambae hem i traehad blong pulum tingting blong ol man blong tingse oli no nid blong obei long Jehova blong kasem laef olwe. Be hem i stap giaman nomo. Yumi wanwan i mas askem se: ‘?Bambae mi mi bilivim giaman tok ya?’ Sipos yumi lavem Jehova mo yumi bilif strong se hem i gud mo i gat raet blong rulum heven mo wol, bambae yumi sakemaot giaman tok ya wantaem. Jehova i lavem ol man, mo yumi wantem stap aninit long rul blong hem oltaem nomo.

13. ?Olsem wanem yumi sapotem rul blong Jehova?

¹³ Yumi lanem finis se, Jehova i gat raet blong rul mo rul blong hem i beswan. Taswe i stret nomo we yumi sapotem rul blong hem fulwan. ?Yumi sapotem olsem wanem? Yumi sapotem taem yumi holemstrong long Jehova, mo yumi mekem ol samting long sem fasin we hem i mekem. Taem yumi mekem bes blong yumi blong folem fasin blong Jehova, yumi soemaot se yumi lavem rul blong hem mo yumi sapotem.—Ridim Efesas 5:1, 2.

14. ?Olsem wanem ol elda mo ol hed blong famle oli save folem fasin blong Jehova?

¹⁴ Baebol i tijim yumi se oltaem Jehova i yusum paoa blong hem long fasin we i soemaot se hem i lavem yumi. Ol hed blong famle mo ol elda we oli lavem rul blong Jehova, bambae oli folem fasin blong hem. Bambae oli no mekem i strong tumas long ol narafala mo mekem bigfala bos long olgeta. Aposol Pol i traehad blong folem fasin blong God mo Jisas. (1 Korin 11:1) Hem i no fosem ol narafala mo mekem olgeta oli sem. Be long kaen fasin, hem i pulum olgeta blong oli mekem i stret. (Rom 12:1; Efesas 4:1; Filimon 8-10) Taem Pol i mekem olsem, hem i folem fasin blong Jehova. Sipos yumi soemaot lav long ol narafala, bambae yumi sapotem rul blong Jehova.

15. ?Yumi sapotem rul blong Jehova long wanem narafala rod?

¹⁵ Yumi sapotem rul blong Jehova taem yumi gat respek mo wok gud wetem ol brata we hem i putumap olgeta, blong oli lukaot long yumi. Nating se yumi no kasem save gud long wan desisen we oli mekem, be bambae yumi sapotem olgeta. Hemia i defren long fasin blong ol man long wol. Be hemia nao stret fasin blong yumi folem, taem yumi stap aninit long Jehova we i Rula blong yumi. (Efesas 5:22, 23; 6:1-3; Hibrus 13:17) Mo taem yumi respektem rod we Jehova i putumap, yumi glad, from we hem i save samting we i gud long yumi.

16. ?Olsem wanem yumi soemaot long ol desisen blong yumi se yumi sapotem rul blong God?

¹⁶ Ol desisen blong yumi tu oli save soemaot se yumi sapotem rul blong God. Jehova i no mekem wan loa blong ol defdefren samting long laef blong yumi. Be hem i talem tingting blong hem, nao yumi kasem save long samting we yumi mas mekem. Traem tingbaot ol klos. Jehova i no mekem wan lis blong ol klos we i stret mo ol klos we i no stret. Be hem i talem se yumi mas werem klos we i no bitim mak, mo i stret long ol Witnes blong hem. (1 Timoti 2:9, 10) Hem i no wantem se yumi mekem wan desisen we i spolem narafala. (1 Korin 10:31-33) Taem yumi mekem ol desisen folem tingting blong Jehova, yumi soemaot se yumi lavem mo sapotem rul blong hem.

17, 18. ?Olsem wanem ol Kristin we oli mared oli save sapotem rul blong Jehova?

¹⁷ Traem tingbaot olsem wanem ol Kristin we oli mared oli save sapotem rul blong Jehova. Maet oli luk se mared i had moa i bitim wanem we oli tingbaot fastaem. Maet i gat bigfala trabol long mared blong olgeta. Sipos i olsem, i gud oli tingbaot fasin we Jehova i mekem long neson blong Isrel. Hem i talem se hem i olsem hasban blong olgeta. (Aesea 54:5; 62:4) Plante taem, neson ya i mekem Jehova i harem nogud. !Mared ya i had! Be Jehova i no lego neson ya. Hem i fogivim olgeta bakegen mo bakegen, mo hem i holem promes we hem i mekem wetem olgeta.—Ridim Ol Sam 106:43-45.

¹⁸ Ol Kristin tede oli traehad blong folem fasin blong Jehova. Sipos oli gat trabol long mared blong olgeta, oli no traem faenem wan eskius we i agensem Baebol, blong brekem mared ya. Oli save se Jehova i tinghevi long promes blong mared, mo i wantem se tufala i “joen” olsem wan bodi nomo. I gat wan risen nomo we Baebol i talem, blong man mo woman i save divos mo mared bakegen. (Matiu 19:5, 6, 9) Taem yumi traehad blong mekem mared blong yumi i rongud, yumi stap sapotem rul blong Jehova.

19. ?Taem yumi mestem, yumi mas mekem wanem?

¹⁹ Yumi evriwan i sinman, mo sam samtaem yumi mekem Jehova i harem nogud. Hem i save se bambae i olsem, taswe hem i letem Jisas i ded olsem wan ransom. Ale, taem yumi mestem, yumi mas askem long Jehova blong i fogivim yumi. (1 Jon 2:1, 2) Yumi harem nogud from mastik blong yumi, be yumi mas traehad tu blong lanem samting from. Yumi mas kam klosap long Jehova, nao bambae hem i fogivim yumi. Bambae hem i givhan long yumi, blong yumi harem gud bakegen mo yumi gohed blong wosipim hem.—Ol Sam 103:3.

20. ?From wanem yumi mas sapotem rul blong Jehova naoia?

²⁰ Long niufala wol, olgeta man bambae oli stap aninit long rul blong Jehova, mo bambae oli lanem ol stret fasin blong hem. (Aesea 11:9) Be tede, yumi stap kasem plante long ol tijing ya finis. Mo tu, klosap Jehova i pruvum fulwan se hem i gat raet blong rul mo rul blong hem nomo i beswan. Taswe, yumi mas sapotem rul blong Jehova naoia. Yumi mekem olsem taem yumi obei long hem, holemstrong long hem, mo folem fasin blong hem long evri samting we yumi mekem.