Sam Advaes Blong Tingbaot Taem Yu Talemaot Tingting Mo Filing Blong Yu

‘MI NO sud talem samting ya.’ ‘Ating mi no talemaot klia samting we i bin stap long tingting blong mi.’ ?Samtaem yu tingting olsemia afta we yu bin traem talem tingting blong yu long hasban no waef blong yu? Fasin blong talemaot tingting mo filing i olsem wan wok. Wok i wan samting we man i mas lanem. Ale, fasin blong toktok blong talemaot tingting mo filing blong yu, hemia tu i wan samting we yu mas lanem. Taem ol man oli lanem wan wok, i gat sam man we i lanem samting hareap mo i gat sam man we i slo moa blong lanem. Ale, long saed blong toktok tu i gat sam we oli harem se i hadwok, mo sam i harem se i isi. Be sipos yu yu wan we yu faenem se i hadwok, yu save lanem yet blong talemaot ol tingting blong yu long wan fasin we narafala i save kasem save, mo yu save lanem tu blong no sem blong toktok olsem.

Samtaem, kalja blong kantri we man i gruap long hem, i tijim hem blong tingting se wanem fasin i stret mo wanem fasin i no stret. Maet wan boe i gruap wetem tingting ya se ‘Sipos yu wan man yu no mas toktok tumas.’ Maet ol manples blong boe ya oli tingting se, sipos wan man i toktok tumas hemia i min se hem i no gat hed mo man i no save trastem toktok blong hem tu. I tru, Baebol i talem se “yufala evriwan i mas rere oltaem blong lesin, be yufala i no mas hareap blong toktok.” (Jemes 1:19) Be, advaes ya i go long man mo woman tugeta, mo i soem se taem yu wantem talemaot tingting blong yu i no naf blong openem maot mo sakem toktok nomo i go. Tingbaot. Maet yu stap toktok long wan man, ale man ya tu i stap toktok long yu, mo yutufala i toktok longtaem. ?Be olsem wanem sipos yu yu no lesin long wanem we man ya i talem, mo hem tu i no lesin long yu? Ating storian blong yutufala i blong nating nomo. Taswe, olsem vas antap i soem, fasin blong toktok tugeta i save karem gudfala frut nomo sipos man i gat fasin blong lesingud tu taem narafala i toktok.

Toktok We i No Gat Wod

Long sam ples, ol woman oli no gat raet blong talemaot tingting blong olgeta insaed long famle. Mo ol hasban oli no lukluk tumas long ol bisnes insaed long famle. Long ol ples olsem, hasban mo waef, tufala i stap luksave nomo long prapa tingting blong olgeta, wanem we hasban no waef i nidim. Sam woman oli kam gud long fasin ya, nao oli naf blong luksave kwiktaem wanem samting we hasban blong olgeta i nidim mo oli mekem samting ya. Long rod ya i gat wan kaen fasin blong toktok we i stap gohed bitwin hasban mo waef, nating se tufala i no talem wan samting. Be fasin ya i no rili givhan long tufala tugeta. Plante taem, waef nomo i lanem blong luksave wanem i stap long tingting mo filing blong man blong hem, be hasban i no rili wokem fasin ya blong luksave ol filing blong woman blong hem.

I tru, long kalja blong sam kantri, ol man oli luksave nid blong ol woman blong olgeta mo oli traem givim samting we waef i nidim. Be long taem ya tu i moagud sipos tufala we i mared tufala i traem toktokgud tugeta.

