?Olsem Wanem Ol Witnes Blong Jehova Oli Mekem Mared?

Taem ol Witnes blong Jehova oli mared, i gat wan seremoni fastaem wetem wan smol tok we i stanap long Baebol. Afta, maet oli joen wanples blong mekem lafet.a Smoltaem afta we Jisas i statem wok blong hem long wol, hem tu i go long wan lafet blong mared long taon ya Kena.—Jon 2:1-11.

• ?Seremoni blong mared i olsem wanem?

• ?Ol Witnes blong Jehova oli mekem ol mared wea?

• ?Hu i save go long ol mared ya?

• ?Wanem klos we i stret blong werem?

• ?Oli givim ol presen long tufala we i mared?

• ?Oli leftemap glas blong wisim tufala wan hapi mared?

• ?Oli sakem raes o narafala samting?

• ?I gat kakae mo dring long ol mared ya?

• ?I gat miusik mo danis?

• ?Ol Witnes blong Jehova oli mekem lafet blong aniveseri blong mared?

Long seremoni, wan minista blong ol Witnes blong Jehova i mekem wan tok blong samwe long 30 minit. Hem i toktok kaen mo i leftemap tingting, blong makem olsem wanem Baebol i save givhan long tufala blong mekem mared blong tufala i hapi, i gat lav, mo i stap longtaem.—Efesas 5:33.

Long plante kantri, gavman i givim raet long sam minista blong ol Witnes blong Jehova, blong oli lukaot long haf ya blong mared we tufala i saenem ol pepa folem loa. Sipos i olsem, klosap long en blong tok, tufala i mekem promes blong mared mo tufala i putum ring long han blong tufala. Nao minista i talem se tufala i hasban mo waef.

Long sam kantri, loa i talem se tufala i mas saen long ofis blong gavman. Tufala i save mekem olsem smoltaem bifo long tok blong mared. Sipos tufala i no mekem promes blong mared long ofis blong gavman, tufala i save mekem long las haf blong tok ya. Sipos tufala i bin mekem promes ya long ofis blong gavman, maet tufala i ripitim, be tufala i yusum ol tok we i soemaot se tufala i mekem promes ya finis. Tok ya i finis wetem wan prea blong askem blesing blong God long tufala.

Plante Witnes oli jus blong mekem seremoni blong mared long Haos Kingdom, sipos i gat long ples blong olgeta.b Sipos i gat lafet blong mared biaen, oli mekem lafet ya long wan narafala ples.

Sipos tufala i mekem seremoni long Haos Kingdom, klosap oltaem hemia i min se eniwan i save go, nating se oli Witnes o nogat. Sipos i gat lafet blong mared biaen, tufala i jusum olgeta we oli wantem invaetem.

I no gat ol spesel klos we ol man oli mas werem long wan mared long Haos Kingdom, be ol Witnes blong Jehova oli folem ol tok blong Baebol blong werem klos we i soemaot respek. Oli glad taem ol narafala tu oli mekem olsem. (1 Timoti 2:9) I sem mak long saed blong lafet blong mared.

Baebol i pulum yumi blong givim presen wetem gladhat. (Ol Sam 37:21) Ol Witnes blong Jehova oli glad blong givim mo kasem ol presen long taem blong mared. (Luk 6:38) Be ol Witnes oli no askem ol presen, mo oli no talemaot nem blong ol man we oli givim presen. (Matiu 6:3, 4; 2 Korin 9:7; 1 Pita 3:8) Hemia i agensem samting we Baebol i talem, mo i save mekem olgeta we oli kam long mared ya oli harem nogud.

Nogat. Ol Witnes blong Jehova oli no mekem olsem, from we fasin ya i kamaot long kastom blong ol giaman skul.c Ol Witnes oli yusum ol narafala rod blong wisim tufala wan hapi mared.

Nogat. Long sam ples, ol man oli sakem raes o narafala samting long tufala we i jes mared. Oli ting se hemia bambae i givim gudlak, mo wan laef we i longfala mo i hapi. Be ol Witnes blong Jehova oli no mekem ol fasin olsem we oli blong givim gudlak. Mo oli no wisim gudlak long tufala tu, from we hemia i agensem ol tok blong Baebol.—Aesea 65:11.

I no gat kakae mo dring long seremoni blong mared long Haos Kingdom. Samfala oli jusum blong mekem lafet biaen, we i gat kakae mo dring. (Prija 9:7) Sipos i gat waen mo bia, oli no givimaot gogo ol man oli dring tumas, mo oli meksua se olgeta we oli dring oli gat yia we loa i talem.—Luk 21:34; Rom 13:1, 13.

Sipos i gat lafet blong mared, maet tufala i wantem miusik mo danis. (Prija 3:4) Bambae tufala i jusum ol gudfala miusik, we tufala i laekem mo i stret long kalja. Long seremoni blong mared long Haos Kingdom, plante taem i gat miusik we i stanap long Baebol.

I no gat sam tok long Baebol we i agri o i agensem ol lafet blong aniveseri blong mared, taswe ol Witnes oli mekem prapa desisen blong olgeta. Sipos tufala i jusum blong mekem aniveseri blong mared, maet tufala i mekem tufala nomo, o wetem ol fren mo famle.