Tok Blong Jeova i Wan Samting We i Laef

Ol Bigfala Poen Long Buk Blong Jenesis​—Haf 2

BUK blong Jenesis i kavremap 2,369 yia long histri blong man, i stat long taem we God i wokem faswan man, Adam, go kasem ded blong Josef, pikinini blong Jekob. Long laswan Wajtaoa yumi tokbaot ol faswan 10 japta blong Jenesis tugeta wetem 9 vas blong japta 11, i stat wetem stori ya long saed blong ol samting we God i wokem mo i go kasem stori ya we ol man oli bildim bigfala haos blong Babel.a Haf ya bambae i tokbaot ol bigfala poen long ol narafala japta blong Jenesis, long saed blong fasin we God i mekem long Ebraham, Aesak, Jekob, mo Josef.

EBRAHAM I KAM FREN BLONG GOD

(Jenesis 11:10–23:20)

Samwe long 350 yia afta we Bigfala Wota i ron, wan man i bon long laen blong Sem, pikinini blong Noa. Man ya i kam wan spesel fren blong God. Nem blong hem Ebram, we biaen nem ya i jenis i kam Ebraham. God i givim oda long Ebram blong i aot long Uru, wan taon blong Koldia, mo i slip long haos tapolen nomo long wan narafala kantri we Jeova i promes blong givim long hem mo ol pikinini blong hem. From strong bilif blong Ebraham mo fasin obei, ol man oli singaot hem se “Fren blong God.”​—Jemes 2:23.

Jeova i tekem aksin agensem ol rabis man blong Sodom mo ol taon we oli stap klosap long hem. Lot mo tufala dota blong hem oli sef long taem ya. Wan promes we God i mekem wetem Ebraham i kamtru taem pikinini blong hem, Aesak i bon. Sam yia biaen, Jeova i givim oda long Ebraham blong kilim Aesak olsem wan sakrefaes. Samting ya i traem bilif blong Ebraham. Ebraham i rere blong obei be wan enjel i blokem hem. I klia se, Ebraham i wan man blong bilif, mo Jeova i mekem Ebraham i sua se from laen blong hem, God bambae i blesem olgeta nesen. Taem gudfala waef blong hem, Sera, i ded, Ebraham i harem nogud tumas.

Ansa Blong Sam Kwestin Long Saed Blong Baebol:

12:1-3​—?Kontrak ya we Jeova i mekem wetem Ebraham i stat wetaem, mo kontrak ya i stap kasem wetaem? Jeova i mekem wan kontrak wetem Ebram se: “Mi bambae mi yusum yu blong blesem ol man blong olgeta narafala kantri long wol.” I luk olsem se kontrak ya i stat taem Ebraham i krosem reva Yufretes blong go long kantri ya Kenan. Hemia long Naesan 14, 1943 B.K.T.b​—430 yia bifo we ol man Isrel oli kam fri long Ijip. (Eksodas 12:2, 6, 7, 40, 41) Kontrak ya wetem Ebraham i wan promes we i “stap olwe, i no save finis.” Kontrak ya bambae i gohed go kasem we Jeova i blesem olgeta man long wol mo olgeta enemi blong God oli lus.​—Jenesis 17:7; 1 Korin 15:23-26.

15:13​—?Ol 400 yia we Jenesis i talemaot se ol man bambae oli mekem i strong tumas long ol pikinini blong Ebraham i finis wetaem? Ol yia ya oli stat long 1913 B.K.T., taem Aesak, pikinini blong Ebraham, i livim titi. Long taem ya, Aesak i gat 5 yia nomo mo haf brata blong hem Ismael, we i gat 19 yia, i stap “laf nogud” long hem. (Jenesis 21:8-14; Galesia 4:29) Ol 400 yia ya oli finis long 1513 B.K.T., taem ol man Isrel oli fri long Ijip, oli no moa slef.