I Impoten Tumas Blong Talemaot Tingting Mo Filing Blong Yu

Taem man i toktok stret blong talem wanem i stap long tingting blong hem, samting ya i halpem narafala blong i kasem klia save mo i no gat rong tingting. Smoltaem afta we ol man Isrel oli kamtru long Promes Lan, ol laen blong Ruben, Gad, mo haf laen blong Manase we oli stap long is saed blong Jodan Reva oli wokem “wan olta we i bigwan we i bigwan” klosap long reva ya. Taem ol laen blong Isrel long wes saed blong reva oli luk samting ya, oli sek nogud. Oli ting se ol laen ya long is blong Jodan oli stap wosip long narafala god. Ale, oli mekemrere blong go mekem faet long ol brata ya blong olgeta we oli “agens” long God. Be bifo we oli mekem faet ya, oli sanem wan grup blong man i go toktok wetem ol laen ya long is. !Samting we oli mekem i waes tumas! Oli faenemaot se olta ya i no blong bonem sakrefaes i go long giaman god. Defren olgeta, ol laen blong Isrel long is saed blong reva oli fraet se long ol yia we bambae i kam, ol narafala laen blong Isrel long wes bambae oli talem long olgeta se: “Yufala i no gat raet blong mekem wosip long Hae God.” Taswe, olta ya we oli wokem, bambae i stap olsem wan witnes se olgeta tu oli stap wosip long Jeova. (Josua 22:​10-29) Oli putum nem blong olta ya se Witnes, from we hem i wan witnes long olgeta evriwan se Jeova hem i trufala God.​—Josua 22:34.

Afta we ol laen blong Isrel long is oli talemaot tingting blong olgeta i klia, ol laen blong Isrel long wes oli no moa mekem faet long olgeta. Yes, fasin blong olgeta ya blong toktok klia mo stret i blokem faet. Plante yia biaen, ol man Isrel oli lego Jeova God, we hem i olsem hasban blong olgeta. Ale, Jeova i talem long olgeta se bambae hem i sore long olgeta, bambae hem i ‘toktok gud long olgeta,’ no i toktok long fasin we i ‘kasem hat’ blong olgeta olsem New World Translation i talem. (Hosea 2:14) !Hemia wan gudfala eksampol we Jeova i soemaot long ol mared man mo woman! Traem kasem hat blong hasban no waef blong yu taem yu toktok long hem, blong bambae hem i harem save ol filing blong yu. Hemia wan fasin we i impoten moa blong folem taem yutufala i mas tokbaot samting we i laenap wetem ol filing blong yutufala. Pattie Mihalik, wan woman we i raetem ol stori blong wan niuspepa long Yunaeted Stet, i talem se: “Sam man oli talem se, i isi nomo blong toktok, be samtaem, ol tok we yumi talem oli sas tumas. Sam man oli faenem i had blong talemaot filing blong olgeta, be sipos oli talemaot bambae oli kasem plante gudfala samting moa i winim mane long bang.”

Kam Gud Moa Long Fasin Blong Toktok

Maet sam man oli tingting se mared blong olgeta i nogud finis stat long taem we oli go saen. Sam narafala man maet oli gat trabol long mared nao oli tingting se i no gat rod blong winim ol trabol ya. Ol man ya oli ting se afta we oli mared finis, i no gat rod blong jenisim ol trabol we i stap. Oli ting se oli no naf blong toktok gud tugeta. Be, long ol kantri we famle nao i jusum hasban no waef blong pikinini blong olgeta, plante mared oli wokgud mo, tufala we i mared, tufala i wokem wan gudfala fasin blong toktok tugeta.

Klosap 4,000 yia bifo, i gat wan yang man long ol kantri blong Is, we papa blong hem i jusum woman blong hem. Papa ya i sanem wokman blong hem i go long wan kantri longwe blong faenem wan woman blong boe blong hem. Taem yang man ya mo woman ya tufala i mared, mared blong tufala i gud tumas, mo tufala i gat gudfala fasin blong toktok tugeta. Yang man ya hemia Aesak. Taem Aesak i stap wokbaot long open ples, hem i mitim wokman blong papa blong hem we i stap kambak wetem woman ya we bambae hem i mared long hem. Nao wokman “i stori long [Aesak], i talemaot olgeta samting ya long hem we i kamtru longwe.” Baebol i storebaot mared blong tufala i se: “Nao Aesak i tekem [Rebeka] i go stap long haos tapolen ya we mama blong hem i bin stap long hem bifo, nao i mared long hem. Hem i lavem gel ya tumas.”​—Jenesis 24:​62-67.

Yu makem we long stori ya, fastaem, Aesak i lesin long wanem we wokman ya i mas talem long hem, nao hem i jes tekem Rebeka i mared long hem. Wokman ya we i go faenem woman blong Aesak, hem i wan man we i wosipim Jeova God, God ya we Aesak tu i wosipim, mo Ebraham i trastem wokman ya. Taswe i stret tu we Aesak i trastem man ya. Afta nao, Aesak i ‘lavem tumas’ Rebeka, we hem i mared long hem.

