?Parabol Blong Gudfala Man Sameria i Tijim Yumi Long Wanem?

Taem wan man i glad blong givhan long narafala we i trabol, samfala oli singaot hem se “Gudfala Man Sameria.” Hemia i kamaot long wan stori o parabol we Jisas i talem, blong soemaot se wan gudfala neba i gat sore, mo i givhan long ol narafala, nating se oli kamaot long wanem kantri o ples.

Long atikol ya

• Parabol blong gudfala man Sameria

• ?From wanem Jisas i talem parabol ya?

• ?Parabol ya i tijim yumi long wanem?

• ?Hu ya ol man Sameria?

• ?Stori ya i tokbaot samting we i rili hapen?

Hemia stori we Jisas i talem: Wan man Jiu i aot long Jerusalem blong go long Jeriko. Long rod, ol rabis man oli rabem hem, kilim hem, mo lego hem i slip long rod blong i ded.

Wan pris we i man Jiu, mo biaen wan lida blong skul blong ol man Jiu, tufala i luk man ya i slip long rod mo ol kil blong hem, be tufala i bitim hem i go nomo. Nating se tufala i blong sem kantri olsem man ya, be tufala i no stop blong givhan long hem.

Biaen, wan man blong narafala kantri i kam. Hem i wan man Sameria. (Luk 10:33; 17:16-18) Hem i sore long man ya mo i fasem ol soa blong hem. Hem i tekem man ya i go long wan gesthaos mo i lukaot long hem long fulnaet. Long nekis dei, hem i pem bos blong gesthaos ya blong i lukaot long man ya, mo i talem se sipos i yusum sam moa mane, bambae hem i givimbak.—Luk 10:30-35.

Jisas i talem stori ya long wan man we i ting se ol neba blong hem i minim nomo ol man we oli gat sem kala blong skin mo skul olsem hem. Jisas i wantem tijim man ya long wan impoten samting, hemia se tok ya “neba” i no minim nomo ol man Jiu. (Luk 10:36, 37) Stori ya i stap long Baebol blong givhan long ol man we oli wantem mekem God i glad.—2 Timoti 3:16, 17.

Stori ya i tijim yumi se wan gudfala neba i mekem sam aksen blong soemaot sore. Hem i mekem samting blong halpem narafala we i trabol, nomata wanem ples we man ya i kamaot long hem, kala blong skin, o kantri blong hem. Wan gudfala neba i mekem i gud long ol narafala, olsem we hem i wantem se oli mekem long hem.—Matiu 7:12.

Kantri blong Sameria i stap long not blong Judia. Ol man Sameria oli pikinini blong ol man Jiu we oli maredem olgeta we oli no man Jiu.

Taem Jisas i stap long wol, ol man Sameria oli gat prapa skul blong olgeta finis. Oli bilif long ol faef buk ya Jenesis kasem Dutronome, be bighaf blong olgeta oli sakemaot ol narafala haf blong Baebol.

Plante man Jiu long taem blong Jisas oli no laekem ol man Sameria mo oli no wantem nating blong joen wetem olgeta. (Jon 4:9) Taem wan man Jiu i wantem spolem narafala, plante taem i sakem tok ya “man Sameria” long hem.—Jon 8:48.

Baebol i no talem sipos parabol ya blong man Sameria i samting we i rili hapen. Be taem Jisas i tijim ol man, plante taem hem i yusum ol kastom mo ples we oli save gud, blong mekem i isi moa blong oli kasem save long poen we hem i wantem soemaot.

Plante samting we stori ya i talem oli laenap wetem histri blong taem ya. Wan eksampol:

• Rod blong Jerusalem go kasem Jeriko i longfala olsem 20 kilometa, mo Jerusalem i stap long graon we i hae moa long Jeriko, maet samting olsem wan kilometa. Taswe, parabol ya i stret, taem hem i talem se man ya “i aot long Jerusalem, i stap godaon long Jeriko.”—Luk 10:30.

• Plante taem ol pris mo ol Livaet we oli laef long Jeriko, oli yusum rod ya blong go long Jerusalem.

• Ol stilman oli stap haed long saed blong rod ya, oli stap wet blong rabem ol man we oli wokbaot, speseli man we i stap hem wan.