16:2​—?I stret we Sarae i givim woman slef blong hem, Hega, olsem wan narafala waef blong Ebram? Samting we Sarae i mekem i laenap wetem kastom blong ol man long taem ya​—se wan waef we i no bonem pikinini nating i mas givim wan woman slef long hasban blong hem, blong woman slef ya i bonem wan pikinini blong hem. Fasin ya we man i gat plante waef i kamaot fastaem long laen blong Ken. Sloslo, fasin ya i kam olsem wan kastom mo sam man we oli wosip long Jeova oli stat blong folem kastom ya. (Jenesis 4:17-19; 16:1-3; 29:21-28) Be, Jeova i neva lego faswan rul we hem i putumap se man i mas gat wan woman nomo. (Jenesis 2:21, 22) Taem Jeova i givim oda ya bakegen long Noa, se “yufala i mas gat plante pikinini, blong bambae wol ya i kam fulap long olgeta,” Noa mo trifala boe blong hem oli gat wanwan woman nomo blong olgeta. (Jenesis 7:7; 9:1; 2 Pita 2:5) Mo Jisas Kraes i talemaot bakegen rul ya, se man i mas gat wan woman nomo.​—Matiu 19:4-8; 1 Timoti 3:2, 12.

19:8​—?I rong we Lot i rere blong givim tufala gel blong hem long ol man Sodom? Folem rul blong ol kantri blong Is, man blong haos nao i gat wok blong lukaotgud long ol man we oli kam stap long haos blong hem. Hem i mas faet blong protektem olgeta go kasem we hem i ded from. Lot i rere blong mekem samting ya. Hem i no fraet blong go afsaed hem wan, i satem doa biaen long hem, nao i toktok long ol rabis man we oli hivap raon long haos blong hem. Taem Lot i talem long olgeta blong tekem tufala dota blong hem, ating hem i luksave finis se tufala strenja ya we tufala i kam stap wetem hem tufala i enjel blong God. Mo maet Lot i bin tingting se God i save protektem tufala dota blong hem olsem we hem i bin protektem anti blong hem, Sera, long Ijip. (Jenesis 12:17-20) Yes, ol samting we i kamaot biaen oli soem se Jeova i protektem Lot mo tufala dota blong hem.

19:30-38​—?Jeova i agri long fasin ya we Lot i drong mo i givim pikinini long tufala dota blong hem? Jeova i no agri long fasin we man i slip wetem wan memba blong prapa famle blong hem mo hem i no agri long fasin blong drong. (Levitikas 18:6, 7, 29; 1 Korin 6:9, 10) Lot tu i agensem “ol fasin nogud” we ol man Sodom oli stap mekem. (2 Pita 2:6-8) Tufala dota blong hem i givim waen long hem gogo hem i drong, from we tufala i save finis se sipos hem i no drong, bambae hem i no save agri blong slip wetem tufala. From we tufala i strenja long kantri ya, tufala i harem se long rod ya nomo bambae tufala i save karem pikinini blong holem nem blong famle blong Lot. Stori ya i stap long Baebol blong soemaot olsem wanem ol man Moab (tru long Moab) mo ol man Amon (tru long Benami) oli famle wetem ol man Isrel, we oli kamaot long Ebraham.

Ol Lesen Blong Yumi:

13:8, 9. !Ebraham i soem nambawan eksampol long saed blong fasin blong stretem ol rao! Yumi mas neva letem fasin blong winim mane, prapa jus blong yumi, no fasin flas i spolem gudfala fasin fren blong yumi wetem ol narafala.

15:5, 6. Taem Ebraham i kam olfala mo i no gat pikinini yet, hem i toktok wetem God from samting ya. Nao Jeova i leftemap tingting blong hem. ?Wanem risal blong samting ya? Ebraham ‘i bilif strong long Jeova.’ Sipos yumi prea long Jeova wetem fulhat blong yumi, yumi agri long ol advaes we Jeova i givim tru long Baebol, mo yumi obei long hem, bilif blong yumi bambae i kam strong moa.

15:16. Jeova i no mekem jajmen blong hem agensem ol laen blong Amoro (no, Kenan) i kamtru gogo kasem taem blong ol smol bubu blong ol smol bubu blong Ebraham. ?From wanem? From we Jeova i wan God we i gat longfala tingting. Hem i wet gogo kasem we hem i luk se i no moa gat hop blong olgeta i jenisim fasin blong olgeta. Olsem Jeova, yumi tu yumi mas gat longfala tingting.

18:23-33. Jeova i no kilim man i ded blong nating nomo. Mo hem i protektem ol man we oli gat stret fasin.

19:16. Lot “i stap tektaem,” mo klosap tufala enjel i mas dragem Lot mo famle blong hem oli aot long taon ya Sodom. Yumi stap wet long en blong rabis wol ya. Yumi waes sipos yumi no foget se taem i sot.

19:26. !I krangke sipos yumi letem ol narafala samting i pulum intres blong yumi no yumi lukluk i gobak long ol samting we yumi livim finis long wol ya!