?Olsem wanem? ?Aesak mo Rebeka tufala i toktok gud tugeta? Afta we pikinini blong tufala, Esao, i mared long tu gel blong laen blong Het, trabol i kamaot long famle blong tufala. Rebeka i “talem long Aesak se, ‘Tufala woman ya blong Esao, tufala i no kamaot biaen long olfala bubu ya blong yumi. !Mi mi taed gud long tufala! !Sipos Jekob [narafala pikinini boe blong tufala] i tekem wan gel bakegen we i laen blong Het, ating i moa gud mi mi ded nomo!’ ” (Jenesis 26:34; 27:46) Yes, Rebeka i talemaot klia long Aesak wanem ol wari mo filing blong hem.

Aesak i talem long Jekob we i twin brata blong Esao, se hem i no mas tekem wan woman long ol pikinini blong Kenan. (Jenesis 28:​1, 2) Rebeka i talemaot klia, samting ya we i impoten long hem. Yes Aesak mo Rebeka tufala i tokbaot mo stretem wan impoten problem insaed long famle, hemia wan gudfala eksampol we yumi save folem tede. ?Be olsem wanem sipos hasban mo waef tufala no save agri long wan samting? ?Wanem nao we i stret blong mekem long taem olsem?

Taem Hasban Mo Waef Tufala i No Save Agri

Sipos yu no agri nating wetem hasban no waef blong yu long saed blong wan impoten desisen, i nogud yu mekem strong fes nao yu no moa toktok long hem. Sipos yu mekem samting ya, i olsem we yu stap talem long hem se yu yu no glad mo yu wantem we hem tu i no glad. Be ating hasban no waef blong yu i no kasem save nating se yu yu wantem wanem mo filing blong yu long saed ya i olsem wanem.

Yutufala i mas tokbaot samting ya tugeta. Maet bambae i hadwok long yutufala blong toktok kwaet sipos samting we yutufala tokbaot i rili mekem yutufala i harem nogud. Wan taem, Ebraham mo Sera, papa mama blong Aesak, tufala i bin fesem problem olsemia. Sera i no save gat pikinini. Ale, hem i folem kastom blong ol man long taem ya, mo hem i givim slef gel blong hem, Hega, blong i gat pikinini wetem Ebraham. Nao Hega i gat bel long Ebraham mo i bonem wan boe we nem blong hem Ismael. Be biaen, Sera tu i gat bel long Ebraham mo i bonem wan boe, hemia Aesak. Taem Aesak i livim titi, Sera i luk we Ismael i stap laf nogud long Aesak ya. Sera i luksave se maet Ismael i save spolem Aesak, ale hem i talem long Ebraham se i mas ronemaot Hega mo Ismael, tufala i no moa stap wetem olgeta. Yes, Sera i talemaot ol filing blong hem long Ebraham. Hem i tok stret mo klia. Be samting we hem i talem i mekem Ebraham i harem nogud.

?Olsem wanem tufala i tekem wan desisen long saed ya? Stori long Baebol i talem se: “God i talem long hem se, ‘Ebraham. Yu no harem nogud from pikinini ya blong yu wetem woman slef ya. Yu mekem olsem we woman blong yu i talem, from we promes ya blong mi . . . bambae i kamtru long pikinini ya blong yu Aesak.’ ” Ale Ebraham i obei long Jeova God mo i mekem olsem we Sera i talem.​—Jenesis 16:​1-4; 21:​1-14.

Maet yu tingting se, ‘!Tru ya, sipos God i toktok stret long mitufala, bambae mitufala i save agri long bisnes ya hareap nomo!’ Samting ya i pulum yumi blong tingbaot wan narafala impoten rod blong winim ol raorao insaed long mared. Mared man mo woman, tufala i save lesin long God. ?Be olsem wanem yutufala i save lesin long God? Taem yutufala i ridim Baebol tugeta mo yutufala i agri blong letem hem i lidim yutufala, i olsem we God i stap toktok long yutufala.​—1 Tesalonaeka 2:13.