JEKOB I GAT 12 PIKININI BOE

(Jenesis 24:1–36:43)

Ebraham i mekem plan blong Aesak i mared wetem Rebeka, wan woman we i gat bilif long Jeova. Rebeka i bonem tufala twin, Esao mo Jekob. Esao i ting nating long raet blong hem olsem fasbon, mo i salem raet ya long Jekob. Biaen, papa blong hem i blesem Jekob. Jekob i ronwe i go long distrik ya Padan-Aram, mo long ples ya hem i mared wetem Lea mo Rejel. Blong 20 yia hem i stap wok long papa blong tufala, i lukaot ol anamol blong hem, nao biaen hem i tekem famle blong hem oli aot long ples ya. Lea, Rejel, mo tufala woman slef, oli bonem 12 pikinini boe mo sam dota blong Jekob. Jekob i resling wetem wan enjel mo i kasem blesing from, mo God i jenisim nem blong hem i kam Isrel.

Ansa Blong Sam Kwestin Long Saed Blong Baebol:

28:12, 13​—?Wanem mining blong drim ya we Jekob i luk long saed blong “wan lada”? “Lada” ya, we maet i luk olsem ol step blong ston we oli stap go antap, i soem se ol man long wol oli save toktok wetem God long heven. Ol enjel blong God oli stap kamdaon mo oli stap go antap long lada ya. Hemia i soemaot se Jeova i yusum ol enjel blong mekem sam impoten wok long saed blong ol man we God i glad long olgeta.​—Jon 1:51.

30:14, 15​—?From wanem Rejel i rere blong letem Jekob i go slip wetem Lea from sam frut blong mandrek nomo? Long taem bifo, ol man oli yusum frut blong mandrek olsem meresin blong mekem man i slip no blong blokem soa no blong mekem we ol masel long bodi blong man oli no taet. Oli talem se frut ya i gud tu blong mekem man i wantem woman tumas mo i save givhan blong mekem woman i gat bel. (Sing blong Solomon 7:13) Baebol i no talem from wanem Rejel i wantem karem frut ya. Maet hem i ting se frut ya bambae i givhan long hem blong gat bel mo long rod ya man i no moa save tok nogud long hem from we hem i no gat pikinini. Be, sam yia i pas bifo we Jeova i ‘givim wan pikinini long hem.’​—Jenesis 30:22-24.

Ol Lesen Blong Yumi:

25:23. Bifo we man i bon, Jeova i naf blong save fasin we man bambae i karem long papa mama blong hem, mo Jeova i soemaot save ya taem hem i jusumaot fastaem man we bambae hem i yusum blong mekem stamba tingting blong hem i kamtru. Be, Jeova i no makemaot evri samting we bambae i hapen long fiuja blong man.​—Hosea 12:3; Rom 9:10-12.

25:32, 33; 32:24-29. Fasin blong Jekob blong wantem karem raet olsem fasbon mo blong stap resling wetem wan enjel wan fulnaet jes blong kasem wan blesing, i soem se Jekob i rili tinghae long ol tabu samting. Jeova i givim plante tabu samting long yumi, olsem fasin fren we yumi gat wetem Hem mo ogenaesesen blong hem, ransom sakrefaes, Baebol, mo hop blong Kingdom. I gud sipos yumi mekem olsem Jekob, mo yumi soem fasin tangkiu from ol tabu samting ya.

34:​1, 30. Trabol ya we i mekem ol man ‘oli no moa laekem Jekob, oli agens long hem’ i kamaot from we Daena i stat fren wetem ol man we oli no laekem Jeova. Yumi mas jusumgud ol fren blong yumi.

JEOVA I BLESEM JOSEF LONG IJIP

(Jenesis 37:1–50:26)

Ol pikinini boe blong Jekob oli stap jalus long brata blong olgeta, Josef, mekem se oli salem hem blong i kam slef. Long Ijip, Josef i kalabus from we hem i holemtaet stret fasin blong God wetem bilif mo fasin no fraet. Biaen, hem i aot long kalabus blong i talemaot mining blong tu drim blong Fero. Tufala drim ya i soemaot se blong seven yia bambae ol garen oli karem fulap kakae, be biaen, bambae i gat hadtaem blong kasem kakae blong seven yia bakegen. Josef i kam man we i lukaot long wok blong seremaot kakae long Ijip. Ol brata blong Josef oli kam long Ijip blong pem kakae blong olgeta. Biaen, Jekob wetem ol famle blong hem oli stap tugeta bakegen mo oli mekem ples blong olgeta long gudfala graon blong Gosen. Jes bifo we Jekob i ded, hem i blesem ol boe blong hem mo i talemaot wan profet tok we i givim hop we i suagud blong ol nambawan blesing long fiuja. Oli tekem dedbodi blong Jekob i gobak long Kenan blong berem hem. Josef i ded taem hem i gat 110 yia. Oli wokem dedbodi blong hem blong i no save kam roten, mo plante yia biaen ol man oli karem dedbodi blong hem i go long Promes Lan.​—Eksodas 13:19.

Ansa Blong Sam Kwestin Long Saed Blong Baebol:

43:32​—?From wanem i tabu blong ol man Ijip oli kakae wetem ol man Hibru? Maet hemia from we ol man Ijip oli no laekem nating man blong narafala skul mo oli flas from kantri blong olgeta. Mo tu, ol man Ijip oli no laekem nating ol man blong lukaot long sipsip. (Jenesis 46:34) ?From wanem? Maet from we long tingting blong ol man Ijip, wok blong lukaot long sipsip i daon olgeta. No maet from we graon blong mekem garen i no plante, taswe ol man Ijip oli no laekem nating olgeta we oli yusum graon ya blong ol sipsip oli kakae long hem.

44:5​—?I tru se Josef i yusum wan panikin blong faenemaot ol strong samting we i haed? I klia se, silva panikin ya mo samting we oli talem long saed ya, i blong trikim ol brata blong Josef nomo. Josef i wan man blong mekem tru wosip long Jeova. Hem i no yusum panikin ya blong faenemaot ol strong samting we i haed, olsem we Benjamin i no rili stilim panikin ya.

49:10​—?Wanem mining blong “wokingstik”? Wan wokingstik i wan stik we wan rula i karem blong soemaot paoa blong hem olsem king. Jekob i tokbaot stik ya blong soemaot se laen blong Juda bambae i gat bigfala paoa gogo kasem we paoa ya i go long wan man we i gat raet blong holem. Jisas Kraes nao i man ya we i kamaot long laen blong Juda, mo Jeova i givim raet long hem blong rul long heven. Kraes i holem paoa blong rul olsem king mo hem i gat raet blong givim oda.​—Ol Sam 2:8, 9; Aesea 55:4; Daniel 7:13, 14.

Ol Lesen Blong Yumi:

38:26. Fasin we Juda i mekem long Tamara, wido blong boe blong hem, i no stret. Be, taem Juda i faenemaot se hem nao i givim pikinini long woman ya, wetem tingtingdaon hem i talemaot rong blong hem. Yumi tu, yumi mas kwik blong luksave ol mastik blong yumi.

39:9. Ansa we Josef i givim long waef blong Potifa i soem se tingting blong Josef long saed blong ol fasin we i stret mo ol fasin we i no stret i laenap wetem tingting blong God. Mo tu, tingting blong hem i jajem hem folem ol rul blong God. Taem yumi gohed blong kasem moa save long saed blong trutok, yumi mas traehad blong letem ol rul blong God i lidim tingting blong yumi.

41:14-16, 39, 40. Jeova i save jenisim samting we i hapen long laef blong ol man we oli fraetgud long hem. Taem yumi kasem hadtaem, i gud yumi trastem Jeova mo gohed blong stap tru long hem.

Olgeta Oli Gat Bilif We i Stap Olwe

Ebraham, Aesak, Jekob, mo Josef oli ol man blong bilif we oli fraetgud long God. Stori blong laef blong olgeta, we i stap long buk blong Jenesis, i mekem bilif blong yumi i strong moa mo i tijim yumi long sam impoten lesen.

Taem yu stap mekem Baebol riding evri wik blong rerem Tiokratik Ministri Skul, yu save kasem gudfala frut from stori ya. Ol bigfala poen we yumi jes tokbaot bambae oli save givhan long yu blong mekem stori ya i gat laef.

[Ol Futnot]

[Tok blong pija long pej 26]

Jeova i blesem Josef

[Tok blong pija long pej 26]

Ebraham i wan man blong bilif

[Tok blong pija long pej 26]

God i sevem laef blong stret man ya Lot mo tufala dota blong hem

[Tok blong pija long pej 29]

Jekob i tinghae long ol tabu samting. ?Olsem wanem long yu?