Wan Kristin waef we i mared plante yia finis i talem se: “Plante taem, taem wan yang woman i kam askem advaes long mi long saed blong mared blong hem, mi askem hem sipos hem mo hasban blong hem, tufala i stap ridim Baebol tugeta. Mo plante taem mi faenemaot se olgeta we oli gat problem long mared blong olgeta, hemia from we oli no stap ridim Baebol tugeta.” (Taetas 2:​3-5) Hemia wan impoten samting ya we Kristin woman ya i soem long yumi. I gud yu ridim Baebol wetem hasban no waef blong yu evri dei. Long rod ya, i olsem we yu stap “harem” tok blong God we i talem long yu wanem fasin i gud blong yu folem, evri dei. (Aesea 30:21) Be lukaot: Baebol i no wan stik blong wipim hasban no waef blong yu. Taswe i nogud we oltaem yu stap jusum mo ridim nomo ol vas blong Baebol we yu yu ting se i stret long hasban no waef blong yu from we hem i no stap mekem samting ya i wok long laef blong hem. Nogat. I moagud sipos yutufala tugeta i tingbaot rod blong folem samting we yutufala i ridim.

Sipos i gat wan impoten problem blong stretem, yu save jekem Watch Tower Publications Indexa blong Wajtaoa blong luk sipos i gat wan haf we i laenap wetem problem ya. Maet wan long yutufala i mas lukaot long olfala papa mama blong hem. Mo maet samting ya i mekem we yutufala i stap raorao plante. I nogud yu agiu wetem hasban no waef blong yu se hem i no stap mekem hemia, no se hem i sud mekem hemia. I moagud yutufala i sidaon tugeta mo lukaot save insaed long Indeks. Lukluk aninit long toktok ya we long Inglis no Franis hemia “Parents (Papa Mama).” Nao aninit long tok ya, faenem wan haf we long Inglis hemia “caring for aged parent” (lukaot long olfala papa mama blong yu) no long Franis hemia “ prendre soin de ses parents âgés.” Ale i gud yutufala tugeta i ridim ol haf blong Wajtaoa no buk we Indeks ya i soemaot. Maet bambae yu yu sapraes blong luk hamas gudfala advaes we Baebol i givim long yu mo hasban no waef blong yu. Ol advaes ya oli halpem plante Kristin finis.

Sipos yutufala i lukaot moa save olsem, nao yutufala i ridim ol save ya tugeta, bambae yutufala i save karem stret tingting long saed blong problem we i stap. Bambae yu faenem ol vas blong Baebol we oli soemaot tingting blong God long saed ya. I gud yutufala i jekem ol vas long Baebol mo ridim ol vas ya tugeta. !Hemia i olsem we God i stap toktok stret long yu long saed blong problem blong yu!

No Letem Wan Samting i Blokem Yutufala Blong Toktok

?Yu yu traem finis blong openem wan doa we i sat i stap blong longtaem finis? Ating bambae yu harem se doa ya i mekem noes from we rosta i kakae hinsis blong hem. ?Be olsem wanem sipos yu bin yusum doa ya oltaem, mo putum gris long ol hinsis blong hem? Ating bambae yu luk we doa ya i isi nomo blong openem. Doa ya i sem mak long fasin blong yu mo hasban no waef blong yu, blong toktok tugeta. Sipos yutufala i gat fasin ya blong storian tugeta oltaem, mo blong wokem Kristin lav taem yutufala i toktok, olsem gris ya we yu putum long hinsis, bambae i isi nomo long yutufala blong serem ol tingting mo filing blong yutufala. Ale nao, taem i gat sam problem i kamaot, bambae i no hadwok tumas long yutufala blong toktok tugeta blong stretem problem ya.

I gud blong stat naoia blong wokem fasin blong toktok tugeta. I tru se maet fastaem, i had long yutufala blong talemaot ol tingting mo filing blong yutufala, be yutufala i mas traehad. Moa we yutufala i wokem fasin ya, moa we bambae yutufala i kamgud long hem. Ale fasin fren bitwin yu mo hasban no waef blong yu bambae i kamgud moa, mo yutufala i kasem save gud long tingting mo filing blong yutufala.

[Futnot]

[Tok blong pija long pej 5]

?Taem yutufala i no agri long wan samting, yutufala i traem faenem tingting blong God?